Dapita si Jesus nga Mosulat sa Inyong Sugilanon
Tugoti nga ang inyong sugilanon mahimong usa nga adunay hugot nga pagtuo, misunod sa inyong Ehemplo, ang Manluluwas nga si Jesukristo.
Magsugod ko pinaagi sa paghatag og pipila ka pangutana, aron mahinuklogan:
-
Unsang klase sa personal nga istorya ang inyong gisulat alang sa inyong kinabuhi?
-
Ang dalan nga gihulagway sa inyong sugilanon tul-id ba?
-
Ang inyong sugilanon motapos ba kon diin kini nagsugod, sa inyong langitnong panimalay?
-
Aduna bay maayong ehemplo sa inyong sugilanon––ug si Jesukristo ba kini?
Ako mopamatuod nga ang Manluluwas mao “ang mag-uugmad ug maghihingpit sa atong pagtuo.”1 Dapiton ba ninyo Siya nga mahimong mag-uugmad ug maghihingpit sa inyong sugilanon?
Siya nasayod sa sinugdanan gikan sa kataposan. Siya mao ang Tiglalang sa langit ug sa yuta. Gusto Siya nga kita mopauli ngadto Kaniya ug sa atong Langitnong Amahan. Siya mihatag kanato sa tanan ug gusto nga molampos kita.
Unsa kaha ang nakapugong kanato sa pagtugyan sa atong istorya ngadto Kaniya?
Tingali kini nga pagtandi makatabang sa pagsukod sa inyong kaugalingon.
Ang usa ka epektibo nga abogado sa korte nahibalo nga atol sa cross-examination, panagsa ra gayod kaayo ka mangutana sa saksi sa butang nga ikaw wala mahibalo sa tubag. Ang sama nga pangutana nagdapit sa saksi sa pagsulti kanimo––ug sa huwes ug sa mga hurado––og usa ka butang nga wala pa ikaw mahibalo. Makadawat unya ka og tubag nga makasopresa kanimo ug sukwahi sa dereksiyon nga imong giplanohan alang sa imong kaso.
Bisan kon sa kinatibuk-an dili maalamon alang sa usa ka abogado ang pagpangutana sa usa ka saksi og pangutana nga wala ka mahibalo sa tubag, ang katugbang mao ang tinuod alang kanato. Makapangutana kita sa atong mahigugmaong Langitnong Amahan, sa ngalan sa atong manggiloy-on nga Manluluwas, ug ang saksi nga motubag sa atong mga pangutana mao ang Espiritu Santo, kinsa kanunay mopamatuod sa kamatuoran.2 Tungod kay ang Espiritu Santo naglihok diha sa hingpit nga pagkahiusa sa Langitnong Amahan ug ni Jesukristo, kita nasayod nga ang mga pagpadayag sa Espiritu Santo kasaligan. Nan, ngano, nga kita usahay magduhaduha man sa pagpangayo sa samang matang sa langitnong tabang, ang kamatuoran nga mapadayag kanato pinaagi sa Espiritu Santo? Nganong atong dugay-dugayon ang pagpangutana sa butang nga wala kita masayod sa tubag kon ang saksi dili lamang mahigalaon apan kanunay nga magsulti sa tinuod?
Tingali tungod kay wala kitay hugot nga pagtuo sa pagdawat sa tubag nga ato unyang madawat. Tingali tungod kay ang kinaiyanhon nga pagkalalaki o pagkababaye nga anaa kanato nagdumili sa hingpit nga pagtugyan sa mga butang ngadto sa Ginoo ug sa bug-os nga pagsalig Kaniya. Tingali mao nga kita mopili nga magpabilin sa sugilanon nga kita mismo ang misulat, usa ka komportable nga bersiyon sa atong sugilanon nga wala usba sa Labing Maayo nga Mag-uugmad. Dili kita gusto nga mangutana ug makadawat og tubag nga dili motakdo pag-ayo sa sugilanon nga atong gisulat alang sa atong kaugalingon.
Sa walay paglipud-lipod, tingali pipila kanato mosulat ngadto sa atong mga istorya sa mga pagsulay nga nakahashas kanato. Apan dili ba kita ganahan og mahimayaon nga pagtapos sa usa ka sugilanon nga atong gibasa kon ang bida makabuntog sa pakigbisog? Ang mga pagsulay mga kabahin sa laraw nga makapahimo sa atong ganahang mga sugilanon nga maagnihon, malungtaron, makapalig-on sa pagtuo, ug takos nga isugilon. Ang nindot nga mga pakigbisog nga nahisulat sa atong mga sugilanon mao ang makapaduol kanato sa Manluluwas ug mohashas kanato, makapahimo kanato nga mas mahisama Kaniya.
