Poro’i mānava
Mānava ia ’outou i te ’āmuira’a rahi ’e i te ha’amaita’ira’a ’ia fa’aro’o i te reo o te Fatu.
E a’u mau taea’e ’e mau tuahine ’e te mau hoa here ’ati a’e te ao nei, tē fa’atae atu nei au i te tāpa’o mānava ia ’outou i teie ’āmuira’a rahi. Tē putuputu nei tātou ’ei ’utuāfare rahi nā te ao nei ma te hina’aro ’ia ha’amori i tō tātou Fatu ’e te Fa’aora ’o Iesu Mesia. Māuruuru i te ’āmuira’a mai ia mātou.
’Ua riro te matahiti i ma’iri a’e nei ’ei matahiti nō te mau buka tāpa’ora’a. E mea pāpū maita’i ē, ’ua ha’api’i mai tātou tāta’itahi i te mau mea ’aita tātou i ’ite i mua ra. Te tahi mau ha’api’ira’a tā’u i ’ite nā mua a’e nei ’ua pāpa’ihia ïa i ni’a i tō’u ’ā’au nā roto i te mau rāve’a ’āpī ’e te ha’api’i pāpū.
’Ei hi’ora’a, ’ua ’ite pāpū vau ē, tē fa’atere nei te Fatu i te mau ’ohipa o tāna ’Ēkālesia. ’Ua parau ’oia, « e fa’a’ite ho’i au ia [’outou] ē, e ti’a iā’u ’ia rave i tā’u iho ra ’ohipa ».1
Pinepine tō’u nā tauturu ’e o vau nei i te māta’ita’i ma te tahe te roimata i tōna ti’ara’a ’ei arai i roto i te mau tupura’a fifi mau, i muri a’e i tō mātou ravera’a ma te maita’i roa, ’e e’ita e nehenehe fa’ahou e rave. ’Ua ti’a noa mātou ma te māere rahi.
Tē māramarama maita’i ato’a a’e nei au i teienei i te aura’a o tāna parau ē, « inaha, e rave ’oi’oi au i tā’u ’ohipa i roto i te tau mau nō te reira ».2 E rave rahi taime ’ua ’oa’oa vau i te mea ē, ’ua arata’i ’oia ’e ’ua fa’atupu i te ha’ape’epe’era’a o tāna ’ohipa—noa atu te ma’i pe’e nā te ao ato’a nei.
E au mau taeaʼe ’e mau tuahine here ē, tei roto te pūai o te ’Ēkālesia i te mau tauto’ora’a ’e te mau ’itera’a pāpū e haere noa ra i te rahi o tōna mau melo. Tei roto i te ’utuāfare te mau ’itera’a pāpū e fa’atupu-maita’i-hia ai. I roto i teie matahiti i ma’iri iho nei, e rave rahi o ’outou tei fa’arahi pāpū i te tuatāpapa i te ’evanelia i roto i tō ’outou fare. Tē ha’amāuruuru atu nei au ia ’outou, ’e e ha’amāuruuru tā ’outou mau tamari’i ia ’outou.
Tē tere noa nei te ’ohipa fa’a’āpīra’a i te hiero nō Roto Miti. Nā roto mai i tō’u piha tōro’a, e nehenehe au e māta’ita’i maita’i i te ’ohipa e tupu ra i ni’a i te tahua hiero.
’A māta’ita’i ai au i te mau rave ’ohipa ’ia tātara i te mau a’a tumu rā’au tahito, te mau auri pape, te mau niuniu uira, ’e te hō’ē fa’atahera’a pape puta, ’ua feruri au i te tītaura’a nō tātou tāta’itahi ’ia tātara, ma te tauturu a te Fa’aora, i te mau hu’ahu’a tahito i roto i tō tātou orara’a.
Te ’evanelia a Iesu Mesia e ’evanelia ïa nō te tātarahapa.3 Maoti te tāra’ehara a te Fa’aora, tē hōro’a mai nei tāna ’evanelia i te hō’ē anira’a ’ia tāmau noa i te taui, i te tupu i te rahi, ’e ’ia rahi atu te vi’ivi’i ’ore. E ’evanelia nō te tīa’ira’a, nō te fa’aora, ’e nō te haerera’a i mua. Nō reira, te ’evanelia e poro’i ïa nō te ’oa’oa ! E ’oa’oa tō tātou vārua i te mau ta’ahira’a ha’iha’i ato’a nō te haere i mua ’o tā ’outou e rave.
Hō’ē tuha’a o te ha’aputuputura’a o ’Īsera’ela, ’e e tuha’a faufa’a roa ïa, ’o tā tātou ïa hōpoi’a ’ei nūna’a, ’ia ti’amā ’e ’ia hina’aro e tauturu i te fa’aineinera’a i te ao nei nō te Tae-piti-ra’a mai o te Fatu.
’A fa’aro’o ai tātou i te mau parau poro’i tei fa’aineine-maita’i-hia nā tō tātou feiā fa’atere i raro a’e i te arata’ira’a a te Vārua Maita’i, tē ani nei au ia ’outou ’ia pure nō te ’ite i te mau hu’ahu’a e ti’a ia ’outou ’ia tātara i rāpae i tō ’outou orara’a ’ia riro mai ’outou ’ei mea ti’amā a’e.
Tē here nei au ia ’outou, e a’u mau taea’e ’e e a’u mau tuahine here, ’e tē fa’a’ite pāpū nei au ē, ’ua ’ite ’e tē here nei tō tātou Metua i te ao ra ’e tāna tamaiti here ia ’outou te ta’ata hō’ē. Tē ti’a nei rāua ma te ineine nō te tauturu ia ’outou i roto i te mau ta’ahira’a ato’a nō te haere i mua ’o tā ’outou e rave. Mānava ia ’outou i te ’āmuira’a rahi ’e i te ha’amaita’ira’a ’ia fa’aro’o i te reo o te Fatu. I te i’oa o Iesu Mesia, ’āmene.