Lub Tuam Tsev thiab lub Hauv Paus rau Nej Sab Ntsuj Plig
Thaum twg muaj xwm txheej ntxhov hnyo hauv nej lub neej, qhov chaw nyab xeeb tshaj rau nej sab ntsuj plig yog kev ua raws nraim li lub tuam tsev tej kev khi lus!
Kuv cov kwv tij thiab cov muam, kuv zoo siab nrog nej nyob tag kis no kom qhia nej txog tej kev xav uas nyob hauv kuv lub siab.
Peb tab tom kho txhua yam ntawm lub Tuam Tsev Salt Lake. Tes hauj lwm no yog ua kom txheem lub hauv paus uas ib txwm muaj ntev li ib puas xyoo tag los. Tiam sis lub tuam tsev yuav tsum nyob ntev tshaj. Thaum lub Tsib Hlis Ntuj, kuv tau mus ntsuam xyuas qhov tes num loj no. Kuv xav tias nej yuav nyiam pom tej yam uas kuv thiab kuv tus poj niam Wendy tau pom lawm. Nyaj nej yuav paub vim li cas zaj nkauj “Lub Hauv Paus Ruaj Nrees”1 muaj ib lub ntsiab tshiab rau wb.
Daim vidi-aus los ntawm qhov chaw kho lub Tuam Tsev Salt Lake: “Peb saib lub Tuam Tsev Salt Lake lub hauv paus uas ib txwm muaj. Kuv sawv hauv ib qhov chaw hauv qab chav hu ua Chav lub Vaj. Thaum kuv tshuaj ntsuam txoj kev ua lub tuam tsev no, ua rau kuv xav tsis thoob cov pioneer tau ua li no. Kuv xav txog qhov uas lawv tau ua lub tuam tsev zoo kawg nkaus no nrog tej cuab yeej thiab tej txheej txheem uas lawv muaj ib puas xyoo tag los xwb.
“Tiam sis, ntau xyoo tom qab ntawd, yog peb ntsuam xyuas lub hauv paus zoo zoo, peb yuav pom tej xwm txheej xws li pob zeb yaig zuj zus, muaj tej kis zeb, thiab tej kev txua zeb uas tsis khov.
“Thaum kuv pom tias cov kws kho tuam tsev, cov kws kos daim qhia ua tsev, thiab cov kws ua tsev txawj ua kom txheem tau lub hauv paus, kuv xav tsis thoob. Lawv tes hauj lwm yeej zoo kawg nkaus!
“Ib lub tsev twg lub hauv paus, qhov tseem ceeb yog ib lub tuam tsev loj npaum li no, los yuav tsum muaj zog txaus kom tiv tau av qeeg, kev puas zuj zus, cua hlob, thiab kev tog zuj zus uas txhua lub tsev raug. Tam sim no mam li pib ua tes hauj lwm kom txheem lub tuam tsev lub hauv puas kom ruaj nrees thiaj li yuav nyob tau mus txog thaum kawg.”
Peb siv zog ua txhua yam kom pov hwm lub tuam tsev no, uas ntshe twb tsis khov zuj zus tuaj, es peb yuav muab ib lub hauv paus uas tiv tau txhua yam uas tshwm sim mus txog thaum lub Caij Milenias. Ib yam li ntawd, twb txog lub sij hawm rau peb siv zog ua txhua yam—tej zaum ua tej yam uas peb yeej ib txwm tsis tau ua—kom txheem lub hauv paus rau peb sab ntsuj plig. Yuav tsum ua tej yam tsis tau pom dua nyob rau hauv lub caij nyoog uas tsis tau pom dua.
Kuv cov kwv tij thiab cov muam, lub caij nyoog no yog hnub nyoog kawg. Yog peb yuav tiv tau tej teeb meem thiab tej xwm txheej uas yuav los, peb yeej yuav tsum muaj ib lub hauv paus ruaj nrees rau peb sab ntsuj plig uas nyob saum lub pob zeb uas yog peb tus Txhiv Dim, Yexus Khetos.2
Yog li ntawd kuv xav nug nej tias, nej lub hauv paus ruaj nrees npaum li cas? Thiab nej yuav tsum txheem nej zaj lus tim khawv li cas thiab nej xav to taub dab tsi txog txoj moo zoo?
