Qhib Rooj Ntug Kom Tau Kev Pab
Cia peb muab siab rau ntseeg tus Tswv Yexus Khetos los ua ib yam!
Nov yog ib tuas zoo kawg thiab txawv txav! Ua neb tsaug, me Laudy thiab Enzo. Neb ua piv txwv zoo txog cov ntxhais hluas thiab tub hluas hauv lub Koom Txoos.
Kuv cov kwv tij thiab cov muam, hnub no peb tau hnov ntau heev txog txoj kev muab lub Koom Txoos Txum Tim Rov Qab Los—lub Koom Txoos kiag uas peb tus Cawm Seej, Yexus Khetos, tau txhim tsa thaum Nws nyob hauv ntiaj teb no. Txoj Kev Txum Tim Rov Qab Los ntawd tau pib 200 xyoo tas los no hauv lub caij nplooj ntoo hlav thaum Vajtswv Leej Txiv thiab Nws tus Tub, Yexus Khetos, tau tshwm los rau tus tub hluas Joseph Smith pom.
Kaum xyoo tom qab txoj kev ua yog toog pom li no, tus Yaj Saub Joseph Smith thiab tsib leeg ntxiv raug hu los ua thawj cov mej zeej hauv tus Tswv lub Koom Txoos uas muab txum tim rov qab los.
Los ntawm pawg neeg me me uas sib sau ua ke thaum lub Plaub Hlis Ntuj hnub tim 6, 1830, txawm muaj ib lub koom haum thoob ntiaj teb no uas muaj coob tshaj 16 plhom leej neeg. Lub Koom Txoos zoo no ua ntau yam thoob plaws ntiaj teb los pab cov neeg txom nyem thiab txhawb nqa tib neeg es sawv daws paub txog tej no. Tiam sis lub hom phiaj tseem ceeb tshaj yog kom pab cov txiv neej, poj niam, thiab cov me nyuam los coj raws li tus Tswv Yexus Khetos, ua raws li Nws cov lus txib, thiab ua neeg tsim nyog tau txoj koob hmoov zoo tshaj plaws—uas yog txoj sia nyob mus ib txhis nrog Vajtswv thiab cov neeg uas lawv hlub.1
Thaum peb nco txog lub caij uas pib thaum xyoo 1820, peb yuav tsum nco qab hais tias xws li peb hawm Joseph Smith vim nws yog Vajtswv ib tug yaj saub, qhov no tsis yog Joseph Smith lub Koom Txoos, thiab tsis yog Maumoos lub koom txoos. Nov yog Yexus Khetos lub Koom Txoos. Nws tshaj tawm hais tias yuav tsum hu Nws lub Koom Txoos li no: “Vim yuav tsum hu kuv lub koom txoos li no nyob hauv hnub nyoog kawg, uas twb yog Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg.”2
Kuv twb hais txog txoj kev uas peb yuav tsum hloov seb peb hu lub Koom Txoos li cas.3 Txij li ntawd los, twb ua ntau yam pab ua txoj kev hloov no. Kuv xav hais ua tsaug rau Thawj Tswj Hwm M. Russell Ballard thiab tag nrho Pawg Kaum Ob tug Tim Thawj, uas twb ua ntau yam pab coj txoj hauj lwm no thiab kuj pab khiav tej uas kuv tab tom yuav qhia nej txog hmo no.
Lub Koom Txoos cov thawj coj thiab tej chaw khiav hauj lwm, cov koom haum, thiab ntau plhom tus mej zeej—thiab lwm cov neeg—tam sim no siv lub npe yog rau lub Koom Txoos. Lub Koom Txoos hom ua ntawv twb pauv lawm. Lub Koom Txoos qhov chaw website tam sim no hu ua ChurchofJesusChrist.org. Tej chaw rau email, hauv paus npe, thiab kev qhauj tawm hauv social media raug muab kho lawm. Tas sim no peb pawg nkauj hu ua Lub Tsev Kheej Pawg Hu Nkauj Nyob ntawm Tshav Tuam Tsev.
