Tiam Sis Peb Tsis Quav Ntsej Lawv
Peb tej kev khi lus thiab cov kab ke taw kev rau peb thiab pab peb nco ntsoov tias peb nrog tus Tswv Yexus Khetos sib raug zoo thaum peb ua raws li peb tej kev khi lus.
Kuv tus poj niam, Susan, wb peb tug tub thiab lawv cov poj niam, wb txhua tus xeeb ntxwv, thiab Txwj Laug Quentin L. Cook, tus uas zaum ze kuv hauv Pawg Kaum Ob tug Thwj Tim rau 15 xyoos lawm, lawv txhua tus yuav ua tim khawv tias kuv tsis txawj hu nkauj. Tiam sis txawm kuv tsis txawj hu nkauj los, kuv nyiam hu tej zaj nkauj los ntawm Kev Muab Txoj Moo Zoo Txum Tim Rov Qab Los. Thaum mloog cov nkauj thiab cov lus zoo mloog ua ke ces pab kuv kawm txog txoj moo zoo tej ntsiab cai thiab tshoov kuv lub siab.
Ib zaj nkauj uas tau pab kuv lub neej ntau yog “Cia Peb Sawv Daws Sib Zog Ua Vajtswv Tes Dej Num.” Kuv tau xav xav thiab kawm txog ib nqe lus los ntawm zaj nkauj qhuas Vajtswv ntawd. “Peb yuav tsis mloog Dab Ntxwg Nyoog cov lus ntxias, vim peb yuav mloog Vajtswv tib leeg tiag.”1
Peb yuav tsis mloog.
Thaum kuv hu zaj “Cia Peb Sawv Daws Sib Zog Ua Vajtswv Tes Dej Num,” kuv pheej xav txog thaum Lihais ua yog toog pom cov neeg uas txiv mus tom hauv ntej ntawm txoj kev uas mus rau tus ntoo uas cawm txoj sia, cov uas tsis “tuav rawv” xwb2 tiam sis lawv “tuav rawv tus nqaj hlau ruaj ruaj tsis tso, mus txog thaum uas lawv los txog thiab qhau cev thiab noj cov txiv ntoo.”3 Lihais piav txog cov neeg coob coob nyob hauv lub tsev loj thiab dav uas taw tes “ntshis thuam [nws] thiab cov uas tab tom noj cov txiv.”4 Qhov uas nws tau ua li cas thaum lawv luag thuam thiab cem nws los yeej zoo kawg thiab ua yooj yim rau kuv nco qab: “Tiam sis peb tsis quav ntsej lawv.”5
Kuv thov kom tus Vaj Ntsuj Plig Dawb Huv yuav foom koob hmoov rau peb thiab tshoov peb lub siab thaum peb nyob ua ke xav txog qhov uas peb yuav tsum ua li cas kom “tsis quav ntsej” tej yam phem thiab tej lub suab uas luag thuam peb hauv lub ntiaj teb niaj hnub no.
Tsis Quav Ntsej
Lo lus Askiv heed txhais tias yus mloog los yog tsom ntsoov rau ib tug neeg los sis ib yam dab tsi. Yog li ntawd, cov lus ntawm zaj nkauj “Cia Peb Sawv Daws Sib Zog Ua Vajtswv Tes Num” qhia peb kom txiav txim siab tias peb yuav tsis mloog tej yam uas tib neeg phem yuav hais. Thiab Lihais thiab cov neeg uas koom nrog nws noj cov txiv ntoo yeej coj yam ntxwv zoo txog kev tsis quav ntsej thaum cov neeg hauv lub tsev loj thiab dav hais lus luag thuam thiab saib tsis taus lawv.