Lub tuam tsev yeej txhawb nqa peb txoj kev ntseeg thiab tiv thaiv peb sab ntsuj plig vim tus Cawm Seej thiab Nws cov lub qhuab qhia yog lub ntsiab ntawm lub tuam tsev. Txhua yam uas peb kawm hauv lub tuam tsev, los ntawm tej lus qhia thiab los ntawm tus Ntsuj Plig, yuav pab peb to taub txog Yexus Khetos ntxiv. Nws cov kab ke khi peb rau Nws los ntawm tej kev khi lus pov thawj hwj uas dawb ceev. Ces thaum peb ua raws li peb tej kev khi lus, Nws pub ntxiaj ntsim rau peb los ntawm Nws lub hwj chim uas txhawb peb dag zog.3 Thiab peb yeej yuav xav tau Nws lub hwj chim nyob rau yav tom ntej.
Tus Tswv tau cog lus tias “yog [peb] npaj txhij [peb] yuav tsis ntshai.”4 Qhov tseeb no yeej tseem ceeb niaj hnub nim no. Tus Tswv tau hais tias txawm muaj teeb meem niaj hnub no uas tsis tau muaj ua ntej, cov uas cia Yexus Khetos ua lawv lub hauv paus, thiab tau kawm siv Nws lub hwj chim, lawv tsis tas raug tej kev ntxhov siab txhawj xeeb ntawm lub caij nyoog no.
Cov kab ke thiab tej kev khi lus ntawm lub tuam tsev tau muaj puag thaum ub. Tus Tswv tau hais kom Adas thiab Evas thov Vajtswv, khi lus, thiab ua kev txi.5 Muaj tseeb tiag, “thaum twg tus Tswv muaj ib co neeg hauv lub ntiaj teb uas yuav mloog Nws tej lus, Nws txib lawv ua cov tuam tsev.”6 Cov vaj lug kub qhia ntau txog lub tuam tsev tej lus qhia, cov ris tsho, cov lus, thiab ntxiv.7 Txhua yam uas peb ntseeg thiab txhua yam uas Vajtswv tau cog lus tseg rau Nws cov neeg khi lus yeej koom ua ke hauv lub tuam tsev. Nyob hauv txhua lub caij nyoog, lub tuam tsev tau qhia qhov tseeb uas muaj nqis hais tias cov uas khi lus nrog Vajtswv thiab ua raws li tej kev khi lus ntawd yeej yog cov me nyuam khi lus.
Yog li ntawd, nyob hauv tus Tswv lub tsev, peb khi lus nrog Vajtswv ib yam li Anplaham, Ixaj, thiab Yakhauj tau khi. Thiab peb txais tau cov koob hmoov zoo ib yam thiab!
Txij thaum pib lub caij nyoog no los twb tau muaj cov tuam tsev.8 Eliyas tau muab cov yawm sij ntawm txoj cai ua kev cai sib khi rau Joseph Smith nyob hauv lub Tuam Tsev Kirtland. Tau muab lub pov thawj hwj txum tim rov qab los nyob hauv lub Tuam Tsev Nauvoo.9
Mus txog thaum nws raug tua tuag, Joseph Smith tseem tau txais tej kev tshwm sim uas muab kab ke txais qhov vaj txiaj ntsim thiab kev cai sib khi txum tim rov qab los.10 Tiam sis nws paub tias yuav tsum kho ntxiv thaum yav tom ntej. Tom qab nws muab qhov vaj txiaj ntsim rau Brigham Young nyob rau lub Tsib Hlis Ntuj xyoo 1842, Joseph qhia Brigham tias, “Tsis tau kho zoo tag nrho, tiam sis peb tau ua zoo npaum li peb ua tau vim yog tej xwm txheej uas peb raug thiab kuv xav kom koj lav ris qhov no thiab npaj ib tug txheej txheem rau cov kab ke no.”11
Tom qab tus Yaj Saub tau tso lub ntiaj teb no tseg, Thawj Tswj Hwm Young tau saib xyuas kev ua lub Tuam Tsev Nauvoo tiav12 thiab tom qab ntawd tau ua tej tuam tsev nyob hauv Utah. Thaum nws muab tej theem qis zog hauv lub Tuam Tsev St. George fij tseg, Brigham Young rau siab hais txog qhov uas yuav tsum sawv cev ua hauj lwm pab lwm tus hauv lub tuam tsev hais tias, “Thaum kuv xav txog qhov no, kuv xav hais lus nrov npaum li xob quaj kom tib neeg tsim los.”13
Txij thaum ntawd los, twb tau muab lub tuam tsev cov kab ke kho kom zoo zuj zus. Thawj Tswj Hwm Harold B. Lee piav vim li cas tej txheej txheem, tsab cai, thiab kev muab lub tuam tsev cov kab ke yuav hloov nyob hauv tus Cawm Seej lub Koom Txoos. Nws hais tias: “Cov ntsiab cai ntawm Yexus Khetos txoj moo zoo yeej los ntawm Vajtswv los. Tsis muaj leej twg uas muaj cai hloov cov ntsiab cai thiab [cov lus qhuab qhia] ntawm lub Koom Txoos tsuas yog tus Tswv xwb thaum Nws muab kev tshwm sim. Tiam sis tej txheej txheem mam li hloov thaum tus uas tswj hwm txais kev tshoov siab.”14
Cia li xav txog tus txheej txheem muab lub cim nco txog tau hloov li cas. Thaum ub, lawv muab cov dej rau pawg ntseeg nyob hauv ib lub hub loj. Txhua tus tau haus cov dej nyob hauv lub hub ntawd. Tam sim no peb siv cov khob uas siv tag ces muab pov tseg. Tus txheej txheem tau hloov, tiam sis tej kev khi lus yeej zoo ib yam.
