ខ្ញុំអធិស្ឋានថាទ្រង់នឹងប្រើប្រាស់យើង

ដោយ សារ៉ុន អូប៊ែង

ទីប្រឹក្សាទីមួយនៅក្នុងគណៈប្រធានសមាគមសង្គ្រោះទូទៅ

កិច្ចខិតខំតូចតាចរួមគ្នាបង្កើតបានជាឥទ្ធិពលដ៏ធំមួយក្នុងការពង្រីកដល់កិច្ចការនីមួយៗដែលយើងធ្វើជាច្រើនក្នុងនាមជាសិស្សរបស់ព្រះយេស៊ូវគ្រីស្ទ ។

នំឃុកឃីនេះធ្វើពីម្សៅភីលឡូ និងសណ្ដែកភីថាស្យូ ទុកជាការថ្លែងអំណរគុណ ។ គ្រួសារ ខាដាដូ បានដុតវា ដែលពួកគេជាម្ចាស់ហាងនំចំនួនបីកន្លែងនៅក្នុងទីក្រុងដាម៉ាស ប្រទេសស៊ីរី រាប់ទសវត្សរ៍មកហើយ ។ ពេលមានសង្គ្រាម ពុំមានការផ្គត់ផ្គងម្ហូបអាហារក្នុងទីក្រុងរបស់ពួកគេទេ ដោយសារតែការបិទផ្លូវមិនឲ្យចេញចូល ។ គ្រួសារ ខាដាដូ ចាប់ផ្តើមស្រេកឃ្លានយ៉ាងខ្លាំង ។ ក្នុងស្ថានភាពអស់សង្ឃឹមដ៏ខ្លាំងនេះ ពួកសប្បុរសធម៌ពួកបរិសុទ្ធថ្ងៃចុងក្រោយ និងបុគ្គលិកដ៏ក្លាហានមួយចំនួននៅអង្គការ Rahma Worldwide បានចាប់ផ្ដើមបម្រើអាហារក្ដៅៗជាប្រចាំថ្ងៃ រួមជាមួយនឹងទឹកដោះគោសម្រាប់ក្មេងតូចៗផងដែរ ។ បន្ទាប់ពីគ្រាដ៏លំបាកមួយ គ្រួសារនេះបានចាប់ផ្ដើមជីវិតរបស់ពួកគេ—ក៏ដូចជាចាប់ផ្តើមបើកហាងនំរបស់ពួកគេ—ជាថ្មីម្ដងទៀតនៅក្នុងប្រទេសថ្មីមួយ ។

ថ្មីៗនេះប្រអប់នំឃុកឃីមួយប្រអប់បានផ្ញើមកដល់ការិយាល័យសាសនាចក្រដោយភ្ជាប់ជាមួយនូវសារដូចខាងក្រោម ៖« អស់រយៈពេលជាងពីរខែ យើងបានទទួលអាហារពីអាហារដ្ឋានរបស់អង្គការ Rahma និង [ សប្បុរសធម៌ ] ពួកបរិសុទ្ធថ្ងៃចុងក្រោយ ។ បើពុំដូច្នោះទេ យើងប្រាកដ [ ជា ] ដាច់ពោះស្លាប់បាត់ទៅហើយ ។ សូមទទួលយក … នំនេះពីហាងរបស់ខ្ញុំទុកជាការថ្លែងអំណរគុណដ៏តូចមួយពីខ្ញុំ ។ ខ្ញុំសូមដល់ព្រះដ៏មានមហិទ្ធិឫទ្ធិប្រទានពរដល់អ្នក … ក្នុងគ្រប់ការណ៍ដែលអ្នកធ្វើ » ។ ^១

ឃុកឃីនៃការដឹងគុណ និងការចងចាំ ។ វាគឺសម្រាប់បងប្អូន ។ សូមអរគុណដល់បងប្អូនទាំងអស់ដែលបានអធិស្ឋានឲ្យ បន្ទាប់ពីមើលឃើញនៅលើសារព័ត៌មាន អរគុណដល់បងប្អូនទាំងអស់ដែលបានស្ម័គ្រចិត្តទោះជាពុំងាយស្រួល ឬដែលបានបរិច្ចាគប្រាក់ដោយសប្បុរសទៅកាន់មូលនិធិសប្បុរសធម៌ ដែលទុកចិត្តថាជួយក្នុងសេចក្ដីល្អ ។

