Muaj Raws Li Tau Qhia txog tej uas Yuav Muaj Los Yav Tom Ntej
Qhov uas tau muab Yexus Khetos txoj moo zoo txum tim rov qab los yog qhov uas ua kom muaj raws li tej lus qhia txog tej uas yuav muaj los yav tom ntej ntau heev.
Kuv cov kwv tij thiab cov muam, kuv zoo siab hais lus hauv lub rooj sab laj no uas ua koob tsheej txog Joseph Smith Thawj Zaug Ua Yog Toog pom Vajtswv Leej Txiv thiab Nws Leej Tub, Yexus Khetos, nyob hauv, ib Koog Ntoo Dawb Ceev tiag. Txoj kev ua yog toog ntawd twb qhib Kev Muab Txoj Moo Zoo Txum Tim Rov Qab Los thiab txhua yam uas muaj tom qab ntawd, xws li Phau Ntawv Maumoos, qhov uas txoj cai thiab cov yawm sij pov thawj hwj tau rov qab los, kev txhim tsa tus Tswv lub Koom Txoos tseeb, Vajtswv cov tuam tsev, thiab cov yaj saub thiab cov thwj tim uas coj txoj hauj lwm no hauv hnub nyoog kawg no.
Raws li Vajtswv pom zoo, Nws cov yaj saub puag thaum ub, thaum tus Vaj Ntsuj Plig Dawb Huv tshoov lawv lub siab, lawv tau qhia txog kev muab txoj moo zoo txum tim rov qab los thiab tej yam uas yuav muaj los hauv peb lub caij nyoog, uas yog lub caij nyoog tso txoj cai zaum kawg. Txoj hauj lwm no ua rau cov pom tau puag thaum ub “muaj lub siab kub lug.”1 Nyob hauv txhua tiam neeg, lawv twb ua npau suav, ua yog toog, thiab qhia tej uas yuav muaj los yav tom ntej hauv Vajtswv lub nceeg vaj hauv lub ntiaj teb, yog qhov uas Yaxayas hu ua “ib txoj hauj lwm zoo kawg nkaus thiab ib qho txuj ci xav tsis thoob.”2
Qhov uas tau muab Yexus Khetos txoj moo zoo txum tim rov qab los yog qhov uas ua kom muaj raws li tej lus qhia txog tej uas yuav muaj los yav tom ntej ntau heev, tsis hais Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Tiam sis hnub no, kuv yuav hais txog ob peb yam uas kuv nyiam heev xwb. Kuv cov xib hwb hauv lub Koom Haum Me Nyuam Yaus thiab kuv niam uas muaj siab dawb siab zoo twb qhia tej no rau kuv.
Daniyees, tus uas tiv taus cov tsov ntxhuav los ntawm kev ntseeg tus Tswv Yexus Khetos thiab Vajtswv cov tim tswv txoj kev los txhawb pab, yeej yog ib tug uas ua yog toog pom peb hnub nyoog. Thaum nws txhais Npanpiloos tus Vaj Ntxwv Nenpukajnexales txoj kev ua npau suav, Daniyees qhia tias tus Tswv lub Koom Txoos yuav los ntawm ib lub pob zeb uas “muab txam tawm saum lub roob los uas tsis yog neeg txam.”3 “Tsis yog neeg txam” txhais tias yog Vajtswv ua qhov no, tus Tswv lub Koom Txoos yuav loj tuaj mus txog thaum nws puv lub ntiaj teb thiab “yuav nyob mus tsis paub kawg … [thiab] yuav nyob mus ib txhis.”4
Qhov uas ua tim khawv tias twb tau muaj raws li Daniyees tej lus yog qhov uas cov mej zeej hauv lub Koom Txoos nyob thoob plaws lub ntiaj teb no saib thiab mloog lub rooj sab laj no.
