Mwichenapen Mwichefen
Ewe Tempel me Om Nongonong non pekin Ngun
October 2021 mwichenap
18:59

Ewe Tempel me Om Nongonong non Pekin Ngun

Seni Preseten Russell M. Nelson

Presetenin Ewe Mwichefenin Jises Kraist ren Aramas mi Pin non Fansoun Soponon

Nupwen och sokkun awosukosuk a fis non manauemi, ewe neni mi tumun ren ngunumw ren omw kopwe nonomw non omw pwon minen non tempel!

Pwi me fefinei achengicheng, Ua kinisou ren ai fitikemi non ei soran ai upwe urenikemi memefin netipei.

Ussun oua sinei, sia fori ew watten forsefanin ewe Salt Lake Tempel mi itefouno non uruo. Ei angangen forun imw a pachenong watten mokutukutun angangen ewe pukutan nongonong, minne mi fokkun pechekun non an angang nap seni pukuwen ier . Nge ei tempel epwe utameno. Non ewe May a no, Ua cheki fetanin ewe watten angang. Ngang uwa ekeieki pwe kopwe kinisow ren omw kuna met punuwei we Wendy me ngang auwa kuna. Ngang ua ekieki oupwene kuna pwata ewe kon “Mi Pochokun Ewe Nongonong a For”1 a wor minefon wewen ngeni kem.

2:4

Vidion ewe fer safanin ewe Salt Lake Tempel: “Kich sia nengeni ewe minen nomwun nongongun ewe Salt Lake Tempel. Ua uta non ew neni fan ewe Garden Room. Nupwen uwa katon foforochun angangen unusen ewe imw, Ua fokkun ingeno non ai mairu ren met kewe pioneers ra fori. Ua unusen ingeno nupwen uwa ekieki pwe ra aueta ei eingeingen tempel fiti ekkewe chok pisekin angang me ar sinenap mi wor rer nap seni pukuwen ier a no.

“Ekkei chommongun ier mwirin, iwe nge ika si katon fichi ne cheki ewe nongonong, sia tongeni kuna met mi pwano ren mokkuk, pwang non pisekin ewe imw mi for seni fau, me sokono nikinikin nonomun murinon seni akkom.

“Iei uwa kuna met ekkewe minefon chon nipwakoch ne anapanapa me oueta mettoch, chon anapanapa napen ew imw, me oueta watten mettoch ra tongen fori ne apochokunnano ena pukutan nongonong, Ua wesewesen mairu. Ar angang a fokkun amwarar!

“Ewe nongonongun ese nifinifin imw, akaewin ew mi watte ussun ei ew, epwe tongeni pochokun ngeni chechin fonu, parang, watten asapawan, me sokkun mettoch epwe awosukosuka unusen ewe imw. Kochufengenin angangen apochokunan iei a poputa epwe apochokunano ei tempel mi pin fiti nongonongun ewe a tongeni me epwe pochokun ngeni sosotun fansoun.”

Sise awora sossot ne ngeni ei osufonochun tempel, ewe napano tumunochun, ew nongonong epwe pochokun ngeni ekkewe pochokunen fonufan tori ewe Engorou Ier. Ussun, a iei fansoun sipwene fori kanapanon kouk—meni kouk sise mo akkangei me mwan—ne apochokuna ach nongonong non pekin ngun pwisin. Kewe fansoun kokko ese fifis me akkom ren kewe kauk ese fifis me akkom.

Pwi me fefinei achengicheng, ikkei ekkewe ran non fansoun soponon. Ika ami me ngang sipwe pochokun ngeni kewe efeiengaw mi weiweita me kewe oumwesimwes, ew kapasen apochokun pwe epwe wor ach pochokunen nongonong non pekin ngun epwe kouta won ewe foun nongonong ach ewe Chon Angasano, Jises Kraist.2

Iwe ngang uwa eisini emon me emon ami, Ifa ussun pochokunen ami nongonong? Me met apochokunen ami kapasen pwarata me weweiti ewe kapas allim mi namot?

Ewe tempel a nom nukanapen apochokunen ach nuku me pwarachou pokiten ewe Chon Ammanau me An nongonong ir kewe wesewesen nuanapechikin ewe tempel. Mettoch meinisin sia kaeo me non ewe tempel, seni emwen me seni ewe Ngun, a anapano ach weweiti Jises Kraist. An kewe auchean angangepin a ri fengenikich ngeni I seni pwon mi pin an pristut. Mwirin, ika sia aponueta ach kewe pwon mii pin, I epwe efeiochukich ren An echikara, manamanen apochokun.3 Me ifa, me ach sipwe mochen An manaman non kewe ran mwach.