ការទទួលខុសត្រូវដ៏ទេវភាពដើម្បីមើលថែដល់ជនក្រីក្រ

សាសនាចក្រនៃព្រះយេស៊ូវគ្រីស្ទ ស្ថិតនៅក្រោមបទបញ្ជាដ៏ទេវភាពដើម្បីមើលថែជនក្រីក្រ ។ ^២ វាគឺជាសរសរបង្គោលមួយនៃកិច្ចការនៃសេចក្តីសង្គ្រោះ និងការលើកតម្កើង ។ ^៣ អ្វីដែលជាការពិតនៅសម័យអាលម៉ាគឺពិតសម្រាប់យើង ៖« ម្ល៉ោះហើយ នៅក្នុងកាលៈទេសៈដ៏ចម្រុងចម្រើនរបស់គេ ពួកគេពុំបានដេញជនណាចេញដែលអាក្រាត ឬជនណាដែលអត់ឃ្លាន ឬជនណាដែលស្រេក ឬជនណាដែលឈឺ ឬជនណាដែលខ្វះការចិញ្ចឹមបីបាច់ឡើយ ហើយពួកគេមិនបានភ្ជាប់ចិត្តគេទៅលើទ្រព្យ សម្បត្តិដែរ ហេតុដូច្នេះហើយ ទើបពួកគេមានចិត្តទូលំទូលាយទៅលើមនុស្សគ្រប់រូប ទាំងចាស់ទាំងក្មេង ទាំងបាវគេទាំងអ្នកសេរី ទាំងប្រុស ទាំងស្រី ទោះជានៅក្រៅសាសនាចក្រ ឬនៅក្នុងសាសនាចក្រនោះក្ដី ដោយមិនរើសមុខអ្នកណាសោះ ឲ្យតែមានការខ្វះខាត » ។ ^៤

សាសនាចក្រឆ្លើយតបចំពោះបទបញ្ជាដ៏ទេវភាពនេះតាមរបៀបផ្សេងៗគ្នាជាច្រើន រួមមាន ៖

ការងារបម្រើដែលយើងធ្វើតាមរយៈសមាគមសង្គ្រោះ កូរ៉ុមបព្វជិតភាព និងថ្នាក់ទាំងឡាយ ។
ការតមអាហារ និងការប្រើប្រាស់ដង្វាយតមអាហារ ។
កសិដ្ឋាន និងរោងចក្រធ្វើម្ហូបកំប៉ុងសម្រាប់សុខុមាលភាព ។
មជ្ឈមណ្ឌលស្វាគមន៍សម្រាប់ជនអន្តោប្រវេសន៍ ។
កម្មវិធីគាំទ្រដល់ទណ្ឌិត ។
កិច្ចខិតខំខាងមនុស្សធម៌របស់សាសនាចក្រ ។
និងកម្មវិធី JustServe ដែលមានសម្រាប់ផ្គូផ្គងអ្នកស្ម័គ្រចិត្តទៅនឹងឱកាសបម្រើនានា ។

នេះជារបៀបទាំងអស់ ដែលរៀបចំតាមរយៈបព្វជិតភាព ដែលកិច្ចខិតខំតូចៗរួមគ្នាបង្កើតបានជាឥទ្ធិពលដ៏ធំមួយ ដែលពង្រីកដល់កិច្ចការនីមួយៗដែលយើងធ្វើយ៉ាងច្រើនក្នុងនាមជាសិស្សរបស់ព្រះយេស៊ូវគ្រីស្ទ ។

ព្យាការីមានភារកិច្ចមើលចំពោះផែនដីទាំងមូល

ព្យាការីមានទំនួលខុសត្រូវមើលថែដល់ផែនដីទាំងមូល មិនត្រឹមតែសមាជិកសាសនាចក្រប៉ុណ្ណោះទេ ។ ខ្ញុំអាចរាយការណ៍ចេញពីបទពិសោធន៍ផ្ទាល់របស់ខ្ញុំថា តើគណៈប្រធានទីមួយទទួលយកទំនួលខុសត្រូវនោះដោយផ្ទាល់ និងលះបង់យ៉ាងណាខ្លះ ។ តាមដែលតម្រូវការកើនឡើង នោះគណៈប្រធានទីមួយបានជំរុញយើងឲ្យបង្កើនការគាំទ្រផ្នែកមនុស្សធម៌ឲ្យកាន់តែខ្លាំង ។ ពួកលោកចាប់អារម្មណ៍ទាំងរឿងធំបំផុត និងកិច្ចការលម្អិតតូចៗបំផុតផងដែរ ។

