Tus Ntaiv ntawm Kev Ntseeg
Kev tsis ntseeg yeej tab kaum peb txoj kev pom tau tej txuj ci tseem ceeb es kev xav ntseeg tus Cawm Seej qhib lub ntuj ceeb tsheej lub hwj chim.
Tej teeb meem ntawm lub neej no yuav ua li cas rau peb txoj kev ntseeg Yexus Khetos? Thiab peb txoj kev ntseeg yuav ua li cas rau peb txoj kev muaj kev xyiv fab thiab kev kaj siab lug nyob hauv lub neej no.
Nyob rau xyoo 1977. Lub xov tooj nrov, thiab qhov uas tus neeg hais qhia peb los ua rau peb nyuaj siab kawg nkaus. Carolyn thiab Doug Tebbs tab tom tsiv tsev mus rau lub tsev tshiab tom qab nkawd tau kawm ntawv tiav. Pawg txwj laug tau los pab tso khoom hauv lub tsheb loj. Doug, uas tau ua tib zoo saib xyuas kom tsis muaj dab tsi nram qab, twb saib ib zaug ntxiv. Tiam sis nws pom tsis taus nws tus me nyuam ntxhais, Jennie, uas tau khiav rau sab nram qab ntawm lub tsheb loj tam sim ntawd. Ib me pliag xwb, es nkawd tus me Jennie twb tas sim neej lawm.
Yuav ua li cas tom qab ntawd? Qhov mob uas nkawd hnov kawg siab kawg ntsws thiab kev nyuaj siab uas tsis pom qab piav tias loj npaum li cas puas yuav ua rau Carolyn thiab Doug sib cais, los sis puas yuav uas rau nkawd ib leeg muab siab npuab ib leeg thiab txhawb nkawd txoj kev ntseeg Leej Txiv Saum Ntuj Ceeb Tsheej txoj hau kev?
Txoj kev mus dhau nkawd txoj kev raug txom nyem no ntshe yog ib txoj kev ntev thiab sab heev, tiam sis nkawd twb muaj zog ntawm sab ntsuj plig kom tsis txhob poob siab nthav tiam sis nkawd tau “nyob raws nraim [nkawd] txoj kev.”1 Xyov ua cas nkawm niam txiv no ho hloov los ua neeg zoo li Yexus Khetos ntxiv. Mob siab ntxiv. Muaj siab hlub ntxiv. Nkawd ntseeg tias, nyob rau lub sij hawm uas Nws teem tseg, Vajtswv yuav muab nkawd tej kev txom nyem fij los ua tej yam uas pab tau nkawd.2
Txawm yog nkawd txoj kev nyuaj siab yeej yuav tsis ploj huv tib si, Carolyn thiab Doug tau txais kev nplij siab vim tias nkawd paub yog nkawd taug kev raws nraim txoj kev ua raws li nkawd tej kev khi lus, ces Jennie yuav nrog nraim nkawd nyob mus ib txhis li.3
Nkawd tus yam ntxwv twb tau txhawb kuv txoj kev ntseeg tus Tswv txoj hau kev. Peb tsis txawj pom txhua yam. Nws yog tus uas pom tag nrho. Tus Tswv tau qhia Joseph Smith nyob hauv Liberty lub Tsev Kaw hais tias “tag nrho tej yam no yuav muab kev kawm rau koj, thiab yuav zoo rau koj. Neeg Leej Tub tau nqis mus qis tshaj tag nrho tej ntawd. Koj puas tseem ceeb dua nws?”4
Thaum peb ua raws li tus Tswv lub siab nyiam, Nws qhia peb kom paub taug kev nrog Nws.5 Thaum kuv yog ib tug tub txib nyob hauv Tahiti, muaj neeg thov kuv foom koob hmoov rau ib tug me nyuam mos liab uas mob heev. Wb tau tso tes saum nws lub taub hau thiab foom koob hmoov rau nws kom rov qab zoo. Nws pib rov qab nyob zoo, tiam sis tom qab ntawd nws raug mob dua. Wb foom koob hmoov rau nws zaum thib ob tiam sis twb zoo ib yam. Twb thov zaum peb lawm. Wb tau thov tus Tswv kom muaj raws li Nws lub siab nyiam. Tsis ntev tom qab ntawd, tus me nyuam mos liab twb rov qab mus rau nws lub tsev saum ntuj ceeb tsheej.
