“Niana Ako Mohimo sa Mahuyang nga mga Butang nga Mahimo nga Malig-on”
Ug samtang kita magpaubos sa atong mga kaugalingon ug magpakita og hugot nga pagtuo kang Jesukristo, ang grasya ni Kristo ug ang Iyang walay kinutoban nga maulaong sakripisyo posibling makapausab niini.
Si Presidente Thomas S. Monson sa makausa mipaambit og istorya sa warden sa prisohan nga si Clinton Duffy. “Sa panahon sa mga 1940 ug 1950, si [Warden Duffy] nailhan kaayo sa iyang paningkamot nga mabuotan ang mga tawo sa iyang prisohan. Usa ka kritiko miingon, ‘Wala ka ba mahibalo nga ang mga leopard dili makausab sa ilang puntik-puntik!’
“Mitubag si Warden Duffy, ‘Angay nimong masayran nga dili leopard ang akong giatiman. Mga tawo ang akong giatiman, ug ang mga tawo mangausab kada adlaw.’”1
Usa sa dakong bakak ni Satanas mao nga ang mga lalaki ug mga babaye dili mausab. Kini nga bakak padayon nga gisulti pag-usab sa daghang lain-laing paagi sama nga ang kalibotan moingon nga kita dili makausab—o ang grabe pa, nga kita kinahanglan nga dili mag-usab. Kita gitudloan nga ang atong mga sirkumstansiya maoy naghulagway unsa kita. Kita kinahanglan “modawat kinsa gayod kita,” matod sa kalibotan, “ug tiunay sa atong tinuod nga kaugalingon.”
Kita Mahimong Mag-usab
Samtang maayo gayod nga kita tiunay, kita kinahanglan nga tiunay, sa atong tinuod, matuod nga kaugalingon, isip mga anak nga lalaki ug mga anak nga babaye sa Dios nga adunay balaan nga kinaiya ug kapalaran nga mahimong sama Kaniya.2 Kon ang atong tumong mao nga mahimong tiunay ngadto niining balaan nga kinaiya ug kapalaran, nan kitang tanan kinahanglan nga mag-usab. Ang pulong sa kasulatan alang sa pag-usab mao ang paghinulsol. “Daghan ra kaayo nga tawo,” si Presidente Nelson nagtudlo, “ang nagkonsiderar sa paghinulsol isip silot––usa ka butang nga likayan gawas lang sa labing seryoso nga mga sirkumstansiya. … Kon si Jesus mosugo kaninyo ug kanako sa ‘paghinulsol,’ Siya nagdapit kanato sa pag-usab,”3
Ang mga Kondisyon sa Dios
Ang mga tigpalambo sa computer software mogamit og kondisyonal nga mga pamahayag sa pagsulti sa mga computer unsay buhaton. Kini tawagon usahan nga kon ug nan nga mga pamahayag. Sama sa, kon ang x tinuod, nan buhata ang y.
Ang Ginoo maglihok usab pinaagi sa mga kondisyon: mga kondisyon sa hugot nga pagtuo, mga kondisyon sa pagkamatarong, mga kondisyon sa paghinulsol. Adunay daghang ehemplo sa kondisyonal nga mga pamahayag gikan sa Dios sama sa:
“Kon ikaw maghupot sa akong mga sugo ug molahutay ngadto sa kataposan [nan] ikaw makaangkon og kinabuhi nga dayon, diin nga gasa mao ang labing mahinungdanon sa tanan nga mga gasa sa Dios.”4
O “kon kamo mangutana sa kinasingkasing, uban sa tinuod nga katuyoan, nga may hugot nga pagtuo kang Kristo, [nan] siya mopakita sa kamatuoran niini nganha kaninyo, pinaagi sa gahom sa Espiritu Santo.”5
Bisan ang gugma sa Dios, bisan walay kinutoban ug hingpit, ubos usab sa mga kondisyon.6 Sama pananglit:
“Kon tumanon ninyo ang akong sugo, [nan] magapabilin kamo sa akong gugma; maingon nga gituman ko ang mga sugo sa akong Amahan ug nagapabilin ako diha sa iyang gugma.”7
Si Elder D. Todd Christofferson dugang nga mipasabot niining kamatuoran sa ebanghelyo sa dihang siya mitudlo: “Ang ubang tawo makaingon sa kanunay nga, ‘Ang Manluluwas mohigugma kanako sa akong pagka-ako,’ ug kana tinuod. Apan Siya dili makadala ni bisan kinsa kanato ngadto sa Iyang gingharian nga basta lang kon unsa kita, “kay walay mahugaw nga butang nga makapuyo didto, o makapuyo sa iyang atubangan” [Moises 6:57]. Ang atong mga sala kinahanglan unahon gayod sa pagsulbad.”8
