Ausening Ngeni I
Semach a sinei pwe nupwen sia nom non osukosuk me nuokus, ewe mettoch epwe anisikich nap seni meinisin ena pwe sipwe rongorong Noun we At.
Pwi me fefinei achenicheng, ifa me kinisoui pwe, seni technology, sia tufichin chufengen me fan fengen non ei sosorun Raninfel. Sia ennetin feioch pwe sia sinei pwe ewe kapas allimen Jises Kraist mi fen niwinsefanito ngeni fonufan!
Non ekkew fitu wik a no, napengeni kich a fisingenikich mi awosukosuka non manauach. Chechechein founu, ekei, noter, semwen, me ekkewe mettoch a osukosuka manauach me a esenipato osukosuk pwe ese naf mongo, pisekin imw, me moni.
Ren ekkei mettoch, sia pwapwa remi me kinisou remi ren ami finata ami oupwe ausening ngeni kapasen ewe Samon non ei fansoun osukosuk ren ami fitikich ren ei mwichenapen mwichefen. Ewe wattenon rochopwach ewe a chieneni watten osukosuk a fori ewe saramen Jises Kraist an epwe fen saramarameno. Ekieki chok usun ekkewe mettoch mi murrino sipwe tongeni fori non ei fansoun osukosuk ren unusen fonufan. Ami tong me nuku non ewe Chon Amanau epwe tufichin anisi emon an epwe kaeo usun ewe Niwinsefaniton unusan ewe kapas allimen Jises Kraist.
Non ekkewe ru ier ra no, Sister Nelson me ngang aua churi ngoroun me neimi non unusen fonufan. Sia mwich fengen non nenien chufengen mi nom nukun me pwan non imwen wasona. Non ekkei neni meinisin, ua fen mefi pwe ua nom ren noun ewe Samon kewe mi kefin me ua kuna ewe chufengenin Israel fan mesei.
Sia manau non ewe fansoun minne semach kewe ra fen witiwit ren mesiek.1 Sia pwisin tongeni kuna met Nifai a kuna non nemasepwi chok, pwe “manamanen ewe Namen Kot” epwe feitiw “won ekkewe aramas pwon noun ewe Samon, ekkewe ra toropas fetan won ewe unusen fonufan; iwe ra fouteni wenechar me ren ewe manamanen Kot non ning mi napanap.”2
Ami, pwi me fefinei, mi nom nein ekkewe mwan, fefin, me semirit minne Nifai a kuna. Ekieki usun ena!
Ina mwo ika ian oua nom ia are napanapen nonnomumi, ewe Samon Jises Kraist I ami Chon Amanau, me noun Kot soufos, Joseph Smith, i noumi soufos. A kefinata me mwen forutan ewe fonufan an epwe emon soufos non ei fansoun soponon, nupwen esor mettoch meinisin esap fangeto 3 ngeni ekkewe Aramas mi Pin. Pwarata a soposopno ne feito seni ewe Samon non fansoun ei niwinsefanito mi soposopono.
Me wewen meremw pwe ewe kapas allimen Jises Kraist a fen niwinsefanito ngeni fonufan?
Wewen pwe ami me ami famini mi tongeni ririfengen fenfeino! Wewen pwe pokiten oua fen papatais me ren emon mi wor an mumuta seni Jises Kraist me oua epinipin pwe ami chon An Mwichefen, me ewe Ngun mi Fel mi tongeni nonnom remi fansoun meinisin. Epwe emweni kemi me tumunu kemi. Wewen pwe ousap anemon me ewe manamanen Kot epwe anisikemi. Wewen pwe ewe manamanen pristut a tongeni efeiochukemi ren ami angei ekkewe angang mi pin me fori me aponuweta pwon mi pin ren Kot. Ekkei mettoch mi ennet mi tongeni apochokua ngunuch, pwan mwo non ei fansoun nupwen a watte ekkewe osukosuk.
