Ifa Usun ewe Pristut a Efeiochu ekkewe Sarafo
A tufich ngeni kich pwe sipwe iamwiri usun chon nang, afanafana ewe kapas allim won ekkewe fonuen ei fonufan, me anisi ngunun aramas ar repwe feitto ren Kraist.
Pwi me Fefinei, ngang mi ennetin kinisou ren ai ei tufichin kapas ngenikemi non ei kunionun, mi auchea non fansoun usun ewe niffang mi pin ren ewe pristut me ewe amwararan manaman a wor an epwe efeiochu ekkewe sarafo non ei kinikinin fansoun. Uwa iotek pwe ina mwo ngang use unusoch, ewe Ngun epwe anisi ei ne osukuna ewe ennet.
Ewe Aewin Presetensi ra fen achema ngeni ekkewe chon kamoch ewe Pristut seni Aaron pwe “oua manau non eu ran minne a wor tufich mi napanap me weires watte—eu ran minne ewe pristut mi niwinsefanito. A nom reom ewe mumuta omw kopwe fori ewe angangen ewe Pristut seni Aaron. Nupwen ka anganga ena mumuta ren iotek me non nimenimoch, kopwe fakkun efeiochu manauen ekkewe aramas ra nom arum.”1 Kich ekkewe anuon non ewe Mwichefen, sia pwan chechemeni pwe kich “noun Kot [at] mi achengicheng, me a wor och angang A mochen [sipwe] fori”2me kich sia aninis non An angang “ne efisito ewe manau fenfeinno me manau ese muuch an aramas” (Moses 1:39).
Ewe pristut ina ewe mumuta ne awora ekkewe annuk pwisin me pwon mi pin me non ewe kapas allimen ewe Chon Amanau ngeni ion ekkewe mi nimenimoch ar repwe angei. Me ren ekkei angangepin an ewe pristut me pwon mi pin epwe atufichi meinisin ekkewe feioch seni ewe Achasefan an ewe Chon Amanau ne anisikich ne tour ngeni ach ennetin popun.
Joseph Smith a emon anuon minne a kokko me ren Kot an epwe aniwinato ewe kapas allimen Jises Kraist me, ren ena popun, a pwan angei ewe pristut minne a aea ne efeiochu aramas meinisin. Doctrine and Covenants 135 a makei chomong ekewe feiech Joseph a ngeni ekewe sarafo non ei kinikinin fansoun. Sia anneani: “Joseph Smith … a angangoch, tiwenon chok Jises, ren manau ese muuch fan iten ekkewe chon ei fonufan, nap seni aramas meinisin minne ra fen manau won. … A awareto ewe Puken Mormon … ; a tinau ewe kapas allim mi unus … ngeni ekkewe ruanu pokukun ewe fonufan; a awarato ekkewe pwarata me annuk minne ra masoweni [ewe] Doctrine me Covenants … ; a iofengeni fite ngerou Aramas mi Pin non Fansoun Soponon, … me nikitano porausechun me itan ese tongeni mano” (Doctrine and Covenants 135:3).
Ne angangoch usun chok Joseph, mi namwot pwe sipwe nimenimoch ne anganga an ewe Samon manamanen ewe pristut. Atun ra chiakuni ewe Puken Mormon, Joseph me Oliver Cowdery ra mochen repwe papatais, nge rese kamoch ewe mumuta mi namwot. Won May 15, 1829, ra fetupuketiw non iotek me John the Paptist a churir, a ngenir ekkewe kiien me mumutan ewe Pristut seni Aaron, a apasa, “Womi chienei kewe chon angang, non iten ewe Messaia uwa epinano ngenikemi ewe Pristut seni Aaron, minne a kamoch ekkewe kiien iamwirin chon nang, me ewe kapas allimen aier, me angangen papatais ren mwono fan konik fan iten omousomousun tipis” (Doctrine and Covenants 13).
A tufich ngeni kich pwe sipwe iamwiri usun chon nang, afanafana ewe kapas allim won ekkewe fonuen ei fonufan, me anisi ngunun aramas ne feitto ren Kraist. Ei angang a wewen pwe sia angang fengen ren John ewe soun papatais, Moronai, Joseph Smith, Preseten Nelson, me pwan ekkoch chon angangen ewe Samon mi achocho.
