Ko Ha Meʻa Angamaheni Foʻou
ʻOku ou fakaafeʻi kimoutolu ke toe lahi ange ʻa hono fakatafoki homou lotó, ʻatamaí, mo e laumālié ki heʻetau Tamai Hēvaní mo Hono ʻAlo ko Sīsū Kalaisí.
Siʻi kāinga ʻofeina, kuo nāunauʻia ʻa e ongo ʻaho ko ʻeni ʻo e konifelenisi lahí! ʻOku ou tui tatau mo ‘Eletā Sefilī R. Hōlani. Hangē ko ʻene laú, kuo tataki kotoa ʻe he ʻEikí ʻa e ngaahi pōpoakí, lotú, mo e hivá. ʻOku ou houngaʻia ʻiate kinautolu kotoa kuo nau kau mai ʻi ha faʻahinga founga pē.
Lolotonga e ngaahi fakatahá, kuó u fakakaukauloto kiate kimoutolu ʻi hoʻomou fanongo ki he konifelenisí. Kuó u kole ki he ʻEikí ke tokoni mai ke mahino ʻa e meʻa ʻoku mou ongoʻí, hohaʻa ki aí, pe feinga ke fakaleleiʻí. Kuó u fakakaukau ki he meʻa te u lava ʻo lea ʻaki ke fakaʻosi ʻaki ʻa e konifelenisí ni ke mou ʻalu atu ai mo ha fakatuʻamelie ki he kahaʻú ʻa ia ʻoku ou ʻilo ʻoku finangalo ʻa e ʻEikí ke mou ongoʻí.
ʻOku tau moʻui ʻi ha kuonga nāunauʻia, ʻa ia naʻe laui senituli ʻa e tomuʻa mamata mai ki ai ʻa e kau palōfitá. Ko e kuonga fakakosipeli ʻeni ʻe ʻikai taʻofi ai ʻa e ngaahi tāpuaki fakalaumālié mei he kau angatonú.1 Neongo ʻa e longoaʻa ʻa e māmaní,2 ka ʻe ʻai ʻe he ʻEikí ke tau “hanganaki atu ki he kahaʻú ʻi he ʻamanaki fiefia.”3 ʻOua naʻa fakamoleki noa hotau taimí ʻi he manatu ki he kuohilí. ʻOku laka ki muʻa ʻa hono tānaki ko ia ʻo ʻIsilelí. ʻOku tataki ʻe he ʻEiki ko Sīsū Kalaisí ʻa ngaahi ngāue ʻa Hono Siasí pea te ne aʻusia ʻa hono ngaahi taumuʻa fakalangí.
Ko e pole leva kiate kitautolú ke fakapapauʻi te tau takitaha aʻusia ʻa e meʻa te tau malava fakalangí. ʻOku tau faʻa fanongo ʻi he ngaahi ʻahó ni ʻo kau ki “ha meʻa angamaheni foʻou.” Kapau ʻokú ke loto moʻoni ke tali lelei “ha meʻa angamaheni foʻou,” ʻoku ou fakaafeʻi kimoutolu ke toe lahi ange ʻa hono fakatafoki homou lotó, ʻatamaí, mo e laumālié ki heʻetau Tamai Hēvaní pea mo Hono ʻAlo ko Sīsū Kalaisí. Tuku ke hoko ia ko hoʻo meʻa angamaheni foʻoú.
Tali lelei hoʻo meʻa angamaheni foʻoú ʻaki hoʻo fakatomala fakaʻahó. Feinga leva ke fakatupulaki ʻa e maʻá ʻi he fakakaukaú, leá, pea mo e ngāué. Ngāue fakaetauhi ki he niʻihi kehé. Maʻu ha fakakaukau ʻoku taʻengatá. Fakahoko totonu ho ngaahi uiuiʻí. Pea neongo pe ko e hā e ngaahi pole ʻokú ke fehangahangai mo iá, kāinga ʻofeina, moʻui ʻi he aho taki taha ke mou mateuteu ange ke feʻiloaki mo homou Tupuʻangá.4
Ko e ʻuhinga ia ʻoku ʻi ai ai hotau ngaahi temipalé. ʻOku teuteuʻi kitautolu ʻe he ngaahi ouau mo e ngaahi fuakava ʻa e ʻEikí ki he moʻui taʻengatá, ʻa ia ko e maʻongoʻonga taha ia ʻi he ngaahi tāpuaki ʻa e ʻOtuá.5 Hangē ko ia ʻoku mou meaʻí, naʻe fie maʻu ke tāpuni fakataimi hotau ngaahi temipalé koeʻuhí ko e mahaki fakaʻauha COVID. Ne tau kamata leva ʻa hono toe fakaava fakakongokonga kinautolú ʻi he fakafekauʻaki mo e mātuʻaki tokanga. ʻI he tūkunga hono 2 ʻoku ava ai ʻa e ngaahi temipale lahi he taimi ní, kuo lava ai ke silaʻi ha ngaahi hoa mali ʻe lauiafe, pea kuo maʻu ʻe he toko lauiafe ʻa honau ʻenitaumení ʻi he ngaahi māhina siʻi kuo hilí. ʻOku mau nofo ʻamanaki atu ki he ʻaho ʻe lava ai ʻa e kau mēmipa moʻui taau kotoa ʻo e Siasí ʻo toe ngāue maʻa ʻenau ngaahi kuí pea moihū ʻi ha temipale māʻoniʻoní.
ʻOku ou fiefia he taimí ni ke fanongonongo atu ha ngaahi palani ke langa ha temipale foʻou ʻe ono ʻi he ngaahi feituʻu ko ʻení: Talaua, Kilipati, Pooti Vila, Vanuatu, Linitoni, ʻIutā; Greater Guatemala Siti, Kuatemala; Sao Paulo East, Palāsila; mo Sanitā Kulusi, Polīviá.
ʻI heʻetau langa mo tauhi ʻa e ngaahi temipale ko ʻení, ʻoku mau lotua te mou takitaha langa mo tauhi kimoutolu ke mou moʻui taau ke hū ki he temipale māʻoniʻoní.
ʻI he taimí ni, siʻoku kāinga ʻofeina, ʻoku ou tāpuakiʻi ke fakafonu ʻaki kimoutolu ʻa e nonga ʻa e ʻEiki ko Sīsū Kalaisí. ʻA ʻEne nongá ʻa ia ʻoku lahi hake ʻaupito ʻi he faʻa ʻiloá.6 ʻOku ou tāpuakiʻi kimoutolu ʻaki ha holi lahi ange mo e malava ke talangofua ki he ngaahi fono ʻa e ʻOtuá. ʻOku ou palōmesi atu ʻi hoʻomou fai iá, ʻe taumalingi atu ʻa e ngaahi tāpuakí, ʻo kau ai ha loto-toʻa lahi ange, fakahā fakatāutaha lahi ange, uouangataha ange ʻi homou ʻapí, mo ha fiefia neongo ʻa e taʻepaú.
Fakatauange ke tau laka fakataha atu ke fakahoko hotau fatongia fakalangí—ʻa hono teuteuʻi ko ia kitautolu pea mo e māmaní ki he Hāʻele ʻAnga Ua Mai ʻa e ʻEikí. ʻOku ou lotua foki, mo fakahā atu ʻa ʻeku ʻofa kiate kimoutolu hono kotoa, ʻi he huafa toputapu ʻo Sīsū Kalaisí, ʻēmeni.