“Ces Kuv Yuav Ua Kom tej uas Qaug Zog Los Ua tej uas Muaj Zog”
Thaum peb txo peb lub hwj chim thiab muab siab rau ntseeg Yexus Khetos, ces Khetos lub hwj chim thiab Nws txoj kev txi theej txhoj yuav ua rau peb txawj hloov.
Muaj ib zaug Thawj Tswj Hwm Thomas S. Monson tau hais ib zaj dab neeg txog tus ceev xwm saib xyuas lub tsev loj cuj Clinton Duffy. “Thaum tej xyoo 1940 thiab 1950, [Warden Duffy] muaj npe heev vim nws ua hauj lwm siv zog pab cov txiv neej hauv tsev loj cuj rov qab ua neeg zoo. ib tug neeg cem hais tias, ‘Koj yuav tsum paub hais tias cov tsov txaij yeej yuav tsis hloov lawv qhov txaij!’
“Warden Duffy tau teb hais tias, ‘Koj yuav tsum paub hais tias kuv tsis ua hauj lwm pab cov tsov txaij nas. Kuv ua hauj lwm pab cov txiv neej xwb, thiab cov txiv neej yeej txawj hloov siab txhua hnub.’”1
Dab Ntxwg Nyoog txoj kev dag loj tshaj plaws yog qhov uas cov txiv neej thiab cov poj niam tsis muaj peev xwm hloov. Tib neeg hais thiab rov qab hais cov lus dag ntxias no vim neeg ntiaj teb qhia tias peb tsis muaj peev xwm hloov—los yog qhia tias peb yuav tsum tsis txhob hloov. Lawv qhia tias peb raug xwm txheej li cas ces peb yuav ua ib tug neeg zoo li ntawd. Lawv hais tias peb yuav tsum “muab siab npuab peb yog neeg zoo li cas tiag,” thiab “ua tus neeg tseeb raws li nej yog tiag.”
Peb Txawj Hloov
Txawm yog ib qho zoo thaum peb ua neeg tseeb raws li peb yog tiag, peb yuav tsum ua neeg tseeb rau qhov uas peb yog Vajtswv cov tub thiab cov ntxhais uas muaj cwj pwm thiab txoj hmoov hloov los ua neeg zoo li Nws.2 Yog tias peb lub hom phiaj yog kom peb ua neeg tseeb raws li Vajtswv tej cwj pwm tiag, ces peb txhua tus yuav tsum hloov. Lo lus hauv vaj lug kub rau kev hloov yog kev hloov siab lees txim. Thawj Tswj Hwm Russell M. Nelson qhia tias, “Neeg coob xav tias kev hloov siab lees txim yog kev raug txim—ib yam uas yuav tsum tsis txhob ua tsuas yog yus tau ua txhaum loj heev. … Thaum Yexus hais kom peb ‘hloov siab lees txim,’ Nws caw peb hloov peb lub siab.”3
Vajtswv tej Kev Cai
Cov kws sau kev xam qhia lub koospistawj siv tej kab lus tsa kev cai kom qhia tej koospistawj paub yuav tsum ua dab tsi. Tej lub sij hawm yuav hu tej kab lus no ua kab lus yog-ces. Xws li, yog qhov x muaj tseeb, ces ua qhov y.