Sia fen pin pwon pwe “ika [kich] sia moneta [kich] sisap nuokus.”4 Ei kapasen onukunuk a fen pwano pungun ikenai. Ewe Samon a fen afata pwe inamo ika kewe sosotun ikenai sise mo kukuna, ekkana ra oueta ar nongonong won Jises Kraist, me kaeo ifa ussun ar repwe arapakan ngeni An manaman, ousap fangeta ngeni kewe sokkun osukosuken non ei fansoun.

Pwon mi pin me angangepinin non tempel ra chok minen nom. Ewe Samon a aiti Adam me Eve ar repwe iotek, fori pwon, me fori ar asor.5 Ewer pungun, “nupwen ewe Samon a fen awora aramas won fonufan kewe repwe anneasosichi An kapas, a fen wor annuk ngenir pwe repwe oueta tempel.”6 Nouch kewe pukefel ra masoweni auchean porous ngeni osukunen ewe tempel, ufoufan, kapasan, me pwan ekkoch.7 Meinisin mettoch sa nuku me meinisin pwon Kot a fori ngeni Noun semirit mi pwon ra chufengen non ewe tempel. Non meinisin nefeng, ewe tempel a fen pwarano ewe auchean ennet pwe ekkana ra fori ar pwon ngeni Kot me aponuetar ir semiritin ewe pwon.

Iwe nge, non ewe imwen ewe Samon, sia tongeni fori pwan kewe chok pwon ngeni Kot kewe Abraham, Isaac, me Jacob ra fori. Me sia tongeni angei pwan kewe chok feioch!

Kirtland me Nauvoo Tempel

Kewe tempel ra fen pwan kinikinin ei kinikinin fansoun seni kewe ranin nom.8 Elijah a fang ngeni Joseph Smith kewe kien mumutan riri non ewe Kirtland Tempel. Unusochun ewe pristut a niwinsefanito non ewe Nauvoo Tempel.9

Tori ewe fansoun a mano, Joseph Smith a sopweno ne angei kewe pwarata ra sopweno ewe niwinsefaniton ewe endowment me kewe angangepin ren riri.10 I a esinna, iwe nge, soposoponon a auchea epwe wor asofo sefan. Mwirin angangen ewe endowment ngeni Brigham Young non May 1842, Joseph a ureni Brigham, “Ei ese tetenoch, nge sia fen fori ukukun ach tongeni fan pungun angangan minne sia enenia me uwa anean kopwe wanong ei auchean mettoch nepoum me eteteni o ota non ururun mwich meinisin.”11

Mwirin ewe Soufos a mano, Preseten Young a emweni wesinon ewe Nauvoo Tempel12 me mwirin kewe tempel non ewe kinikinin Utah ra kouta. Ren ewe efeiochun ewe sasarin fan ren ewe St. George Tempel, Bringham Young fiti an pochokun a afata ewe auchean fori angangen non tempel nupwen a apasa, “Nupwen uwa ekieki ewe mettoch, ua mochen ekkewe kapasen fisu chopunap repwe fongunata ekkewe aramas.”13

Seni ena fansoun fefeino, kewe angangepin non tempel ra asofosefan. Preseten Harold B. Lee a awewei ika pwata tetenin angang, annuk, me pwan angangepin non tempel ra soposopono ne ekesiwin non an ewe Chon Amanau ewe Mwichefen mi niwinsefanito. Preseten Lee a apasa: “Kewe nongonongun ewe kapas annimen Jises Kraist ra unusen pin. Ese wor emon epwe siwini kewe nongonong me [annuk] ren ewe Mwichefen me nukun ewe Samon ren pwarata. Nge kewe tetenin ra siwin nupwen ewe memefin emwen a feitto ngeni ekkana ra emweni ren ew fansoun a kawor.”14

Ekieki ifa ussun angangen ewe sakrament a siwin non ekkewe ier. Non kewe ran mwan, ewe konikin ewe sakrament a einet ngeni kewe chon fan non watten nenian. Meinisin ra un seni. Iei sia aea ew me ew kap si chok aea poutano. Ewe tetenin a siwin, nge ewe kewe annuk mi pin pwan kewe chok mi chok nom.

