Kutta Kinamwe non ekkewe Asepwanin Manau
Jises Kraist me An Achasefan ina ewe nenien asoso mi namwot ngenikich meinisin, ese nifinifin ekkewe asepwan minne a osukosuka manauach.
Me non ekkewe ier ano nukanapen ekkewe ierin 1990 me 2000, otun ai we college, ngang emon chon ewe Ruanuan Mwichen ewe Santiago Kinikinin Fiu ngeni Ekei non Chile. Ren ai we angang ikewe, uwa nom non ewe imwen ekei ren wisei chon tumun nepwin. Saigon na ier, uwa kaeo pwe epwe namwot upwene nom non ewe imwen ekei non ewe pwin mwen ranin New Year pun non na ran napengeni mi wor osukosuk epwe fiis. Ua mairu uwa penueni, “O fokkun?”
Iwe, uwa chechemeni uwa nom ren chienei tori, atun nukenipwin, ekkewe firework ra poputa ne pung me non teninimwen Santiago. Am aua poputa turufengen ren kapasen apwapwati ewe ier minafo. Iwe ekkewe bell non ewe imwen ekei ra poputa ne ring, esisinen pwe mi wor osukosuk. Aua angei pisekim kewe me tota won ewe sein ekei. Non am aua sa ngeni ewe osukosuk, aua kuna chommong aramas minne ra apwapwa ren ewe minafon ier, uwa esinna pwe napengeni rese nuokus me esor ar osukosuk. Ir mi kinamwe me ra chok pwapwa non ewe pwin mi ekinamwe pwichikar. Nge ekis mi chok kaneto, ekkewe aramas am mi sai ngeni aupwe anisi ir mi ennetin osukosuk.
Ei pwin a anisi ei ne esinna pwe ina mwo ika manauach mi tongeni mecheres fan ekkoch, ewe fansoun epwe feito pwe emon me emon kich sipwe kuna mettoch mi weires me asepwan minne epwe uwei kich tori nesoponon met sia mefi sia tongeni pworacho ngeni. Pekin inis, pekin ekiek, famini, me osukosuken angang; osukosuken fonu; pwan ekkoch mettochun manau ika mano ikkei ekkoch chok awewen ekkewe asepwan minne sipwe kuna non manauch.
Nupwen sia kuna ekkei asepwan, fan chommong sipwe mefi memmefin netipechou are nuokus. Preseten Russell M. Nelson a apasa, “Nuku ewe safei fan iten nuokus” (“Let Your Faith Show,” Liahona, May 2014, 29). Ren ai uwa kuna ekkewe asepwan minne a tori manaen aramas, uwa kaeo pwe ese nifinifin met sokkun asepwan minne a efeingawa kich—ese nifinifin ika mi wor met sia tongeni awesi ren are sia tongeni kuna nesopun—mi wor eu chok nenien asoso, me a nonno chok ren meinisin sokkun asepwan. Ei eu chok nenien asoso minne Semach won Nang a ngenikich ach ewe Samon Jises Kraist me An Achasefan.
Esor emon me neich esap kuna ekkewe asepwan. Ilaman, emon soufosun ewe Puken Mormon, a aitikich ekkei mettoch: “Chechemeni pwe ina won ewe foun ach Chon Angaseno, i ewe Kraist, ewe Noun Kot, ewe mi auchea oupwe aueta ami nongonong won; pwe nupwen ewe tefin a tinato an asepwan mi pochokun, ewer, an kewe assefich non ewe ewuniar, ewer, nupwen an kewe pungun foun ice meinisin me an monumon mi pechekun repwe wichi kemi, esap wor an nemenem womi ne etekinikemitiw ngeni ewe pwangen riaffou me riaffou esemuuch, pokiten ewe fau minne oua kauuta won, minne a ew nongonong mi nukuchar, ew nongonong won minne ika aramas ra kauuta won resap tongeni turutiw.” (Ilaman 5:12).