Tus Tswv kuj ua hauj lwm los ntawm tej yam peb yuav tsum ua, xws li yuav tsum ntseeg, yuav tsum ua ncaj ncees, yuav tsum hloov siab lees txim. Muaj ntau zaus thaum Vajtswv hais txog tej yam yuav tsum ua xws li:
“Yog hais tias [nej] ua raws li kuv tej lus txib thiab nyiaj mus kom txog thaum kawg ces [nej] yuav tau txoj sia nyob mus ib txhis, uas yog lub txiaj ntsim zoo tshaj plaws ntawm tag nrho Vajtswv tej txiaj ntsim.”4
Los sis “yog nej thov nrog lub siab dawb paug, nrog kev mob siab ntso, thiab muaj kev ntseeg Khetos, [ces] nws yuav qhia rau nej tias tej no muaj tseeb, los ntawm tus Vaj Ntsuj Plig Dawb Huv lub hwj chim.”5
Txawm yog Vajtswv txoj kev hlub yeej nyob mus ib txhis thiab zoo tag nrho los, kuj yuav tsum ua tej yam kom thiaj tau.6 Piv txwv hais tias:
“Yog nej ua raws li kuv tej lus, [ces] nej yuav muaj lub siab hlub ib yam li kuv ua raws li kuv Txiv tej lus thiab kuv muaj lub siab hlub ib yam li nws.”7
Txwj Laug D. Todd Christofferson tau piav ntxiv txog qhov tseeb ntawm txoj moo zoo no thaum nws hais tias: “Muaj neeg uas hais tias, ‘Kuv zoo li cas los tus Cawm Seej hlub kuv,’ es qhov no muaj tseeb tiag. Tiam sis Nws coj tsis tau peb nkag mus hauv Nws lub nceeg vaj yog peb zoo li no, ‘vim tsis muaj ib yam tsis dawb huv uas nyob taus haud, los yog nyob ntawm nws lub xub ntiag’ [Mauxes 6:57]. Yuav tsum them nqi rau peb tej kev txhaum ua ntej.”8
Tej Kev Qaug Zog Txawj Hloov Los Muaj Zog
Txoj koob hmoov uas peb txais Vajtswv lub hwj chim kom pab peb hloov siab yeej nyob ntawm tej yam peb yuav tsum ua thiab. Tus Cawm Seej tau hais los ntawm tus yaj saub Maulaunais nyob hauv Phau Ntawv Maumoos tias: “Yog tias tib neeg los cuag kuv, kuv yuav ua kom lawv paub txog lawv txoj kev qaug zog. Kuv muab txoj kev qaug zog rau tib neeg xwv kom lawv yuav txo hwj chim; thiab kuv lub hwj chim yeej txaus rau tib neeg txhua tus uas txo lawv lub hwj chim rau kuv; yog tias lawv txo lawv lub hwj chim rau kuv, thiab ntseeg kuv, ces kuv yuav ua kom tej uas qaug zog los ua tej uas muaj zog rau lawv.”9
Thaum peb ua tib zoo kawm tej yam uas tus Tswv qhia peb ntawm no, Nws hais ua ntej tias Nws muab txoj kev qaug zog rau cov txiv neej thiab cov poj niam, uas yog ib feem ntawm peb lub neej hauv ntiaj teb no thaum peb ua cov neeg ntawm sab cev nqaij daim tawv. Peb tau los ua neeg ntawm sab cev nqaij daim tawv vim muaj Adas txoj Kev Poob. Tiam sis dhau los ntawm Yexus Khetos txoj Kev Theej Txhoj, peb yuav kov yeej peb txoj kev qaug zog los sis qhov uas peb sab cev nqaij daim tawv tau poob mus.
Ces tus Tswv hais tias Nws lub hwj chim yeej txaus thiab yog peb yuav txo peb lub hwj chim thiab ntseeg Nws, ces Nws yuav “yuav ua kom tej uas qaug zog los ua tej uas muaj zog rau [peb].” Los yog hais tias, thaum peb hloov peb sab cev nqaij daim tawv uas poob lawm, uas yog peb txoj kev qaug zog, ces peb yuav txawj hloov peb tej cwj pwm, uas yog peb tej kev qaug zog.
Tej Yam Yuav Tsum Ua Kom Hloov
Cia peb rov qab kawm seb yuav tsum ua dab tsi kom hloov raws li tus Tswv tus txheej txheem.
Qhov thib ib, peb yuav tsum txo peb lub hwj chim. Tus Tswv hais tias peb yuav tsum txo hwj chim kom peb hloov taus. Nws tau hais tias, “Yog lawv txo lawv lub hwj chim rau kuv.”10 Qhov fab ntxeev ntawm kev txo hwj chim yog kev muab hlob. Peb muab hlob thaum peb xav tias peb paub zoo dua—thaum qhov uas peb xav yog qhov tseem ceeb tshaj qhov uas Vajtswv xav.