Tiam sis peb twb nyob kaj siab lug lawm. Peb xav kom tus me nyuam mos liab ua neej, tiam sis tus Tswv tau npaj lwm yam. Kev lees yuav Nws lub siab nyiam thiab tsis txhob ua raws li peb lub siab nyiam xwb yeej yog qhov tseem ceeb kom thiaj li muaj kev xyiv fab txawm yog peb raug xwm txheej dab tsi los yog.
Kev ntseeg Yexus Khetos uas peb muaj thaum peb pib kawm txog Nws yeej nyob tau hauv peb lub siab thaum peb raug tej teeb meem ntawm lub neej no. Peb txoj kev ntseeg Nws yeej yuav coj peb mus kom dhau tej xwm txheej nyuaj hauv lub neej no. Muaj tseeb tiag, peb yuav kawm tias muaj kev yooj yim thaum dhau tej xwm txheej nyuaj ntawm lub neej no6 yog peb tseem ua raws nraim li “kev ntseeg Khetos … khov kho, muaj ib txoj kev cia siab uas ci kawg nkaus.”7
Lub hom phiaj ntawm lub neej no ib feem yog kom cia tej yam uas tab kaum peb yuav hloov los ua tej yam uas pab txhawb peb thaum peb nce mus ntawm “tus ntaiv ntawm kev ntseeg”—yog ib tug ntaiv vim tias peb txoj kev ntseeg hloov taus. Peb nce los sis nqis mus raws li tej yam uas peb xaiv.
Thaum peb siv zog ua kom peb txoj kev ntseeg tus Cawm Seej loj hlob tuaj, tej zaum peb tsis to taub Vajtswv hlub peb npaum li cas thiab peb ua raws li Nws tej kev cai vim peb xav tias peb yuav tsum ua xwb. Tej zaum kev muaj txim yog qhov uas ua rau peb xav ua li ntawd thiab tsis yog kev hlub. Tej zaum peb tseem tsis tau nrog Nws sib raug zoo tiag.
Thaum peb nrhiav kev ua kom peb txoj kev ntseeg loj tuaj, tej zaum peb yuav tsis nkag siab txog qhov uas Yakaunpaus qhia. Nws qhia peb tias “txoj kev ntseeg uas tsis ua hauj lwm yeej tsis muaj qab hau dab tsi li.”8 Peb xav yuam kev yog peb xav tias txhua yam nyob ntawm peb xwb. Qhov uas peb tso siab rau peb tus kheej xwb yuav tab kaum peb txoj kev txais tau hwj chim uas los saum ntuj los.
Tiam sis thaum peb ntseeg Yexus Khetos tiag tiag ceb peb txoj kev txawj xav pib hloov. Peb to taub tias kev mloog lus thiab kev ntseeg tus Cawm Seej ua rau peb tsim nyog muaj Nws tus Ntsuj Plig nrog nraim peb nyob.9 Kev mloog lus tsis yog ib yam uas meem txom peb tiam sis yog ib lub hom phiaj.10 Peb to taub tias kev ua raws li Vajtswv tej lus txib ua rau Nws tso siab rau peb. Thaum Nws tso siab rau peb ces peb txais txoj kev kaj ntxiv. Txoj kev kaj yuav coj peb hauv lub neej no thiab cia peb pom meej tias peb yuav tsum taug txoj kev twg.