Elter Robert D. Hales, minne a pwisin sinei usun nikitu non asepwan, a apasa: “Riaffou a tori meinisin; met sia fori pokiten a nongonong won emon me emon. Riaffou a tongeni emwenikich won eu me ruu aan. A tongeni eu fansoun apechekun me animenimoch fiti pwan nuku, are a tongeni eu manaman epwe atai manauch ika ese wor ach nuku non an ewe Samon asoren achasefan.” (“Your Sorrow Shall Be Turned to Joy,” Ensign, Nov. 1983, 66).
Pwe kich mi tongeni pwapwa non ewe asoso minne Jises Kraist me An Achesefan a ngenikich, mi namwot epwe wor ach nuku non I—eu nuku minne epwe anisikich ne fefeita asen ekkewe metek seni kich chon fonufan ren ach sinei, mi keuk. A pwon pwe Epwe fori pwe ach weires mi chou epwe paneno ika sia feitto ren I non mettoch meinisin sia fori.
“Oupwe feito rei,” A apasa, “ami meinisin mi pekus ren choun osemi o ngang upwe asoso kemi.
“Oupwe angei osei o oupwe mwarei o oupwe kaeo seni ei, pun ngang mi mosonoson o tipetekison, iwe oupwe kuna ami ngaseno.
“Pwe osei a mecheres, me ai chou a paneno” (Matthew 11:28–30; nengeni pwan Mosaia 24:14–15).
A pwan apasa pwe “ngeni emon mi wor an nuku, ese pwan namot kapas awewe. Ngeni emon ese wor an nuku, ese wor kapasen awewe mi tufich.” (Ei kapas afen katou pwe Thomas Aquinas a apasa ekkei kapas nge napengeni mi tufich ra chok nongonong won mettoch a aitir.) Nge, ach weweiti usun ekkewe mettochun mi fiis won ei fonufan mi keuk, me fan chommong sise sinei penuwen ewe kapas eis pwata. Pwata ei a fiis? Pwata ei a fiis ngeniei? Met ururun upwe kaeo seni? Nupwen sise sinei penuen, ina ewe atun minne ekkewe kapas minne ach Chon Amanau a ngeni ewe Soufos Joseph Smith non Liberty Jail mi tongeni aninis:
“Nei we at, kinamwe ngeni ngunum; om kewe osukosuk me riaffou repwe chok nom reom ekis chok fansoun;
“Me mwirin, ika ka nikitu, Kot epwe ekiuketa” (Doctrine and Covenants 121:7–8).
Ina mwo chommong aramas ra ennetin nuku non Jises Kraist, ewe auchean kapas eis epwe ika sia nuku I me ika sia nuku ekkewe mettoch pwe A aitikich me tingor ngeni kich sipwe fori. Meni emon epwe ekieki, “Met Jises Kraist a sinei usun ekkewe mettoch minne a fis ngeniei? Ifa usun A sinei met a namwot pwe upwe pwapwa?” Ennetin, ach Chon Angaseno me Chon Affor ngeni ion ewe soufos Isaiah a fos usun nupwen a apasa:
“A koput me ese ketiw me ren aramas; chon mefi riaffou, me metek. …
“Ennetin i a fen engino ngeni ach netipechou, me uwei ach netipengaw. …
“Nge i a kinas fan iten ach tipis, i a feiengaw fan iten ach angangangaw; kapungun ach kinamwe a nom won; iwe seni an kewe kinasen opup sia chikar.” (Isaiah 53:3–5).
Ewe Aposel Peter a pwan aitikich usun ewe Chon Amanau, a apasa, “Kraist a pwisin mwarei ach kewe tipis won inisin ngeni ewe irapenges, pwe sipwe mano ngeni tipis, nge sipwe manau ngeni mi pung; kich sia fen chikareta ren kinasan kewe” (1 Peter 2:24).
Ina mwo atun an Peter we mano a kanneto, an kapas rese ur ren nuokus are netipengaw; nge, a aiti ekkewe Souneng pwe repwe “pwapwa,” ina mwo ra nom “non weires fan choun chommong sossot.” Peter a auraura kich ach sipwe chechemeni pwe “ewe sossotun [ach] nuku, … ina mwo a sossot ren ekei,”epwe emwen ngeni “itoch me ning, me mwareiti non ewe ran Jises Kraist epwene pwato” me ngeni “ewe angangen amanauen ngun[uch]” (1 Peter 1:6–7, 9).
