Bwe Ren Maron̄ Lo
Lale im jar kōn iien ko rem̧m̧an n̄an romaak am̧ meram bwe ro jet ren lo iaļ eo n̄an Jisōs Kraist.
Ro jeiū im jatū, buruōd ejeraam̧m̧an im ebar kāāl kōn Jetōb Kwojarjar eo me jekar en̄jake ilo kweilo̧k in.
Rubuki iiō ko remootļo̧k, juon jurōn meram ekar romaak ioon juon likao ilo bukwin wōjke ko. Ilo meram eo, Josep Smith ekar lo Anij Jemed im eo Nejin, Jisōs Kraist. Meram eo aer ekar kapenjakļo̧k marok jilōn̄lōn̄ in jetōb ettoon eo me ekar penej laļ in im kwaļo̧k iaļ eo n̄an Josep Smith—im n̄an kōj aolep. Kōn meram eo me ekar waļo̧k raan eo, jemaron̄ bōk tarlep in kōjeraam̧m̧an ko me repojak kōn Pinmuur eo an ad Rilo̧mo̧o̧r, Jisōs Kraist.
Kōn wānōk in Jepļaaktok eo an gospel eo An, jemaron̄ obrak kōn meram eo an ad Rilo̧mo̧o̧r. Ijoke, meram in ejjab n̄an kwe im n̄a wōt. Jisōs Kraist ekar kūr kōj n̄an “romaak ami meram im̧aan armej rein, bwe ren maron̄ lo jerbal ko rem̧m̧an ami im wūjtak Jemāmi eo ej pād ilo lan̄.”1 Em̧ōj an erom̧ juon naan eo em̧m̧an ippa “bwe ren maron̄ lo.” Ej juon kūr eo em̧ool jān Irooj n̄an lukkuun kōttōpar n̄an jipan̄ ro jet lo iaļ eo im itok n̄an Kraist.
Ke ekar 10 aō iiō, baam̧le eo am rekar utiej ilo aer kar karuwaineneik Elder L. Tom Perry jān Doulul eo an Jon̄oulruo Rijilōk ro ke kar jitōn̄e bwe en lotok bukwōn eo ij jokwe ie.
Ilo jem̧ļo̧kin raan eo, baam̧le eo am im baam̧le eo an Perry rekar jijet ilo ettōņaak eo im m̧ōņōņō ilo aer kam̧aolaļe abōļ pie eo enno ilo an Elder Perry kar bwebwenato kōn Armej ro Rekwojarjar ipeļaakin laļ in. Ikar lukkuun bwūlōn̄.
Ekar jino tin bon̄ ke jinō ej kūr eō n̄an jikin kōm̧m̧an m̧ōn̄ā eo im ekar kajjitōk ippa juon kajjitōk em̧m̧an: “Bonnie, kwar ke naajdik bao ko?”
Buruō ekar burom̧ōj; ijjan̄in. Ikar jab kōņaan etal jān im̧aan mejān Rijilōk eo an Irooj, ikar leļo̧k ļōmņak in ke bao ko remaron̄ jitlo̧k m̧ae ilju jibbon̄.
Jino ekar uwaak im ba eban “ejjab.” Ejja iien eo wōt, Elder Perry ekar deļon̄e jikin kōm̧m̧an m̧ōn̄ā eo im kōn juon ainikien eļap im emourrur ekar kajjitōk, “Ejim̧we ke ij ron̄ ke juon armej ej aikuj naajdik bao ko? Imaron̄ ke im ļaddik eo nejū kobawaj im jipan̄?”
O, ej juon lan̄lōn̄ eļap kiiō n̄an naajdik bao ko! Ikar ettōr n̄an m̧weo im bōk teen̄ki iaļo eo am ekilep. Kōn itok limo, ikar tōl iaļ eo, kejoone iaļ eo me eto aō iminene kake n̄an im̧ōn bao ko. Kōn teen̄ki eo ej ettoto ilo peiū, kōm ar kejoone jikin ko̧o̧n ko im eļļāļo̧k wōt jān meļaaj in wiit eo.
Ke ij tōpar kom̧laļon̄ jidikdik in dān in wūtdikdik eo me ej eļļā jān iaļ in etetal eo, ikar kajju kejoone āinwōt aō kijon̄ kōm̧m̧ane elōn̄ bon̄ ko m̧oktaļo̧k. Ikar jab jeļā ke Elder Perry ekar kate im ļoor bun̄tōn ko ilo juon iaļ emarok im ejjab jeļā kake. Erromrom in tōma eo ekar jab jipan̄ e lo kom̧laļ jidikdik eo. Ilo an ejjeļo̧k meram n̄an loe, ekar kajju rūm̧ļo̧k neen ilo dān eo im ekar lamōj. Ikar leln̄on̄, ikar oktakļo̧k n̄an lale eo m̧ōtta im bōk neen jān kom̧laļ jidikdik eo im joļo̧k dān ko jān juuj ko an me rōddo kōm̧m̧an jān leather.