ថ្មីៗនេះ យើងបាននាំយករ៉ូបការពារខាងវេជ្ជសាស្ត្រដែលក្រុម Beehive Clothing បានដេរសម្រាប់មន្ទីរពេទ្យយកទៅប្រើប្រាស់អំឡុងពេលរោគរាតត្បាត ។ ក្នុងនាមជាវេជ្ជបណ្ឌិតមួយរូប ប្រធាន រ័សុលអិម ណិលសុន មានចំណាប់អារម្មណ៍យ៉ាងខ្លាំង ។ លោកមិនត្រឹមតែចង់ឃើញវាប៉ុណ្ណោះទេ ។ លោកចង់សាកពាក់វា—ពិនិត្យមើលកដៃអាវ និងសម្រុង និងរបៀបដែលវាចងទៅខាងក្រោយយ៉ាងណាផងដែរ ។ ក្រោយមកលោកបានប្រាប់យើង ទាំងសំឡេងក្ដុកក្ដួលថា « នៅពេលដែលប្អូនជួបពួកគេ ពេលប្អូនចុះបំពេញការចាត់តាំងរបស់ប្អូន សូមអរគុណពួកគេសម្រាប់ការតមអាហាររបស់ពួកគេ ដង្វាយរបស់ពួកគេ និងការងារបម្រើរបស់ពួកគេនៅក្នុងព្រះនាមព្រះអម្ចាស់ផង » ។

របាយការណ៍មនុស្សធម៌

ក្រោមការដឹកនាំរបស់ប្រធាន ណិលសុន ខ្ញុំសូមរាយការណ៍ត្រឡប់ទៅបងប្អូនអំពីរបៀបដែលសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ កំពុងឆ្លើយតបទៅនឹងព្យុះសង្ឃរា ការរញ្ជួយដី ការផ្លាស់ទីលំនៅរបស់ជនភៀសខ្លួន—ថែមទាំងរោគរាតត្បាតផងដែរ—សូមអរគុណដល់ចិត្តសប្បុរសរបស់ពួកបរិសុទ្ធថ្ងៃចុងក្រោយ និងមិត្តភក្ដិជាច្រើនផ្សេងទៀតផងដែរ ។ ខណៈដែលគម្រោងទាក់ទងទៅនឹងកូវីដ-១៩ មានចំនួនជាង ១៥០០ គម្រោង ផ្ដោតខ្លាំងបំផុតដល់ការជួយសង្គ្រោះរបស់សាសនាចក្រនៅក្នុងរយៈពេល ១៨ ខែចុងក្រោយនេះ នោះសាសនាចក្រក៏បានឆ្លើយតបទៅនឹងគ្រោះធម្មជាតិចំនួន ៩៣៣ និងវិបត្តិជនភៀសខ្លួនក្នុង ១០៨ ប្រទេស ។ ប៉ុន្តែស្ថិតិមិនបានប្រាប់ពីសាច់រឿងទាំងមូលនោះទេ ង្ហាញនូវរបៀបដ៏តូចបំផុតនៃអ្វីដែលយើងកំពុងធ្វើ ។

ជំនួយសង្គ្រោះ កូវីដ នៅ អាហ្វ្រិកខាងត្បូង

ឌីកេ ម៉ហ្វូទី អាយុ ដប់ប្រាំមួយ ឆ្នាំនៃទីក្រុង វេលខុម ប្រទេសអាហ្វ្រិកខាងត្បូង បានបាត់បង់ឪពុកម្ដាយរបស់នាងកាលពីប៉ុន្មានឆ្នាំមុន ដោយទុកឲ្យនាងថែរក្សាប្អូនៗបីនាក់ដោយខ្លួនឯង ។ វាតែងតែជារឿងគួរឲ្យភ័យខ្លាចសម្រាប់នាងក្នុងការស្វែងរកអាហារឲ្យបានគ្រប់គ្រាន់ ប៉ុន្តែកង្វះការផ្គត់ផ្គង់ដោយសារកូវីដ និងការធ្វើចត្តាឡីស័កបានធ្វើឲ្យនាងស្ទើរតែរកអាហារបរិភោគពុំបាន ។ ជាញឹកញាប់ពួកគេឃ្លាន ពួកគេរស់បាន ដោយសារតែចិត្តសប្បុរសរបស់អ្នកជិតខាងប៉ុណ្ណោះ ។

