’Ua ha’amaita’i te tāvinira’a misiōnare i tō’u orara’a ē a muri noa atu
Tē pure nei au ē, e ’ite mai ’outou te feiā ’āpī tamāroa ’e te feiā ’āpī tamāhine ’e tō ’outou nā metua, ’e e pāpū ho’i ia ’outou te huru te tāvinira’a misiōnare e ha’amaita’i a muri atu i tō ’outou orara’a.
Māuruuru e te peresideni Nelson nō te hōro’a-fa’ahou-ra’a i teie parau a’o nō ni’a i te tāvinira’a misiōnare.
Te mau taea’e ’e te mau tuahine, e rave rahi matahiti i ma’iri tē paraparau ra vau i roto i te ’āmuira’a rahi, tupu a’enei te tahi fifi i ni’a i tō’u mata, ’ua ’ino te tuha’a o te mata tei parauhia te « macula », ’e haere noa ē ’aita vau e ’ite maita’i ra ’e terā mata.
I te tāfifira’a vau i te reira, ’ua tupu mai ra tō’u māuruuru rahi i te tahi atu huru hi’ora’a i te mau mea, mai te ferurira’a i te mau mea i tupu. ’Ua hi’o vau i te orara’a tā’u i rātere ’e ’ua ’ite au i te tahi mau ’ohipa i tupu tei taui rahi i tō’u orara’a. Hō’ē o te reira mau ’ohipa, ’o te ha’amaita’ira’a ïa tā’u tāvinira’a taure’are’a misiōnare rave tāmau i Peretāne, i tō’u orara’a ’e ’ua fa’ata’a haere ato’a i tō’u hope’a pae vārua.
’Ua feruri au i te tupura’a te mau fifi fa’arava’ira’a faufa’a nō te Topatarira’a rahi i te mau matahiti 1930, tei tu’u i tō’u nā metua ’e tō mātou nei ’utuāfare i roto i te fifi. Nō te ’imi-noa-ra’a tō’u metua tāne i te fa’aherehere i tāna taiete ho’ora’a pere’o’o ’e i te aupuru i tōna ’utuāfare i roto i terā tau fifi, ’aita atu ra tō’u nā metua i haere i te purera’a nō te hō’ē tau.
Noa atu ā ’aita mātou te ’utuāfare i haere i te mau purera’a a te ’Ēkālesia, ’ua noa’a rā iā’u ’ia haere ri’i nā muri i tō’u mau hoa.
I terā tau, tei roto i tō’u ferurira’a te ’ōpuara’a e haere i te misiōni, ’aita rā vau i paraparau i te reira i tō’u nā metua.
I te haerera’a vau i te ha’api’ira’a tuatoru, ’ua fa’aoti mātou te tahi mau hoa e tāvini i te hō’ē misiōni. ’Ua fārerei au i tō’u ’episekōpo ’e ’ua fa’a’ī au i tā’u pu’e parau misiōnare i te revara’a tō’u nā metua nō te tahi ’ohipa. I te ho’ira’a mai rāua, ’ua hitimahuta rāua i te fa’aro’ora’a i te parau ’āpī ē, ’ua pi’ihia vau e tāvini i Peretāne. ’Ua māuruuru roa vau nō tō rāua ’ana’anatae ’e te turura’a mai i teie fa’aotira’a, nā reira ato’a nō tō’u mau hoa maita’i tei tauturu mai e rave i te fa’aotira’a ’ia tāvini.
’Ua fa’aineine tā’u tāvinira’a misiōnare iā’u ’ia riro ’ei tāne fa’aipoipo ’e ’ei metua tāne maita’i a’e, ’e ’ia manuia i roto i tā’u tapiho’ora’a. ’Ua fa’aineine ato’a te reira iā’u nō te hō’ē orara’a tāvinira’a i te Fatu i roto tāna ’Ēkālesia.
