Ib lub Hauv Paus Ruaj rau Yav Tom Ntej
Yav tom ntej no, kuv thov Vajtswv kom tej yam uas peb kho hauv lub Tuam Tsev Salt Lake yuav tshoov peb lub siab.
Keeb Kwm txog lub Tuam Tsev Salt Lake
Cia peb xav txog lub Xya Hli Ntuj 24, 1847, ze rau 2:00 tav su. Brigham Young, uas yog tus Thawj Tswj Hwm ntawm Pawg Kaum Ob tug Tim Thawj thaum ntawd, nws tau koom nrog 148 tus mej zeej ntawm lub Koom Txoos hauv thawj pawg uas mus rau sab hnub poob. Thaum nws tseem mob heev thiab ua npaws, thiab tom qab lawv taug kev 111 hnub lawm, nws twb nkag mus hauv lub hav Salt Lake.
Ob hnub tom qab ntawd, thaum nws tseem tsis tau zoo mob tas, Brigham Young coj ob peb tug ntawm Pawg Kaum Ob tug Tim Thawj thiab lwm tus mus saib cheeb tsam. William Clayton sau hais tias: “Ze li yuav luag ib mais rau sab qaum teb ntawm lub yeej, peb los txog ib lub tiaj nras uas nqes me ntsis rau sab hnub poob.”1
Thaum nws saib qhov chaw no nrog pawg ntawd, Brigham Young nres kiag, thiab tso nws tus pas hauv av, hais tias, “Peb tus Vajtswv lub Tuam Tsev mam li nyob no.” Nws ib tug khub yog Txwj Laug Wilford Woodruff, uas hais tias thaum Thawj Tswj Hwm Young hais li ntawd ces “zoo li xob laim nkag hauv nws lub cev,” thiab nws tso ib ceg ntoo rau hauv av kom ntaus cim rau qhov chaw uas Thawj Tswj Hwm Young tus pas nyob. Twb xaiv plaub caug acre (16 ha) rau lub tuam tsev, thiab tau txiav txim siab yuav ua lub nroog kom “ua xwm fab ncaj nraim sab Qaum Teb & Qab Teb, sab hnub tuaj & sab hnub poob” cia lub tuam tsev nyob hauv plawv.2
Nyob hauv lub tuam rooj sab laj thaum lub Plaub Hlis Ntuj 1851, lub Koom Txoos cov mej zeej txhua tus pom zoo txhawb nqa kev ua ib lub tuam tsev “rau tus Tswv lub npe.”3 Ob xyoos tom qab ntawd, thaum lub Ob Hlis Ntuj 14, 1853, Heber C. Kimball tau muab qhov chaw ntawd fij tseg nyob hauv ib txoj kab ke uas ob peb txhiab Neeg Ntseeg tuaj saib, thiab lawv dig av rau lub tuam tsev Salt Lake lub hauv paus. Ob peb lub hlis tom qab ntawd, thaum lub Plaub Hlis Ntuj 6, tau muab cov ncej zeb tag teeb rau thiab fij tseg nyob hauv tej txoj kab ke loj uas muaj cov neeg tub rog thiab tej pawg qoj nkauj thiab lub Koom Txoos cov thawj coj taug kev sib raws ntsaws txij ntawm lub tsev kheej mus rau qhov chaw rau lub tuam tsev, es nyob ntawd lawv tau hais lus thiab thov Vajtswv rau plaub lub pob zeb ntawd.4
Thaum ua kab ke dig av ntawd, Thawj Tswj Hwm Young hais txog qhov uas thaum nws tsuj ib txhais ko taw rau ntawm cov av thaum lawv saib lub hav nws ua yog toog, nws hais tias, “Kuv paub [thaum ntawd], ib yam li kuv paub tam sim no, hais tias nov yog cov av ua ib lub tuam tsev—kuv yeej pom qhov ntawd.”5
Kaum xyoo tom qab ntawd, Brigham Young tau hais tej lus qhia txog tej yuav mauj los yav tom ntej hauv lub tuam rooj sab laj thaum lub Kaum Hli Ntuj xyoo 1863 hais tias: “Kuv xav pom peb ua lub tuam tsev kom tiv taus nyob mus txog thaum ib txhiab xyoos tag lawm. Lub tuam tsev no tsis yog tib lub uas peb yuav ua; yeej yuav muaj ob peb puas lub tuam tsev uas peb ua thiab fij tseg rau tus Tswv. Lub tuam tsev no yog thawj lub tuam tsev uas Tsoom Haiv Neeg Ntseeg hauv Hnub Nyoog Kawg tau ua hauv cov roob. Kuv xav ua kom lub tuam tsev ntawd … nyob ruaj khov ua ib lub cim txog Vajtswv haiv neeg ntseeg txoj kev ntseeg, kev nyiaj ntxeem thiab kev ua hauj lwm hauv cov roob.”6
Thaum kawm txog keeb kwm no ua rau kuv xav tsis thoob uas Brigham Young txawj pom tau li no—qhov thib ib, qhov uas nws tau siv txhua yam kev ua tsev thiab tej khoom uas muaj thaum lub sij hawm ntawd kom lub Tuam Tsev Salt Lake yuav tiv taus kom txog thaum lub caij Milenias tag lawm, thiab qhov thib ob, nws txoj kev qhia tias yuav muaj tej lub tuam tsev ntau heev nyob thoob plaws lub ntiaj teb, mus txog thaum muaj ob peb puas lub tuam tsev.