នៅថ្ងៃដ៏ក្ដៅមួយក្នុងខែ សីហា ឆ្នាំ ២០២០ ឌីកេ មានការភ្ញាក់ផ្អើលដោយមានគេគោះទ្វារផ្ទះរបស់នាង ។ នាងបានបើកទ្វារឃើញមនុស្សមិនស្គាល់ពីរនាក់—ម្នាក់ជាអ្នកតំណាងរបស់សាសនាចក្រមកពីការិយាល័យតំបន់ក្នុងក្រុង ចូហានណេសប៊ឺក និងមន្ត្រីម្នាក់ទៀតមកពីនាយកដ្ឋានអភិវឌ្ឍសង្គមអាហ្វ្រិកខាងត្បូង ។

អង្គការទាំងពីរបានសហការគ្នាដើម្បីនាំយកស្បៀងអាហារទៅដល់គ្រួសារដែលមានហានិភ័យ ។ ឌីកេ បានធូរស្បើយក្នុងចិត្តណាស់ ពេលនាងបានសម្លឹងមើលគំនរអាហារពោត និងអាហារចាំបាច់ផ្សេងៗទៀត ដែលបានទិញដោយមូលនិធិមនុស្សធម៌របស់សាសនាចក្រ ាភិបាលអាចចាប់ផ្ដើមមានសម្រាប់នាង ។

សូមអរគុណដល់ការបរិច្ចាគដ៏លះបង់របស់បងប្អូន ហើយរឿងរបស់ ឌីកេ គឺជាបទពិសោធន៍មួយក្នុងចំណោមបទពិសោធន៍រាប់ពាន់ ដែលកើតឡើងនៅជុំវិញពិភពលោកអំឡុងពេលរោគរាតត្បាតកូវីដនេះ ។

ជំនួយសង្គ្រោះ នៅបន្ទាយរ៉ាមស្ទីន ប្រទេសអាហ្វហ្គានីស្ថាន

យើងទាំងអស់គ្នាបានឃើញពីរូបភាពថ្មីៗនេះក្នុងសារព័ត៌មាន ៖មានជនភៀសខ្លួនរាប់ពាន់នាក់ត្រូវបានហោះចេញពីប្រទេសអាហ្វហ្គានីស្ថាន ។ មនុស្សជាច្រើនបានមកដល់បន្ទាយទ័ពអាកាស ឬនៅទីតាំងបណ្ដោះអាសន្នផ្សេងៗទៀតក្នុងប្រទេសកាតា សហរដ្ឋអាមេរិក ប្រទេសអាល្លឺម៉ង់ និងប្រទេសអេស្បាញ មុននឹងបន្តដំណើរទៅទិសដៅចុងក្រោយរបស់ពួកគេ ។ តម្រូវការរបស់ពួកគេគឺភ្លាមៗ ហើយសាសនាចក្របានឆ្លើយតបជាមួយនឹងសម្ភារ និងអ្នកស្ម័គ្រចិត្ត ។ នៅឯបន្ទាយទ័ពអាកាសរ៉ាមស្ទីន ក្នុងប្រទេសអាល្លឺម៉ង់ សាសនាចក្របានផ្ដល់ការបរិច្ចាគដ៏ធំមានដូចជា កន្ទបទឹកនោម ម្ស៉ៅទឹកគោសម្រាប់ទារក អាហារ និងស្បែកជើង ។