I te ’āmuira’a rahi nō ’Ēperēra 1985, ’ua anihia vau ’ia paraparau i roto i te tuha’a purera’a nā te Autahu’ara’a. ’Ua paraparau ta’a ’ē au i te feiā ’āpī tamāroa. ’Ua paraparau vau nō ni’a i te fa’aineinera’a e tāvini ’ei misiōnare. ’Ua nā ’ō atu vau : « I roto i te mau ha’api’ipi’ira’a ato’a tā’u i fāna’o i roto i tā’u mau fa’auera’a ’ohipa nō te ’Ēkālesia, ’aita e ha’api’ipi’ira’a faufa’a a’e maori rā te ha’api’ipi’ira’a tā’u i fāna’o ’ei peresibutero ’ahuru mā iva matahiti i roto i tā’u misiōni rave tāmau. »1
’Ua ’ite te Fatu ’o vai ’outou. ’Ia tāvini ’outou i te hō’ē misiōni, e tupu te mau ’ohipa ’o tē tauturu ia ’outou ’ia ’ite maita’i a’e ’o vai ’oia. E tupu ’outou i te pae vārua nā roto i te tāvinira’a iāna. Nā ni’a i tōna i’oa, e tonohia ’outou nō te tāvini i te ta’ata. E fa’afāna’o mai ’oia i te mau ’ohipa e ’ite ’outou i te mau muhumuhu a te Vārua Maita’i. E fa’ati’a te Fatu ia ’outou ’ia ha’api’i nā ni’a i tōna i’oa. E fāna’o ’outou i te fa’a’ite iāna ē e nehenehe tāna e tu’u i tōna ti’aturi i ni’a ia ’outou ’e e tūru’i i ni’a ia ’outou.
’A pae a’e ’āva’e i ma’iri, ’ua ’āpe’e mai ’o Elder Jeffrey R. Holland ’e ’o Elder Quentin L. Cook iā’u, rāua i tāvini ato’a i te mau motu nō Peretāne, nō te fārerei i te mau melo ’e te mau misiōnare i terā fenua nehenehe. I reira, ’ua feruri au i tō’u tau taure’are’a misiōnare. Tē parau pāpū atu nei au ē, i te misiōni vau i te ’itera’a ē, ’ua ’ite tō’u Metua i te ao ra ’e tō’u Fa’aora Iesu Mesia ’o vai au, ’e ’ua here rāua iā’u.
’Ua ha’amaita’ihia vau nā roto i tō’u nā peresideni misiōni fa’ahiahia e piti, ’o Selvoy J. Boyer ’e ’o Stayner Richards, nā reira ato’a tō rāua hoa fa’aipoipo iti ia Gladys Boyer ’e Jane Richards. ’Ia hi’o fa’ahou vau, e mea pāpū maita’i atu ā iā’u tō rāua ti’aturi iā’u ’e tō rāua here. ’Ua ha’api’i mai rāua i te ’evanelia iā’u. E mau tītaura’a rahi tā rāua iā’u nei. E rave rahi fa’auera’a ’ohipa ’ōhie ’ore tā rāua i hōro’a mai, nā reira ato’a te mau hōpoi’a fa’aterera’a nō te tauturu iā’u ’ia tupu i te rahi ’e ’ia fa’aineine nō te hō’ē orara’a tāvinira’a.