Vaj Ntxwv Npeyamis qhia tias “tus neeg ntawm sab cev nqaij daim tawv yog ib tug yeeb ncuab rau Vajtswv… thiab yuav yog, mus ib txhiab thiab ib txhis, tsuas yog nws … tso tus neeg ntawm sab cev nqaij daim tawv tseg thiab los ua ib tug neeg dawb huv los ntawm tus Tswv Khetos txoj kev theej txhoj, thiab hloov los ua zoo li ib tug me nyuam, mloog lus, muaj siab mos siab muag, [thiab] txo hwj chim.”11
Yog peb xav hloov, peb yuav tsum tso tus neeg ntawm sab cev nqaij daim tawv tseg thiab txo hwj chim thiab mloog lus. Peb yuav tsum txo hwj chim txaus kom coj raws li tus yaj saub qhia. Txo hwj chim txaus kom ua kev khi lus hauv lub tuam tsev. Txo hwj chim txaus kom hloov siab lees txim txhua hnub. Peb yuav tsum txo hwj chim txaus kom xav hloov siab, kom “ywj peb lub siab rau Vajtswv.”12
Qhov thib ob, peb yuav tsum ntseeg Yexus Khetos. Tus Tswv kuj hais tias: “Yog tias lawv txo lawv lub hwj chim rau kuv, thiab ntseeg kuv,”13 ces Nws yuav ua kom tej uas qaug zog los ua tej uas muaj zog rau peb. Kev txo hwj chim, nrog kev ntseeg Yexus Khetos, yuav ua rau peb txais tau lub hwj chim ntawm Nws txoj kev tshav ntuj thiab cov koob hmoov uas los ntawm Nws txoj Kev Theej Txhoj.
Thawj Tswj Hwm Nelson tau qhia tias “kev hloov siab lees txim pib los ntawm kev ntseeg tias Yexus Khetos muaj hwj chim ntxuav peb, kho peb zoo, thiab txhawb peb lub dag zog. … Yog peb txoj kev ntseeg uas ua rau peb txais tau Vajtswv lub hwj chim nyob hauv peb lub neej.”14
Qhov thib peb, yog los ntawm Nws txoj kev tshav ntuj los yog Nws lub hwj chim Nws thiaj li ua kom tej uas qaug zog los ua tej uas muaj zog. Yog peb txo hwj chim thiab ntseeg Yexus Khetos, ces Nws txoj kev tshav ntuj yuav ua rau peb txawj hloov. Los yog hais tias, Nws yuav muab hwj chim rau peb kom txawj hloov. Yeej muaj li no vim, ib yam li Nws hais tias, “Kuv lub hwj chim yeej txaus rau tib neeg txhua tus.”15 Nws txoj kev tshav ntuj muab dag zog thiab lub hwj chim rau peb kov yeej txhua yam teeb meem, txhua yam uas tab kaum peb, thiab tag nrho tej kev qaug zog uas peb xav hloov.
Peb tej kev qaug zog loj tshaj plaws yuav los ua tej yam uas muaj zog tshaj plaws. Peb yuav hloov siab thiab “los ua neeg tshiab.”16 Tej yam uas qaug zog yeej yuav “los ua tej uas muaj zog rau [peb].”17
Tus Cawm Seej tau ua Nws txoj Kev Theej Txhoj uas nyob mus ib txhis li kom peb thiaj yuav txawj hloov siab lees txim, thiab los ua neeg zoo dua ntxiv. Kom peb yuav yug dua tshiab. Peb muaj peev xwm kov yeej tej kev muaj yees, tej cwj pwm tsis zoo, thiab kev “muaj siab xav ua phem.”18 Vim peb yog Leej Txiv Saum Ntuj Ceeb Tsheej cov tub thiab cov ntxhais, peb muaj hwj chim nyob hauv peb kom hloov taus.
Cov Neeg uas Coj Yam Ntxwv txog Kev Hloov Siab
Cov vaj lug kub muaj neeg coob uas tau hloov siab.
Xaulus, ib tug Falixais thiab ib tug uas tsim txom cov neeg Ntseeg Khetos thaum ub,19 tau hloov los ua Povlauj, tus Tswv Yexus Khetos ib tug Thwj Tim.
Amas yog ib tug pov thawj hauv tus neeg phem, Vaj Ntxwv Nau-as, lub rooj. Nws tau mloog Anpinadais lus, hloov siab lees txim tag nrho, thiab tau los ua ib tug tub txib zoo tshaj hauv Phau Ntawv Maumoos.
Nws tus tub Amas tau sim ua kom lub Koom Txoos puas tsuaj thaum nws yog ib tug tub hluas. Nws yeej yog tus “neeg txhaum uas phem tshaj plaws”20 mus txog thaum nws hloov siab heev thiab tau los ua ib tug tub txib uas muaj hwj chim thiab.