ស្ត្រីកំពុងដេរសម្លៀកបំពាក់សម្រាប់ជនភៀសខ្លួន អាហ្វហ្គានីស្ថាន

បងប្អូនស្ត្រីសមាគមសង្គ្រោះមួយចំនួនបានកត់សម្គាល់ឃើញថា ស្ត្រីអាហ្វហ្គានីស្ថានជាច្រើនបានប្រើប្រាស់អាវរបស់ស្វាមីពួកគេដើម្បីគ្របក្បាលពួកគេ ដោយសារតែក្រណាត់គ្របក្បាលជាប្រពៃណីរបស់ពួកគេត្រូវបានរហែកនៅក្នុងភាពវឹកវរនៅឯអាកាសយានដ្ឋានកាប៊ុល ។ នៅក្នុងទង្វើនៃមិត្តភាព ដោយពុំគិតពីភាពខុសគ្នាផ្នែកសាសនា ឬវប្បធម៌ នោះបងប្អូនស្ត្រីនៃវួដរ៉ាមស្ទីនទីមួយ បានប្រមូលផ្តុំគ្នាដេរសម្លៀកបំពាក់ប្រពៃណីម៉ូស្លីមសម្រាប់ស្ត្រីអាហ្វហ្គានីស្ថាន ។ ស៊ីស្ទើរ ប៊េថានី ហលស៍ បាននិយាយថា « យើងបានឮថា ស្ត្រីទាំងនោះត្រូវការសម្លៀកបំពាក់សម្រាប់ការបួងសួង ហើយយើងក៏ដេរដើម្បីឲ្យពួកគេអាចមាន [ ភាពងាយស្រួល ] ក្នុងការបួងសួង » ។ ^៥

ជំនួយសង្គ្រោះដល់ការរញ្ជួយដីនៅប្រទេសហៃទី

ឧទាហរណ៍បន្ទាប់នេះបង្ហាញបងប្អូនថា បងប្អូនមិនចាំបាច់តែជាអ្នកមាន ឬទាល់តែជាមនុស្សចាស់ ទើបធ្វើជាឧបករណ៍ក្នុងការធ្វើការល្អបាននោះទេ ។ ម៉ារី « ចាដជូ » ចាកគីស៍ អាយុ ១៨ ឆ្នាំ មកពីសាខាខាវៀលូន ក្នុងប្រទេសហៃទី ។ ពេលការរញ្ជួយដីដ៏សាហាវបានវាយប្រហារនៅជិតទីក្រុងរបស់នាងកាលពីខែសីហា នោះផ្ទះរបស់នាងគឺជាផ្ទះមួយនៅក្នុងចំណោមអគាររាប់ពាន់ដែលបានដួលរលំ ។ ស្រមៃពីភាពអស់សង្ឃឹមនៃការបាត់បង់ផ្ទះរបស់បងប្អូនគឺលើសលប់ណាស់ ។ ប៉ុន្តែជាជាងការចុះចាញ់ក្នុងភាពអស់សង្ឃឹមនោះ ចាដជូ—គួរឲ្យអស្ចារ្យណាស់—បានគិតពីផលប៉ះពាល់របស់ការរញ្ជួយដីចំពោះអ្នកដទៃ ហើយទៅជួយពួកគេវិញ ។

នាងបានឃើញអ្នកជិតខាងវ័យចំណាស់កំពុងពិបាក ហើយបានចាប់ផ្ដើមថែទាំគាត់ ។ នាងបានជួយអ្នកដទៃទៀតសម្អាតកម្ទេចកំទី ។ ថ្វីបើនាងអស់កម្លាំង នាងបានចូលរួមនឹងសមាជិកសាសនាចក្រផ្សេងទៀត ដើម្បីចែកអាហារ និងចែកកញ្ចប់អនាម័យដល់អ្នកដទៃទៀត ។ រឿងរបស់ ចាដជូ គ្រាន់តែជាគំរូមួយក្នុងចំណោមគំរូដ៏មានឥទ្ធិពលផ្សេងៗទៀត អំពីការបម្រើដែលយុវវ័យ និងយុវមជ្ឈិមវ័យបានធ្វើ កាលដែលពួកគេព្យាយាមធ្វើតាមគំរូរបស់ព្រះយេស៊ូវគ្រីស្ទ ។

ជំនួយសង្គ្រោះទឹកជំនន់នៅប្រទេសអាល្លឺម៉ង់

នៅប៉ុន្មានសប្ដាហ៍ពីមុនការរញ្ជួយដី ក្រុមយុវមជ្ឈិមវ័យមួយក្រុមទៀត បានផ្ដល់ការបម្រើស្រដៀងគ្នានេះនៅផ្នែកម្ខាងទៀតនៃមហាសុទ្រអាត្លង់ទិក ។ ទឹកជំនន់ដែលជន់លិចទូទាំងអ៊ឺរ៉ុបខាងលិចក្នុងខែកក្កដា ជាទឹកជំនន់ដ៏ធ្ងន់ធ្ងរបំផុតក្នុងរយៈពេលជាច្រើនទសវត្សរ៍មកនេះ ។