Tiam sis muaj ntxiv thiab. Thaum peb txoj kev ntseeg tus Cawm Seej loj tuaj, peb to taub ntxiv hais tias peb txheeb ze Vajtswv li cas—yog ib txoj kev hloov siab me ntsis kom txhob xav txog tej yam uas peb xav tau xwb, tiam sis ua rau peb xav paub seb Vajtswv xav kom peb ua dab tsi. Ib yam li tus Cawm Seej, peb xav kom “tsis txhob ua raws li [peb] lub siab nyiam, tiam sis cia ua raws li [Nws] lub siab nyiam xwb.”11 Peb xav ua Vajtswv tej hauj lwm thiab ua ib lub cuab yeej hauv Nws txhais tes.12
Peb txoj kev vam meej yeej yog ib txoj kev uas mus ib txhis li. Thawj Tswj Hwm Russell M. Nelson tau qhia tias muaj ntau yam ntxiv uas Leej Txiv Saum Ntuj Ceeb Tsheej xav kom peb paub.13 Thaum peb vam meej, peb to taub zoo dua ntxiv txog tej uas tus Tswv tau qhia Joseph Smith: “Vim, yog nej ua raws li kuv tej lus txib nej yuav tau txais tag nrho tej nws muaj, thiab yuav tau yeeb koob los ntawm kuv; … kuv hais rau nej tias, nej yuav tau txais lub hwj chim ntxiv rau lub hwj chim.”14
Peb yuav nce ntaiv ntawm kev ntseeg siab npaum li cas los yeej nyob ntawm peb. Txwj Laug Neil L. Andersen qhia tias, “txoj kev ntseeg … yuav tsis yog vim nej lam tau, tiam sis vim nej xaiv tau.”15 Peb muaj peev xwm xaiv kom peb txoj kev ntseeg tus Cawm Seej loj tuaj ntxiv.
Cia li xav seb tau muaj li cas thaum Lamas thiab Lemu-ees nqis mus thiab Nifais tau nce tus ntaiv ntawm kev ntseeg. Qhov uas Nifais tau hais tias, “Kuv yuav mus thiab ua”16 es Lamas thiab Lemu-ees, uas nyuam qhuav pom tus tim tswv tau hais tias, “Yuav ua li cas tus Tswv thiaj yuav coj tau Lanpas los rau hauv peb tes?”17 qhia meej tias lawv sib txawv npaum li cas.
Kev tsis ntseeg yeej tab kaum peb txoj kev pom tau tej txuj ci tseem ceeb es kev xav ntseeg tus Cawm Seej qhib lub ntuj ceeb tsheej lub hwj chim.
Txawm yog peb txoj kev ntseeg tsis muaj zog los, tus Tswv txhais tes yeej ncav rau peb kom tsa peb sawv.18 Ntau xyoo tas los, kuv yuav tsum muab ib ceg txheem ntseeg hauv Nigeria hloov. Txog lub sij hawm yuav pib ua, lub sij hawm uas teem tseg tau hloov. Muaj ib tug txiv neej nyob hauv ceg txheem ntseeg uas tau txiav txim tias nws yuav tawm lub nroog mus es tsis mus rau lub rooj sab laj. Nws tsis xav cia leej twg hu nws ua ceg txheem ntseeg tus thawj tswj hwm.
Thaum nws tsis nyob tsev nws raug ib qho xwm txheej phem heev, tiam sis nws tsis raug mob hlo li. Qhov no ua rau nws xav yog vim li cas nws tseem muaj txoj sia nyob. Nws tau rov qab xav txog nws txoj kev txiav txim. Nws tau hloov siab lees txim thiab txo hwj chim mus rau lub rooj sab laj thaum txog hnub uas rov qab teem tseg. Yog los mas, twb hu nws los ua ceg txheem ntseeg tus thawj tswj hwm tshiab.
Txwj Laug Neal A. Maxwell qhia tias: “Tsuas yog thaum peb muab peb lub siab nyiam hloov kom ua zoo li Vajtswv lub siab nyiam xwb peb thiaj li yuav nrhiav kev zoo siab tag nrho. Yog tsis ua li ntawd ces peb yuav txais ib feem xwb.”19
Tom qab peb “ua txhua yam uas peb muaj hwj chim ua tau,” ces twb txog lub sij hawm “kom peb sawv twj ywm … los paub Vajtswv txoj kev cawm seej.”20 Kuv twb pom li no thaum kuv yog ib tug kwv tij txhawb pab tsev neeg McCormick. Nkawd sib yuav tau 21 xyoos lawm, es Mary Kay rau siab ntseeg ua nws tej hauj lwm hauv lub Koom Txoos. Ken tsis yog ib tug mej zeej ntawm lub Koom Txoos thiab tsis xav ua, tiam sis vim nws hlub nws tus poj niam, nws xaiv kom nrog nws mus rau lub tsev koom txoos.
