Lub Pov Thawj Hwj Foom Koob Hmoov Li Cas rau cov Tub Ntxhais Hluas
Los ntawm lub pov thawj hwj, peb yuav tau kev txhawb nqa. Lub pov thawj hwj coj qhov kaj los rau hauv peb lub neej.
Kuv zoo siab tuaj ntawm no. Thaum kuv xub hnov hais tias kuv yuav muaj cib fim los hais lus hnub no, kev yeej zoo siab kawg tiam sis, tib lub sij hawm ntawd, kuv txawm uas siab mos siab muag. Kuv tau siv sij hawm ntau xav mus xav los seb kuv yuav hais li cas, thiab kuv cia siab hais tias nej yuav hnov tus Ntsuj Plig thaum kuv hais lus rau nej.
Hauv Phau Ntawv Maumoos, Lihais muab ib txoj koob hmoov rau nws txhua tus tub ua ntej nws tuag uas pab lawv pom seb lawv txawj ua li cas thiab lawv lub neej nyob mus ib txhis yuav zoo li cas. Kuv yog tus ntxhais ntxawm hauv peb tsev neeg uas muaj yim tus me nyuam, thiab xyoo tas los no kuv yog tib tug me nyuam uas nyob hauv tsev xwb. Yeej nyuaj rau kuv vim tsis muaj kuv cov niam laus thiab nus nyob ze kuv thiab tsis muaj leej twg nrog kuv tham txhua lub caij. Muaj tej hmo uas kuv kho siab kawg. Kuv yeej ris kuv niam txiv txiaj, nkawd twb sim pab kuv kawg. Muaj ib zaug thaum kuv txiv xav muab lub pov thawj hwj ib txoj koob hmoov rau kuv kom pab nplij kuv siab thaum kuv muaj ib lub sij hawm nyuaj kawg. Tom qab txoj koob hmoov ntawd, txhua yam tsav tsis tau hloov tas sim ntawd kiag, tiam sis kuv yeej tau hnov kev kaj siab lug thiab kev hlub los ntawm kuv Leej Txiv Saum Ntuj Ceeb Tsheej thiab kuv txiv. Kuv muaj hmoov vim kuv txiv tsim nyog muab lub pov thawj hwj txoj koob hmoov thaum twg kuv xav tau thiab pab kuv pom kev tej kev txawj thiab seb kuv lub neej nyob mus ib txhis yuav zoo li cas, ib yam li Lihais thaum nws foom koob hmoov rau nws cov me nyuam.
Txawm nej nyob li cas los xij, nej yeej txais tau lub pov thawj hwj tej koob hmoov. Los ntawm nej tsev neeg, cov phooj ywg, cov tij laug txhawb pab, lub pov thawj hwj cov thawj coj, thiab ib Leej Txiv Saum Ntuj Ceeb Tsheej uas yuav tsis tso nej tseg, nej thiaj txais tau lub pov thawj hwj tej koob hmoov. Txwj Laug Neil L. Andersen hais tias: “Cov koob hmoov ntawm lub pov thawj hwj yeej tseem ceeb tshaj tus uas Vajtswv hais kom muab lub txiaj ntsim ntawd. … Thaum peb tsim nyog, cov kab ke ntawm lub pov thawj hwj txhawb nqa peb lub neej.”1
Txhob txaj muag thov ib txoj koob hmoov thaum twg nej xav tau kev pab me ntsis. Thaum muaj tej kev nyuaj heev peb yeej xav tau tus Ntsuj Plig txoj kev pab tshaj plaws. Tsis muaj leej twg uas zoo kawg nkaus thiab peb sawv daws yeej muaj kev nyuaj siab. Peb ib txhia muaj kev xeeb txob, kev nyuaj siab kho siab, kev quav ub no, los sis xav tias peb tsis yog neeg zoo. Lub pov thawj hwj tej koob hmoov yuav pab tau peb kov yeej tej kev cov nyom no thiab muaj kev thaj yeeb thaum peb mus rau yav tom ntej. Kuv cia siab hais tias peb yuav ua neej zoo kom peb yuav tsim nyog txais tej koob hmoov no.
Lwm txoj kev uas lub pov thawj hwj foom koob hmoov rau peb yog los ntawm tus yawg suab tej koob hmoov. Kuv tau kawm los nyeem kuv tus yawg suab txoj koob hmoov thaum twg kuv tu siab los sis kho siab. Kuv txoj koob hmoov pab kuv pom hais tias kuv muaj cuab kav li cas thiab seb Vajtswv tau npaj tej yam dab tsi rau kuv. Nws pab nplij kuv siab thiab pom tom qab lub neej hauv ntiaj teb no. Ua rau kuv nco txog kuv tej txiaj ntsim thiab tej koob hmoov uas kuv yuav txais tau yog kuv ua neeg zoo. Nws kuj pab kuv nco qab txog thiab hnov kev thaj yeeb vim kuv paub tias Vajtswv yuav teb thiab qhib tej qhov rooj rau kuv thaum uas yog lub sij hawm zoo tshaj rau kuv.