Ang Huyang nga mga Butang Mahimo nga Malig-on
Ang panalangin sa pagdawat sa gahom sa Dios sa pagtabang nato nga mausab kondisyonal usab. Ang Manluluwas, namulong pinaagi ni propeta Moroni sa Basahon ni Mormon, mitudlo: “Kon ang mga tawo moduol ngari kanako, ako mopakita ngadto kanila sa ilang kahuyang. Ako mohatag ngadto sa mga tawo og kahuyang nga sila mahimo nga magpaubos; ug ang akong grasya igo alang sa tanan nga mga tawo nga magpaubos sa ilang mga kaugalingon sa akong atubangan; kay kon sila magpaubos sa ilang mga kaugalingon sa akong atubangan, ug magbaton og hugot nga pagtuo ngari kanako, niana Ako mohimo sa mahuyang nga mga butang nga mahimo nga malig-on ngadto kanila.”9
Kon tan-awon og maayo unsay gitudlo sa Ginoo kanato dinhi, atong makita nga Siya unang miingon nga Siya mihatag sa mga lalaki ug mga babaye og kahuyang, usa ka kahuyang, nga kabahin sa atong mortal nga kasinatian isip napukan o kalibotanon nga mga binuhat. Kita nahimong kinaiyanhon nga mga lalaki ug mga babaye tungod sa Pagkapukan ni Adan. Apan pinaagi sa Pag-ula ni Jesukristo, kita makabuntog sa atong kahuyang, o sa atong napukan nga kinaiyahan.
Siya dayon miingon nga ang Iyang grasya igo ug kon kita magpaubos sa atong kaugalingon ug magbaton og hugot nga pagtuo diha Kaniya, nan Siya “mohimo sa mahuyang nga mga butang [daghang mga kahuyang] nga malig-on ngari [kanato].” Sa laing pagkasulti, kon unahon nato sa pag-usab ang atong napukan nga kinaiyahan, ang atong kahuyang, dayon kita makahimo sa pag-usab sa atong mga kinaiya, sa atong mga kahuyang.
Mga Kinahanglanon sa Kausaban
Atong rebyohon ang mga kinahanglanon sa kausaban sumala sa sumbanan sa Ginoo:
Una, kita kinahanglan nga magpaubos sa atong kaugalingon. Ang kondisyon sa Ginoo alang sa kausaban mao ang pagpaubos. “Kon sila magpaubos sa ilang mga kaugalingon sa akong atubangan,”10 Siya miingon. Ang katugbang sa pagpaubos mao ang garbo. Ang garbo moabot kon kita maghunahuna nga kita mas nakahibalo—kon unsay atong gihunahuna o gibati maoy unahon sa unsay gihunahuna o gibati sa Dios.
Si Hari Benjamin, mitudlo nga “ang kinaiyanhon nga tawo mao ang usa ka kaaway sa Dios … ug mahimo, hangtod sa kahangtoran, gawas kon iyang … isalikway ang iyang kinaiyanhon nga pagkatawo ug mahimo nga usa ka santos pinaagi sa pag-ula ni Kristo ang Ginoo, ug mahimo nga ingon sa usa ka bata, manunuton, maaghop, [ug] mapainubsanon”11
Aron mag-usab, kita kinahanglan nga mosalikway sa kinaiyanhon nga tawo ug mahimong mapainubsanon ug manunuton. Kita kinahanglan nga mapainubsanon pag-ayo sa pagsunod sa buhi nga propeta. Mapainubsanon kaayo aron sa paghimo ug pagtuman sa mga pakigsaad sa templo. Mapainubsanon kaayo aron makahinulsol matag adlaw. Kita kinahanglan nga mapainubsanon kaayo aron magtinguha nga mag-usab, sa “pagtugyan sa atong mga kasingkasing ngadto sa Dios.”12
Ikaduha, kita kinahanglan nga magbaton og hugot nga pagtuo kang Jesukristo. Sa pagsubli, ang mga pulong sa Manluluwas: “Kon sila magpaubos sa ilang mga kaugalingon sa akong atubangan, ug magbaton og hugot nga pagtuo ngari kanako,”13 Siya mohatag kanato og gahom sa pagbuntog sa atong mga kahuyang. Ang pagkamapainubsanon dinuyogan sa hugot nga pagtuo diha kang Jesukristo, makatugot nato sa paggamit sa makaabag nga gahom sa Iyang grasya ug sa kahingpitan sa mga panalangin nga anaa tungod sa Iyang Pag-ula.
