Usa ka Bag-o nga Normal
Ako modapit kaninyo nga ibaling og dugang ang inyong kasingkasing, hunahuna ug kalag ngadto sa atong Langitnong Amahan ug sa Iyang Anak, si Jesukristo.
Minahal nakong mga kaigsoonan, kining duha ka adlaw nga kinatibuk-ang komperensya nahimong mahimayaon! Mouyon ko ni Elder Jeffrey R. Holland. Sama sa iyang giingon, ang mga mensahe, mga pag-ampo, ug ang musika, tanan dinasig sa Ginoo. Mapasalamaton ako sa tanan kinsa miapil sa bisan unsa nga paagi.
Sa tibuok nga mga kahimuan, nakita ko kamo sa akong hunahuna nga naminaw sa komperensya. Ako nangayo sa Ginoo sa pagtabang kanako nga makasabut sa unsay inyong gibati, gikabalak-an, o gipaningkamutan sa pagsulbad. Naghunahuna ko unsay akong isulti sa pagtapos niining komperensya nga mopadala kaninyo nga dunay kamasaligon mahitungod sa umaabut nga ako nasayud nga ang Ginoo gusto nga inyong mabati.
Kita nagpuyo sa usa ka mahimayaon nga panahon, nga nakita sa mga propeta sa daghang mga siglo. Mao kini ang dispensasyon nga walay espirituhanong mga panalangin nga ihikaw sa mga matarung.1 Bisan sa kagubot sa kalibutan,2 ang Ginoo gusto nga kita “[m]aglantaw sa umaabut uban sa malipayong pagpaabut.”3 Dili kita mag-usik sa paningkamot sa panumduman sa kagahapon. Ang pagpundok sa Israel magpadayon. Ang Ginoong Jesukristo naggiya sa mga kalihokan sa Iyang Simbahan, ug kini makakab-ot sa balaang mga tumong niini.
Ang hagit alang kaninyo ug kanako mao ang pagsiguro nga ang matag usa kanato makakab-ot sa iyang balaan nga potensyal. Karon kanunay kitang makadungog mahitungod sa “usa ka bag-o nga normal.” Kon gusto gayud ninyo nga modawat sa usa ka bag-o nga normal, ako modapit kaninyo nga ibaling og dugang ang inyong kasingkasing, hunahuna ug kalag ngadto sa atong Langitnong Amahan ug sa Iyang Anak, si Jesukristo. Himoa kana nga inyong bag-o nga normal.
Dawata ang inyong bag-o nga normal pinaagi sa paghinulsol matag adlaw. Pagtinguha nga mag-anam-anam kaputli ang hunahuna, pulong, ug buhat. Pangalagad ngadto sa uban. Pagbaton og mahangturon nga panglantaw. Buhata ang inyong mga calling. Ug bisan unsay inyong mga hagit, akong mga minahal nga mga kaigsoonan, pagpakabuhi matag adlaw nga ikaw mas andam nga moatubang sa inyong Magbubuhat.4
Mao kana nga kita adunay mga templo. Ang mga ordinansa ug mga pakigsaad sa Ginoo mag-andam kanato alang sa kinabuhing dayon, ang labing mahinungdanon sa tanang mga panalangin sa Dios.5 Sa inyo nang nahibaloan, ang COVID nga pandemya nagkinahanglan og usa ka temporaryo nga pagsira sa atong mga templo. Dayon misugod kita og usa ka mainampingong pakigtakdo, anam-anam nga pag-abli. Uban sa hugna 2 nga gipatuman na karon sa daghang mga templo, liboan ka mga magtiayon ang nasilyo, ug liboan ang nakadawat sa ilang kaugalingong mga pagtuga sa pipila lang ka bulan ang milabay. Kami mahinamong nagpaabut sa adlaw nga ang tanang takus nga mga miyembro sa Simbahan makaserbisyo na usab sa ilang mga katigulangan ug makasimba diha sa usa ka balaan nga templo.
Karon ako malipayon nga mopahibalo sa mga plano alang sa pagtukod sa unom ka bag-ong mga templo nga pagatukuron sa mosunod nga mga dapit: Tarawa, Kiribati; Port Vila, Vanuatu; Lindon, Utah; Greater Guatemala City, Guatemala; São Paulo East, Brazil; ug sa Santa Cruz, Bolivia.
Samtang kita magtukod ug magmentinar niini nga mga templo, kami nag-ampo nga ang matag usa kaninyo magpalig-on ug magmintinar sa inyong kaugalingon aron mahimong takus sa pagsulod sa balaan nga templo.
Karon, akong minahal nga mga kaigsoonan, ako mopanalangin kaninyo nga kamo mapuno sa kalinaw ni Ginoong Jesukristo. Ang Iyang kalinaw dili matugkad sa tawo.6 Ako mopanalangin kaninyo og dugang nga tinguha ug abilidad sa pagsunod sa mga balaod sa Dios. Ako mosaad nga kon buhaton ninyo, kamo mabubu-an og mga panalangin, lakip ang dugang kaisug, dugang nga personal nga pagpadayag, mas nindot nga panag-uyon sa inyong mga panimalay, ug hingpit nga kalipay bisan taliwala sa walay kasiguroan.
Hinaut nga maghiusa kitang magpadayon sa pagtuman sa atong balaan nga sugo—ang pag-andam sa atong kaugalingon ug sa kalibutan alang sa Ikaduhang Pag-anhi sa Ginoo. Ako nag-ampo, inubanan sa akong pagpadayag sa gugma alang kaninyo, diha sa sagradong ngalan ni Jesukristo, amen.