Tus yawg suab tej koob hmoov pab peb npaj rov qab mus nrog peb Leej Txiv Saum Ntuj Ceeb Tsheej nyob ua ke dua. Kuv paub hais tias tus yawg suab tej koob hmoov los ntawm Vajtswv los tiag thiab yuav pab peb muab peb tej kev qaug zog los ua tej yam uas muaj zog. Tsis yog ib zaj zov los ntawm tus neeg piav yus zaj hmoov; tej koob hmoov no qhia peb txog tej yam uas peb yuav tsum hnov. Tej no yeej zoo li lub pob Liyahaunas rau peb txhua leej txhia tus. Thaum peb tso Vajtswv ua tus thib ib thiab ntseeg Nws, Nws yuav coj peb mus dhau plaws peb lub rooj mob sab qhua.
Zoo ib yam li Vajtswv foom koob hmoov rau Joseph Smith thaum muab lub pov thawj hwj rau nws xwv kom txoj moo zoo yuav rov qab los nyob hauv ntiaj teb no dua, peb kuj txais tau tej koob hmoov hauv txoj moo zoo dhau los ntawm lub pov thawj hwj. Txhua lim piam peb muaj cib fim thiab koob hmoov thaum peb noj lub cim nco txog. Dhau ntawm lub pov thawj hwj txoj kab ke no, peb thiaj yuav muaj tus Ntsuj Plig nrog nraim peb nyob, uas pab ntxuav thiab ua kom peb dawb huv. Yog tias peb pom dab tsi tsis zoo hauv peb lub neej uas peb yuav tsum tso tseg, cia li ncav tes rau ib tug thawj coj uas pab tau koj pib taug txoj kev zoo. Nej cov thawj coj yuav pab tau nej txais tau lub hwj chim ntawm Yexus Khetos txoj Kev Theej Txhoj.
Vim muaj lub pov thawj hwj, peb kuj txais tau tej koob hmoov hauv lub tuam tsev tej kab ke. Txij li kuv muaj cai mus hauv lub tuam tsev, kuv tau cuab ib lub hom phiaj thiab teem caij ib sij mus hauv lub tuam tsev ib zaug. Thaum siv sij hawm thiab txi tej yam kom kuv thiaj nyob ze kuv Leej Txiv Saum Ntuj Ceeb Tsheej hauv Nws lub tsev dawb huv no, kuv thiaj tau tej kev tshwm sim thiab kev tshoov siab uas tau pab kuv lub neej heev.
Los ntawm lub pov thawj hwj, peb yuav tau kev txhawb nqa. Lub pov thawj hwj coj qhov kaj los rau hauv peb lub neej. Txwj Laug Robert D. Hales hais tias: “Yog tias tsis muaj lub pov thawj hwj lub hwj chim ces, ‘tag nrho lub ntiaj teb yuav raug kev puas tsuaj mus’ (saib Q&K 2:1–3). Yuav tsis muaj qhov kaj, kev cia siab—tsuas muaj kev tsaus ntuj nti.”2
Vajtswv yeej txhawb nqa peb. Nws xav kom peb rov mus cuag Nws. Nws paub peb txhua tus zoo kawg nkaus. Nws paub koj. Nws hlub peb. Nws yeej paub tias peb nyob li cas thiab foom koob hmoov rau peb tab txawm peb xav tias peb tsis tsim nyog tau. Nws paub hais tias peb xav tau dab tsi thiab xav tau thaum twg.
“Nej thov, nej thiaj yuav tau; nej nrhiav, nej thiaj yuav ntsib; nej khob, Vajtswv thiaj yuav qhib qhov rooj rau nej:
“Rau qhov txhua tus uas thov yeej yuav tau, txhua tus uas nrhiav yeej ntsib, thiab txhua tus uas khob, Vajtswv yeej yuav qhib qhov rooj rau nws” (Mathais 7:7–8).
Yog tias koj tsis muaj ib zaj lus tim khawv txog lub pov thawj hwj, kuv yaum kom koj yuav thov Vajtswv thiab nug seb puas muaj lub hwj chim ntawd tiag ces nyeem cov vaj lug kub los mloog Vajtswv cov lus. Kuv paub yog peb yuav ua li no thiab sim seb puas muaj Vajtswv lub hwj chim hauv lub pov thawj hwj hauv peb lub neej ces, peb thiaj yuav tau koob hmoov. Los ntawm Yexus Khetos lub npe, amees.