Kōn juon juuj etutu im elōn̄ ainikien dān ilowaan, Elder Perry ekar jipan̄ eō naajdik bao ko. Ke ekar dedeļo̧k am naajdik bao ko, ekar katakin eō ilo iakwe, “Bonnie, ij aikuj lo iaļ eo. Ij aikuj meram n̄an rome ijo ij etetal ie.”
Ikar kōmeramram e teen̄ki eo aō ak ilo juon wāween me ejipan̄ Elder Perry. Kiiō, ilo aō jeļā ke ekar aikuji meram eo aō n̄an tōl iaļ eo, ikar kajejjet meram in teen̄ki eo n̄an kōmeram m̧aan an iaļ im kōm kar maron̄ jepļaak n̄an m̧weo kōn lōke.
Ro jeiū im jatū rejitōnbōro, ium̧win iiō ko eto aō kejo̧kļo̧kjeņ kōn katak eo ikar ekkatak jān Elder Perry. Kūr eo an Irooj n̄an romaak ad meram ejjab ad bajjōk kameramrame aolep jikin bwe laļ in en meramļo̧k. Ej kōn wōt kajejjet meram eo ad bwe ro jet ren maron̄ lo iaļ eo n̄an Kraist. Ej aiintok doon eo an Israel ilo turājet in ilo ran̄ōl eo—jipan̄ ro jet lo bun̄tōn eo tok juon m̧aanļo̧k ilo kōm̧m̧an im kōjparok bujen ko ippān Anij.2
Rilo̧mo̧o̧r ej kam̧ool, “Lo N̄a meram eo; Iaar kwaļo̧k jon̄ok eo n̄an kom̧.”3 Jān lale mok juon iaan waanjon̄ak ko An.
Kōrā eo ilo aibōj laļ eo ekar juon RiSamaria eo me ekar jab jeļā kōn Jisōs Kraist im kar watōke ippān elōn̄ armej āinwōt juon ruwamājet ilo jukjuk in pād eo an make. Jisōs ekar ioon kōrā in im ekar ijjino juon bwebwenato ippān. Ekar kōnono n̄an e kōn menin dān. Ekar tokālik tōl e n̄an meram eo eļapļo̧k ilo An kar kalikkare bwe E make ej “dān in mour.”4
Kraist ekar tūriamo̧ im jeļā kōn kōrā in im aikuj ko an. Ekar ioone kōrā eo ijo ej pād ie im kar jino kōnono kōn juon men eo me ejeļā kake. Eļan̄n̄e enkar bōjrak jān an kōnono n̄an kōrā eo, enkar juon men eo em̧m̧an. Bōtaab eban kar kōm̧m̧an bwe kōrā eo en etal n̄an jukjuk in pād eo im kwaļo̧k, “Kom̧win itok, im lo … : E in ri Kraist ke?”5 Ilo m̧ool, itok jān bwebwenato eo, ekar jeļā wōn in Jisōs Kraist, im jekdo̧o̧n mour eo an m̧okta, ekar erom̧ juon kein jerbal in meram, rome iaļ eo bwe ro jet ren loe.6
Kiiō jen lale ruo bwebwenato ko an armej ro rekar ļoor waanjon̄ak eo an Rilo̧mo̧o̧r n̄an romaak meram eo. Raan ko ļo̧k ļeo m̧ōtta Kevin ekar jijet itūrin juon pejnej boss ilo juon iien kōjota. Ekar nana an mour kōn ta eo enaaj kōnono kake ium̧win ruo awa. Ļoor juon unoojdikdik, Kevin ekar kajjitōk, “Ba n̄an eō jidik kōn baam̧le eo am̧. Rej jān ia?”
Em̧m̧aan eo ekar jeļā wōt jidik kōn menmenbwij eo an, kōn menin Kevin ekar jibwe tok taļboon eo nejin, im ba “Ewōr juon app me ej koneeke armej n̄an baam̧le ko aer. Jen lale ta eo jemaron̄ loe.”
Ālikin juon iien kōmeļeļe eo aitok, eo m̧ōttan Kevin ekāāl ekar kajjitōk, “Etke baam̧le ko rekanooj aorōk ilo kabun̄ eo ami?”
Kevin ekar uwaak, “Jej tōmak bwe jej wōnm̧aanļo̧k wōt im mour ālkin ad mej. Eļan̄n̄e jejeļā kōn ro jibūd im jim̧m̧aad etto im bōk etāer n̄an jikin ko rekwojarjar ņa etan tampeļ, jemaron̄ kōm̧m̧ani jerbal in kain̄i ko me renaaj dāpij baam̧le ko ad ippān doon ālkin mej.”7
Kevin ekar jino juon men eo me e im eo m̧ōttan ekāāl rekar jim̧or errā kake. Innem ekar lo juon iaļ n̄an kam̧ool kōn meram im iakwe eo an Rilo̧mo̧o̧r.
