Afanafana worousen ewe Niwinsefanito me Manausefan
Ewe Niwinsefanito ew pisekin fonufan, me porausan mi ennetin auchea ikenai.
Non ei mwichenap mwichefen sia fen kapas me ken fiti meseik ren fisiechun ewe osuni “niwinsefaniton mettoch meinisin,”1 usun “chufengen non ew mettoch meinisin non Kraist,”2 usun niwinton ewe kapas allim unus, pristut, me ewe Mwichefenin Jises Kraist ngeni fonufan, ren meinisin sia angei non ewe itenap “ewe Niwinsefanito.”
Nge ewe Niwinsefanito esapw chok fan iten kich kewe sia meseik non ikanai. Ekkewe pwarata usun ewe Aewin Nemasepwi esapw fan iten Joseph Smith chok nge ra kawor usun saram me ennet fan iten ekkewe “rese mirit.”3 Ewe Puken Mormon ew pisekin aramas meinsin. Ekkewe angangepinen pristut ren amanau me manawen feifeita ra monneta fan iten meinisin, pwan ekkewe rese chiwen manaw. Ewe Mwichefenin Jises Kraist ren Aramas mi Pin non Fansoun Soponon me feiochun kewe a kawor fan iten meinisin ekkewe ra mwochen. Ewe niffangen ewe Ngun mi Fel a kawor fan iten meinisin. Ewe Niwinsefanito ew pisekin fonufan, me porausan mi ennetin auchea ikenai.
“Ina minne, ifa watten auchean ar repwe fori ekkei mettoch ar repwe fatochuno ngeni chon fonufan, pwe repwe tongeni sinei pwe ese wor aion epwe tongeni nonnom ren Kot, tiwenon chok ika seni ekkewe nimenimochun foffor, me umoumoch, me chenin ewe Messiah mi Fel, ewe a watiw manauan anongonong won pekin aion, me angeisefani seni ewe manamanen ewe Ngun, pwe i epwe tongeni efisi ewe manausefanin ekkewe mi mano.”4
Seni ewe ran pwin ewe Soufos Samuel Smith a amasowa an ewe pwotow ngeni kapin ewe Puken Mormon a keran for me a poputan ne afanafana ewe minafon Pukefel, ekkewe Souneng ra angang weires ese wor asoso “ar repwe fori ekkei mettoch ar repwe fatochuno ngeni chon fonufan.”
Non 1920, an iteni-Elter David O. McKay seni ewe Mwichen Engon me Ruemon Aposel a poputani ewe nangatamen ierin an churi ekkewe misin non ewe Mwichefen. Non May 1921, a uta non ewe kukun nenien peias non Fagali‘i, Samoa, memwen ekkewe peias mi tumun peiasen unumon semirit, ewe nengin me ruemon aat noun Thomas and Sarah Hilton. Ekei kukkun—ewe watte a ruu ier—a mano nupwen ewe fansoun Thomas and Sarah ra fori wiser ren pwupwunu misineri non ewe 1800s.
Memwen a no seni Utah, Elter McKay a pwon ngeni Sarah, iei a emon mi ma seni pwunuwan, epwe feino churi peiasen neun kewe non Samoa pokiten ii ese mwo tufich an epwe niwin ngeni ikewe. Elter McKay a mak sefan ngeni, “Noum kewe unumon kukun, Fefinei Hilton, non mosonoson mei pechekun … ra chiwen sopweno omw ewe angangen misineri ewe ka pwopwutani akarap ngeni inik ier a no.” Iwe a apachanong ew wokisin a pwisin makkei:
Ren tongen kumuch meser mei apwangapwangono ra kesip,
Ren tongen kumuch pour me pecher mi mosonosonono,
Ren kumuchun ekkoch peiaser kewe ra ening,
Ren an ekkoch ra afona, me an ekkoch ra netipeta.5
Ei pworous ew chok me nein ngeruw, pwuku ngeruw, kewe ra kapas usun ewe fansoun, afona, me manaw ra fen peutuno non kewe 200 ier ar afanafana ese kapasen ewe Niwinsafanito. Ach anean pwe sipwe tori muu meinisin, einang, sokopaten kapas me aramas ese kukkununo ikanai usun afen pwano seni fite ngoru enuwen, fepwun, me kewe pwupwunu kewe ra angangen misineri; seni chon Mwichefen ekewe ra fori an Phillip tungor ach sipwe feito me katon;6 me seni ewe minion chana afen neunow iteiten ier an epwe fori ei angang non unusen fonufan.