Tus Tim Thawj Petus piav txog “thaum uas ib puas tsav yam [yuav] hloov dua tshiab tas huv tib si.”5 Tus Tim Thawj Povlauj sau hais tias thaum txog lub caij nyoog uas muaj txhij txhua, Vajtswv yuav “sau txhua yam los ua ib ke rau Khetos ua tus thawj,”6 vim “tus ncej tas … yog Yexus Khetos ntag.”7 Kuv yeej xav txog tej lus qhia no thaum kuv koom muab lub Tuam Tsev Rome Italy fij tseg. Cov yaj saub thiab cov thwj tim tag nrho nyob ntawd ua tim khawv txog Yexus Khetos, tus Txhiv Dim neeg ntiaj teb, ib yam li Petus thiab Povlauj tau ua. Cov kwv tij thiab cov muam, lub Koom Txoos yog ib tug yam ntxwv txog kev txum tim rov qab los no, thiab peb cov mej zeej yog neeg tim khawv txog tej lus qhia no puag thaum ub.
Yauxej hauv Iyiv Teb tau qhia tias nyob hauv hnub nyoog kawg no “tus Tswv uas yog kuv tus Vajtswv yuav tsa ib tug pom tau, uas yog tus pom tau uas tseem ceeb heev los rau koj cov xeeb leej xeeb ntxwv.”8 “Vim nws yuav ua [tus Tswv] txoj hauj lwm.”9 Joseph Smith, tus yaj saub ntawm Kev Muab txoj Moo Zoo Txum Tim Rov Qab Los, yog tus pom tau ntawd.
Yauhas tus uas Txais Kev Tshwm Sim tau qhia txog tus uas Muaj Hwj Chim Tag Nrho tus tim tswv uas coj tej yam tseem ceeb ntawam Kev Muab Txoj Moo Zoo Txum Tim Rov Qab Los sau los ua ke thaum nws hais li no: “Kuv txawm pom ib tug tim tswv ceeb tsheej ya sau nruab ntug, nws coj Txoj Moo Zoo uas nyob mus ib txhis los qhia rau tej neeg uas nyob thoob plaws hauv lub qab ntuj no, tsis hais haiv neeg twg, xeem twg thiab cov neeg uas hais yam lus twg los nws qhia txhua tus huv tib si.”10 Maulaunais yog tus tim tswv ntawd. Nws tau pom peb hnub nyoog raws li sau rau hauv Phau Ntawv Maumoos. Nws tau tshwm sim ntau zaus, nws npaj Joseph Smith rau nws txoj kev qhuab qhia, tsis hais kev txhais Phau Ntawv Maumoos: Ib Zaj Lus Tim Khawv Ntxiv txog Yexus Khetos.
Muaj lwm tus yaj saub uas hais txog peb hnub nyoog no. Malakis tau hais txog Eliyas txoj kev “tig cov txiv lub siab mus rau cov me nyuam, thiab tig cov me nyuam lub siab mus rau cov txiv.”11 Eliyas twb los, thiab yog li ntawd, hnub no peb muaj 168 lub tuam tsev nyob thoob plaws lub ntiaj teb. Txhua lub tuam tsev muaj mej zeej tsim nyog uas ua kev khi lus dawb ceev thiab txais cov kab ke rau lawv tus kheej thiab lawv cov poj koob yawm txwv uas tau tuag. Txoj hauj lwm dawb ceev uas Malakis piav txog yeej yog “lub ntsiab ntawm tus Tsim lub tswv yim rau nws cov me nyuam txoj hmoov nyob mus ib txhis li.”12
Peb nyob hauv lub caij nyoog uas lawv qhia txog; peb yog cov neeg uas Vajtswv tau txib kom npaj rau Yexus Khetos txoj Kev Los Zaum Ob; peb yuav tsum muab Vajtswv cov me nyuam sau los ua ke, cov uas yuav mloog thiab ua raws li tej lus tseeb, tej kev khi lus, thiab cov lus cog tseg ntawm txoj moo zoo uas kav ib txhis. Thawj Tswj Hwm Nelson hais tias yog qhov tseem ceeb tshaj plaws, lub hom phiaj tseem ceeb tshaj plaws, thiab txoj hauj lwm tseem ceeb tshaj plaws hauv lub ntiaj teb hnub no!”13 Kuv ua tim khawv txog qhov txuj ci tseem ceeb no.