Aron si David makabuntog ni Goliath, ang batan-on kinahanglan nga makig-away sa higante. Ang komportable nga sugilanon ni David mao unta ang pagbalik ngadto sa pagbantay sa karnero. Apan hinuon siya namalandong sa iyang kasinatian sa pagluwas sa mga nating karnero gikan sa usa ka liyon ug usa ka oso. Ug nagkuha og kusog gikan niadtong bayanihon nga mga buhat, siya nakatigom og hugot nga pagtuo ug kaisog sa pagtugot sa Dios nga mosulat sa iyang sugilanon, mipahayag, “Giluwas ako sa Ginoo gikan sa koko ug baba sa mga liyon ug sa mga oso busa luwason usab ako niya gikan niining Filistihanon.”3 Uban sa tinguha nga ipatigbabaw ang Dios labaw sa tanan, maminaw sa Espiritu Santo ug matugtanon nga ang Manluluwas mahimong mag-uugmad ug maghihingpit sa iyang sugilanon, ang batan-ong si David mipildi ni Goliath ug miluwas sa iyang katawhan.
Ang labing halangdon nga baroganan sa kabubut-on, sa pagkatinuod, magtugot kanato sa pagsulat sa atong kaugalingon nga mga sugilanon––si David mipauli unta, mibalik sa pagbantay sa karnero. Apan si Jesukristo andam nga mogamit kanato isip balaan nga mga instrumento, talinis nga mga lapis diha sa Iyang mga kamot, aron sa pagsulat og usa ka obra-maestra! Siya maloloy-on nga andam mogamit kanako, usa ka daot nga lapis, isip instrumento sa Iyang mga kamot, kon ako adunay hugot nga pagtuo nga tugotan Siya, kon ako motugot nga Siya mosulat sa akong sugilanon.
Si Ester mao ang laing nindot kaayo nga ehemplo sa pagpatigbabaw sa Dios labaw sa tanan. Imbis nga magpabilin sa mabinantayon nga sugilanon sa pagpatunhay sa kaugalingon, siya mipakita og hugot nga pagtuo, hingpit nga mitugyan sa iyang kaugalingon ngadto sa Ginoo. Si Aman nagplano sa pagpuo sa tanang Judio sa Persia. Si Mardoqueo, paryente ni Ester, nahibalo sa plano ug misulat kaniya [Ester], nag-awhag kaniya sa pakigsulti sa hari alang sa iyang katawhan. Si Esther misulti kaniya nga ang moduol sa hari nga wala gipatawag mahimong patyon. Apan sa dakong pagpakita sa hugot nga pagtuo, siya misugo kang Mardoqueo sa pagtigom sa mga Judio ug sa pagpuasa alang kaniya. “Magpuasa usab ako ug ang akong mga sulugoong babaye,” siya miingon, “ug moadto ako sa hari bisan og supak kini sa balaod. Ug kon mamatay ako, mamatay ako.”4
Si Ester andam nga motugot sa Manluluwas nga mosulat sa iyang sugilanon bisan paman, sa mga mata sa mortalidad, ang kataposan mahimong makalilisang. Maayo nalang gani, ang hari midawat ni Ester, ug ang mga Judio sa Persia naluwas.
Dayag lang, ang lebel sa kaisog ni Ester panagsa ra kaayong gipangayo kanato. Apan ang pagtugot sa Dios nga mopatigbabaw labaw sa tanan, magtugot Kaniya nga mahimong mag-uugmad ug maghihingpit sa atong mga sugilanon, nanginahanglan kanato nga motuman sa Iyang mga sugo ug sa mga pakigsaad nga atong gihimo. Ang atong pagtuman sa sugo ug pakigsaad ang moabli sa linya sa komunikasyon aron kita makadawat og pagpadayag pinaagi sa Espiritu Santo. Ug kini pinaagi sa pagbutyag sa Espiritu nga atong mabati ang kamot sa Manluluwas nga nagsulat sa atong mga sugilanon uban kanato.