Ika mwo ach tungor rese fiti echimw, sia anean pwe aramas repwe kuna pwe ir mi mwasangasang. Ren an epwe ina, ua nuku pwe unungat mettoch epwe fis: aewin, ami tong; oruan, ami nenien appiru; me unungatin, ami aea ewe Puken Mormon.
Ach tungor esapw chok ren met sia sani; nge, repwe seni ach tong.7 Ei tong, sia sinei pwe tong ennet, ewe nimenimochun tongen Kraist, epwe ach ika sipwe tungor. Sia fen ketiw, ika annuk ngenikich, sipwe “iotek ngeni Samach ren pochokunen netip, pwe [sipwe] ureno ren ei tong.”8
Ren awewe, uwa opworousa ew mettoch seni Sister Lanett Ho Ching, ewe a angang fiti pwunuwan, Preseten Fancis Ho Ching, ewe a nemeni ewe Samoa Apia Misin. Sister Ho Ching a ureniei:
“Ier chommong a no, am ewe famini a mwokut ngeni ew kukun imw non Laie, Hawaii.” Ewe neenien taraku a siwin ngeni ew kukkun ruumw, emon mwan itan Jonathan a nomw ia. Jonathan a fen pwan chon winiorum pwan non ew neni. Aua mefi pwe esapw ew pekin rukono an ewe Samon ochu fengenikem, auwa finata pwe aupwe kapas usun am mwokutukut me nonnomwumw non ewe Mwichefen. Jonathan a unusen sani am chiechi fengen me a sani an nomw ren am ewe famini. A sani an kaeo usun ewe kapas allim, nge ese mwo mochen fiti ewe Mwichefen.
“Ekis ngeni chok, Jonathan a angei itan ewe ‘Angkel Jonathan’ meren neum kewe. Nupwen am ewe famini a sopweno me watteno, fen pwan an Jonathan pwapwaiti met a fiffis rem. Am tungoren pari non holiday, ranin upwutiw, urumwotun sukun, me urumwotun non Mwichefen me tori non pwinin famini me papataisen semirit.
“Ew raan a toriei ew keken won fon seni Jonathan. A wor met a mochen ren pekin aninnis. A uri semwenin suke me a pwopwuta ew paikingin pechen a wateno epwene tongeni tutununo. Am ewe famini me chon kewe wart unukum auwa anisi non an ei osukosuk. Auwa ekkesiwin me tumunu non ewe pioing, me efeiechun pristut rafen tori. Nupwen Jonathan a epechekun sefan, fiti an ekkewe Fin Anisi aninis, auwa nimeti ruumwan ewe. Ekkewe pristut ra fori ew ramp ngeni asaman ewe me an nenien komwoch non an ewe nenien tutu. Nupwen Jonathan a niwin ngeni imwan, a ureno ren memef.
“Jonathan a pwopwuta kaeo seni ekkewe misineri safan. Ewe wiik memwen ewe Ier Sofo, a kekeriei me a eis, ‘Met kopwe fori non ewe ran me mwen Ier Sofo?’ Uwa achema ngeni am ewe pari iteiten ier. Nge, a penueni, ‘Ngang uwa mwochen kopwe feito fiti ai papatais! Uwa mwochen upwe pwopwutani ei ier minafo non pwung.’ Mwirin 20 ierin ‘feito me kuna,’ ‘feito me aninis,’ me ‘feito me nonomw,’ ei ngun mi euchea a monota an epwene papatais.