Ekiekochu ekkei unungat ennet:

  1. Ewe Niwinsefanito ew angang mi fiti foforun, esap ew mettoch a wor kokotun an epwe fis, me epwe soposopono tori an ewe Samon epwe niwinsefanito.

  2. Ewe popun ochufengenin Israel15 epwe wato kewe efeiochun ewe tempel ngeni noun Kot semirit mi nikitu.

  3. Nupwen sia kuta ifa ussun ach sipwe torochu ena popun, ewe Samon ewe pwarano chommong anononun wewe. Ewe Niwinsefanito mi chok soposopono a auchea pwarata epwe pwan soposopono.

Ewe Aewin Presetensi me Mwichen Engon me Ruemon Aposel ra fen eis ngeni ewe Samon fan chommong ika mi wor ew murinon anen ar repwe angei ekkewe effeiochun non tempel ngeni Noun kewe semirit mi nikitu. Sia kukuta emwen iteitan won ifa ussun sipwe affata unusen fonufan pungun me nukucharen emwen, pwon mi pin, me angangepin ren tempel inamo ika mi sokofesen kapasen fonu me oruni.

Fan emwenien ewe Samon me ponuen am iotek, minefon ekesiwinin tetenin a fen for. I ewe Emon a mochen kopwe wewe fiti wachimuken fatafatoch won met ka fori kewe pwon repwe fori. I ewe Emon a mochen kopwe sinei unusen An kewe angangepin. I a mochen kopwe weweiti om kewe tufich, pwon, me wisom. I a mochen epwe wor om anonnonen wewe non pekin ngun me esinna ekkewe mettoch ese mo fis ngonuk me mwan. Iei an mochen ren meinisin chon awora aninis ngeni tempel, inamo ika ra nom ian.

Minenomun ekesiwin tetenin non tempel, me ekkoch epwe tapweto, ra soposopono ne pisekin pwarata pwe ewe Samon mi achocho ne emweni An Mwichefen. I a awora tufichin emon me emon kich ach sipwe anapano ne apochokuna ach nongonong non pekin ngun ren ach nukanap chochoni manauach won I me won kewe angangepin me pwon ren An ewe tempel. Nupwen oua wato noummi taropwen mumutan non tempel, ew memefin netip, me ew ekiek mi kukuta imwen ewe Samon ewe imwen kaeo, I epwe aituk.

Towawen neni, apwangapwangen inis, sosot, ika pwan ekkoch kauk ra epeti sonuk om kopwe feinno non tempel non ew kinikinin fansoun, Ua tingor ngeni ami oupwe fori ew fansoun an epwe amonata non ekiekum ekkewe angangepin ka fori.

Ika kose mo mochen feinno non tempel, feinno fan chommong—esap chokukun. Mut ngeni ewe Samon, seni Ngunun we, epwe aituk me amwasangok me ikanan. Ua pwon ngonuk pwe ren ekkoch fansoun, ewe tempel epwe winiti ew nenien eppet, kinamwe, me pwarata.

Ika mi tufich ren ai upwe porous ngeni emon me emon sarafo, upwe tingor ngeni ami oupwe kukuta chienemi oupwe tongeni riri fengen non ewe tempel. Meni oupwe ekieki met sokonon ei epwe fori non manauemi. Ua pwon pwe epwe fori meinisin ekkewe sokofesenin! Nupwen ka opupunu non ewe tempel me ekkeniwin chok, kopwe pochokunono me emwen non om finata.

Ika ngang mi tongeni kapas ngeni emon me emon kewe mwan mi pupunu me punuwer kewe resemo riri fengen non tempel, Upwe tingor oupwe angei auchean mokutun ami oupwe angei ewe tekian, angangepin mi ekesiwin-non manau.16 Epwe fori ew sokofesenin? Ika ma ke mochen om kopwe fefeita feinfeino me chufengen feinfeino. Mochen oupwe chufengen feinfeino esap tufich. Ese pwan wor ew angangen apwapwa ika etipeew esap fis.17

Ika ngang mii tongeni fos ngeni emon mwan ika fefin ra mochen pupunu ren fansoun nakatam nge rese mo kuna chiener feinfeino, ngang upwe pesekemi ousap uti tori apupunu epwe epinipin non ewe imwen ewe Samon. Poputa iei ne kaeo me sinei met wewen epeti ngonuk ewe manamanen pristut

Me ngeni emon me emon ami ion a fori pwon mi pin non tempel, Ua tingor remi oupwe kukkuta—fiti iotek iteitan—om kopwe weweiti kewe pwon mi pin me angangepin non tempel.18 Kewe asamen ngun repwe suuk. Oupwe kaeo ifa ussun oupwe osuono ewe eppet nefinen nang me fonufan, ifa ussun oupwe tingor ren noun Kot kewe chon nang ar repwe etenekikemi, me ifa murinon ami oupwe angei emwen seni nang. Ami tiniken achocho ne fori epwe apochokunakemi me apochokunano ami nongonong non pekin ngun.