’Ua feruri ato’a vau i te pi’ira’ahia vau e te peresideni Spencer W. Kimball nō te peresideni i te misiōni nō Tanada Toronto, māua ta’u vahine iti, ’o Barbara, ’e tā māua nā tamari’i. ’Ua pi’i mai te peresideni Kimball ia māua ’ia tāvini i te ’āva’e ’Ēperēra 1974, i muri noa mai i tāna a’ora’a fa’auru nō ni’a i te ’ohipa misiōnare, te upo’o parau, « ’Ia fa’afāriu-ana’e-hia te ao. »2 I roto i terā a’ora’a ’ua fa’ata’a mai te peresideni Kimball i tāna hi’ora’a nō te fa’ataera’a i te ’evanelia i tō te ao ato’a nei. ’Ua pi’i ’oia i te mau misiōnare ’ia rahi atu ā nā te ao ato’a nei. ’Ua fa’aha’amana’o mai ’oia i te tītaura’a a te Fatu « ’ia rave te ta’ata tāta’itahi […] ’ia fa’ateitei i te reo fa’aara i tō te ao nei. »3 ’Ua riro mai te ha’api’ira’a a te peresideni Kimball nō ni’a i te tītaura’a nō te feiā ’āpī tamāroa e tāvini i te hō’ē misiōni, ’ei tumu parau i roto i te mau ’utuāfare ’ati a’e te ao nei. ’Aita te reira tītaura’a i taui. ’Ua māuruuru vau i te mea ē, ’ua ha’apāpū fa’ahou mai te peresideni Russell M. Nelson i te tītaura’a a te Fatu i teie po’ipo’i.
Fātata roa ’a 10 matahiti i teienei tō te peresideni Thomas S. Monson fa’aarara’a i te fa’atopara’a o te matahiti nō te misiōni, nō te feiā ’āpī tamāroa ’e te feiā ’āpī tamāhine.4 I tō’u hi’ora’a, hō’ē tumu rahi nō teie tauira’a, nō te fa’afāna’o rahi atu ā ïa i tō tātou feiā ’āpī i teie taime fa’ataui orara’a ’ia tāvini ’ei misiōnare.
Nā ni’a i tō’u ti’ara’a ’āpōsetolo nō te Fatu Iesu Mesia, tē pi’i nei au ia ’outou te feiā ’āpī tamāroa, ’e te feiā ’āpī tamāhine tei hina’aro e tāvini i te hō’ē misiōni, ’ia ha’amata i teie nei ā taime e paraparau i tō ’outou nā metua nō ni’a i te tāvinira’a i te hō’ē misiōni. Tē ani ato’a nei au ia ’outou ’ia paraparau i tō ’outou mau hoa nō ni’a i te tāvinira’a i te hō’ē misiōni, ’e mai te mea e hoa ’aita i pāpū roa, ’a fa’aitoito iāna ’ia paraparau i tōna ’episekōpo.
’A fafau ia ’outou iho ’e i mua i te Metua i te ao ra ē, e tāvini ’outou i te hō’ē misiōni, ’e mai teie taime atu e tūtava ’outou e vai mā noa ’e te ti’a mā tō ’outou ’ā’au, tō ’outou rima ’e tō ’outou ferurira’a. Tē ani nei au ia ’outou ’ia noa’a mai tō ’outou ’itera’a pāpū pa’ari maita’i nō te ’evanelia a Iesu Mesia i fa’aho’ihia mai.
Te mau metua tāne ’e te mau metua vahine a teie nau feiā ’āpī fa’ahiahia, e hōpoi’a faufa’a rahi tā ’outou i roto i teie ’ohipa fa’aineinera’a. ’A ha’amata i teie nei ā mahana e paraparau i tā ’outou mau tamari’i nō ni’a i te tāvinira’a misiōnare. ’Ua ’ite mātou ē, ’o te ’utuāfare te vāhi fa’auru hōhonu roa nō te tauturu i tō tātou feiā ’āpī tamāroa ’e tō tātou feiā ’āpī tamāhine ’ia fa’aineine.
Mai te mea ’ua ti’a tō ’outou matahiti nō te tāvinira’a misiōnare ’e ’aita ā ’outou i tāvini nō te pararera’a ma’i pe’e ’aore rā nō te tahi atu tumu, tē ani nei au ia ’outou ’ia tāvini i teienei. ’A paraparau i tō ’outou ’episekōpo ’e ’a fa’aineine nō te tāvini i te Fatu.