Peter a sopweno:
“Ami pwii achengicheng, ousap mairu ren ewe riaffou mi weires a tori kemi, ussun ita nge och mettoch a keran chok fis ngeni kemi;
“Nge oupwe chok pwapwa pun oupwe fiti Kraist non an kewe riaffou, iwe ami pwapwa epwe unusoch nupwen an we ning epwe ne pwapwano” (1 Peter 4:12–13).
Preseten Russell M. Nelson a aiti kich pwe “Souneng ra tongeni pwapwa non sokkun napanap meinisin. … Nupwen ionapen manauach a nom won an Kot kokkoten manau ese much … me Jises Kraist me An kapas allim, sia tongeni mefi pwapwa ikamo ese nifinifin met mi fis—are ese fis—non manauach. Pwapwa mi feito seni me pokiten I. I ewe popun pwapwa meinisin” (“Joy and Spiritual Survival,” Liahona, Nov. 2016, 82).
Iwe ennet, a fen mecheres ne apase ekkei mettoch nupwen sise nom non eu asepwan nap seni ach manaueni nupwen ewe asepwan a torikich. Nge ngang pwiimi, uwa apinukunuk pwe oupwe tongeni mefi pwe uwa ennetin mochen erenikemi ewe auchean ach sipwe sinei pwe Jises Kraist me An Achasefan ina ewe nenien asoso mi namwot ngenikich meinisin, ese nifinifin ekkewe asepwan minne a osukosuka manauach.
Ngang mi sinei pwe kich meinisin noun Kot semirit, pwe A tongeikich, me sise anaemon chok. Uwa etiwakemi oupwe feito me kuna pwe A tongeni apanano omw kewe chou mi weires me epwe ewe nenien asoso oua fen kutta. Feito me anisi ekkoch ne kuna ewe asoso minne ra fokkun mochen. Feito me nom rech non ei nenien asoso, minne epwe anisuk ne nikitu ngneni ekkewe asepwanin manau. Ese wor tipemwaramwar non netipei pwe ika oupwe feito, oupwe kuna, oupwe aninis, me oupwe nonnom.
Ewe soufos Alma a ngeni noun we at Ilaman ei kapasen pwarata: “Pun uwa sinei pwe ion chok epwe wanong ar apinukunuk non Kot repwe angei aninis me non ar kewe sossot, me ar osukosuk, me ar riaffou, me repwe seikita non ewe ranin soponon” (Alma 36:3).
Ewe Chon Amanau A pwisin apasa:
“Akinamwei netipemi … ; pwe futuk meinisin a nom non pei; mosonoson chok me sinei pwe Ngang Kot. …
“Iwe, ousap nonininen tori mano pwan; pwe won ei fonufan ami pwapwa esap unus, nge non ngang ami pwapwa a unus” (Doctrine and Covenants 101:16, 36).
Ewe kon “Be Still, My Soul,” minne a ekinamwei netipei fan chommong, a wor non eu porausen kinamwe ngeni ngunuch. Iei usun kapas:
Mosonoson, nguni: Ewe awa a kaneto
Nupwen sipwe nom ren ewe Samon fenfeinno,
Nupwen netipengaw, netipechou, me nuokus epwe wesino,
Riafou epwe menukano, unusochun pwapwa seni tong a niwin.
Mosonoson, nguni: Nupwen siwin me chonun mas ra feino,
Meinisin mi tumun me feioch sipwe chufengen nesoponon. (Hymns, no. 124)
Ren ach kuna ekkewe asepwanin manau, uwa sinei pwe ika sipwe ennetin achocho pwe sipwe anongonong won Jises Kraist me An Achasefan pwe epwe ach nenien asoso, sipwe feioch ren ewe asoso, echipwer, pechekun, tipetekison, me kinamwe minne sia kutta, ren nukuchar non netipach pwe non nesoponon ach fansoun won ei fonufan, sipwene rongorong ekkewe kapasen ewe Masta: “Fokkun murinno, en emon chon angang mi murinno me nikitu: … kepwe tonong me fitiei non ai pwapwa” (Matthew 25:21). Non iten Jises Kraist, amen.