Jerovia eskaléra
Jeguerovia’ỹ ojoko ñande katupyry jahecha hag̃ua umi milágro, uperãngue katu, Salvador-re jerovia reko, ojora umi pokatu yvagapegua.
Mba’éichapa umi mba’evai ko tekovepegua omomýita ñande jerovia Jesucristo-re? Ha mba’eichapa ñande jerovia, omomýita vy’a ha py’aguapy jahasáva ko vídape?
Ha’ékuri ary 1977. Ipu teléfono, ha pe mensáhe ojoka ore korasõ. Carolyn ha Doug Tebbs oĩkuri ova hag̃uáicha hóga pyahúpe ojapopa rire escuela-pegua posgrado. Elder-kuéra Kuórun oúkuri omyenyhẽ pe kamiõ ojeva hag̃ua. Doug, ohechaporã hag̃ua nandípa pe tape, oma’ẽ jey ojevy mboyve. Upe ndaikatúiva ohecha ha’ékuri itajýra michĩva, Jennie, oñanívo pe kamiõ kupépe momento vaípe. Peteĩ tesapirĩme, Jennie, ohauyetévape hikuái noĩvéimakuri.
Mba’épa oikóta upe rire? Mba’erasy oñandu pypukúva hikuái, ha oñeimo’ãkuaa’ỹva ñehundi remiandu, omoĩtapa pa’ũ ojoajukuaave’ỹva Carolyn ha Doug mbytépe, térã ombojoajútapa ikorasõkuéra ha omombarete ijeroviakuéra Túva Yvagapegua plan-re?
Ijehasa’asykuéra rape ipuku ha hasýkuri, ha katu peteĩ hendágui oúkuri umi rreserva espiritual, ani hag̃ua operde hikuái esperanza, ha katu “opyta hag̃ua [hapépe]”.1 Peteĩ hendáicha, ko paréha ijojaha’ỹva ojoguavétema Cristo-pe. Oñekomprometeve. Iporiahuverekove. Oguerovia hikuái, Hi’árape, Tupã okonsagrataha ijeiko’asykuéra heko porãnguerarã.2
Mba’erasy ha ñehundi ndohoséiva ni ndaikatúiramo jepe ojeipa, Carolyn ha Doug oñemoangapyhýkuri oikuaa añetégui, opytáramo ñemova’ỹme konvénio rapére, pe I’Jennie ohayhuetéva, imba’ekuérata tapiaite g̃uarã.3
Hembiecharãnguéra omombaretékuri che jerovia Ñandejára plan-re. Ndajahechái opaite mba’e. Ha’e ohechapa. Ñandejára he’iva’ekue José Smith-pe Liberty ka’irãime, “opa ko’ã mba’e ome’ẽta ndéve tembiasa, ha ha’éta ne ñeimeporãrã. Pe Kuimba’e Ra’y, oguejyva’ekue opa ko’ãva guýpe. Ndetuichavépa nde chugui?”4
Jaguerohorývo Ñandejára rembipota, Ha’e ñanembo’e mba’éicha jaguata hag̃ua Hendive.5 Ha’érõguare misionero imitãva aservíva Tahiti-pe, ojejerure chéve aadministra hag̃ua peteĩ mitãra’y hasývape. Romoĩ ore po iñakã ári ha rohovasa chupe oñeñandu porãve hag̃ua. Oñepyrũkuri oñeñandu porãve, ha katu hasy jey. Mokõiha ára rohovasákuri chupe ha katu upéicha jey. Mbohapyha jejerure ou. Rojerure Ñandejárape toiko Hembipota. Mbykymi upe rire, pe espíritu michĩmi ohojey hóga yvagaguápe.
Ha katu roimékuri py’aguapýpe. Roipotákuri pe mitãra’y oikove, ha katu Ñandejára oguereko ambue plan. Jaguerohorývo Hembipota ñane rembipota rãngue, ha’e mba’éicha jajuhu vy’a, taha’e ha’e jahasavahína.
Jerovia rasy’ỹ jarekóva Jesucristo-re, jaikuaa ñepyrũvo Chugui, ikatu opyta ñane korasõme ñambohováivo umi mba’evai tekovepegua. Ñande jerovia Hese ikatu ha ñanemboguatáta tekove rasykue rupive. Añetehápe, jajuhúta oĩha hasy’ỹva, ko vida hasýva ambue rembe’y gotyo6, japytáramo “[ñemovã’ỹme] Cristo-pe, jaguerekóvo ñeha’arõ porãmba mimbi”.7
Ko vida propósito párte ha’e, jaheja toiko umi ikatúvagui ha’e ita ñañepysãnga hag̃ua, ita jajupi hag̃ua, upe che ahenóivape “jerovia eskaléra”—peteĩ eskaléra, he’ígui jerovia ndaha’eiha peteĩ mba’e oku’e’ỹva. Ikatu ojejupi ha ojeguejy, jeiporavo ñande jajopaháicha.