Si Presidente Nelson mitudlo nga “ang tinuod nga paghinulsol magsugod sa hugot nga pagtuo nga si Jesukristo adunay gahom sa paglimpyo, pag-ayo, ug paglig-on kanato. … Ang atong hugot nga pagtuo mao ang mobubu sa gahom sa Dios sa atong kinabuhi.”14
Ikatulo, pinaagi sa Iyang grasya Siya makahimo sa mahuyang nga mga butang nga mahimo nga malig-on. Kon kita magpaubos sa atong mga kaugalingon ug magbaton og hugot nga pagtuo kang Jesukristo, nan ang Iyang grasya makapahimo nato nga mausab. Sa laing pagkasulti, Siya mohatag nato og gahom nga mag-usab. Kini posible tungod kay, sama sa Iyang giingon, “Ang akong grasya igo alang sa tanan nga mga tawo.”15 Ang Iyang makalig-on, makaabag nga grasya makahatag og gahom sa pagbuntog sa tanan nga mga babag, sa tanan nga mga hagit, ug sa tanan nga mga kahuyang samtang kita magtinguha nga mag-usab.
Ang atong labing dako nga mga kahuyang mahimong atong labing dakong mga kalig-on. Kita mahimong mausab ug “mahimo nga bag-o nga mga nilalang.”16 Ang huyang nga mga butang sa tinuod “mahimo nga malig-on ngari [kanato].”17
Ang Manluluwas mihimo sa Iyang walay kinutoban ug mahangtoron nga Pag-ula aron nga kita sa tinuod mausab, maghinulsol, ug mahimong mas maayo. Kita sa pagkatinuod mahimong matawo pag-usab. Kita makabuntog og mga kinaiya, mga adiksyon, ug gani sa “hilig sa pagbuhat og daotan.”18 Isip mga anak nga lalaki ug mga anak nga babaye sa usa ka mahigugmaong Amahan sa Langit, kita adunay gahom diha sa atong kaugalingon nga mag-usab.
Mga Ehemplo sa Kausaban
Ang mga kasulatan puno sa mga ehemplo sa mga lalaki ug mga babaye kinsa nag-usab.
Si Saul, usa ka Pariseo ug aktibo nga tigpanggukod sa unang Kristiyano nga simbahan,19 nahimo nga Pablo, usa ka Apostol ni Ginoong Jesukristo.
Si Alma mao ang pari sa korte sa daotan nga si Hari Noah. Siya naminaw sa mga pulong ni Abinadi, hingpit nga naghinulsol, ug nahimong usa sa labing bantogan nga mga misyonaryo sa Basahon ni Mormon.
Ang iyang anak nga si Alma migahin sa iyang pagkabatan-on sa pagtinguha sa paglaglag sa Simbahan. Siya usa “[sa] labing daotan sa mga makasasala”20 hangtod siya adunay kausaban sa kasingkasing ug nahimong usa ka gamhanan nga misyonaryo sa iyang kaugalingong katungod.
Si Moises gisagop sa pamilya ni Paraon ug nagdako sa kabuhong isip usa ka prinsipe nga Ehiptohanon. Apan sa dihang siya nakasabot kinsa gayod siya ug nakat-on sa iyang balaan nga kapalaran, siya nausab ug nahimong bantogan nga magbabalaod nga propeta sa Daang Tugon.21
Ang apohan nga lalaki sa akong asawa, si James B. Keysor, kanunay nga nakapadani nako sa iyang kaugalingon nga dakong kausaban sa kasingkasing.22 Natawo gikan sa matinud-anong mga pioneer sa Walog sa Salt Lake niadtong 1906, namatay ang iyang inahan sa bata pa siya ug nakigbisog sa iyang tibuok pagkabatan-on. Ang katuigan sa iyang pagkatin-edyer ug pagka-young adult gigahin nga nahilayo sa Simbahan; nga sa maong panahon siya nakaangkon og daghang dili maayo nga mga kinaiya. Bisan pa niana, nahimamat niya ug naminyo sa usa ka matinud-anon nga babaye ug silang duha mipadako og lima ka anak.