Ach angang non me pwan ren An pristut a achufengeni ekkewe ion ra ennetin mochen tapweno mwirin me manaueni non tichikin met ewe Samon a aiti, minne uwa pwisin sinei mi tongeni weires ren ekkewe mettoch sia osukosuk nupwen sia chon sarafo. Nge iwe ach angang fengen ren chienach kei chon angangen ewe Samon ne efisita An angang epwe anisi ne apechekunakich ne pworacho ngeni ewe chon ungeni sossot me mwaken. En mi tongeni usun ewe saram ngeni meinisin ion kewe rese fatafatoch usun pwisin won winikaper. Ewe saram me non en epwe saramaram tori meinisin ion ka churi epwe feioch pokiten chok ka nom rer. Fan ekkoch mi tongeni weires ne esinna pwe chienach won pekin ngun ra nom reech, nge uwa kinisou pwe uwa sinei pwe ngang chon eu mwichen pristut mi nukuchar, minne uwa tongeni angang fengen ren ne fefeito ngeni Kraist.
Fitifengen me chiechiach me famini, ewe Ngun mi Fel ina ew me nein chiechiach kewe mi tupon me aninisech. Nge ren ach sipwe tungor an chiechi ngenikich itetan, sipwe anomwu manawach non met a fis me neni epwe mowchen sipwe nomw non. Ei a tongeni poputa non imwach kewe, ren ach angang pwe epwe eu neni mi pin ren ach kaeo ekkewe pukefel iteitan ran me iotek ren ach famini me, watten auchea, ren ach pwisin stuti ekkewe pukefel me iotek kich emon me emon.
Non chok ei ier, uwa mefi meseik nge pwon tipetekison ren ewe tufich a ngeniei ai upwe anisi fefinei kukkun, Oceane, an epwe soposopono won ewe aan mi pin ren an epwe etiwa ewe tingor pwe epwe papatais me apwonueta eu ekkewe mettoch mi namwot an epwe tonong non ewe muun akkar. A amangeno an ranin papatais ngeni eu maram, tori ngang uwa tongeni efeioch ngeni emon priest, pwe ngang uwa tongeni wisen fori ewe angangepin me fefinem kewe ekkoch ra pwan tongeni angang fan nemenem ewe pristut non wisen chon pwarata. Ren am auwa uta nukun ewe nenien papatais me amonata am aupwe tonong non ewe konik, uwa apereni an pwapwa, usun chok ai. Me uwa mefi ai tipew ngeni, ai kuna pwe a fori ew finata mi pwung. Ei tufich ne anganga ewe pristut a anamwota ai upwe tumunoch me usap tanechepwak non ai manaueni ewe kapas allim. Ren ai upwe monneta, uwa feinno ngeni ewe tempel iteitan ran non na wiik, me ren aninis seni inei, inen inei, me fefinei, ne fori angangen papatais fan iten ekkewe mi mano.
A aiti ei chommong usun ewe pristut me ifa usun ngang mi tongeni anganga non nimenimoch. Ngang mi sinei pwe ekkewe pristut meinisin mi pwan tongeni mefi ekkei mettoch usun chok ngang ika sipwe tapweno mwirin an Nifai nenien appiru ne “feinno me fori” (nengeni 1 Nephi 3:7). Sise tongeni mommot uchok me ekieki pwe ewe Samon epwe anganga kich non An angang mi ning. Sisap utiwit ngeni ekkewe ra mochen ach aninis ar repwe kutakich; wisach ussun emon pristut an epwe fori usun chon uta me pwarata fan iten Kot. Ika sia fini mettoch minne a epetikich seni ach feffeita ese much, mi namwot sipwe siwin iei. Setan epwe fokkun achocho pwe sipwe nonnom non napanapen tipis me kutta ekkewe mochenin inis Nge uwa sinei pwe ika sia angang me achocho, kutta ekkewe repwe anisikich, me aier itetian ran, ekkewe feioch seni repwe amwarar me manauch repwe siwin fenfeinno ren ach sopweno ne fetan won ewe aan mi pin.
Ua sinei pwe iei ewe ennetin Mwichefenin Jises Kraist, I ewe ach Chon Amanau me a fen ngeni Noun kewe Aposel ekkewe kien ewe pristut, repwe aea ne emweni kich, akaewin non ekkei ran mi aweires me ar repwe amonata ewe fonufan ren an ewe niwinsefan.
Ua pwarata pwe Joseph Smith emon soufosun ewe Niwinsefanito me Preseten Russell M. Nelson in nouch soufos ikenai mi manau. Uwa tingor ngeni meinisin kich pwe sipwe kaeo usun manauen ekkei chon pristut mi amwarar me achocho ne pwisin siwinikich iteitan ran pwe sipwe monneta ne kuna ewe Chon Forikich. Non iten Jises Kraist, amen.