Ewe Puken Mormon a awewechu forutan me turutiwan ru muun aramas. Porauser a pwarano ifa usun mecheresin chommong aramas ar repwe nemenano Kot, nikitano kapasen pesepes seni ekkewe soufosen ewe Samon, me ra achocho ar repwe kuta nemenem, itefouno, me pwapwan inis.4 Fan chommong, ekkewe soufosun nom ra pwarata “auchean me amwararen mettoch ngeni ekkewe aramas, ir rese nuku.”5
Mi chok nonno ngeni ikenai. Non ekkewe ier, sia fen rong mettoch mi auchea me amwarar seni nenien afanafan ekis meinisin won fonufan. Nge chommong aramas rese etiwa ekkei mettoch mi ennet—pokiten rese sinei ian repwe kuta me ia6 are pokiten ra ausening ngeni ekkewe rese sinei ewe ennet are pokiten ra fen nikitano ewe ennet ren ar mochen fori mettochen fonufan.
Ewe chon koum mi tipachem. Ren fansoun nangatam a fen siwini eoch ngeni ngau me ngau ngeni eoch.7 Porausan mi akurong, pochokun, me namanam tekia.
Nge, porausan Semach won Nang mi sokono. A kapas ngeni kich ren kapas mi mecheres, mosonoson, me fatafatoch pwe sisap tongeni wewengaweiti I.8
Ren awewe, nupwen A pwarata Noun we Anemon ngeni aramas won fonufan, A fori ren fitu chok kapas. Kot a apasa ngeni Peter, James me John won ewe Chuuk mi Teki, “Iei I nei we At mi achengicheng, oupwe ausening ngeni.”9 Iei An kapas ngeni ekkewe chon Nifai non Bountiful me nom “Nengeni Nei mi Achengicheng, non i ngang ua pwapwa, non i ua fen eningano itei—rongorong ngeni i.”10 Me ngeni Joseph Smith, ren ekkewe kapas mi aucheanap minne a suki ei fansoun soponon, Kot a chok apasa, “Iei Nei At mi Acheingicheing. Kopwe ausening ngeni I!”11
Iei, pwii me fefinei kewe mi achengicheng, non ekkei unungat fansoun ua poraus usun, me mwen ewe Sam a pwarata ewe Nau, ekkewe aramas mi pachenong ra nuokus me, non och napanap, ra osukosuk, ekieki usun ena.
Ekkewe Aposel mi nuokus nupwen ra kuna Jises Kraist nein eu kuchu won ewe Chuuk mi Tekia.
Ekkewe Chon Nifai ra nuokus pokiten ra keren wes seni eu fansoun tatakis me rochopwak ren fitu ran.
Joseph Smith a nom fan pochokunen rochopwak me mwen nang a suk ngeni.
Semach a sinei pwe nupwen sia nom non osukosuk me nuokus, ewe mettoch epwe anisikich nap seni meinisin ena pwe sipwe rongorong Noun we At.
Pokiten nupwen sia achocho ach sipwe rongorong—ennetin rongorong—Noun we At, sipwe emwen ach sipwe sinei met sipwe fori ese nifinifin met a fis ngenikich.
Ausening ina ewe aewin kapas non ewe Doctrine and Covenants.12 Wewen “ach sipwe ausening fiti ach mochen aponuweta.”13 Wewen ausening pwe sipwe “rongorong ngeni I”—ach sipwe rongorong met ewe Chon Amanau a apasa iwe sipwe aponuweta An kapas. Non ekkei unungat kapas— “Rongorong ngeni I”—Kot a ngeni kich ewe kokkot ach sipwe manauoch me sipwe pwapwa non ei manau. Sipwe rongorong ekkewe kapasan ewe Samon, ausinging ngeniir, me aponuweta met A erenikich ach sipwe fori!
Kich sia achocho ngeni ach sipwe chon kunon Jises Kraist, mi aucheanap ach sipwe ennetin achocho ach sipwe rongorong ngeni I Mi namwot sipwe ekieki usun me achocho iteiten ach sipwe urano manauach iteiten ran ren An kapas, An afanafan, An nongonong mi ennnet.
Sisap chok anongonong won met sia kuna won social media. Ren chommong kapas won ewe internet me chommong add mi osukosuk ren angangen ewe chon koum mi akurong me ngau, ian sipwe feino ia ach sipwe rongorong ngeni I?