Niadtong 1943, human sa malisod nga mga katuigan sa Grabing Depresyon ug atol sa Ikaduhang Gubat sa Kalibotan, si Bud, nga maoy tawag sa iyang mga higala ug pamilya, mibiya sa Utah ug mibalhin ngadto sa Los Angeles, California, aron mangita og trabaho. Atol niining panahon nga layo sa panimalay, siya nagpuyo uban sa iyang igsoong babaye ug sa bana, kinsa nagserbisyo isip bishop sa ilang ward.
Uban sa gugma ug impluwensya sa iyang igsoong babaye ug bayaw nga lalaki, nagsugod pagbalik ang iyang tinguha sa Simbahan ug nagsugod sa pagbasa sa Basahon ni Mormon matag gabii sa dili pa matulog.
Usa ka gabii, samtang nagbasa sa Alma kapitulo 34, ang iyang kasingkasing natandog samtang nagbasa siya sa mosunod nga mga pulong:
“Oo, ako buot nga kamo moduol ug dili magpatig-a sa inyong mga kasingkasing. …
“Kay tan-awa, kini nga kinabuhi mao ang panahon alang sa mga tawo sa pagpangandam sa pagsugat sa Dios; oo, tan-awa ang adlaw niini nga kinabuhi mao ang adlaw alang sa mga tawo sa paghimo sa ilang mga buluhaton.”23
Samtang nagbasa niini nga mga bersikulo, usa ka gamhanan nga pagbati ang miabot kaniya ug nasayod siya nga siya kinahanglan nga mag-usab, maghinulsol, ug nasayod siya unsay kinahanglan niyang buhaton. Siya mibangon gikan sa iyang higdaanan ug miluhod ug nagsugod sa pag-ampo, nangamuyo sa Ginoo sa pagpasaylo kaniya ug sa paghatag niya og kalig-on nga iyang gikinahanglan sa paghimo og mga kausaban sa iyang kinabuhi. Ang iyang pag-ampo natubag, ug gikan nianang panahona, wala na siya mobalik sama sa kaniadto. Si Bud padayon nga nagserbisyo sa Simbahan ug nagpabilin nga matinud-anon, mapasaligon nga Santos sa Ulahing mga Adlaw hangtod sa kataposan sa iyang kinabuhi. Nausab ang tanan kaniya. Ang iyang hunahuna, iyang kasingkasing, iyang mga aksyon, iyang pagkatawo nausab.
Mga kaigsoonan, ang atong balaan nga kapalaran ug katuyoan mao gayod ang pagkahimong sama sa atong Langitnong Amahan ug sa Manluluwas, si Jesukristo. Kita mobuhat niini samtang kita mag-usab, o maghinulsol. Kita nakadawat sa hitsura sa Maluluwas diha sa [atong] panagway.”24 Kita mahimong bag-o, limpyo, lahi, ug kita mopadayon lamang sa pagpaningkamot niini matag adlaw. Usahay tingali morag mobati ta og duha ka lakang paabante ug usa ka lakang paatras, apan kita mopadayon nga mapainubsanon nga magpadayon pinaagi sa hugot nga pagtuo.
Ug samtang kita magpaubos sa atong mga kaugalingon ug magpakita og hugot nga pagtuo kang Jesukristo, ang grasya ni Kristo ug ang Iyang walay kinutoban nga maulaong sakripisyo maghimo niini nga posible nga mausab.
Ako mosaksi ug mopamatuod nga si Jesukristo sa pagkatinuod mao ang atong Manluluwas ug Manunubos. Ang Iyang grasya sa pagkatinuod paigo. Ako mopahayag nga Siya ang “dalan, ang kamatuoran, ug ang kinabuhi.”25 Sa ngalan ni Jesukristo, amen.