Pwi me fefinei achengicheng, nupwen forsefan won ewe Salt Lake Tempel a taweno, esap wor kinamwein neni fansoun ew chechin fonu non ewe Salt Lake Valley nap seni non ewe tempel.

Ussun chok, nupwen och sokkun awosukosuk a fis non manauemi, ewe neni a kon tumun non pekin ngun a nom non ami kewe pwon mi pin non tempel!

Ouse mochen nukuwei nupwen ua apasa pwe nupwen ami nongonong non pekin ngun a kouta won Jises Kraist, ese wor om kopwe chiwen nuokus. Nupwen kopwe ennet ngeni om kewe pwon mi pin a for non tempel, oupwe pochokunono ren an manaman. Mwirin, nupwen chechin fonu non pekin ngun a fis, ouwa tufichin uta non pochokun pokiten ami nongonong non pekin ngun mi pochokun o ese tongeni epwe mokutukut.

Ua tongekemi achengicheng pwi me fefinei,. Ekkei ennet ua sinei: Kot, Samach won Nang, a mochen kopwe fini om kopwe feitto neim ren I. An kokkoten fefeita fochofoch ese awosukosuk, me a osufonu om pungun finata. Ka pusin nemenuk ne fin kopwe ion—me ion kopwe nom ren—non ewe fonufan epwe feitto!

Kot mi manau! Jises ii ewe Kraist! Iei An Mwichefen, a niwinsefanito an epwe anisuk ne aponueta kokotun fetanin manauom. Ua pwarata non itan Jises Kraist mi pin, amen.

Esinesin

  1. Nengeni “Mi Pochokun ewe Nongonong,” Konupin, peich.4.

  2. Iwe nge, “nupwen ewe tefin epwe [tinato] rech an pochokunen [asapwan], … esap wor an epwe pochokun ngeni [kich] … pokiten ewe fau minne [kich] sia oueta, minne ew ennetin nongonong, ew nongonong minne ika aramas ra kauta won resap tongeni turutiw” (Ilaman 5:12; auchean mi kapacheta).

  3. Nengeni Doctrine and Covenants 109:15, 22.

  4. Doctrine and Covenants 38:30; nengeni pwan Doctrine and Covenants 10:55.

  5. Nengeni Moses 5:5–6.

  6. Bible Dictionary, “Tempel.”

  7. Awewe chok, nengeni Exodus 28; 29; Leviticus 8. Ewe tabernacle non fansoun Moses mi esisin pwe eu “imwen kapasen pwarata” (Numbers 9:15) me eu “tabernacle an kapasen pwarata” (Exodus 38:21). An Solomon ewe tempel a tano non 578 B.C, ekkoch ier mwirin an Liai famini a tou seni Jerusalem. Ewe niwinsefaniton ei tempel seni Zerubbabel a fis ekkoch 70 ier mwirin. Iwe mwirin a tano seni ekkei non 37 BC. Herod a aweteno ewe tempel non arap ngeni 16 BC. Mwirin ei tempel, a itefouno meren Jises, a tano non AD 70. A wor an Nifai tempel-ussun met a fifis ren “feita ngeni ewe chuk fan chommong” an epwe iotek (1 Nifai 18:3) me mwirin, non kewe fonuwen America, ew tempel a kouta “a appiru napanapan an Solomon we tempel,” ina mo ika ese kon tekarara ofoutan (nengeni 2 Nifai 5:16).

  8. Nengeni Doctrine and Covenants 88:119; 124:31.

  9. Nengeni Doctrine and Covenants 110:13–16; 124:28. Ewe foun nongonong ren ewe Nauvoo Tempel a for non April 6, 1841, mwirin chok ekkoch maram mwirin an Joseph Smith a angei ewe pwarata an epwe oueta. Ewe Nauvoo Tempel a wor watten angangan. Awewe chok, ewe Samon a awewei pwe ew nenien papatais a auchea ren ekkewe souneng ar repwe papatais ren ekkewe mi mano (nengeni Doctrine and Covenants 124:29–30).