Ñañeha’ãvo ñamopu’ã jerovia Salvador-re, ikatu nañaikũmbypái Tupã mborayhu ñanderehe, ha ikatu ñañe’ẽrendu Ileikuérare ñañandúguinte jajapova’erãha. Kúlpa ikatu ha’e mba’e ñanemokyre’ẽvéva, mborayhu rãngue. Ikatu ne’írãgueteri oñeñandu peteĩ joaju añete Hendive.
Jahekávo ñambotuicha ñande jerovia, ikatu ñanemoapañuã Santiago ombo’eva’ekue. Ha’e ñanemomandu’a “jerovia tembiapo’ỹre omanoha”.8 Ikatu ñañepysãnga ñaimo’ãramo opa mba’e odependeha ñanderehe. Ñasãingoitéramo ñandejehe ikatu ojoko katupyry jaguerekóva jahupyty hag̃ua umi yvagagua pokatu.
Ha katu jaku’e memévo jerovia añete gotyo Jesucristo-re, umi mba’e ñane akãmegua oñepyrũ iñambue. Jahechakuaa, Salvador-re ñe’ẽrendu ha jerovia, ohejaha jaguereko tapiaite Ijespíritu ñanendive.9 Ñe’ẽrendu ndaha’evéima mba’e idegusto’ỹva, ha katu oiko chugui peteĩ jeheka.10 Jahechakuaa Tupã rembiapoukapykuérare ñe’ẽrendu, ohejaha Ha’e ojerovia ñanderehe. Ijerovia reheve ou tuichave tesape. Ko tesape omboguata ñande rape, ha oheja jahecha porãve upe tape jajapyhyva’erã.
Ha katu oĩve. Tuichavévo ñande jerovia Salvador-re, jahecha peteĩ ñemoambue’imi, oúvandi ñeikũmby divíno ñande jeiko Tupãndiguágui—peteĩ jeku’e meme “Mba’épa che aipotágui”, “mba’épa Tupã oipotápe”. Salvador-cha, ñande jajapose “ndaha’éi che aipotaháicha, ha katu nde reipotaháicha”.11 Ñande jajapose Tupã rembiapo ha jaikose tembiporúramo Ipópe.12
Ñande jekakuaa ha’e peteĩ mba’e ijapyra’ỹva. Presidente Russell M. Nelson ombo’ékuri oĩha hetaiteve pe Túva Yvagapegua oipotáva jaikuaa.13 Jakakuaávo, ñaikũmby porãve Ñandejára ombo’eva’ekue José Smith-pe: “Reñongatúramo che rembiapoukapykuéra rehupytýtagui iplenitúgui, ha rejeglorifikáta chepype; … Che ha’e ndéve, rehupytýta grásiare grásia”.14
Ñande jejupi yvatekue jerovia eskalérape, ñande jadesidi. Elder Neil L. Andersen ombo’e, “jerovia ndaha’éi kasualida rupi ha katu jeiporavo rupi”15 Ikatu jaiporavo jajapo tekotevẽva ñambotuichave hag̃ua ñande jerovia Salvador rehe.
Pehechami mba’épa ogueru desisiõ ojejapova’ekue Laman ha Lemuel oguejyrõguare hikuái jerovia eskaléragui, Nefi ojupi yvatevévo. Oĩpa ñemoha’anga hesakãvéva pe joavy oĩva Nefi ñembohovái “Aháta ha ajapóta”16 ha Lamán ha Lemuel ñembohovái, ohechapamívo peteĩ ánhel, “Mba’éicha piko Ñandejára omoĩta ñande pópe?”17
Jeguerovia’ỹ ojoko ñande katupyry jahecha hag̃ua umi milágro, uperãngue katu, Salvador-re jerovia reko, ojora umi pokatu yvagapegua.
Ikangýramo jepe ñande jerovia, Ñandejára jyva akóinte ojepyso.18 Ojapo heta ary, oñeme’ẽhague chéve asignasiõ amohendajey hag̃ua peteĩ estáka Nigeria-pe. Upe mboyvemi, oñemoambuékuri pe ára. Oĩkuri peteĩ kuimba’e estákape he’iva’ekue osẽtaha upe távagui peteĩgua conferencia árape. Ha’e ndoipotáikuri oñehenoimba’e chupe presidente de estaca-ramo.