នៅទីបំផុត ពេលទឹកបានស្រកទៅវិញ នោះម្ចាស់ហាងម្នាក់នៅស្តេកជាប់មាត់ទន្លេ អាវៃឡឺ ប្រទេសអាល្លឺម៉ង់ បានធ្វើការស្ទង់មើលពីការខូចខាត ហើយមានចិត្តតក់ស្លុតយ៉ាងខ្លាំង ។ បុរសដ៏រាបទាបនេះ ជាអ្នកកាន់សាសនាកាតូលិកដ៏ស្មោះត្រង់ម្នាក់ បានអធិស្ឋានខ្សឹបៗថា សូមឲ្យព្រះបញ្ជូននរណាម្នាក់មកជួយគាត់ផង ។ ព្រឹកបន្ទាប់នោះ ប្រធាន ឌេន ហាមម៉ុន នៃបេសកកម្ម ហ្វ្រែងហ្វើត អាល្លឺម៉ង់ បានមកដល់ច្រកផ្លូវនោះ ជាមួយនឹងក្រុមអ្នកផ្សព្វផ្សាយសាសនាពាក់អាវដៃជំនួយពណ៌លឿង លើជញ្ជាំងហាងរបស់ម្ចាស់ហាងនោះ ដែលមានជាប់ភក់យ៉ាងក្រាស ។ ពួកអ្នកស្ម័គ្រចិត្តបានចូកភក់ចេញ យកកម្រាលព្រំ និងជញ្ជាំងចេញ ហើយបានគរអ្វីគ្រប់យ៉ាងនៅលើផ្លូវដើម្បីគេយកទៅចោល ។ ម្ចាស់ហាងមានអំណរក្រៃលែង បានធ្វើការជាមួយពួកគេអស់ជាច្រើនម៉ោង ទាំងមានចិត្តស្ញប់ស្ញែងដែលព្រះអម្ចាស់បានបញ្ជូនក្រុមពួកអ្នកបម្រើរបស់ទ្រង់ឲ្យឆ្លើយតបការអធិស្ឋានរបស់គាត់—ក្នុងរយៈពេល ២៤ ម៉ោង ! ^៦

« មែនហើយ ខ្ញុំអធិស្ឋានថាទ្រង់នឹងប្រើប្រាស់យើង » ។

និយាយដល់កិច្ចខិតខំខាងមនុស្សធម៌របស់សាសនាចក្រ អែលឌើរ ជែហ្វ្រី អ័រ ហូឡិន ធ្លាប់បានថ្លែងថា « ការអធិស្ឋានត្រូវបានឆ្លើយតប … ភាគច្រើនបំផុត … ដោយព្រះប្រើប្រាស់មនុស្សផ្សេងទៀត ។ មែនហើយ ខ្ញុំអធិស្ឋានថាទ្រង់នឹងប្រើប្រាស់យើង ។ ខ្ញុំអធិស្ឋានថា យើងនឹងជាចម្លើយចំពោះការអធិស្ឋានរបស់មនុស្សទាំងឡាយ » ។ ^៧

បងប្អូនប្រុសស្រី តាមរយៈការងារបម្រើ ដង្វាយ ពេលវេលា និងសេចក្ដីស្រឡាញ់របស់បងប្អូន បងប្អូនគឺជាចម្លើយដល់ការអធិស្ឋានជាច្រើន ។ ប៉ុន្តែនៅតែមានកិច្ចការជាច្រើនដែលត្រូវធ្វើបន្តទៀត ។ ក្នុងនាមជាសមាជិកដែលបានជ្រមុជទឹករូចហើយនៃសាសនាចក្រ យើងស្ថិតនៅក្រោមសេចក្ដីសញ្ញាដើម្បីមើលថែអ្នកដែលត្រូវការជំនួយ ។ កិច្ចខិតខំនីមួយៗរបស់យើង ពុំចាំបាច់តែមានប្រាក់ ឬក៏នៅទីតាំងដ៏ឆ្ងាយនោះទេ ^៨ តែវាពិតជាតម្រូវឲ្យមានការណែនាំពីព្រះវិញ្ញាណបរិសុទ្ធ និងដួងចិត្តដែលមានឆន្ទៈដើម្បីទូលទៅកាន់ព្រះអម្ចាស់ថា « ទូលបង្គំនៅឯណេះហើយ សូមចាត់ទូលបង្គំចុះ » ។ ^៩