Falaus tsev neeg tau yuav Mauxes los tu nws thiaj li tau loj hlob ua ib tug tub vaj ntxwv Iyiv nplua nuj heev. Tiam sis thaum nws to taub tias nws yog leej twg tiag tiag thiab kawm txog nws txoj hmoov uas los saum ntuj los, nws tau hloov siab thiab los ua tus yaj saub uas muab kev cai rau cov Ixayees nyob hauv Phau Qub.21
Kuv tus poj niam yawg James B. Keysor yeej ib txwm tshoov kuv lub siab thaum kuv kawm txog nws txoj kev hloov siab loj heev.22 Nws niam nws txiv yog Tsoom Haiv Neeg Ntseeg hauv Hnub Nyoog Kawg ob tug pioneer uas rau siab ntseeg nyob hauv lub Hav Salt Lake nyob rau xyoo 1906, tiam sis nws niam tas sim neej no thaum nws tseem hluas es ua nyuaj rau nws heev. Thaum nws yog ib tug tub hluas nws tsis tau koom lub Koom Txoos, lub sij hawm ntawd nws twb kawm ua tej yam tsis zoo thiab. Txawm li ntawd los, nws tau ntsib ib tug poj niam uas rau siab ntseeg, thiab nyob ua ke nkawd muaj tsib tug me nyuam.
Nyob rau xyoo 1943, tom qab muaj lub Caij Nyoog Poob Nyiaj Txiag Loj Heev thiab thaum ua Kev Tsov Rog Thoob Ntiaj Teb thib Ob, Bud, uas nws cov phooj ywg thiab tsev neeg hu nws, nws tau tawm Utah mus rau Los Angeles, California, nrhiav hauj lwm ua. Thaum lub sij hawm uas nws tsis nyob hauv tsev, nws nrog nws tus muam thiab tus yawm yij, uas yog tus npisov ntawm nkawd pawg ntseeg.
Los ntawm nws tus muam thiab nws tus yawm yij txoj kev hlub thiab tej lus qhia, nws pib xav kawm txog lub Koom Txoos thiab pib nyeem Phau Ntawv Maumoos txhua hmo ua ntej nws tsaug zog.
Muaj ib hmo, thaum nws nyeem nyob hauv Amas chapter 34, nws txais kev tshoov siab thaum nws nyeem tej lus no:
“Muaj tseeb tiag, kuv xav kom nej cia li tawm los thiab tsis txhob ua nej lub siab tawv ntev ntxiv lawm. …
“Vim saib seb, lub neej no yog lub caij rau tib neeg npaj mus ntsib Vajtswv; muaj tseeb tiag, saib seb lub caij ntawm lub neej no yog lub caij rau tib neeg ua lawv tej hauj lwm.”23
Thaum nws nyeem tej nqe no, nws txais kev tshoov siab loj heev thiab nws paub tias nws yuav tsum ua li cas kom hloov siab lees txim. Nws tau sawv thiab txhos caug pib thov Vajtswv, thov kom tus Tswv zam txim pub rau nws thiab muab dag zog rau nws hloov tej yam nws yuav tsum hloov hauv nws lub neej. Vajtswv tau teb nws tej lus thov, thiab txij thaum ntawd los, nws yeej tsis tau rov qab mus. Bud twb tau ua hauj lwm hauv lub Koom Txoos thiab yog ib tug Neeg Ntseeg hauv Hnub Nyoog Kawg rau siab ntseeg kom tas nws lub neej. Nws tau hloov siab tag nrho. Nws lub siab, nws lub hlwb, tej yam nws ua, nws tus kheej tag nrho los twb hloov.
Cov kwv tij thiab cov muam, peb txoj hmoov thiab lub hom phiaj yog kom hloov los ua neeg zoo li peb Leej Txiv Saum Ntuj Ceeb Tsheej thiab tus Cawm Seej Yexus Khetos. Peb ua li no thaum peb hloov siab lees txim. Peb “txais [tus Cawm Seej] tus yam ntxwv rau [peb] lub ntsej muag.”24 Peb los ua neeg tshiab, neeg huv, neeg txawv, thiab peb yeej meem niaj hnub ua kom hloov ntxiv. Tej lub sij hawm peb yuav xav tias peb mus ib ruam tom ntej thiab ib ruam thaub qab, tiam sis peb txo hwj chim muaj kev ntseeg mus tom ntej.
Thiab thaum peb txo peb lub hwj chim thiab muab siab rau ntseeg Yexus Khetos, ces Khetos lub hwj chim thiab Nws txoj kev txi theej txhoj yuav ua rau peb txawj hloov.
Kuv ua tim khawv hais tias Yexus Khetos yog peb tus Cawm Seej thiab tus Txhiv Dim tiag tiag. Nws txoj kev tshav ntuj yeej txaus. Kuv tshaj tawm tias Nws yog “txoj kev, qhov tseeb, thiab yog txoj sia.”25 Los ntawm Yexus Khetos lub npe, amees.