Cia li xav txog peb qho tseeb no:
-
Kev Muab Txoj Moo Zoo Txum Tim Rov Qab Los yog ib tug txheej txheem, tsis yog ib lub sij hawm xwb, thiab yuav muaj li ntawd txog thaum tus Tswv rov qab los.
-
Lub hom phiaj ntawm kev muab Ixayees sau los ua ke15 yog kom coj cov koob hmoov los ntawm lub tuam tsev rau Vajtswv cov me nyuam uas rau siab ntseeg.
-
Thaum peb nrhiav kev kom paub ua raws li lub hom phiaj ntawd, tus Tswv muab tswv yim ntxiv tshwm sim rau peb. Kev Muab Txoj Moo Zoo Txum Tim Rov Qab Los uas ib sij mus los yuav tsum muaj kev tshwm sim uas ib sij txais mus los thiab.
Thawj Pawg Thawj Tswj Hwm thiab Pawg Kaum Ob tug Thwj Tim tau thov tus Tswv ntau seb puas muaj tej kev zoo dua kom Nws cov me nyuam uas rau siab ntseeg txais tau cov koob hmoov ntawm lub tuam tsev. Peb thov Vajtswv coj peb paub ua li cas kom tej lus qhia, tej kev khi lus, thiab cov kab ke hauv lub tuam tsev yuav mus ib yam zoo mus thoob plaws lub ntiaj teb, txawm yog muaj tej yam lus thiab tej kab lig kev cai uas sib txawv.
Raws li tus Tswv tau qhia kom teb peb tej lus thov, peb tau hloov tus txheej txheem lawm. Nws yog tus uas xav kom nej to taub meej tias nej khi lus ua dab tsi. Nws yog tus uas xav kom nej ua tag nrho Nws cov kab ke dawb huv. Nws xav kom nej to taub nej tej txiaj ntsim, nej cov lus cog tseg, thiab tej kev lav ris. Nws xav kom nej txais kev tshoov siab uas nej ib txwm tsis tau muaj dua. Nws xav kom muaj li no rau tag nrho cov uas tuaj rau lub tuam tsev, tsis hais lawv nyob qhov twg los yog.
Tej kev hloov lub tuam tsev tej txheej txheem, thiab tej uas yuav muaj yav tom ntej, yog kev ua pov thawj txog qhov uas tus Tswv coj Nws lub Koom Txoos. Nws muab cib fim rau peb txhua tus txheem lub hauv paus rau peb sab ntsuj plig ntxiv thaum peb tsom ntsoov rau Nws thiab rau cov kab ke thiab tej kev khi lus ntawm Nws lub tuam tsev. Thaum nej nqa nej daim ntawv tso cai nkag tuam tsev, thaum nej muaj ib lub siab uas xav ua zoo, thiab lub siab uas xav paub los rau tus Tswv lub tuam tsev tej kev kawm, Nws yuav qhia nej.
Yog tias nej nyob deb, tsis noj qab nyob zoo, los sis muaj lwm yam uas tav nej kev mus rau lub tuam tsev rau ib ntus, kuv caw nej teem sij hawm xav txog nej tej kev khi lus hauv nej lub siab.
Yog tias nej tsis tshua nyiam mus rau lub tuam tsev, yuav tsum mus ntau ntxiv. Cia tus Tswv, los ntawm Nws tus Ntsuj Plig, tshoov nej lub siab nyob ntawd. Kuv cog lus rau nej tias thaum sij hawm dhau mus, lub tuam tsev yuav los ua ib qho chaw nyab xeeb, nplij siab, thiab txais kev tshwm sim.