“Vajtswv tus uas muaj sia nyob tus Ntsuj Plig” tau muab Khetos cov lus qhuab qhia, “sau rau hauv [peb] lub siab”6 es cov lus qhuab qhia ntawd ua rau peb muaj zog kom “tsis quav ntsej” tej lus thuam thiab tej yam uas sim kom peb tig mus ntsia nyob hauv lub ntiaj teb no. Piv txwv hais tias, kev ntseeg tus Tswv Yexus Khetos txhawb peb lub dag zog ntawm sab ntsuj plig. Kev ntseeg tus Cawm Seej yog ib lub ntsiab cai ntawm kev muaj peev xwm thiab hwj chim. Thaum peb ua raws li tej lus tseeb los ntawm Nws txoj moo zoo, peb tau koob hmoov vim peb muaj zog ntawm sab ntsuj plig txaus kom txiv mus lawm tom hauv ntej dhau tej teeb meem ntawm lub neej no thiab peb tsom ntsoov rau tej kev xyiv fab uas tus Cawm Seej muab rau peb. Muaj tseeb tiag, “Peb yeej tsis tas ntshai yog peb ua neeg ncaj ncees, vim Vajtswv yeej pab peb, nws yeej yuav nyob ze.”7
Kev Sib Khi Los ntawm tej Kev Khi Lus
Qhov uas yus khi lus dawb ceev thiab ua neeg tsim nyog txais cov kab ke pov thawj hwj muab peb khi rau tus Tswv Yexus Khetos thiab Leej Txiv Saum Ntuj Ceeb Tsheej.8 Qhov no txhais hais tias peb tso siab rau tus Cawm Seej vim nws yog tus uas tuaj peb tog9 thiab tus neeg nruab nrab10 thiab peb cia siab rau Nws tej hauj lwm, txoj kev muaj siab hlub, thiab kev tshav ntuj11 nyob hauv lub neej no. Thaum peb rau siab los cuag Khetos thiab koom ua ke ua Nws txoj hauj lwm, peb txais cov koob hmoov ntawm Nws txoj Kev Theej Txhoj uas nyob mus ib txhis kom ntxuav peb huv, kho peb, thiab txhawb peb dag zog.12
Kev muaj siab xav ua raws li peb tej kev khi lus ua rau peb nrog tus Tswv sib raug zoo uas yog ib yam muaj hwj chim heev kom peb koom siab koom ntsws. Thaum peb ua raws nraim li peb tej kev khi lus thiab cov kab ke dawb ceev, peb tuaj ze Nws13 thiaj li paub tias peb lub neej yuav zoo li cas thaum muaj ib tug uas los saum ntuj los nyob nrog peb. Ces peb yuav tsis xav tias Yexus yog ib tug neeg nyob hauv cov vaj lug kub xwb; Nws tus yam ntxwv thiab Nws tej lus qhia hloov peb tej kev xav thiab txhua yam peb ua.
Kuv tsis txawj piav zoo txaus txog lub hwj chim uas los ntawm peb tej kev khi lus nrog Vajtswv Leej Tub uas tau sawv rov los. Tiam sis kuv ua tim khawv tias qhov uas peb yuav nrog Nws thiab Leej Txiv Saum Ntuj Ceeb Tsheej sib raug zoo los muaj tiag thiab qhov no yog lub hauv paus ntawm kev nplij siab, kev kaj siab, kev xyiv fab, thiab kev dag zog ntawm sab ntsuj plig uas ua rau peb thiaj li tsis “txhob ntshai thaum tus yeeb ncuab tsim txom peb.”14 Vim peb yog Yexus Khetos cov thwj tim uas khi lus thiab ua raws li peb tej kev khi lus, ces peb yuav tsum ua siab loj vim “Yexus … yeej yuav tsis tso peb tseg”15 thiab peb yuav tsum tsis txhob quav ntsej neeg phem tej lus cem thiab tib neeg txoj kev luag thuam.
Thaum kuv nrog cov mej zeej hauv lub Koom Txoos tham nyob thoob plaws lub ntiaj teb, kuv pheej nug lawv seb tej yam twg pab lawv “txhob quav ntsej” neeg ntiaj teb tej kev luag thaum thiab txoj kev ntxub ntxaug? Lawv teb li cas los yeej qhia tau peb zoo.