Kev Kho lub Tuam Tsev Salt Lake Dua Tshiab
Ib yam li Brigham Young, peb tus yaj saub niaj hnub no saib xyuas lub Tuam Tsev Salt Lake thiab lwm lub tuam tsev zoo zoo. Hauv lub caij nyoog no, Thawj Pawg Thawj Tswj Hwm tau ntuas Pawg Thawj Npisov kom ua tib zoo saib xyuas lub hauv paus rau lub Tuam Tsev Salt Lake kom ruaj khov. Thaum kuv ua hauj lwm hauv Pawg Thawj Npisov, raws li Thawj Pawg Thawj Tswj Hwm hais, peb tau tshuaj ntsuam txhua yam txog lub Tuam Tsev Salt Lake, tsis hais kev tshawb fawb txog tej kev pab txhawb nqa thaum av qeeg thiab kev kho tsev kom ruaj.
Nov yog tej feem ntawm kev tshuaj ntsuam uas tau muab rau Thawj Pawg Thawj Tswj Hwm thaum ntawd: “Hais txog kev ua lub Tuam Tsev Salt Lake, lawv twb siv tej daim qauv, tej tes num, cov pob zeb thiab ntoo, tej khoom tso haud thiab lwm yam uas zoo tshaj hauv lub caij nyoog ntawd. Txij thaum tau muab fij tseg thaum xyoo 1893 los, lub tuam tsev yeej nyob ruaj khov thiab yog ib lub tsev ci ntsa iab uas ua rau neeg muaj kev ntseeg [thiab] kev cia siab. Twb tau saib xyuas zoo zoo kom khiav hauj lwm, tu, thiab kho lub tuam tsev zoo zoo. Cov pob zeb tawv tawv uas siv sab nraud thiab tej nqaj tsev thiab ncej txhawb los kuj zoo heev. Tej kev tshawb fawb pom zoo tias qhov chaw uas Brigham Young xaiv ua lub tuam tsev muaj av zoo thiab yog qhov chaw uas muaj zog heev.”7
Kev tshuaj ntsuam no tau hais tias muaj tej yam uas yuav tsum kho kom ua rau lub tuam tsev rov tshiab, tsis hais sab nraud thiab sam thiaj, tej hlua rau hluav taws xob uas qub dhau, thiab tej chaw ua kev cai raus dej. Tiam sis, twb xav txog ib yam kev txhawb nqa lub tuam tsev lub hauv paus thiab tag nrho lub tuam tsev kom ruaj khov thaum av qeeg.
Lub Tuam Tsev lub Hauv Paus
Ib yam li nej tau kawm, Thawj Tswj Hwm Brigham Young nws tus kheej twb tau ua hauj lwm ntau thaum ua lub tuam tsev lub hauv paus, uas twb txhawb lub tuam tsev tau 127 xyoo no. Kev txhawb lub tuam tsev kom khov kho thaum av qeeg yuav siv tej txuj ci technology kom lub hauv paus tsis txav li, yog ib qho uas tsis tau muaj thaum ua lub tuam tsev thaum ub. Nov yog kev tiv thaiv thaum muaj av qeeg uas tshiab tshaj plaws.
Tej txuj ci no, yuav nyob ntawm lub tuam tsev lub hauv paus, uas yuav tiv thaiv zoo kom txhob raug piam tas thaum av qeeg lawm. Lub ntsiab yog li no, qhov no txhawb lub tuam tsev kom nyob khov kho, txawm yog cov av qeeg thiab txhua yam co co nyob ib puag ncig.
