O Le Meaalofa Silisili o le Alo
E ala atu ia Iesu Keriso, e mafai ai ona tatou sosola mai i tiga e tatau ai o o tatou toilalo o tulaga lelei ma faatoilalo ia tiga e le tatau ai o o tatou faaletonu o le olaga faaletino.
A o faitauina le Tusi a Mamona mo se lesona o le Sau, Mulimuli Mai ia te A’u i le taumafanafana ua te’a, sa ou maofa i le lipoti a Alema e faapea, ina ua matua silafia atoatoa e ia ana agasala, sa “leai se mea e faapea ona silisili ma faapea ona oona e pei o [ona] tiga.” 1 Ou te tautino atu, o lena talanoaga o le tiga silisili na ou gauai atu i ai i se isi itu, ona o la’u tauiviga i lena vaiaso ma se ma’a fatuga’o e fitu-milimita. E le’i i ai lava se tagata na oo i ia “mea tetele” ina ua “faataunuu” se mea “laiti ma faatauvaa.” 2
O le gagana a Alema sa tu matilatila mai ona o le upu silisili, i le faaliliuga faaPeretania o le Tusi a Mamona, e masani ona faamatala ai mea e silisili ona matagofie po o le mamalu e lēmafaatusalia. Mo se faataitaiga, na tusia e Iosefa Samita le laeiina e le agelu o Moronae o le ofutalaloa “sa matuā paepae lava,” “o se paepae sa silisili atu nai lo soo se mea faalelalolagi” na [ia] vaaia. 3 Ae o le silisili e mafai foi ona faailoa mai ai se mea sili ona malosi e oo foi i mea le lelei. O le mea lea na faafesootai e Alema ma lomifefiloi sili le tiga silisili i le “mafatia,” “tigaina,” ma le “atuatuvale” i le “tulaga silisili.” 4
O le ata a Alema ua atagia ai le mea moni e faapea, o nisi taimi o le tausalaina ogaoga atoatoa o agasala uma tatou te faia e tatau ona lagonaina. O le faamasinoga tonu e manaomia ai, ma e le mafai e le Atua Lava Ia ona suia. 5 Ina ua manatua e Alema ana agasala “uma”—aemaise ia na faatamaia le faatuatua o isi—sa toetoe a ia le gafatia ona tiga, ma le manatu o le tu i luma o le Atua na faatumulia o ia i se “fefe e lefaamatalaina.” Sa ia manao ina ia “tinei i le agaga ma le tino.” 6
Ae peitai, sa fai mai Alema na amata ona suia mea uma i lena lava taimi ina ua “tau ane [lona] mafaufau” i le valoaga o “le afio mai o se tasi o Iesu Keriso … e togiola mo agasala a le lalolagi” ma sa ia “tagi i totonu o [lona] loto: E, Iesu e, oe le Alo o le Atua, ia e alofa mutimutivale mai ia te au.” Faatasi ma lena manatu ma lena olega e tasi, sa faatumulia Alema i le olioli “silisili” “sa sili atu ona tele e pei o [lona] tiga.” 7
E le tatau lava ona tatou faagalo lena lava faamoemoega o le salamo o le ave lea o nisi faanoanoaga ma suia i le fiafia atoatoa. Faafetai i Lona “agalelei vave,” 8 o le taimi lava tatou te o mai ai ia Keriso—faatino le faatuatua ia te Ia ma se suiga moni o le loto—e amata ai ona se’e ese atu le mamafa o a tatou agasala mai o tatou tua i Lona tua. Ua mafai ona fai lenei mea ona o Ia e leai se agasala na puapuagatia i se “tiga lē mafuatia ma lē mafaamatalaina” 9 o soo se agasala i le lalolagi o Ana foafoaga, mo Ana foafoaga uma—o se mafatiaga sili ona ogaga, na tafe mai ai le toto mai Ona pu afu uma. Mai le aafia tuusao ai ma patino, ua lapatai mai ai i tatou e le Faaola, i tusitusiga paia faaneionapo, tatou te le o iloa le “silisili” o o tatou “mafatiaga” pe afai tatou te le salamo. Peitai faatasi ai ma le agalelei lē mafuatia, na Ia faamanino mai ai foi “O A’u, o le Atua, na mafatia i nei mea mo tagata uma, ina ia latou le mafatia pe afai latou te salamo.” 10 —o se salamo lea e faataga ai i tatou e “tofo” i le “olioli tele” na tofo i ai Alema. 11 Mo lenei lava aoaoga faavae, “ou te tu ma ofo.” 12 Ae, e sili ai ona maofa, ua ofo mai e Keriso nisi mea se tele.
