Porora’a i te ’evanelia o te hau

Nā te peresideni Russell M. Nelson

Peresideni nō Te ’Ēkālesia a Iesu Mesia i te Feiā Mo’a i te mau Mahana Hope’a nei

Tei ia tātou te hōpoi’a mo’a ’ia fa’a’ite i te mana ’e i te hau o Iesu Mesia i te mau ta’ata ato’a e fa’aro’o mai.

E au mau taea’e ’e mau tuahine here, mānava i te taera’a mai i te ’āmuira’a rahi ! ’Ua tīa’i au i teie mahana ma te rū rahi. Tē pure nei au nō ’outou i te mau mahana ato’a. ’Ua pure ato’a vau ’ia riro teie ’āmuira’a ’ei taime fa’a’āpīra’a i te pae vārua nō te tā’āto’ara’a.

Mai te ’āmuira’a i ma’iri a’e nei, tē tāmau noa nei ā te mau fifi i roto i te ao nei. Tē ha’afifi noa nei ā te ma’i pe’e nā te ao nei i tō tātou orara’a. I teie taime, ’ua ’ārepurepuhia te ao nei e te tama’i ’o tei fa’atopa i te ri’ari’a rahi i ni’a i te mau tāne, te mau vahine ’e tae noa atu i te mau tamari’i.

’Ua ’ite ātea mai te mau peropheta i tō tātou nei ’anotau, ’a tupu ai te mau tama’i ’e te mau ro’o tama’i, ’e e ’ārepurepu roa ho’i te ao pā’āto’a.¹ ’Ei ta’ata ’āpe’e ia Iesu Mesia, tē tāparu nei mātou i te feiā fa’atere o te mau hau fenua ’ia fa’atiti’aifaro i tō rātou mau ta’a-’ē-ra’a nā roto i te hau. Tē pi’i nei mātou i te mau ta’ata i te mau vāhi ato’a ’ia pure nō te feiā nava’i ’ore, ’ia tauturu i te feiā i roto i te fifi ’e ’ia ’imi i te tauturu a te Fatu, ’ia fa’aea teie mau mārōra’a fa’aano.

E a’u mau taea’e ’e mau tuahine, ’aita te ’evanelia a Iesu Mesia i tītau-rahi-hia a’e nei mai teie mahana. Tē ’ōfati nei te mau mārōra’a i te mau mea ato’a tā te Fa’aora i pāruru ’e i ha’api’i. ’Ua here au i te Fatu ia Iesu Mesia ’e tē fa’a’ite pāpū nei au ē, tāna ’evanelia ’o te rāve’a hō’ē ïa ’e te vai maoro nō te hau. Tāna ’evanelia, ’o te ’evanelia ïa nō te hau.²

Tāna ’evanelia, ’o te pāhonora’a hō’ē ïa ’ia tupu ana’e te ri’ari’a i ni’a i te mau ta’ata e rave rahi i roto i te ao nei.³ Tē ha’apāpū nei te reira i te faufa’a rahi ’ia pe’e i te arata’ira’a a te Fatu i tāna mau pipi ’ia « haere […] e fa’a’ite haere i te ’evanelia i te ta’ata ato’a ’e ’ia poro i te ’evanelia i te mau mea ora ato’a ».⁴ Tei ia tātou te hōpoi’a mo’a ’ia fa’a’ite i te mana ’e i te hau o Iesu Mesia i te mau ta’ata ato’a e fa’aro’o mai, ’e e vaiiho i te Atua ’ia upo’oti’a i roto i tō rātou orara’a.

Te mau ta’ata ato’a tei rave i te mau fafaura’a i mua i te Atua, ’ua fafau mai ïa rātou ’ia aupuru ia vetahi ’ē ’e ’ia tāvini i te feiā nava’i ’ore. E nehenehe tātou e fa’a’ite i tō tātou fa’aro’o i te Atua ’e ’ia vai ineine nō te pāhono i te feiā e uiui nei nō ni’a i « te ti’aturira’a e vai ra i roto ia [tātou] ».⁵ E ’ohipa tā tātou tāta’itahi i roto i te ha’aputuputura’a o ’Īsera’ela.

I teie mahana te ha’apāpū fa’ahou nei au ē, ’ua ani mai te Fatu i te feiā ’āpī tāne ti’amā ato’a ’e te itoito, ’ia fa’aineine nō te tāvini i te hō’ē misiōni. Nō te feiā ’āpī tamāroa nō te mau mahana hope’a nei, te tāvinira’a misiōnare e hōpoi’a ïa nō te autahu’ara’a. ’Outou, te feiā ’āpī tamāroa, ’ua fa’ahereherehia ’outou nō teie taime, ’a tupu ai te ha’aputuputura’a o ’Īsera’ela tei fafauhia. ’A tāvini ai ’outou i te misiōni, tē rave nei ’outou i te hō’ē ’ohipa faufa’a rahi i roto i teie ’ohipa ’aita ā i ’itehia a’e nei !

Nō ’outou te mau tuahine ’āpī itoito, te misiōni e rāve’a pūai ato’a, e ’ere rā i te mea fa’ahepohia. Tē here nei mātou i te mau tuahine misiōnare ’e tē fāri’i poupou nei mātou ia rātou ma tō mātou ’ā’au ato’a. E mea nehenehe roa te mea tā ’outou e hōro’a nei nō teie ’ohipa. ’A pure nō te ’ite e hina’aro ānei te Fatu ’ia rave ’outou i te hō’ē misiōni, ’e nā te Vārua Maita’i e pāhono mai i roto i tō ’outou ’ā’au ’e i tō ’outou vairua.

E te mau hoa taure’are’a here ē, e mea faufa’a rahi ’outou tāta’itahi nō te Fatu. ’Ua fa’aherehere ’oia ia ’outou tae roa mai i teie taime, nō te tauturu i te ha’aputuputu ia ’Īsera’ela. Tā ’outou fa’aotira’a ’ia tāvini i te hō’ē misiōni, ’oia ho’i te porora’a ānei ’aore rā hō’ē tāvinira’a misiōni, e riro ïa te reira ’ei ha’amaita’ira’a nō ’outou ’e nō te feiā e rave rahi. E fāri’i ato’a mātou i te mau ta’ata pa’ari fa’aipoipo nō te tāvini, mai te mea e nehenehe tā rātou. ’Aita tā rātou mau tauto’ora’a e nehenehe e monohia.

Tē ha’api’i nei ’e tē fa’a’ite pāpū nei te mau misiōnare pā’āto’a nō te Fa’aora. Nō te pōuri pae vārua i roto i te ao nei i tītau-rahi-hia ai te māramarama o Iesu Mesia. E ti’a i te mau ta’ata ato’a ’ia fāna’o ’ia ’ite i te ’evanelia a Iesu Mesia tei fa’aho’i-fa’ahou-hia mai. E ti’a roa i te ta’ata tāta’itahi ’ia ’ite i hea e ’itehia ai ia rātou te hau ’o tei « [hau ’ē atu] i te ’ite ta’ata nei ».⁶

’A fa’ariro i teie ’āmuira’a ’ei taime nō te hau ’e nō te ’amura’a mā’a pae vārua nō ’outou. ’A ’imi ’e ’a fāri’i i te heheura’a nō ’outou iho i roto i teie mau tuha’a purera’a, tā’u ïa pure i te i’oa mo’a o Iesu Mesia ’āmene.