Xyoo tas los Thawj Pawg Thawj Tswj Hwm twb tshaj tawm tias kev kho lub tuam tsev yuav siv tej txuj ci technology no. Raws li Pawg Thawj Npisov twb tau pib kho lub tuam tsev ob peb lub hlis tas los, thaum lub Ib Hlis Ntuj xyoo 2020. Mam li ua tiav kwv yees li plaub xyoos.
Kev Teeb Nej lub Hauv Paus Ruaj
Thaum kuv xav txog plaub xyoos yuav zoo li cas rau lub Tuam Tsev Salt Lake uas muaj koob muaj npe thiab zoo nkauj, kuv xav tias yog ib lub sij hawm kom rov ua zoo thiab tsis yog lub sij hawm uas peb muab kaw! Ib yam li ntawd, tsim nyog uas peb nug peb tus kheej tias, “Qhov uas yuav kho lub Tuam Tsev Salt Lake rov qab zoo li no yuav tshoov peb lub siab li cas kom peb yuav xav kho tau peb sab ntsuj plig kom rov zoo, rov yug dua tshiab, los sis rov muaj zog?”
Tej zaum qhov uas peb saib seb peb lub siab zoo li cas yuav qhia tias peb thiab peb tsev neeg xav tau kev kho kom rov zoo thiab kev pab txhawb nqa, tej zaum yuav tsum kho kom zoo thaum av qeeg li ntawd! Tej zaum peb yuav xav pib ua tus txheej txheem no thaum peb nug:
“Kuv lub hauv paus zoo li cas?”
“Tej ncej zeb tag ruaj khov kho twg yog kuv lub hauv paus, qhov uas kuv txhawb kuv zaj lus tim khawv?”
“Kuv tus cwj pwm ntawm sab ntsuj plig muaj lub hauv paus twg uas yuav cia kuv thiab kuv tsev neeg nyob ruaj nrees thiab khov kho, tsis hais thaum twg yuav tsum tiv taus tej xwm txheej uas loj npaum li av qeeg hauv peb lub neej?”
Tej xwm txheej zoo li av qeeg los yeej nyuaj rau peb twv seb yuav muaj thaum twg thiab yuav muaj tej qhov loj thiab me—xws li thaum peb muaj lus nug los sis ua xyem xyav, peb raug txom nyem los sis kev tsim txom, peb tu siab txog tej yam uas lub Koom Txoos cov thawj coj los yog cov mej zeej tau ua, peb tu siab txog cov lus qhuab qhia los sis txoj kev cai. Kev tiv taus tej no los yeej nyob ntawm seb peb lub hauv paus ntawm sab ntsuj plig zoo li cas.
Tej ncej zeb tag ntawm sab ntsuj plig rau peb tus kheej thiab peb tsev neeg yog dab tsi? Tej zaum yog kev ua raws li tej ntsiab cai ntawm txoj moo zoo uas yooj yim thiab muaj nqis—tsev neeg kev thov Vajtswv; kev kawm vaj lug kub; kev mus rau lub tuam tsev; Phau Ntawv Maumoos; thiab kev kawm txoj moo zoo los ntawm Los, Nrog Kuv Mus thiab tsev neeg hmo ua ke. Muaj lwm yam uas pab txhawb tau koj lub hauv paus ntawm sab ntsuj plig xws li Tej Nqe Kev Ntseeg, kev tshaj tawm txog tsev neeg, thiab “Tus Khetos uas Muaj Sia Nyob.”
Kuv xav tias tej lub ntsiab cai nyob hauv tej lus uas nug thaum yuav txais ib daim ntawv tso cai nkag tuam tsev yuav pab peb teeb ib lub hauv paus ntawm sab ntsuj plig uas ruaj khov—qhov tseem ceeb yog thawj plaub lus nug. Kuv pom tej no yog tej ncej zeb tag ntawm sab ntsuj plig.
Peb yeej paub tej lus nug no, raws li Thawj Tswj Hwm Russell M. Nelson tau nyeem rau peb hauv lub tuam rooj sab laj tas los.
-
Koj puas muaj kev ntseeg thiab ib zaj lus tim khawv txog Vajtswv, Leej Txiv Nyob Mus Ib Txhis; Nws Leej Tub, Yexus Khetos; thiab tus Vaj Ntsuj Plig Dawb Huv?