Peb tau ua tej hauj lwm no vim thaum peb tshem tus Tswv lub npe los ntawm lub npe rau Nws lub Koom Txoos, peb ua yuam kev es tshem Nws hauv nruab plawv peb txoj kev teev tiam thiab peb lub neej. Thaum peb ris tus Cawm Seej lub npe thaum uas peb ua kev cai raus dej, peb cog lus tias peb yuav ua tim khawv, los ntawm peb tej kev xav thiab tej yam peb ua, tias Yexus yog tus Khetos.4
Yav tas los lawm, kuv cog lus hais tias yog peb yuav “ua zoo npaum li peb ua tau kom kho lub npe yog rau tus Tswv lub Koom Txoos,” Nws thiaj yuav “nchuav Nws lub hwj chim thiab cov koob hmoov saum Tsoom Haiv Neeg Ntseeg hauv Hnub Nyoog Kawg tej taub hau, ntau dua li peb ib txwm tau pom dua.”5 Hnub no kuv rov qab cog lus li ntawd rau nej.
Ua kom pab peb nco txog Nws thiab lees tias Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg yog tus Tswv lub Koom Txoos, peb zoo siab qhia nej txog ib lub cim hom uas yuav qhia tias Yexus Khetos nyob nruab plawv Nws lub Koom Txoos.
Lub cim hom muaj lub Koom Txoos lub npe nyob rau hauv ib tug ncej zeb tag. Yexus Khetos yog tus thawj ncej zeb tag.6
Nyob nruab plawv lub cim hom no muaj ib daim duab txog Thorvaldsen tus mlom txog Yexus. Nws piav txog txoj kev sawv rov los, tus Tswv uas muaj sia nyob ncav ob txhais tes rau txhua tus neeg uas yuav los cuag Nws.
Ua cim hom, Yexus Khetos sawv hauv qab ib tug ncej pob zeb uas nkhaus. Tus ncej pob zeb uas nkhaus no pab peb nco txog qhov uas tus Cawm Seej uas sawv rov los tawm ntawm lub ntxa hnub thib peb tom qab lawv muab Nws Ntsia Saum Ntoo Khaub Lig.
Tej zaum nej coob leej tau pom lub cim hom no dua, vim tau ntev ntev lawm peb nco txog txoj moo zoo uas raug muab txum tim rov qab los, thaum peb siv tus Khetos uas sawv rov los tus uas muaj sia nyob.
Tas sim no lub cim hom no yuav nyob hauv peb cov ntawv, cov xov xwm, thiab tej yam uas lub Koom Txoos ua.7 Qhov no yuav pab sawv daws nco qab hais tias nov yog tus Cawm Seej lub Koom Txoos thiab tias txhua yam peb ua thaum ua ib tug mej zeej hauv Nws lub Koom Txoos yeej tso Yexus Khetos thiab Nws txoj moo zoo hauv nruab plawv.
Nim no, kuv cov kwv tij thiab cov muam, tag kis yog Hnub Caiv Toov Laj, raws li Txwj Laug Gong tau qhia. Thaum peb pib lub lim piam tshwj xeeb uas xaus thaum Hnub Easter no. Ua cov neeg ntseeg Yexus Khetos, uas nyob hauv lub caij muaj tus phaum mob COVID-19 uas ua rau lub ntiaj teb muaj kev kub kev ntxhov, cia peb tsis txhob hais lus txog Khetos xwb los sis qhuab qhia txog Khetos xwb los sis ua ib lub cim hom piv txog Khetos xwb.
Cia peb muab siab rau ntseeg tus Tswv Yexus Khetos los ua ib yam!
Tam li nej paub lawm, cov mej zeej hauv lub Koom Txoos yeej ua txoj kev cai yoo mov ib hnub txhua lub hlis.