O nisi taimi e le oo mai le tiga silisili ona o agasala ae o mea sese faamaoni, o amio a isi tagata, po o malosiaga e le oo i ai lo tatou malosi. I nei taimi, e te ono alaga ai e pei o le faiSalamo amiotonu.
“Ua sapotuvale lo’u lava loto i totonu ia te au; ua oo mai foi ia te au le mata’u i le oti.
“… Ua matuā faagateteina a’u.
“… E ta fia maua apaau e pei o le lupe! ou te lele ese ai lava, i le ou nofo mau ai.” 13
O saienisi faafomai, faufautua faapolofesa, po o tupe e totogi mai faaletulafono, e mafai ona fesoasoani e faaitiitia ai sea mafatiaga. Ae ia manatua, o meaalofa lelei uma—e aofia ai ma nei mea—e maua mai le Faaola. 14 E tusa lava po o a mafuaaga o o tatou tiga matuitui ma loto tiga, o le punavai autu o le toomaga e tutusa lava: o Iesu Keriso. Ua na o Ia lava e umia le mana atoa ma le pulu pasama faamalolo e faasa’oina mea sese uma, faalelei amioga sese, fetuunai ni lē atoatoa uma, faaleleia manu’a uma, ma tuuina mai faamanuiaga uma e tuai [ona oo mai]. E pei o molimau o anamua, ou te molimau atu “e le ia te i tatou faitaulaga sili e le mafaia ona tiga alofa faatasi ma i tatou i o tatou vaivai,” 15 ae o se Togiola alofa na afio mai i Lona nofoalii i luga ma afio atu ma “mafatia i tiga ma puapuaga ma faaosoosoga o ituaiga eseese uma; … ina ia mafai ona ia silafia … le ala e fesoasoani ai i ona tagata.” 16
Mo soo se tasi i le asō o loo i ai ni tiga matuā matuitui pe tulaga ese ua e lagonaina e leai lava se tasi e talisapaiaina atoatoa, atonu e sa’o oe. Atonu e leai se tagata o le aiga, uo, po o se taitai perisitua—po o le a lava le nofouta ma ni faamoemoega lelei e ono i ai i tagata taitasi—e iloa lelei lava le mea o loo e lagonaina pe o i ai foi upu tonu e fesoasoani e te malolo ai. Ae ia iloa le mea lenei: o loo i ai le toatasi e malamalama atoatoa i mea o loo e aafia ai, e “silisili atu lona malosi i le lalolagi,” 17 ma o lē e “mafaia ona faia o mea uma e faasilisili lava i mea [e te[ ole atu ai pe mafaufau i ai.” 18 O le a faaalia mai le faagasologa i Lana ala ma i Lona taimi faatulagaina, ae ua sauni pea Keriso e faamaloloina soo se vaega o lou tiga.