Oĩ mombyry aja, ha’e orekókuri accidente vaiete, ha katu ndojehúi chupe mba’eve. Kóva rupi opensákuri, mba’érepa ojesalva hekove. Ha’e opensajey desisiõ ojapova’ekuére. Oñearrepenti ha ñemomirĩme oho conferencia ára oñemoĩpyahuva’ekuépe. Ha héẽ, oñehenóikuri chupe presidente de estaca pyahúramo.
Elder Neal A. Maxwell ombo’ékuri: “Ñambojojávo añoite ñane rembipota Tupã rembipotáre, jajuhu vy’apavẽ paha. Oimeraẽ mba’e michĩvéva ogueru pehẽngue michĩvéva”.19
Jajapo rire “opa mba’e ikatúva jajapo”, upérõ ha’e ára ñaimeha py’aguapýpe … jahecha hag̃ua Tupã salvasiõ”.20 Che ahechava’ekue kóva aservi aja hermano ministrante ramo familia McCormick-pe. Omendáva 21 áño, Mary Kay oservi’akue jeroviarekópe umi illamamiénto. Ken, ndaha’ei’akue tupao miembro ha ndoikoséi peteĩva ramo, ha katu ohayhúgui hembirekópe, odesidi ohotaha tupaópe hendive.
Peteĩ Domingo añandu impresiõ akomparti hag̃ua Ken-ndi che testimónio. Aporandu chupe ikatúpa. Iñembohovái hasy’ỹ ha hesakã: “Nahániri, aguyje”.
Chemoapañuãkuri. Añandúkuri peteĩ impresiõ ha añeha’ã asegi. Ha’esékuri ajapomahague che párte. Ha katu ñembo’e ha jepy’amongeta rire, ahechákuri, pe ajaposéva oĩporãramo jepe, ajerovia hetákuri chejehe ha sa’i Ñandejárare.
Upe rire ajujey, ha katu ambue ñemoakãngeta reheve. Ahátante peteĩ tembiporúramo Ñandejára pópe, mba’eve ambue potapy reheve ndaha’éirõ Espíritu-pe jesegínte. Oñondive che irũ ijeroviarekóvandi, Gerald Cardon, roike McCormick rógape.
Upe riremi, añandu impresiõ ainvita hag̃ua Gerald-pe ropurahéi “Yo sé que vive mi Señor”.21 Ha’e oma’ẽ ñeporandu cherehe, ha katu ojeroviávo che jeroviáre, ojapo. Espíritu porãite omyenyhẽ upe koty. Ou pe impresiõ roinvita hag̃ua Mary Kay ha imemby Kristin-pe, tokomparti itestimoniokuéra. Ojapóvo hikuái, pe Espíritu okakuaa mbareteve. Ha upéicha, Kristin testimónio rire, osyry umi tesay Ken rováre.22
Tupã oñenkargákuri. Ndaha’éi ojepokónteva umi korasõre ha katu oñemoambue tapiaite g̃uarã. Veintiún áño jeguerovia’ỹ ojeíkuri Espíritu Santo pu’aka rupive. Peteĩ semána rire, Ken oñemongaraíkuri. Peteĩ ary rire, Ken ha Mary Kay ojesellákuri Ñandejára rógape, ko ára ha opa ára apyra’ỹre.
Oñondive rohasákuri mba’épa he’ise, ñamyengovia ñane rembipota Ñandejára rembipotáre, ha ore jerovia Hese tuichavékuri.
Pehechami ko’ã mbovy ñeporandu ojapova’ekue Tupã profetakuéra oñeha’ãvo ojupi jerovia eskalérape:
Aipe’ápa chejehegui orgúllo?23
Ame’ẽpa tenda che korasõme Tupã ñe’ẽme?24
Ahejápa che jeiko’asykuéra oñekonsagra che rekoporãrã?25
Aimépa aheja hag̃uáicha che rembipota toñemoĩ Túva rembipotápe?26
Añandúmavo apuraheiva’erãha mborayhu purahéi orredimíva, ikatúpa añandu ko’ág̃a27
Ahejápa Tupã ipu’akapa che rekovépe?28
Pejuhúramo pende rape ko’ag̃agua noĩporãiha pende jeroviándi Salvador rehe, pejuhumíke pende rape pejujey hag̃ua Hendápe. Peẽ ha pende posterida exaltasiõ odepende upévare.
Ajerure tañañotỹ pypuku pe jerovia yvara’ỹi ñane korasõme. Ajerure tañañangareko upe yvara’ỹire, jajoajúvo Salvador-re, ñamomorãvo umi konvénio Hendive jajapova’ekue. Jesucristo rérape, Amén.