Cov mej zeej uas rau siab ntseeg hais ntau txog qhov uas yuav tsum caw tus Vaj Ntsuj Plig Dawb Huv lub hwj chim nyob rau hauv lawv lub neej los ntawm kev kawm vaj lug kub, kev thov Vajtswv, thiab kev npaj txais lub cim nco txog. Lawv kuj hais ntau txog qhov uas lawv tsev neeg thiab phooj ywg rau siab ntseeg txhawb nqa lawv, tej zaj lus uas lawv kawm los ntawm kev txhawb pab thiab kev ua hauj lwm hauv tus Tswv lub Koom Txoos, thiab kev muaj peev xwm pom tias tej yam twg los ntawm lub tsev loj thiab dav yeej tsis muaj qab hau dab tsi li.
Kuv twb pom tias tej yam uas cov mej zeej hais los muaj ib tug txheej txheem uas tseem ceeb heev. Qhov thib ib, cov thwj tim no paub tseeb tias Leej Txiv Saum Ntuj Ceeb Tsheej muaj ib txoj hau kev zoo siab thiab Yexus Khetos yog peb tus Txhiv Dim thiab tus Cawm Seej. Thiab qhov thib ob, tej yam lawv paub ntawm sab ntsuj plig yog tej uas lawv paub hauv lawv lub siab ntsws tiag tiag; tsis yog lawv lam paub tej yam no li lwm tus xwb. Kuv mloog lawv hais txog qhov uas lawv tej kev khi lus ua rau lawv muaj zog kov yeej tej kev tsim txom thiab qhov uas lawv txoj kev sib khi nrog tus Tswv yeej txhawb nqa lawv tsis hais thaum lawv raug tej yam phem los sis tej yam zoo los yog. Cov neeg no yeej paub tias Yexus Khetos yog lawv tus Cawm Seej tiag.
Txoj moo zoo tej kev khi lus thiab cov kab ke pab peb lub neej zoo ib yam li ib tus twj qhia kev. Tus twj qhia kev yog ib yam uas piav tias sab qaum teb, sab qab teb, sab hnub tuaj, thiab sab hnub poob nyob qhov twg thiab tib neeg siv kom paub mus qhov twg thiab seb lawv nyob qhov twg. Ib yam li ntawd, peb tej kev khi lus thiab cov kab ke taw kev rau peb thiab pab peb nco ntsoov tias peb nrog tus Tswv Yexus Khetos sib raug zoo thaum peb ua raws li peb tej kev khi lus.
Qhov chaw uas peb txhua tus xav mus hauv lub ntiaj teb no yog mus los cuag Khetos kom ua neeg zoo tag nrho.16 Tej kev khi lus thiab cov kab ke pab peb tsom ntsoov rau tus Cawm Seej thiab sib zog, los ntawm Nws txoj kev tshav ntuj,17 hloov los ua neeg zoo li Nws. Muaj tseeb tiag, “peb muaj hwj chim los ntawm ntuj ceeb tsheej [uas] pab peb qhia txoj lus tseeb.”18
Tuav Rawv tus Nqaj Hlau
Peb tej kev khi lus nrog Vajtswv thiab Yexus Khetos yeej yog txoj kev uas pab peb thiaj li txais tau dag zog thiab txoj kev muaj peev xwm kom “tsis quav ntsej” tej yam phem. Thiab txoj kev sib khi no yeej muaj zog zuj zus tuaj thaum peb tuav rawv tus nqaj hlau. Tiam sis Nifais cov kwv tij tau nug tias, “Tus nqaj hlau uas peb txiv pom … txhais li cas?”