Sia tongeni rongorong ngeni I non ekkewe pukfel. Ra aitikich usun Jises Kraist me An kapas allim, watten An Achesefan, me an Semach we kokkotun pwapwa me manau mi nap. Ach anneani kapasen Kot iteiten ran mi namwot ach sipwe manau, non pekin ngun non ekkei ran mi watte osukosuk. Nupwen sia kamatip won ekkewe kapasen Kriast iteiten ran, ekkewe kapasen Kriast repwe aitikich met sipwe fori non ach kewe osukosuk minne sise ekieki sipwe ach sipwe kuna.
Sia pwan tongeni rongorong ngeni I non ewe tempel. Iwen ewe Samon mi eu imwen kaeo. Ikana ewe Samon A aitikich non An napanap. Ikana ekkewe angang mi pin mi aitikich usun ewe Chon Amanau. Ikana sia kaeo ifa usun sipwe suki ewe epet me kapas ngeni nang ren fatafatoch. Ikana sia kaeo ifa usun sipwe osuno ewe chon koum me angei manaman seni an ewe Samon manamanen pristut an epwe apochokunakich me atongeich kewe. Kich sipwe mochen ach sipwe kuta kinamwe ikana.
Nupwen a wes kesipen ekkewe tempel pokiten COVID-19, ouse mochen oupwe okkota fansoun oupwe pin me angang non ewe tempel. Iteiten minich ren ami fansoun non tempel epwe efeiochukemi me ami famini non chommong napanap minne ese pwan tongeni feito seni pwan eu neni. Oupwe okkota fansoun oupwe ekieki usun met oua rongorong me mefi nupwen oua nom ikana. Tungorei ewe Samon an epwe aitikemi ifa usun oupwe suki nang an epwe efeiochu manauemi me manauen ekkewe oua tongei me angang ngeni.
Non ei fansoun nupwen ese tufich oupwe fan non ewe tempel, ua tungoreikemi oupwe awatteno ami fori uruon famini, pwan kukutan uruon famini me awewen rekotun nom. Ua pwon pwe nupwen oua awatteno ami fansoun non ewe tempel me angangen uruon famini, oupwe awatteno ami tufichin rongorong ngeni I.
Sia pwan awatteno ach tufichin rongorong ngeni I nupwen sia awatteno ach tufichin esina memefin ewe Ngun mi Fel. Ese mo wor ew fansoun nap seni iei pwe mi namwot ach sipwe sinei ifa usun ewe Ngun a kapas ngenikemi. Non ekkewe Unumon non Kot, ewe Ngun mi Fel I ewe chon tenre. Epwe ngeni kemi ekiek non mokuremi minne ewe Sam me Nau ra mochen oupwe angei. I ewe Chon Ekinamwei. Epwe awora memefin kinamwe non netipemi. A pwarata usun mettoch mi ennet me epwe pwarata pwe mi ennet nupwen oua rongorong me anneani kapasen ewe Samon.
Ua eniwini ai tingor ngenikemi oupwe fori met chok mi namwot oupwe awatteno ami tufichin angei pwisin pwarata.
Ami fori ei epwe anisikemi ami oupwe sinei met oupwe fori non manauemi, met oupwe fori non fansoun osukosuk, me sinei me touseni sosot me ekkewe nikotupotupen ewe chon koum.
Me, nesoponon, sipwe rongorong ngeni I nupwen sia aponuweta kapasen ekkewe soufos, chon oseni, me chon pwarata. Noun Jises Kraist kewe Aposel mi epinepin repwe pwarata usun I fansoun meinisin. Repwe aitikich ia sipwe feino ia non ach fetan non ekkewe watte osukosuken manauach won fonufan.
Met epwe fis nupwen oua achocho oupwe rongorong, ausening, me aponuweta met ewe Chon Amanau a apasa me met A apasa iei ren Noun kewe soufos? Ua pwon ngenikemi oupwe feioch ren pwan och manaman ren ami riaffou ren sossot, osukosuk, me apwangapwang. Ua pwon ngenikemi epwe wor manaman non ami pupunu, famini, me angang iteiten ran. Me ua pwon ngenikemi pwe epwe awatteno ami tufichin mefi pwapwa pwan mo non fansoun osukosuken manauemi.