A o e faatagaina o Ia e faia lena mea, o le a e iloaina o ou mafatiaga sa aogā lava. I le talanoa ai i le toatele o toa maoae o le Tusi Paia ma o latou tiga, na saunoa mai ai le Aposetolo o Paulo e faapea “Ua saunia e le Atua … se tasi mea e sili ona lelei mo i [latou e ala i o latou mafatiaga, aua a aunoa ma mafatiaga e] le faaatoatoaina i latou.” 19 Tou te silafia, o le natura moni lava o le Atua ma le faamoemoega o lo tatou olaga faalelalolagi o le fiafia lea, 20 ae e le mafai ona avea i tatou ma tagata atoatoa o le olioli faalelagi e aunoa ma aafiaga e tofotofoina i tatou, o nisi o taimi i lo tatou lava gafatia. Fai mai Paulo e oo lava i le Faaola Lava Ia ua “atoatoa [pe ua faaatoatoaina] ona o tiga.” 21 O lea ia puipui mai musumusuga faasatani e faapea, afai o oe o se tagata e sili ona lelei, ia e aloese mai ia tofotofoga.
E tatau foi ona e teenaina le pepelo e faatatau i ai faapea, o ou mafatiaga ua fautuaina oe e tu i fafo o le li’o o tagata filifilia e le Atua, o ē foliga mai e na o le fiafia ma faamanuiaga latou te maua ae leai ni faigata. Ae, vaai ia te oe lava e pei ona vaai moni Ioane le Talifaaaliga ia te oe i lana faaaliga mamalu o aso e gata ai. Aua na vaai Ioane i le “motu o tagata e toatele mai atunuu uma, ma aiga, ma nuu, ma gagana eseese, e le ma faitaulia e se tasi, [o e na] tutu i luma o le nofoalii ma luma o le Tamai Mamoe, ua oofu i latou i ofu sisina, … [o e ua] alalaga ma leo tetele, ua faapea atu, O i ai le faaolataga i lo tatou Atua.” 22
Ina ua fesiligia: “O i latou ia e ua oofu i ofu sisina, o ai ea i latou? po o fea foi na latou o mai ai?” Na maua e Ioane le tali: “O i latou ia o e o mai nai le puapuaga tele, ua ta foi o latou ofu, ma ua faasinasina o latou ofu i le toto o le Tamai Mamoe.” 23
Uso e ma tuafafine, o le mafatia i le amiotonu e fesoasoani e faaagavaa ai oe mo, nai lo le iloagofie ai o oe, mai le au filifilia a le Atua. Ma ua faia ai a latou folafolaga ma au folafolaga. E pei ona folafola mai e Ioane, e te “le toe fia ‘ai, e le toe fia inu foi; e le ogotia [oe] i le la, po o se tasi vevela. “Aua o le Tamai Mamoe o loo i luma o le nofoalii na te fafaga ia [te oe] ma ta’ita’i ia te [oe] i puna o vai ola; e sōloieseina foi e le Atua o loimata uma nai [ou] mata.” 24
“E leai foi se toe oti, po o se faanoanoa, po o se aue, e leai foi se toe puapuaga.” 25
Ou te molimau atu ia te outou e ala i le tele o le agalelei o Iesu Keriso ma Lana Togiola le iu, e mafai ai ona tatou sosolaese mai tiga e tatau ai o o tatou toilalo o tulaga lelei ma faatoilaloina tiga e le tatau ai o o tatou faaletonu o le olaga faaletino. I lalo o Lana taitaiga, o lou taunuuga paia o le avea ma se tasi o olioli e lēmafaatusalia le matagofie ma e lēmafaamatalaina—o se olioli e matuā malosi ma e matuā tulaga ese ia te oe, o le a avea ou “efuefu” faapitoa ma mea matagofie e “silisili atu nai lo soo se mea faalelalolagi.” 26 Ou te faamoemoe e te tofo i lenei fiafia i le taimi nei ma ia faatumuliaina e oo i le faavavau, ou te valaaulia outou ina ia faia le mea na faia e Alema: ia pu’e mau e lou mafaufau le meaalofa silisili o le Alo o le Atua e pei ona faaali mai e ala i Lana talalelei i lenei, Ekalesia moni ma le ola I le suafa o Iesu Keriso, amene.