“Non 2018, nupwen auwa keke am aupwe presetenin misson me chiechi, pechekunen Jonathan ewe a kisikisino. Auwa tungormaw ngeni an epwe epechekuna ne awit tori am niwin. A achocho ngeni ren arapakan ew ier, nge ewe Samon a amonata an epwe feito ngeni imwan. A mano non kinamwe non April 2019. Neum kewe nengin ra fiti soman ‘Angel Jonathan’ ewe me ra konu ewe koon auwa konu non a ewe papatais.”
Uwa pwopwutani ew oruwen foffor omw kopwe apworousa usun ewe Niwinsefanito mi unusech fiti ei kapas eis: met epwe fori an omw tungor epwe amwarar ngeni ekkoch? Esapw fen en, ewe awewe non manawom? Chommong ekkewe rafen rong me angei pworousen ewe Niwinsefanito ra fen mwasangasang ren met ra kuna non emon memper ika chochon ewe Mwichefenin Jises Kraist. Epwe fen ren sokun ar nikinik ngeni ekkoch, mettoch ra apasa ika rese apasa, ar engino non fansoun mei aweires, ika fen mesemeser.9
Ren metuchok, sise tongeni suseni ewe enet pwe sipwe weweiti me manaweni ekkewe nongonongen ewe kapas allim mei niwin sefan ren ach tufichin tongeni ren ach sipwe tungorei ekoch. Och metoch sa kapas usun ikanai pwe mi pung. Ika ewe tongeni Kraist a nonomw rech, ekkoch repwe sinei pwe ach tong fan iter mei ennet. Ika saramen ewe Ngun mi Fel a nom rech, epwe awora sefan ewe Saramen Kraist non iir.10 Met nonnomum mi pung a anisi om tungoren repwe feito mefi ewe pwapwan unusechun ewe kapas allimen Jises Kraist.
Ewe eunungatin euchean kich mi nounou fan chommong ewe pisekin ekkesiwin Kot a fen amonata fan iten ei amuchunon kinikinin fansoun, ewe Puken Mormon. Mi pwarata usun wisen Joseph Smith pwe emo soufos me pisekin pwarata usun pinin me Manasefanitan Jises Kraist. Awewen an Semach non Nang ewe kokkoten amanau mi fokkun napanap. Nupwen ka apworousa ese Puken Mormon, ka apworousa ewe Niwinsefanito.
Nupwen Jason Olson a emon sarafo, chon an famini me chiechian ra pesei an esapw winiti emon souneng. Mei wor ruemon chiechian mei euchea, inamwo, iir chon ewe Mwichefenin Kraist ren Aramas mi Pin non Fansoun Sopwonon, me iteitan ra pworousen namanam. Chiechian kewe, Shea me Dave, ra apponuwa anini ekkoch ra fen ngeni Jason usun an esapw nuku non Jises Kraist. Saingonon, ra ngeni ew kapin ewe Puken Mormon, ra apasa, “Ei puk epwe penuweni omw kapas eis. Kose mwochen aneani.” A tiperuweru ne etiwa ewe puk me a wanong non an ewe pakpak, ewe ia a nomw ia non fite maram. Ese mwochen nikitatiw non imwan ewe ia an ewe famini epwe kuna me ia, me ese mwochen ochou netipen Shea me Dave an epwe eniwini. Saingonon, a finata pwe epwe keni ewe puk.