Bwebwenato eo kein karuo ej kōn Ella, juon rikkure basketball ilo jikuuļ. Waanjon̄ak eo an ekar jino ke ekar bōk mijen kūr eo an ke ej pād ilo jikuuļ ilo juon jikin ettoļo̧k. Ekar kālet n̄an kōpeļļo̧k mijen kūr eo an im̧aan mejān tiim eo an. Rekar jab jeļā eļap kōn Kabun̄ eo an Jisōs Kraist im rekar jab meļeļe kōn ikdeleel eo an Ella n̄an mijen. Elōn̄ kōttan an jar n̄an jeļā ewi wāween an kōmeļeļeiki mijen eo an ilo juon wāween eo me tiim in ikkure eo ren maron̄ en̄jake Jetōb. Uwaak eo an?
“Ikar kōm̧m̧ane juon PowerPoint,” Ella ekar ba, “kōnke ilukkuun kalimomo.” Ekar ba n̄an er kōn aer maron̄ mijen ilo juon iaan 400 jima mijen ko im maron̄ ekkatak bar juon kajin. Ekar kallikar ilo an ba kōn taujin mijinede ro repād ilo mijen. Ella ekar kōjjōm̧ļo̧k kōn juon pija in Rilo̧mo̧o̧r im naan in kam̧ool in ekadu: “Basketball ej juon iaan men ko eļap aer aorōk ilo mour eo aō. Ikar etal jān baam̧le eo aō n̄an jikin ko jet bwe in ikkure n̄an juon ko̧uj im ippān tiim in. Men ko wōt ruo me relukkun aorōk n̄an n̄a ijjeļo̧kin ikkure basketball rej tōmak eo aō im baam̧le eo aō.”8
Kiiō, n̄e kwobaj ļōmņak,”waanjon̄ak kein reļļap rej 1,000-watt kajoor in meram, ak ij juon 20-watt kajoor in meram in tein̄ki,” keemeej bwe Rilo̧mo̧o̧r ekar kam̧ool, “N̄a meram eo kom̧ naaj kotak lōn̄ļo̧k.”9 Ej kakeememej kōj bwe E enaaj boktok meram eļan̄n̄e jenaaj jitōn̄ļo̧k ro jet n̄an E.
Kwe im n̄a ebwe meram eo arro n̄an kwaļo̧ke kiiō. Jemaron̄ kōmeram bun̄tōn ko n̄an jipan̄ juon epaake Jisōs Kraist, innem bar bun̄tōn eo tok juon im bar eo tok juon.
Kajjitōkin eok make, “Wōn eo ej aikuji meram eo epād ippam̧ n̄an pukot iaļ eo rej aikuji ak rejjab maron̄ loe?”
Ro m̧ōtta rejitōnbōro, etke romaak ad meram elukkuun aorōk? Irooj ekar ba n̄an kōj bwe “elōn̄ ioon laļ … ro dāpiji er jān m̧ool eo kōnke rej jab jeļā ia eo ren pukote ie.”10 Kom̧ maron̄ jipan̄. Jemaron̄ ilo lukkuun kōttōpar romaak ad meram bwe ro jet ren loe. Jemaron̄ erļo̧ke juon kūr.11 Jemaron̄ etetal ilo iaļ eo ippān ro rej etal ie ļo̧k n̄an ippān Rilo̧mo̧o̧r, jekdo̧o̧n ewi jon̄an aer āliklik. Jemaron̄ aiintok Israel.
Ij kam̧ool bwe Irooj enaaj kōļapļo̧k aolep kijejeto ko reddik. Jetōb Kwojarjar eo enaaj im̧we kōj n̄an jeļā ta eo n̄an ba im kōm̧m̧ane. Ad kajjieon̄ emenin aikuj n̄an kōm̧m̧an men ko me jejaminene kaki, ak jemaron̄ kile bwe Irooj enaaj jipan̄ meram eo ad bwe en romaak.
Eļap aō kam̧m̧oolol kōn meram eo an Rilo̧mo̧o̧r, eo me ej wōnm̧aanļo̧k wōt n̄an tōl Kabun̄ in kōn revelesōn.
Ij kūr kōj aolep n̄an ļoor waanjon̄ak eo an Jisōs Kraist im tūriamo̧ ilo ļōmņak kōn ro ipeļaakid. Lale im jar kōn iien ko rem̧m̧an n̄an romaak am̧ meram bwe ro jet ren lo iaļ eo n̄an Jisōs Kraist. Kallim̧ur eo an eļap An: “Eo ej ļoor Eō e jāmin etal ilo marok, a enaaj an meram in mour.”12 Ij kam̧ool bwe ad Rilo̧mo̧o̧r, Jisōs Kraist, ej iaļ eo, m̧ool, im mour, meram, im iakwe an laļ. Ilo etan Jisōs Kraist, amen.