Niadtong Abril 2021, ang atong propeta, si Presidente Russell M. Nelson, mihangyo kanato sa pagkonsiderar unsa atong mabuhat kon aduna kitay mas dako nga hugot nga pagtuo kang Jesukristo. Uban sa dugang pa nga hugot nga pagtuo kang Jesukristo, makapangutana kita sa butang nga wala kita masayod sa tubag––mangutana sa atong Amahan sa Langit, sa ngalan ni Jesukristo, sa pagpadala og tubag pinaagi sa Espiritu Santo, kinsa nagpamatuod sa kamatuoran. Kon kita adunay dugang pa nga hugot nga pagtuo, mangutana kita ug dayon andam nga modawat sa tubag, bisan kon kini dili mohaom sa atong komportable nga istorya. Ug ang gisaad nga panalangin nga moabot gikan sa paglihok nga adunay hugot nga pagtuo kang Jesukristo mao ang paglambo sa hugot nga pagtuo diha Kaniya isip atong mag-uugmad ug maghihingpit. Si Presidente Nelson mipahayag nga atong “dawat[on] ang dugang pa nga hugot nga pagtuo pinaagi sa paghimo og butang nga nagkinahanglan og dugang nga hugot nga pagtuo.”5
Busa, ang magtiayon nga walay anak nga nag-antos sa pagkadili makaanak mahimong mangutana diha sa hugot nga pagtuo kon sila ba magsagop og mga bata ug mahimong andam sa pagdawat sa tubag, bisan kon ang sugilanon nga ilang gisulat alang sa ilang kaugalingon naglakip og milagrosong pagpanganak.
Ang senior nga magtiayon mahimong mangutana kon panahon na ba nila nga moserbisyo og misyon ug andam nga moadto, bisan kon ang sugilanon nga ilang nasulat alang sa ilang kaugalingon naglakip og dugang panahon sa pangempleyo. O tingali ang tubag “dili pa,” ug ilang mahibaloan sa ulahing mga kapitulo sa ilang sugilanon nganong gikinahanglan sila sa panimalay og dugay-dugay pa.
Ang bayong-bayong nga batan-ong lalaki ug batan-ong babaye mahimong mangutana nga adunay hugot nga pagtuo kon ang pagtinguha sa esport o akademiko o musika mao ba ang labing bililhon ug andam mosunod sa mga pag-aghat sa hingpit nga saksi, ang Espiritu Santo.
Ngano nga gusto nato nga ang Manluluwas mao ang mag-uugmad ug ang maghihingpit sa atong mga sugilanon? Tungod kay hingpit Siya nga nahibalo sa atong potensyal, Siya modala kanato sa mga dapit nga kita mismo wala makahunahuna. Siya mahimong mohimo kanato nga usa ka David o usa ka Ester. Siya mosulay kanato ug maghashas kanato aron mahimong mas mahisama Kaniya. Ang mga butang nga atong makab-ot samtang kita maglihok nga adunay dugang pa nga hugot nga pagtuo makapalambo sa atong hugot nga pagtuo kang Jesukristo.
Mga kaigsoonan, usa lang ka tuig ang milabay ang atong pinangga nga propeta nangutana: “Andam ba kamo nga ipatigbabaw ang Dios labaw sa tanan diha sa inyong kinabuhi? … Andam ba kamo nga himoon ang bisan unsa nga Iyang ipabuhat kaninyo nga mas importante kay sa bisan unsang ambisyon?”6 Ako mapainubsanon nga modugang niadtong propetikanhong mga pangutana: “Motugot ba kamo sa Dios nga mahimong mag-uugmad ug maghihingpit sa inyong sugilanon?”
Sa Gipadayag atong nakat-onan nga kita mobarog atubangan sa Dios ug pagahukman gikan sa libro sa kinabuhi, sumala sa atong mga binuhatan.7
Kita pagahukman pinaagi sa atong libro sa kinabuhi. Kita makapili sa pagsulat og komportable nga sugilanon alang sa atong kaugalingon. O kita motugot sa Labing Maayo nga Mag-uugmad ug Maghihingpit sa pagsulat sa atong sugilanon uban kanato, tugotan nga ang papel nga Iyang kinahanglan nato nga buhaton maoy hatagan og prayoridad kaysa uban nga mga ambisyon.
Tugoti si Kristo nga mahimong mag-uugmad ug maghihingpit sa inyong sugilanon!
Tugoti nga ang Espiritu Santo nga mahimong inyong saksi!
Pagsulat og sugilanon nga ang dalan nga inyong gisubay tul-id, modala kaninyo og balik ngadto sa inyong langitnong panimalay aron magpuyo sa presensiya sa Dios.
Tugoti nga ang kalisdanan ug kasakit nga kabahin sa matag maayo nga sugilanon mahimong paagi diin kamo makapaduol ngadto, ug mamahimong mas mahisama kang, Jesukristo.
Pagsaysay og sugilanon diin kamo moila nga ang mga langit abli. Pangutana ug mga pangutana nga kamo wala mahibalo sa tubag, nasayod nga ang Dios andam sa pagpahibalo sa Iyang kabubut-on alang kaninyo pinaagi sa Espiritu Santo.
Tugoti nga ang inyong sugilanon mahimong usa nga adunay hugot nga pagtuo, misunod sa inyong Ehemplo, ang Manluluwas nga si Jesukristo. Sa ngalan ni Jesukristo, amen.