Daim DuabPawg Vajtswv -
Koj puas muaj ib zaj lus tim khawv txog Yexus Khetos txoj Kev Theej Txhoj thiab txog Nws lub luag hauj lwm ua tus Cawm Seej thiab tus Txhiv Dim?
Daim DuabYexus Khetos txoj Kev Theej Txhoj -
Koj puas muaj ib zaj lus tim khawv tias Yexus Khetos txoj moo zoo tau raug muab Txum Tim Rov Qab Los?
Daim DuabKev Txum Tim Rov Qab Los -
Koj puas txhawb nqa tus Thawj Tswj Hwm ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg ua tus yaj saub, tus pom tau, thiab tus qhia kev tshwm sim thiab yog tib tug neeg nyob hauv lub ntiaj teb no uas muaj cai siv tag nrho tej yawm sij ntawm lub pov thawj hwj?8
Daim DuabCov yaj saub
Nej puas txawj pom tias qhov uas nej xav txog tej lus nug no yuav pab nej teeb nej lub hauv paus thiab txhawb nws kom ruaj khov? Povlauj tau qhia cov Neeg Efexus txog ib lub koom txoos uas “ua rau saum lub qua tsev uas [yog cov thwj tim thiab cov yaj saub]. Tus ncej tas ntawd yog Yexus Khetos ntag; Yexus yog tus uas txheem lub tsev ntawd kom khov, thiab ua kom tiav, thiaj li tau ib lub tuam tsev uas zoo kawg nkaus rau Vajtswv nyob.”9
Qhov uas ua rau kuv xyiv fab heev hauv kuv lub neej yog kev paub cov mej zeej ntawm lub Koom Txoos nyob thoob plaws lub ntiaj teb uas coj yawm ntxwv muaj kev ntseeg Yexus Khetos thiab Nws txoj moo zoo. Lawv twb ua lawv lub hauv paus ruaj nrees uas cia lawv tiv taus tej xwm txheej loj heev hauv lawv lub neej thiab muaj kev txawj to taub thiab kev xyiv fab uas kav ib txhis.
Xwv kom paub kuv hais li cas no, tsis ntev tas los kuv tau hais lus hauv ib tug poj niam uas muaj peev xwm thiab zoo nkauj heev, ib tug niam tsev hluas lub ntees tuag (nws kuj yog kuv tsev neeg ib tug phooj ywg). Nws yog ib tug kws ncaws pob thaum nws ntsib thiab yuav nws tus txiv uas tseem yog ib tug tub kawm ntawv ua ib tug kws kho hniav. Nkawd twb muaj ib tug ntxhais uas txawj ntse thiab zoo nkauj. Nws twb siv rau xyoo tawm tsam ob peb hom kev mob cancer. Txawm yog nws raug xwm txheej li cas rau nws lub siab thiab nws lub cev nqaij daim tawv, nws tso siab rau nws Leej Txiv Saum Ntuj Ceeb Tsheej thiab cov uas raws nws tej social media nyiam nws tej lus uas hais tias: “Vajtswv yeej nyob hauv txhua qhov me.”
Nws twb sau hauv social media txog qhov uas ib tug neeg nug nws tias, “Ua cas koj ho tseem muaj kev ntseeg thaum muaj kev nyuaj siab nyob ib puag ncig koj?” Nws teb li no tias: “Vim kev ntseeg yog qhov uas pab kuv nyiaj kom dhau tej lub sij hawm tsaus ntuj no. Kev ntseeg tsis txhais hais tias yus tsis raug kev phem hlo li. Kuv txoj kev ntseeg cia kuv ntseeg tias thaum yav tom ntej yuav rov qab muaj txoj kev kaj. Thiab txoj kev kaj ntawd yuav haj yam ci ntsa iab vim kuv tau taug kev hauv qhov tsaus ntuj. Ob peb xyoos no txawm kuv pom ntau yam tsaus ntuj los, kuv haj yam pom txoj kev kaj ntau dua li ntawd. Kuv twb pom tej txuj ci tseem ceeb. Cov tim tswv tau pab kuv. Kuv paub tias kuv Leej Txiv Saum Ntuj Ceeb Tsheej nqa kuv mus. Kuv yeej yuav tsis paub txog tej ntawd yog tias kuv lub neej yooj yim xwb. Kuv tsis paub yav tom ntej yuav zoo li cas, tiam sis kuv paub txog kuv txoj kev ntseeg. Yog tias kuv xaiv kom tsis muaj kev ntseeg, ces kuv cia li xav taug kev hauv qhov tsaus ntuj. Vim yog tsis muaj kev ntseeg, ces tsuas muaj qhov tsaus ntuj xwb.”10
Nws zaj lus tim khawv ruaj nrees txog kev ntseeg tus Tswv Yexus Khetos—uas yog los ntawm nws tej lus thiab tej yam nws ua—twb tau tshoov lwm tus lub siab. Txawm nws lub cev qaug zog, nws twb txhawb nqa lwm tus kom muaj zog ntxiv.