  10. Nengeni Doctrine and Covenants 131; 132. Doctrine and Covenants 128 a masoweni echo taropwe Joseph Smith a makkei ngeni kewe souneng ussun papatais ren mi mano. Ikana a affata pwe ewe amanauen kewe mi mano “a auchea me namot ngeni ach amanauach, … [ren] ir ika esap fan itach resap unusochuno—ika esap ren kich ach kewe mi mano resap unusochuno” (wokisin 15).

  11. Joseph Smith, non Saints: The Story of the Church of Jesus Christ in the Latter Days, vol. 1, The Standard of Truth, 1815–1846 (2018), 454.

  12. “George A. Smith noun Mwichefen chon fori uruo a awesano ren 5,634 pwiich me fefinach ra angei ar epinipin non ewe Tempel Nauvoo ese mo kon wesochuno non December 1845 me January 1846. Ochufenin pwupwunu a sopwosopwono tori Feb. 7, [1846,] ren na fansoun a nap seni 2,000 pwupwunu ra fen nomw fengen seni ewe pechekunen pristut ren fansoun feinfeino” (Bruce A. Van Orden, “Temple Finished before Exodus,” Deseret News, Dec. 9, 1995, deseret.com; nengeni pwan Richard O. Cowan, “Endowments Bless the Living and Dead,” Church News, Aug. 27, 1988, thechurchnews.com).

  13. “Met ke ekieki kewe sam repwe ura ika ir mi tongeni kapas seni kewe mi mano? Met resap apasa, ‘Am aua fen kokkon ikei ren fitu ngorou ier, ikei non ei imwen fotek, utiwit ngeni ei kinikinin fansoun epwe feitto’? … Pwata, ika a wor rer ewe manaman kewe wesewesen chopunapen nang repwe nom non seningach, ika sipwe tongeni esina auchean ewe angang sia nom non. Meinisin kewe chon nang non nang ra nenengeni ei ukukun aramas, me amanauereta ren ewe amanauen ewe faminien aramas. … Nupwen ua ekieki ussun ei mettoch, ua mochen ekkewe kapasen fisu chopunap repwe fongunata kewe aramas”(Discourses of Brigham Young, sel. John A. Widtsoe [1954], 403–4).

  14. Harold B. Lee, “God’s Kingdom—a Kingdom of Order,” Ensign, Jan. 1971, 10. Nengeni pwan ew pworous a kawor sen Preseten Wilford Woodruff in 1896; a afata: “Ua mochen apasa, ussun emon presetenin Ewe Mwichefenin Jises Kraist ren Aramas mi Pin Non Fansoun Soponon, pwe iei sipwene feinno me feinno mwach. Kich sise mo [tour] ngeni fiti pwarata. … President [Brigham] Young, ewe a tapwoto mwirin President Joseph Smith, a emweni ngeni kich ikei. A forata ekkei tempel me fori ekkewe popun an kokko me wisan. … Ese mo angei meinisin kewe pwarata fan iten an ewe angang, esap pwan Preseten Taylor, ika Wilford Woodruff. Esap wor nemuchun ei angang tori an epwe unusochuno” (The Discourses of Wilford Woodruff, sel. G. Homer Durham [1946], 153–54).

  15. Nengeni 3 Nifai 29:8–9.

  16. Nengeni Doctrine and Covenants 131:2–4.

  17. Nengeni Doctrine and Covenants 132:7.

  18. Elder John A. Widtsoe a makkei: “Ngeni ewe mwan ika fefin ewe a no non ewe tempel, fiti nennenon mas, nenengenoch ngeni kewe esisin me ekkewe annuk mi pin me nukuchar ne fori, sopweno ne sotuni om kopwe weweiti ewe unusen wewen, Kot a kapas an kapas, me pwarata epwe etto. Ewe endowment a fokkun wou ren esisin ekkewe chok mi umwes repwe sotuni ne awewei; mi ur ren kewe pwarata ngeni ekana ra omokutu ar pochokun ne kutta me kuna, pwe ese wor anon aramas epwe tongeni awewei ika afata ekkewe tufich ra nom non angangen ewe tempel. Ewe endwoment minne ewe a kawor meren pwarata a tongeni weweoch ren pwarata” (non Archibald F. Bennett, Saviors on Mount Zion [Sunday School manual, 1950], 168).