“Thiab [Nifais] hais rau lawv tias tus nqaj hlau yog Vajtswv txoj lus; thiab cov uas mloog Vajtswv txoj lus, thiab tuav txoj lus no tsis tso, lawv yuav tsis piam sij ib zaug li; thiab tej kev haub ntxias thiab tus yeeb ncuab tej xib xub hluav taws yuav kov tsis yeej lawv ua rau lawv dig muag, kom coj lawv mus rau txoj kev puas tsuaj.”19
Thov nco qab ntsoov tias tus Tswv cog lus rau cov neeg uas “tuav txoj lus no tsis tso” thiab tsis lam tuav Vajtswv txoj lus xwb hais tias tej kev ntxias thiab tus yeeb ncuab tej xib xub hluav taws yuav kov tsis yeej lawv.
Tus Thwj Tim Yauhas kuj tau piav txog txoj lus thaum nws hais tias Yexus Khetos yog Txoj Lus.20
“Thaum tsis tau tsim lub ntiaj teb, Txoj Lus yeej muaj nyob lawm; Txoj Lus ntawd ib txwm nrog Vajtswv nyob, thiab Txoj Lus ntawd yog Vajtswv. …
“Vajtswv kom nws tsim ib puas tsav yam huv tib si; ib puas tsav yam ntawd tsis muaj ib yam uas tsis yog nws tsim li. …
“Txoj Lus ntawd tau los yug ua neeg, nws puv hlo txoj kev hlub, nws yog qhov tseeb thiab nws nrog peb nyob. Peb pom nws lub tshwj chim ci ntsa iab; Leej Txiv pub lub hwj chim ntawd rau nws, rau qhov nws yog Leej Txiv tib leeg Tub.”21
Yog li ntawd, ib lub npe rau Yexus Khetos yog “Txoj Lus.”22
Tsis tas li ntawd, Nqe Kev Ntseeg thib yim hais tias, “Peb ntseeg tias phau Npaivnpaum yog Vajtswv txoj lus npaum li uas tau txhais yog; peb kuj ntseeg tias Phau Ntawv Maumoos yog Vajtswv txoj lus thiab.”23
Yog li ntawd, tus Cawm Seej tej lus qhia, raws li muaj nyob hauv cov vaj lug kub dawb huv, kuj yog “txoj lus.”
Cia kuv qhia hais tias kev tuav rawv Vajtswv txoj lus txhais tias peb (1) nco ntsoov, hwm thiab sib raug zoo nrog tus Cawm Seej thiab Nws Leej Txiv dhau los ntawm tej kev khi lus thiab cov kab ke ntawm txoj moo zoo, thiab (2) peb thov Vajtswv thiab rau siab siv cov vaj lug kub thiab cov yaj saub thiab cov thwj tim tej lus qhia tsis tu tsis tseg kom qhia qhov tseeb rau peb. Thaum peb nrog tus Tswv sib khi ua ke thiab “tuav rawv” Nws txoj lus thiab qhov uas peb ua raws li Nws cov lus qhuab qhia hloov peb lub siab,24 kuv cog lus tias peb txhua tus yuav tau koob hmoov kom “sawv hauv tej qhov chaw dawb huv thiab yuav tsis txav mus li.”25 Yog peb muab siab npuab Khetos, ces Nws yuav muab siab npuab peb thiab nrog peb mus.26 Muaj tseeb tiag “thaum peb raug sim siab Vajtswv [yuav] pab nws cov neeg, thiab txawb nqa txoj lus tseeb.”27
Ua Tim Khawv
Txiv mus lawm tom hauv ntej. Tuav rawv. Tsis txhob mloog.
Kuv ua tim khawv tias yog peb ua raws nraim li tus Cawm Seej txoj moo zoo tej kev khi lus thiab cov kab ke ces peb yuav muaj peev xwm sib zog ua tus Tswv tes dej num, tuav rawv Nws vim Nws yog Vajtswv Txoj Lus, thiab tsis quav ntsej tus yeeb ncuab tej kev ntxias. Thaum peb ntaus rog ua qhov yog, thov kom peb txhua tus yuav tuav ntaj, “tuav ntaj ntawm txoj lus tseeb,”28 kuv hais los ntawm Yexus Khetos lub npe dawb huv, amees.