Yog tias kuv muaj sij hawm hais lus rau txhua tus tub hluas ntxhais hluas, kuv yuav thov kom nej nrhiav ib tug khub uas tsim nyog ua kev cai sib khi hauv lub tuam tsev nrog nej. Tej zaum nej xav paub seb yuav hloov nej lub neej li cas. Kuv cog lus tias yuav hloov nej lub neej tag nrho! Thaum nej sib yuav hauv lub tuam tsev thiab rov qab mus ntau zaus, nej yuav txais dag zog thiab muaj tswv yim thaum nej txiav txim siab ua tej yam.
Yog tias kuv muaj sij hawm hais lus rau txhua nkawm niam txiv uas tseem tsis tau ua kev cai sib khi hauv lub tuam tsev, kuv yuav thov nej ua tej yam kom txais tau txoj kab ke tseem ceeb ntawd.16 Puas yuav hloov nej lub neej? Yuav hloov tsuas yog nej xav vam meej tas mus li thiab nyob ua ke tas mus li. Kev xav nyob ua ke tas mus li xwb yeej yuav tsis hloov nej lub neej. Tsis muaj lwm txoj kab ke los sis kev cog lus yuav ua li ntawd.17
Yog tias kuv muaj sij hawm hais lus rau txhua tus txiv neej los sis poj niam uas xav sib yuav tiam sis tseem tsis tau nrhiav lawv tus khub mus ib txhis li, kuv yuav hais kom nej tsis txhob tos txog thaum nej sib yuav kom txais nej qhov vaj txiaj ntsim hauv tus Tswv lub tsev. Cia li pib tam sim no kom kawm thiab paub tias kev muaj lub hwj chim pov thawj hwj yog dab tsi.
Thiab hais rau nej txhua tus uas tau khi lus hauv lub tuam tsev, kuv thov nej thov Vajtswv tsis tu tsis tseg kom nej yuav to taub tej kev khi lus thiab cov kab ke hauv lub tuam tsev.18 Tej qhov rooj ntawm sab ntsuj plig yuav qhib. Nej yuav kawm paub kom qhib daim ntaub thaiv uas nyob nruab nrab lub ntuj ceeb tsheej thiab lub ntiaj teb, nej yuav kawm paub thov Vajtswv kom cov tim tswv nrog nraim nej nyob, thiab nej yuav paub txais Vajtswv tej lus qhia. Qhov uas nej rau siab ua li ntawd yuav txheem lub hauv paus rau nej sab ntsuj plig kom khov kho.
Kuv cov kwv tij thiab cov muam, thaum twg kho lub Tuam Tsev Salt Lake tiav lawm, yeej yuav tsis muaj ib qhov chaw uas nyab xeeb tshaj thaum av qeeg nyob hauv lub Hav Salt Lake tsuas yog nyob hauv lub tuam tsev ntawd xwb.
Ib yam li ntawd, thaum twg muaj xwm txheej ntxhov hnyo hauv nej lub neej, qhov chaw nyab xeeb tshaj rau nej sab ntsuj plig yog kev ua raws nraim li lub tuam tsev tej kev khi lus!
Thov cia li ntseeg kuv thaum kuv hais tias yog tias nej ua lub hauv paus rau nej sab ntsuj plig rau saum Yexus Khetos, nej tsis tas ntshai dab tsi li. Thaum nej ua raws li nej tej kev khi lus uas nej khi hauv lub tuam tsev, Nws lub hwj chim yuav txhawb nej dag zog. Ces, thaum twg muaj av qeeg ntawm sab ntsuj plig, nej yuav muaj peev xwm sawv khov kho vim lub hauv paus rau nej sab ntsuj plig nyob ruaj nrees thiab txav tsis taus.
Kuv hlub nej, cov kwv tij thiab cov muam. Kuv paub tej yam tseeb no: Vajtswv, peb Leej Txiv Saum Ntuj Ceeb Tsheej xav kom nej xaiv los tsev kom los cuag Nws. Nws txoj hau kev kom nej vam meej mus ib txhis li tsis nyuaj to taub, thiab nyob ntawm nej txoj kev ywj siab xaiv. Nej muaj kev ywj siab xaiv seb nej yuav ua neeg zoo li cas—thiab nej yuav nrog leej twg nyob—hauv lub ntuj rau yav tom ntej!
Vajtswv muaj txoj sia nyob! Yexus yog tus Khetos! Nov yog Nws lub Koom Txoos uas Nws muab txum tim rov qab los kom pab nej hloov ua neeg zoo li Vajtswv. Kuv ua tim khawv li no los ntawm Yexus Khetos lub npe dawb ceev, amees.