Tē fa’aitoito nei au ia ’outou te mau ’episekōpo, ’ia tauturu i te feiā ’āpī tamāroa ato’a ’e te feiā ’āpī tamāhine e fātata ra i te matahiti nō te misiōni ’ia fa’aineine nō te tāvini, ’e tē fa’aitoito ato’a nei au ia ’outou te mau ’episekōpo ’ia hi’o mai ’o vai tei ra’ehia i te matahiti ’e ’aita ā i tāvini. ’A ani i te taure’are’a tamāroa tāta’itahi ’ia riro ’ei misiōnare, nā reira ato’a te taure’are’a tamāhine tāta’itahi tei hina’aro e tāvini.
I te mau misiōnare e tāvini nei, māuruuru ia ’outou. ’Ua tupu tā ’outou misiōni i te taime nō te hō’ē pararera’a ma’i pe’e ’ati a’e te ao nei. ’E nō reira, ’aita tā ’outou misiōni i hōho’a roa i tā’u misiōni, ’aore rā i te misiōni o te mau misiōnare tei tāvini nā mua atu i te matahiti 2020. ’Ua ’ite au ē, ’aita i ’ohie roa. Noa atu rā teie mau tau fifi, e ’ohipa tā te Fatu i fa’ata’a nā ’outou e rave, ’e ’ua rave ’outou i te reira ma te fa’ahiahia. ’Ei hi’ora’a, ’ua fa’a’ohipa ’outou i te mau rāve’a ha’apararera’a, e fa’a’ohipara’a ’āpī nō te ’imi mai i te ta’ata tei ineine i te ’apo mai i te ha’api’ira’a nō ni’a i te Fa’aho’i-fa’ahou-ra’a o te ’evanelia a Iesu Mesia. Nō te tāvini-itoito-ra’a ’outou mai te au i tō ’outou ’aravihi, ’ua ’ite au ē, ’ua māuruuru te Fatu i tā ’outou mau tauto’ora’a. ’Ua ’ite au ē e ha’amaita’i tā ’outou tāvinira’a i tō ’outou orara’a.
’Ia ha’amāuruuruhia ’outou i tā ’outou misiōni, ’a ha’amana’o ē, ’aita ’outou i ha’amāuruuruhia i te ’ohipa i roto i te ’Ēkālesia. ’A patu i ni’a i te mau peu maita’i tā ’outou i ha’api’i i roto i te misiōni, ’a tāmau noa i te ha’apūai i tō ’outou ’itera’a pāpū, ’a fa’aitoito i te ’ohipa, ’a pure ’e ’a ha’apa’o i te parau a te Fatu. ’A fa’atura i te mau fafaura’a tā ’outou i rave. ’A tāmau i te ha’amaita’i i te ta’ata ’e i te tāvini ia rātou.
Tē pure nei au ē, e ’ite mai ’outou, te feiā ’āpī tamāroa ’e te feiā ’āpī tamāhine ’e tō ’outou nā metua, ’e e pāpū ho’i ia ’outou te huru te tāvinira’a misiōnare e ha’amaita’i a muri noa atu i tō ’outou orara’a. ’Ia ’ite mai ’outou i roto i tō ’outou ferurira’a ’e i roto i tō ’outou ’ā’au i te mana nō te anira’a tā te Fatu i tu’u i nā misiōnare rahi ra, i te mau tamaiti a Mosia ra. ’Ua nā ’ō ’oia : « ’A haere atu […] ’e ’a fa’ati’a i tā’u parau ; ’e ’ia fa’a’oroma’i ’outou i te fa’a’oroma’ira’a roa ’e te mau ’ati, ’e ’ia fa’ariro ’outou ia ’outou iho ’ei hi’ora’a maita’i […] i roto iā’u, ’e e fa’ariro vau ia ’outou ’ei mauha’a i roto i tō’u nei rima nō te fa’aorara’a i te mau ta’ata e rave rahi. »5
’Ia ha’amaita’i te Atua i te feiā ’āpī o te ’Ēkālesia, ’ia hina’aro rātou ’ia fa’aineine ’e ’ia tāvini iāna, ’o tā’u nei ïa pure ha’eha’a tā’u e pūpū nei i teie po’ipo’i, nā roto i te i’oa o te Fatu Iesu Mesia, ’āmene.