Ei April 2020 mwichenapen mwichefen ina ach fansoun sipwe apwapwai ew mettoch mi siwini ewe fonufan. Nupwen sia esuku ei 200 ierin achechemen an Joseph Smith we Aewin Nemasepwi, ewe Aewin Presetensi me ewe Mwichen ekkewe Engon me Ruemon Aposel ra ekipwichi met sipwe fori ach sipwe apwapwai ei amwararen mettoch.
Ena pwato an Kot a poputani ewe Niwinsefaniton unusan ewe kapas allimen Jises Kraist me emwenato ewe kinikinin fansoun ekkewe unusochun fansoun.
Aua ekieki ika ew nios epwe kauuta. Nge nupwen aua ekieki usun sokkonon uruon me pochokunen ena Aewin Nemasepwi me non fonufan, aua mefi pwe aupwe foruata ew nios esap for seni simen me fau nge seni foun kapas—kapasen ennet me esinesin mi pin—epwe makk, esap fanafan non “cheen fau” nge epwe fen reirei non “aionen cheen” netipach.14
Seni fansoun ewe Mwichefen a poputa, nimu chok Esinesin ra fen kawor, ren ewe saingonon “Ewe Famini: Eu Esinesin ngeni ewe Fonufan,” a katou me ren Preseten Gordon B. Hinckley in 1995.
Iei nupwen aua nengenochu ei auchean fansoun non uruon fonufan me an ewe Samon angang ne ionfengeni Israel ren amonnetan ewe Aruwen Wareto an Jises Kraist, am, ewe Aewin Presetensi, me Mwichen ekkewe Engon me Ruemon Aposel, aua wau ei Esinesin. Itenapan “Ewe Niwinsefaniton ewe Unusen ewe Kapas allimen Jises Kraist: Eu Achechemen Ruepuku Ier Esinesin ngeni ewe Fonufan.” A makk me ren ewe Aewin Presetensi me ewe Mwichen ekkewe Engon me Ruemon Aposelun Ewe Mwichefenin Jises Kraist ren Aramas mi Pin non Fansoun Soponon. Pwinin maraman Apriil 2020. Ne monneta ikenai, ua akkom rekotuni ei Esinesin me non ewe Nenien Ira mi Pin, ikewe Joseph Smith a aewin kuna ewe Sam me ewe Nau.
“Aua ennetin pwarata pwe Kot mi tongei Noun semirit non muun fonufan meinisin. Kot ewe Sam a fen ngenikich ewe uputiw mi pin, ewe manau mi nap, me ewe achasefanin fangeno esemuch an Noun we Achengicheng, Jises Kraist. Ren manamanen ewe Sam, Jises a manausefan me akkufu mano. I ach Chon Amanau, ach Nenien appiru, me Ach Chon Angasano.
“Ruepuku ier a no, non ew ningochun nesosoran ranin uwa non 1820, Joseph Smith, a kutta an epwe sinei menni mwichefen epwe fiti, a no nein ekkewe ira an epwe iotek arap ngeni imwan we non upstate New York, USA. A wor an kapaseis usun amanauen ngunun me a apinukunuku pwe Kot epwe emweni i.
“Non tipetekison, aua pwari pwe ponuwen an iotek, Kot ewe Sam me Noun we, Jises Kraist, ra pwato ren Joseph me poputani ewe fansoun ‘mettoch meinisin repwe sofo sefan’ (Foffor 3:21) usun mi osini me non ewe Paipel. Non ei nemasepwi, a kaeo pwe mwirin manon ekkewe akkomwen Aposel, An Kraist we Mwichefen non ewe Testamen Sofo a poutuno seni fonufan. Joseph epwe pisekin aninis pwe epwe niwinsefanin.
“Aua apungano pwe fan emwenien ewe Sam me ewe Nau, chon kuno seni nang ra feito ar repwe auroura Joseph me forsefani ewe Mwichefenin Jises Kraist. John ewe Sou Papatais mi manausefan a eniwinato ewe mumutan papatais ren mono fan konik ren omusomusen tipis. Unumon me nein ekkewe akkomwen engon me ruemon Aposel—Peter, James, me John—ra eniwinato ewe wisen aposel me kiien mumutan pristut. Ekkoch ra pwan feito, mi pachenong Elijah, ewe a eniwinato ewe mumuta ne achufengeni famini feinfeino non nefin esemuch mi nap seni mano.