Thawj Tswj Hwm Russell M. Nelson tau txib kuv xyoo no, thaum lub Ob Hlis Ntuj, mus muab lub Tuam Tsev Durban South Africa fij tseg. Yog ib hnub uas kuv yeej yuav nco ntsoov. Kuv tau koom nrog cov mej zeej uas tau los ntseeg txoj moo zoo ib yam li Yelemis tau qhia—“ib tug neeg ntawm ib lub nroog, thiab ob tug neeg ntawm ib tsev neeg.”14 Yexus Khetos cov lus qhuab qhia yeej ua rau peb txhua tus nyob thoob plaws lub ntiaj teb koom siab—vim peb yog Vajtswv cov tub thiab cov ntxhais, cov kwv tij thiab cov muam hauv txoj moo zoo. Txawm peb hnav li cas los xij, peb yeej yog ib haiv neeg uas muaj ib Leej Txiv Saum Ntuj Ceeb Tsheej. Nws txoj hau kev txij puag thaum ub los yeej yog kom Nws tsev neeg rov los nyob ua ke thaum lawv ua raws li lawv tej kev khi lus hauv lub tuam tsev.
Hais rau ib co uas tuav lub pov thawj hwj nyob hauv ib lub tsev kawm ntawv nyob Kirtland, Ohio thaum xyoo 1834, tus Yaj Saub Joseph qhia tias, “Hmo no nej tsuas pom qhov me ntsis ntawm lub Pov Thawj Hwj, tiam sis lub Koom Txoos no twb yuav puv tag nrho Amelikas Sab Qaum Teb thiab Sab Qab Teb---thiab yuav puv tag nrho lub ntiaj teb.”15
Txij thaum ob peb xyoos tas los kuv twb mus xyuas cov mej zeej ntawm lub Koom Txoos nyob thoob plaws lub ntiaj teb. Kuv cov Kwv Tij nyob hauv Pawg Kaum Ob tug Tim Thawj twb raug txib ua ib yam li no. Tiam sis, tsis muaj leej twg uas txawj ua zoo li peb tus yaj saub, Thawj Tswj Hwm Nelson, vim thawj ob xyoos nws yog tus Thawj Tswj Hwm ntawm lub Koom Txoos nws twb mus ntsib Haiv Neeg Ntseeg nyob hauv “32 lub teb chaws thiab tej qhov chaw hauv lub Teb Chaws Amelikas”16 kom ua tim khawv txog Khetos uas muaj txoj sia nyob.
Kuv nco qab thaum kuv txais kuv cov ntawv hu kuv ua tub txib. Kuv twb xav ua hauj lwm hauv Yelemes Teb, zoo li kuv txiv, kuv tus tij laug, thiab kuv tus muam tus txiv. Kuv tsis tau tos leej twg los tsev, es kuv khiav mus rau thawv txais ntawv, thiab qhib kuv cov ntawv. Kuv nyeem hais tias Vajtswv hu kuv mus rau qhov chaw tshaj tawm txoj moo zoo Eastern States, uas nyob hauv New York City. Kuv poob siab, yog li ntawd kuv thiaj mus hauv tsev thiab nthuav kuv cov vaj lug kub kom nplij kuv lub siab. Kuv pib nyeem phau Lus Qhuab Qhia thiab Kev Khi Lus hais tias: “Saib seb, thiab xyuas seb, kuv muaj neeg coob nyob hauv qhov chaw no, nyob hauv tej thaj tsam puag ncig no; thiab ib lub qhov rooj tij lim yuav qhib nyob hauv tej cheeb tsam puag ncig hauv thaj av sab hnub tuaj no.”17 Tej lus qhia no, uas tau muab rau tus Yaj Saub Joseph Smith thaum xyoo 1833, yog kev tshwm sim rau kuv. Thaum ntawd kuv twb paub tias tus Tswv tau hu kuv mus rau qhov chaw tshaj tawm txoj moo zoo uas Nws xav kom kuv mus. Kuv tau qhia txog txoj kev muab txoj moo zoo txum tim rov qab los thiab qhia txog lub sij hawm thaum peb Leej Txiv Saum Ntuj Ceeb Tsheej hais lus rau Joseph Smith thiab hais tias, “Tus no yog Kuv Leej Tub uas Kuv Hlub. Cia li mloog Nws hais!”18