Muaj ib Hnub Caiv kuv txais kev tshoov siab ua tim khawv rau Ken. Kuv nug nws seb nws puas kam kuv ua li ntawd. Nws teb meej hais tias: “Ua tsaug tiam sis tsis xav mloog.”
Kuv tsis to taub. Kuv twb ua raws li kev tshoov siab thiab sim ua li ntawd. Kuv xav tias tej zaum kuv twb ua qhov kuv yuav tsum ua tas lawm. Tiam sis tom qab kuv thov Vajtswv thiab xav ntxiv, kuv to taub tias txawm kuv twb xav ua zoo los, kuv tau tso siab rau kuv tus kheej ntau dua li kuv tso siab rau tus Tswv.
Tom qab ntawd kuv tau rov qab mus tiam sis kuv xav txawv yav tas los. Kuv yuav ua ib tug cuab yeej hauv tus Tswv txhais tes uas tsis xav ua dab tsi tsuas yog xav ua raws li tus Ntsuj Plig qhia xwb. Nyob ua ke nrog kuv tus khub, Gerald Cardon, wb tau nkag hauv lub tsev McCormick.
Tsis ntev, kuv tau txais kev tshoov siab caw Gerald hu zaj nkauj “Kuv Paub Yexus Tseem Muaj Txoj Sia.”21 Nws ntsia ntsoov kuv xav paub vim li cas, tiam sis nws ntseeg kuv, es nws thiaj li tau hu zaj nkauj ntawd. Tab tom muaj tus Ntsuj Plig puv npo. Kuv txais kev tshoov siab caw Mary Kay thiab Kristin, nkawd tus ntxhais, kom hais lus tim khawv. Thaum nkawd ua li ntawd, tus Ntsuj Plig los muaj zog ntxiv. Tom qab Kristin hais lus tim khawv, Ken los kua muag poob dawb vog ntawm nws sab plhu.22
Yog los ntawm Vajtswv lub hwj chim thiaj muaj li no. Tsis tau txais kev tshoov siab xwb tiam sis lawv lub siab hloov mus ib txhis li. Nees nkaum ib xyoos ntawm kev tsis ntseeg tau ploj mus los ntawm tus Vaj Ntsuj Plig Dawb Huv lub hwj chim. Ib lub lim tiam tom qab ntawd, Ken tau ua kev cai raus dej. Ib xyoos tom qab ntawd, Ken thiab Mary Kay tau ua kev cai sib khi hauv tus Tswv lub tsev rau lub neej no thiab mus ib txhis li.
Nyob ua ke peb tau kawm tias yuav zoo li cas thaum peb muab peb lub siab nyiam tso tseg thiab ua raws li tus Tswv lub siab nyiam, peb txoj kev ntseeg Nws thiaj li loj tuaj ntxiv.
Thov kom nej xav txog tej lus nug uas Vajtswv cov yaj saub tau nug thaum nej siv zog nce nej tus ntaiv ntawm kev ntseeg:
Kuv puas tau muab txoj kev muab hlob hle pov tseg?23
Kuv puas muab ib qho chaw hauv kuv lub siab rau Vajtswv txoj lus?24
Kuv puas cia tus Tswv muab kuv tej kev kub ntxhov pub ua kev zoo siab rau kuv?25
Kuv puas kam cia kuv lub siab nyiam ywj rau Leej Txiv lub siab nyiam?26
Yog kuv lub siab xav hu zaj nkauj txog txoj kev hlub uas txhiv dim, nim no kuv puas tseem xav zoo li ntawd?27
Kuv puas cia Vajtswv yeej hauv kuv lub neej?28
Yog tias nej kawm tias txoj kev uas nej taug tam sim no yeej tsis pab nej ntseeg tus Cawm Seej, ces cia li nrhiav kev kom rov qab mus cuag Nws thiab taug txoj kev ua raws li nej tej kev khi lus. Nej txoj kev tsa nto thiab nej cov xeeb leej xeeb ntxwv yeej nyob ntawm qhov nej ua li ntawd.
Xav kom peb cog tej noob ntawm kev ntseeg tob rau hauv peb lub siab. Thov kom peb yuav tu cov noob no thaum peb muab peb tus kheej khi rau tus Cawm Seej thaum peb ua raws peb tej kev khi lus. Los ntawm Yexus Khetos lub npe, amees.