Ew pwinin, ew raita non efoch peun me ewe Puken Mormon non ewe efoch, arapakan ngeni a keni ewe puk nupwen a rong ew mengungu non an ekiek a apasa, “Kosapw keni nei na puk.” Mairu, a keuno. Iwe, a ekieki pwe an anchang ewe mengungu, a sotuni sefani an epwe keni ewe raita. Ewe mengungu apwan feito sefan ngeni non an ekiek: “Feino ngeni rumwom ewe me aneani nei na puk.” Jason a watiw ewe raita, fetan sefan ngeni rumwan ewe, suki ewe Puken Mormon, me a pwopwuta aneani. A sopweno ran mwirin ran, fan chomong a tori kunokun winimweran. Npwen Jason a tori nesopwonon me a iotek, a rekotuni, “Uwa mefi ewe Ngun seni won akaschikin mekurei to apachapachei. … Uwa mefi uur ren saram. … Ina ew wachemwuken meseik uwa keran kuna non manawei.” A kutta an epwe papatais me mwirin a winiti emon misineri won winikapan.
Sisapw fen apasa pwe inamwo ika mei wor tong me seni unusen ach mwochen, chommong, ika esapw napengeni, ach kewe tungor ren pekin apworousa ewe kapasen Niwinsefanito epwe wor chon opwut. Nge chechemeni ei: meinisin mei tufich ngeni ei tungor—“meinisin ra nonno chok ngeni Kot”;11ewe Samon mi pwapwa ren ach achocho meinisin sia fori, ese nifinifin pwungunon; ew tungor mei kopwut esapw ew pwopwun sipwe keuno; ar resap mwochen ikanai epwe tongeni ekesiwin ngeni mwochen non kan ran mwach. Inamwo, ach tong mei chok soposopono.
Amo sisap monuki ewe Niwinsefan a feito ren watte osukosuk me fangagang. Ina eu tuttunapen pwan eu ran. Ikenai sia pwapwaiti uwan ewe Niwinsefan, eu nein ekkewe mi kon auchea ena ewe manaman ach sipwe ririfengen won fonufan me won nang.12 Usun Preseten Gordon B. Hinkley a apasa fitu ier me nom, “Ika ese pwan wor met a feito seni ewe osukosuk, sossot, me metekin ewe niwinsefan chienon chok ewe manamanen ririfengen an ewe pristut mi pin minne a ochufengenikich fen feino, epwe och niwinin.”13
Ewe ennetin pwonen ewe Niwinsefanito ina ngaseno non Jises Kraist. Ewe Manausefanin Jises Kraist ina ew afat pwe ii, non ennet, a wor ren pechekunen angasano meinisin ekewe ra feito ren—angasano iir seni ar netipechow, ese anene, niemam, tipis, me fen pwan mano. Ikanai ew Raninfel memwen ranin manaweta; ew wiik seni ikanai iwe Ranin Paska. Sia chechemeni, sia chechemeni iteitan, an Kraist riaffow me mano ne achasefani ach tipis, me sia apwapwai ena Raninfel mei echipwer, ewe ranin ewe Samon, ewe ran minne I a manaw sefan seni an mano. Pwokiten ewe manausefan an Jises Kraist, ewe Niwinsefanito a wor wewen, manawach mei wor wewen, me pwan nununon ach manaw mei wor wewen.
Joseph Smith, ewe unusechun Soufosun ewe Niwinsefanito, a ngenikich ei pwarata non ach fansoun ren Kraist mi manau sefan: “Pwe i mi manau! Pun aua kuna i, pwan mwo won penien mwanin Kot.”14 Uwa unusen apachata ai pwarata ngeni an Joseph me pwan ekewe aposel me soufos memwan me ekewe aposel me soufos ra tapweto mwirin, pwe Jises seni Nazareth ii ewe Messiah mi pwon, ewe Anamon Noun Kot, me ewe Chon Angasanon aramas meinisin.
“Sia affata ei esinisin pwe “ekkewe repwe iotek me kaeo porausun ewe Niwinsefanito me angang fiti nuku repwe feioch ne angei ar pwisin sinei usun auchean me popun pwe epwe ammonata ewe fonufan ren ewe Oruen Niwinsefaniton ach ewe Samon me Chon Amanau, Jises Kraist.”15 An Kraist manausefan a fori an kewe pwon repwe ennet. Non iten Jises Kraist, amen.