Ib qho tseem ceeb rau lub Koom Txoos yog Yaxayas tej lus qhia tej yuav muaj los yav tom ntej, 700 xyoo ua ntej Yexus Khetos yug los: “Thiab yuav muaj tias nyob hauv hnub nyoog kawg, thaum tus Tswv yuav muab lub roob ntawm tus Tswv lub tsev tsa rau saum tej ncov roob, … thiab txhua haiv neeg yuav ntws los mus rau lub roob ntawm tus Tswv lub tsev.”19
Hnub no kuv xav txog peb cov mej zeej thiab cov phooj ywg uas saib lub rooj sab laj no hauv TV, internet, thiab lwm txoj kev. Peb zaum ua ke zoo li peb “saum tej ncov roob.”20 Yog Brigham Young uas hais tej lus qhia txog tej yuav muaj los yav tom ntej no hais tias “Nov yeej yog qhov chaw yog lawm.”21 Haiv Neeg Ntseeg, ib txhia yog kuv cov poj koob yawm txwv pioneer, lawv twb ua hauj lwm kom txhim tsa Xi-oos nyob hauv cov Roob Rocky no “los ntawm lub siab nyiam thiab lub siab xav ntawm tus uas kav cov teb chaws hauv lub ntiaj teb.”22
Kuv sawv saum cov av dawb ceev uas ua rau neeg coob tuaj xyuas. Xyoo 2002, Salt Lake City tau tos txais cov neeg uas tuaj rau kev sib tw Winter Olympic Games. Lub Tsev Kheej Pawg Hu Nkauj tau hu nkauj thaum qhib kev sib tw, thiab lub Koom Txoos twb tau qoj nkauj thiab ua yeeb yam rau cov neeg uas tuaj xyuas los ntawm ntau lub teb chaws los. Kuv yeej yuav nco txog qhov uas kuv pom tau lub tuam tsev thaum kuv saib kev tshaj tawm xov xwm uas xa mus rau ntau lub teb chaws.
Tau ntau xyoo no, muaj cov thawj tswj hwm ntawm lub Teb Chaws Amelikas, cov vaj ntxwv, cov txiav txim, thiab cov sawv cev tseem fwv tuaj ntau lub teb chaws tuaj rau Salt Lake City sib ntsib nrog peb cov thawj coj. Thawj Tswj Hwm Nelson tau ntsib cov thawj coj ntawm National Association for the Advancement of Colored People, uas yog ib lub koom haum hauv lub Teb Chaws Amelikas uas pab kom txhua tus muaj cai ib yam tsis hais lawv yog yam neeg twg. Kuv nco qab thaum kuv nrog cov thawj coj no thaum Thawj Tswj Hwm Nelson koom nrog lawv hais kom muaj kev koom siab thiab kev siab dawb hauv lub ntiaj teb.23
Neeg coob ntxiv tau tuaj rau Tshav Tuam Tsev thiab sib sab laj nrog lub Koom Txoos cov thawj coj. Piv txwv hias tias, xyoo tas los no, peb twb tos txais neeg tuaj rau lub koom haum United Nations lub rooj sab laj thiab 68 txog Civil Society, uas yog ib rooj sab laj rau txhua lub teb chaws, thiab yog thawj zaug uas lawv tsis ua nyob hauv New York City. Peb twb ntsib cov uas nyob hauv lub Teb Chaws Nyab Laj pawg saib xyuas kev teev ntuj, cov sawv cev los ntawm Cuba, Philippines, Argentina, Romania, Sudan, Qatar, thiab Saudi Arabia. Peb kuj tau ntsib tus thawj hais lus rau Muslim World League.