Ib yam li tus muam no, kuv xav txog lwm tus mej zeej hauv lub Koom Txoos, cov uas muaj zog li tus poj niam no, cov uas taug kev txhua hnub nrog kev ntseeg, siv zog ua cov thwj tim tseeb ntawm peb tus Cawm Seej, Yexus Khetos. Lawv kawm txog Khetos. Lawv qhia txog Khetos. Lawv siv zog coj yam ntxwv li Nws. Txawm lawv ua neej hauv tej qhov chaw uas tsis khov thiab tsis ruaj, lawv paub tias lawv lub hauv paus ntawm sab ntsuj plig ruaj khov kho.
Cov neeg zoo no yog cov uas to taub cov lus hauv zaj nkauj no txhais li cas hais tias, “Lub hauv paus ruaj nrees yog peb tus Vajtswv tej lus” thiab “sawv daws raws Yexus kom nws tsom kwm pab [lawv].”11 Kuv zoo siab kawg vim kuv nrog cov uas tau npaj ib lub hauv paus ntawm sab ntsuj plig uas tsim nyog muaj npe Haiv Neeg Ntseeg thiab muaj zog thiab khov kho txaus kom tiv taus tej kev ntxhov hnyo ntawm lub neej no.
Kuv xav tias peb hais tsis tau tias ib lub hauv paus ruaj li ntawd nyob hauv peb lub neej tseem ceeb npaum li cas. Txawm lawv hluas los, peb cov me nyuam yaus kawm txog qhov no thaum lawv hu nkauj qhov tseeb no:
Tus neeg ntse ua nws tsev saum lub pob zeb,
Ces twb pib los nag tshauv. …
Los nag tshauv, ces tej dej nyab los.
Lub tsev saum pob zeb nyob ruaj khov.12
Cov vaj lug kub pab txhawb cov lus qhuab qhia no. Tus Cawm Seej tau qhia cov neeg hauv Amelikas tias:
“Nej tau koob hmoov yog tias nej yuav ua tej yam no tas mus li, vim nej cog rau saum kuv lub pob zeb.
“Tiam sis tus uas nyob hauv nej uas ua ntau dua los sis tsawg dua tej yam no twb tsis yog cog rau saum kuv lub pob zeb, tiam sis cog rau saum xuab zeb; thiab thaum nag los, thiab dej nyab los, thiab cua tshuab, thiab nplawm lawv, lawv yuav vau.”13
Lub Koom Txoos cov thawj coj cia siab tias tej kev kho lub Tuam Tsev Salt Lake yuav pab kom muaj raws li Brigham Young txoj kev xav ua “lub tuam tsev kom tiv taus nyob mus txog thaum ib txhiab xyoos tag lawm.” Yav tom ntej no, kuv thov Vajtswv kom tej yam uas peb kho hauv lub Tuam Tsev Salt Lake yuav tshoov peb lub siab, peb txhua tus thiab peb tsev neeg, xwv kom peb kuj yuav ua peb tus kheej “kom tiv taus nyob mus txog thaum ib txhiab xyoos tag lawm.”
Peb yuav ua li ntawd thaum peb ua raws li tus Thwj Tim Povlauj hais kom “npaj [lub hauv paus ruaj] rau [peb] yav tom ntej kom [peb] tau txoj sia uas tsis txawj ploj mus ib txhis los ua [peb] tug.”14 Kuv thov Vajtswv tias peb lub hauv paus ntawm sab ntsuj plig yuav ruaj khov, peb zaj lus tim khawv txog Yexus Khetos txoj Kev Theej Txhoj thiab Nws lub luag hauj lwm ua peb tus Cawm Seej thiab tus Txhiv Dim yuav los ua peb tus thawj ncej zeb tag, es kuv ua tim khawv txog Nws lub npe, tus uas yog Yexus Khetos, amees.