ឆ្នាំដែលព្រះអម្ចាស់ទ្រង់សព្វព្រះហឫទ័យ

លូកា ៤កត់ត្រាថា ព្រះយេស៊ូវបានយាងមកភូមិណាសារ៉ែត ជាកន្លែងដែលទ្រង់បានចិញ្ចឹមបីបាច់ ហើយទ្រង់បានឈរនៅក្នុងសាលាប្រជុំដើម្បីអាន ។ នេះគឺនៅកៀកនឹងពេលនៃការចាប់ផ្ដើមការងារបម្រើក្នុងជីវិតរមែងស្លាប់របស់ទ្រង់ ហើយទ្រង់បានដកស្រង់វគ្គបទគម្ពីរមួយចេញពីគម្ពីរអេសាយ ៖

« ព្រះវិញ្ញាណព្រះអម្ចាស់សណ្ឋិតលើខ្ញុំ ពីព្រោះទ្រង់បានចាក់ប្រេងតាំងខ្ញុំ ឲ្យផ្សាយដំណឹងល្អដល់មនុស្សទ័លក្រ ទ្រង់បានចាត់ខ្ញុំឲ្យមក ដើម្បីនឹងប្រោសមនុស្សដែលមានចិត្តសង្រេង ហើយប្រកាសប្រាប់ពីសេចក្តីប្រោសលោះដល់ពួកឈ្លើយ និងសេចក្តីភ្លឺឡើងវិញដល់មនុស្សខ្វាក់ ហើយឲ្យដោះមនុស្សដែលត្រូវគេជិះជាន់ឲ្យរួច

« ព្រមទាំងប្រកាសប្រាប់ពីឆ្នាំដែលព្រះអម្ចាស់កំណត់ទុក ។ …

« … នៅថ្ងៃនេះ បទគម្ពីរនេះបានសម្រេចនៅត្រចៀកអ្នករាល់គ្នាហើយ » ។ ^១០

ខ្ញុំសូមថ្លែងទីបន្ទាល់ថា បទគម្ពីរនេះកំពុងត្រូវបានបំពេញនៅក្នុងជំនាន់របស់យើងផ្ទាល់ផងដែរ ។ ខ្ញុំសូមថ្លែងទីបន្ទាល់ថា ព្រះយេស៊ូវបានយាងមកដើម្បីប្រោសដល់ពួកអ្នកដែលមានចិត្តសង្រេង ធ្វើឲ្យភ្នែកមើលឃើញឡើងវិញ ។ សាសនាចក្ររបស់ទ្រង់ប្រកាសប្រាប់ពីសេចក្តីប្រោសលោះដល់ពួកជាប់សេវកភាព ហើយពួកសិស្សរបស់ទ្រង់នៅទូទាំងពិភពលោកកំពុងព្យាយាមរំដោះមនុស្សដែលត្រូវគេជិះជាន់ឲ្យរួច ។

ខ្ញុំសូមបញ្ចប់ដោយការសួរសំណួរដដែល ដែលព្រះយេស៊ូវបានសួរដល់សាវករបស់ទ្រង់ ស៊ីម៉ូន-ពេត្រុស ថា « តើអ្នកស្រឡាញ់ខ្ញុំ » ទេ ? ^១១ ខ្លឹមសារនៃដំណឹងល្អមាននៅក្នុងរបៀបដែលយើងឆ្លើយសំណួរនោះសម្រាប់ខ្លួនយើង ហើយ « ឲ្យចំណីដល់កូនចៀម [ របស់ទ្រង់ ] » ។ ^១២ ជាមួយនឹងគារវភាព និងសេចក្ដីស្រឡាញ់ដ៏ធំធេងចំពោះព្រះយេស៊ូវគ្រីស្ទ ដែលជាចៅហ្វាយនៃយើង ខ្ញុំសូមអញ្ជើញបងប្អូនម្នាក់ៗឲ្យក្លាយជាផ្នែកមួយនៃការងារបម្រើដ៏អស្ចារ្យរបស់ទ្រង់ ហើយ « ខ្ញុំអធិស្ឋានថាទ្រង់នឹងប្រើប្រាស់យើង » ។ នៅក្នុងព្រះនាមដ៏ពិសិដ្ឋនៃព្រះយេស៊ូវគ្រីស្ទ អាម៉ែន ៕