Txoj kev cai yoo mov yog ib txoj kev cai qub qub. Cov neeg hauv phau vaj lug kub twb ua txoj kev cai yoo mov txij thaum chiv keeb los. Mauxes, Da-viv, Exalas, Nehemis, Exethaws, Yaxayas, Daniyees, Yau-ees, thiab lwm cov neeg coob coob tau yoo mov thiab qhuab qhia txog kev yoo mov.8 Hauv tag nrho Yaxayas cov ntawv, tus Tswv hais tias: “Puas yog txoj kev cai yoo mov uas kuv txaus siab ua yog li no? kom daws tej saw hlau ntawm txoj kev tsim txom thiab txo tus quab ntawm txoj kev tsis ncaj ncees, thiab tso cov neeg uas nej tsim txom tawm mus?”9
Tus Tim Thawj Pov Lauj ntuas ib Tsoom Haiv Neeg Ntseeg hauv Kaulithaus kom “ua kev cai yoo mov thiab thov Vajtswv.”10 Tus Cawm Seej Kiag tshaj tawm hais tias muaj tej yam uas “tsis tawm mus tsuas yog muaj kev thov Vajtswv thiab yoo mov.”11
Tsis ntev tas los nyob hauv ib daim vidis-aus kuv hais tias “vim kuv yog ib tug kws kho mob thiab ib tug kws phais mob, kuv yeej saib cov kws kho mob, cov kws tshawb fawb science, thiab txhua tus uas ua hauj lwm tas mus li kom kab mob COVID-19 txhob kis mus.”12
Nim no, ua tus Thawj Tswj Hwm rau Yexus Khetos Lub Koom Txoos ntawm Tsoom Haiv Neeg Ntseeg hauv Hnub Nyoog Kawg thiab Yexus Khetos ib tug Tim Thawj, kuv paub tias Vajtswv “muaj hwj chim tag nrho, muaj tswv yim tag nrho, thiab muaj kev to taub tag nrho; nws thoob tsib to nrog txhua yam, thiab nws yog ib Tug uas muaj kev hlub tshua, nws thiaj muab txoj kev cawm seej, rau cov uas yuav hloov siab lees txim thiab ntseeg nws lub npe.”13
Yog li ntawd, thaum tej lub sij hawm muaj kev nyuaj siab no, thaum muaj ib phaum mob loj kawg thoob ntiaj teb, qhov zoo yeej yog thov peb Leej Txiv Saum Ntuj Ceeb Tsheej thiab Nws Tib Leeg Tub—tus Xib Hwb Kho Neeg—kom Nkawd yuav nthuav lawv lub hwj chim los foom koob hmoov rau neeg ntiaj teb.
Nyob hauv kuv zaj vidis-aus, kuv tau caw txhua leej los nrog peb sib koom yoo mov Hnub Caiv, lub Peb Hlis Ntuj hnub tim 29, 2020. Tej zaum nej coob leej twb pom daim vidis-aus thiab tau koom txoj kev yoo mov no. Tej zaum ib txhia tsis tau. Tas sim no peb tseem xav tau lub ntuj txoj kev pab.
Ces hmo no, kuv cov me kwv tij thiab cov muam es, xav ua li Mauxiyas cov tub ua, vim lawv tau yoo mov thiab thov Vajtswv ntau,14 thiab ua ib qho ntawm peb lub tuam rooj sab laj thaum lub Plaub Hlis Ntuj xyoo 2020, kuv tab tom thov kom tib neeg thoob ntiaj teb yuav yoo mov dua. Rau cov neeg uas noj qab nyob zoo, cia peb yoo mov, thov Vajtswv, thiab rov qab muab peb txoj kev ntseeg sib koom ua ib lub siab. Cia peb taij thov kom tus phaum mob thoob ntiaj teb no yuav pib ploj mus.
Kuv caw txhua tus, kuj caw cov uas tsis yog peb txoj kev teev ntuj, kom yoo mov thiab thov Vajtswv Hnub Friday Zoo, thaum lub Plaub Hlis Ntuj hnub tim 10, hais tias yuav tswj tau phaum mob no, yuav tiv thaiv cov neeg kho mob, kom txoj kev khwv nyiaj khwv txiag yuav zoo zuj zus, thiab peb lub neej yuav rov qab nyob li qub.
Peb ua li cas thiaj yoo mov? Feem ntau yuav yog yoo ob pluag mov los sis 24 xuab moos. Tiam sis nej sawv daws yuav tau txiav txim seb li cas thiaj yog ib txoj kev txi rau nej, thaum ua nej nco txog txoj kev txi loj uas tus Cawm Seej muab rau nej. Cia peb sib koom siab taij thov kom tau kev kho mob thoob plaws ntiaj teb no.
Hnub Friday Zoo yuav yog hnub zoo tshaj plaws rau peb Leej Txiv Saum Ntuj Ceeb Tsheej thiab Nws tus Tub hnov peb cov lus!
Cov kwv tij thiab cov muam, kuv qhia kuv txoj kev hlub rau nej, nrog rau kuv zaj lus tim khawv tias txoj hauj lwm uas peb ua no twb yog lub ntuj ceeb tsheej txoj ntiag tug hauj lwm. Nov yog Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Nws sawv los ua tus thawj coj thiab coj kav txhua yam peb ua. Kuv paub hais tias Nws yuav teb Nws cov neeg tej kev taij thov no. Kuv ua tim khawv li no los ntawm Yexus Khetos lub npe dawb ceev, amees.