“Aua sopweno ne pwarata pwe Joseph Smith a angei ewe niffang me manamanen Kot an epwe chiakuni ew uruon nom: ewe Puken Mormon— Pwan ew Kapasen Pwarata usun Jises Kraist. Peichen ei puk mi pin mi pachenong ew uruon pwisin an Jises Kraist angang nein aramas non ewe Esopun Fonufan mwirin chok An Manausefanita. A aitikich usun popun manau me awewei ewe nongonongen Kraist, ewe ionapen ena popun. Ren ew chiechien pukfel ngeni ewe Paipel, ewe Puken Mormon a pwarata pwe aramas meinisin ir at me nengin noun Samach mi tong won Nang, pwe mi wor An kokkot mi pin fan iten manauach, me pwe Noun we, Jises Kraist, a kapas ikenai usun pwan non ranin nom.
“Aua pwarata pwe Ewe Mwichefenin Jises Kraist ren Aramas mi Pin non Fansoun Soponon, minne a fisita non April 6, 1830, iwe a An Kraist we Mwichefen non ewe Testamen Sofo mi niwinsefan. Ei Mwichefen mi nukuchar non unusochun manauen foun nongonongun we, Jises Kraist, me non An Achasefan esemuch me wesewesen Manausefan. Jises Kraist a pwan kor sefani Aposel me ngenir mumutan pristut. A tingorei kich meinisin sipwe feito Ren me An Mwichefen, ach sipwe angei ewe Ngun mi Fel, ekkewe angangepinen manau, me angei pwapwa esemuch.
“Ruepuku ier ra fen no seni ena fansoun ei Niwinsefanito a poputa me ren Kot ewe Sam me Noun we Achengicheng, Jises Kraist. Minion aramas non unusen fonufan ra fen etiwa ew sinenapen ekkei mettoch mi osini.
“Aua pwapwa ne affata pwe ewe Niwinsefanito mi pwon mi soposopono ren soposoponon pwarata. Ewe fonufan esap chiwen ususun we, pun Kot epwe ‘achufengeni non ew mettoch meinisin non Kraist’ (Ephesians 1:10).
“Ren mennin me kinisou, am Noun Aposel aua tingor meinisin repwe sinei—usun am mi sinei—pwe ekkewe nang mi suk. Aua apungano pwe Kot a affata An mochen fan iten Noun achengicheng at me nengin. Aua affata pwe ekkewe repwe iotek me kaeo porousen ewe Niwinsefanito me angang fiti nuku repwe feioch ne angei ar pwisin sinei usun auchean me popun pwe epwe ammonata ewe fonufan ren ewe Aruen Wareto an ach ewe Samon me Chon Amanau, Jises Kraist.”15
Achengicheng pwi me fefinei, ina ach we achechemen rupepuku ier esinesin ngeni ewe fonufan usun ewe Niwinsefaniton ewe kapas allimen Jises Kraist non unusochun. A fen chiaku non 12 fosun ekis. Ekkoch fosun ekis epwe pwan chiaku. Epwe mwitir kawor won an ewe Mwichefen website, ikewe ia oua tongeni angei echo kapi. Kaeo non monomon me ren chon om famini me chiechiom. Ekipwichi ekkewe ennet me ekieki met ekkenan ennet repwe fori ngeni manauom ika kopwe ausening ngenir, rong ngenir, me aneasochisi ekkewe annuk me pwon mi pin mi fitir.
Ua sinei pwe Joseph Smith i ewe soufos mi kefinita minne ewe Samon a finata an epwe suki ei fansoun soponon. Me ren i an ewe Samon we Mwichefen a niwinsefanito ngeni fonufan. Joseph a awesano an kapasen pwarata ren chaan. Iwe iei ua ennetin tongei me asomonu i!
Kot mi manau! Jises ii ewe Kraist! An Mwichefen a niwinsefan! I me Seman, Semach won Nang, ra tumunu kich. Ua pwarata ekkei non itan Jises Kraist mi pin, amen.