Tej yam uas kuv hais no yeej tau muaj raws li Yaxayas tej lus qhia tias hauv hnub nyoog kawg, tej teb chaws yuav los rau “tus Tswv lub tsev [uas] tsa rau saum tej ncov roob.”24 Lub Tuam Tsev Salt Lake yeej nyob hauv plawv ntawm qhov zoo kawg nkaus ntawd.
Tsis yog tej toj roob hauv pes uas kom tib neeg tuaj, txawm nov yog ib qho chaw zoo nkauj los; yeej yog qhov uasYexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg thiab nws cov neeg ua raws li lawv txoj kev teev ntuj thiab ua siab dawb siab zoo; peb txoj kev hlub li Vajtswv hlub; thiab peb txoj kev muab siab npuab ib qho siab tshaj plaws, qhov uas Joseph Smith hais tias yog “Khetos txoj hauj lwm.”25
Peb tsis paub thaum twg tus Cawm Seej mam li rov qab los, tiam sis peb paub qhov no. Peb paub tias peb yuav tsum npaj siab ntsws, ua neeg tsim nyog txais Nws, thiab zoo siab vim peb muaj feem ua tej yam uas cov yaj saub puag thaum ub tau hais txog.
Kuv ua tim khawv tias Thawj Tswj Hwm Russell M. Nelson yog tus Tswv tus yaj saub hauv lub ntiaj teb no, thiab nws muaj cov Tim Thawj uas Vajtswv tau hu nrog nws nyob, cov uas peb pom zoo txhawb nqa ua cov yaj saub, cov pom tau, thiab cov txais kev tshwm sim. Thiab kuv cov kwv tij thiab cov muam, peb tseem muab txoj moo zoo txum tim rov qab los.
Kuv xaus lus hais Joseph Smith tej lus qhia tej uas yuav muaj los yav tom ntej, tej lus uas kuv ua tim khawv muaj tseeb: “Tsis muaj ib txhais tes uas tsis dawb huv yuav nres tau txoj hauj lwm no; yuav muaj kev tsim txom, tej pab laib sib sau ua ke, tej pab tub rog yuav sawv los, tib neeg yuav taug xaiv yuav dag, tiam sis Vajtswv txoj lus tseeb tseem yuav tawm mus nrog kev ua siab loj, kev hwm, thiab nyob nws tus kheej, mus txog thaum qhov tseeb tau nkag mus hauv txhua thaj av, tau xyuas txhua txhia qhov chaw, tau mus thoob plaws txhua lub teb chaws, thiab txhua tus neeg tau hnov, txog thaum Vajtswv cov hom phiaj muaj tiav tas, thiab tus Yehauvas uas Muaj Hwj Chim yuav hais tias txoj hauj lwm twb tiav lawm.”26 Kuv ua tim khawv tias tab tom muaj raws li Joseph Smith tej lus hais txog yav tom ntej.
Kuv cog lus rau nej tias thaum nej ua raws li peb tus yaj saub, Thawj Tswj Hwm Russell M. Nelson, nws ob tug pab cuam, cov Thwj Tim, thiab lub Koom Txoos lwm tus thawj coj, tej lus, thiab thaum nej mloog cov yaj saub thaum ub tej lus uas hais txog peb hnub nyoog, ces nej yuav muaj lub hwj chim thiab kev xav ua hauj lwm ntawm Kev Txum Tim Rov Qab Los hauv nej lub siab lub ntsws. Kuv cog lus rau nej tias nej yuav pom tus Tswv txhais tes hauv nej lub neej, mloog Nws tej kev tshoov siab, thiab hnov Nws txoj kev hlub. Los ntawm Yexus Khetos lub npe, kuv ua Vajtswv tsaug rau qhov Nws muab Nws txoj moo zoo thiab lub Koom Txoos txum tim rov qab los, vim Nws hlub peb kawg nkaus, amees.