Trutok we I Stret Gud, Doktrin we I Stret Gud, mo Revelesen we I Stret Gud
Plis, mekem konfrens ia i wan taem blong lafet long ol mesej we oli kam long Lod tru long ol wokman blong Hem.
Ol dia brata mo sista blong mi. !Welkam long jeneral konfrens! !Hem i wan bigfala glad blong stap wetem yufala! Yufala i bin stap long maen blong mi plante taem long ol las sikis manis ia we oli pas. Mi bin prea abaot yufala mo blong yufala. Long ol las wik, mi bin prea wetem tingting ia se bae konfrens ia i wan taem blong revelesen mo wan taem blong tingtingbak, hemia long olgeta we oli stap lukaotem ol blesing ia.
Mifala i glad tumas blong toktok wetem yufala aot long Konfrens Senta, bakegen. Plante long ol jea ia oli stap emti, be blong gat samfala memba blong Tabenakol Kwaea, i wan gud step fored. Mifala i welkamem yufala evriwan long bigfala onlaen konfrens ia, nomata weaples yu stap long hem.
Yumi stap lukluk yet long ol nogud wok blong KOVID-19 mo ol narawan blong hem. Mifala i talem tangkyu blong folem kaonsel blong mifala mo advaes blong ol top medikol man mo ol ofisa blong gavman long ol komuniti blong yufala.
Mifala i stap mit, evri jeneral konfrens, olsem we Lod i daerektem.1 Fasin blong hem i bin jenis ova long ol yia. Taem mi yang moa, konfrens i stap blong tri kasem fo dei. Afta, oli daonem i go long tu dei. Evri mesej—blong bifo mo naoia—i risal blong strong prea mo bigfala fasin blong stap rere long spirit.
Ol Jeneral Atoriti, mo ol Jeneral Ofisa blong Jos we bae oli toktok, mesej blong olgeta i lukluk nomo long Sevya blong yumi, Jisas Kraes, sore blong Hem mo bigfala paoa blong Hem blong pemaot man. I neva bin gat wan taem long histri blong wol we save abaot Sevya blong yumi i moa impoten long wanwan man o woman, mo i moa tru long evri sol blong man. Traem tingting. Ol nogud raorao oli go kwik raon long wol—mo olgeta long wanwan laef blong yumi—bae oli stretem olgeta sapos yumi evriwan i jusum blong folem Jisas Kraes mo mekem folem ol tijing blong Hem.
Wetem spirit ia, mi stap invaetem yufala blong lisin long tri samting long taem blong konfrens ia: trutok we i stret gud, doktrin blong Kraes we i stret gud, mo revelesen we i stret gud. Oposit long ol tu tingting blong samfala, i rili gat wan samting olsem, raet mo rong. I rili gat wan trutok we i tru evriwan—trutok we i no save finis. Wan long ol bigfala sik blong tedei, i we, i no gat inaf pipol we oli save weaples blong tanem olgeta blong faenem trutok.2 Mi save talem stret long yufala se wanem bae yufala i harem tedei mo tumoro, i trutok we i stret gud.
Doktrin blong Kraes we i stret gud, i gat paoa. Hem i jenisim laef blong evriwan we i andastanem doktrin ia mo i lukaotem blong praktisim insaed long laef blong hem. Doktrin blong Kraes i helpem yumi blong faenem mo stap long kavenan rod ia. Sapos yumi stap long rod ia we i no isi be i klia i stap, bae yumi kwalifae blong kasem evri samting we God i gat.3 !I no gat wan samting we bae i sas moa bitim evri samting we Papa i gat!
Long en, revelesen we i stret gud blong ansarem ol kwestin blong hat blong yu, bae i mekem konfrens ia i wan nambawan mo yu no save fogetem. Sapos yu no lukaotem yet givhan blong Tabu Spirit blong helpem yu blong harem wanem we Lod i wantem yu lisin long hem long tufala dei ia, mo mi invaetem yu blong mekem naoia. Plis, mekem konfrens ia i wan taem blong lafet long ol mesej we oli kam long Lod tru long ol wokman blong Hem. Lanem olsem wanem blong yusum olgeta insaed long laef blong yu.
Hemia, hem i Jos Ia blong Jisas Kraes blong Ol Lata-dei Sent. Yumi ol kavenan pipol blong Hem. Lod i talemaot se bae Hem i mekem wok blong Hem i hariap long stret taem blong hem,4 mo Hem i stap mekem hemia naoia long wan spid we i stap go antap moa. Yumi gat spesel janis ia blong tekpat long tabu wok ia blong Hem.
Mi askem wan blesing blong i stap wetem olgeta evriwan we oli stap lukaotem laet, save, mo trutok ia we i moa bigwan. Mi talemaot lav blong mi long wanwan long yufala, long tabu nem blong Jisas Kraes, amen.