Ua Qhov uas Muaj Nqis Tshaj Plaws
Thaum peb ua neej thiab tsom ntsoov rau Yexus Khetos, peb yuav tau koob hmoov muaj zog ntawm sab ntsuj plig, peb yuav txaus siab, thiab muaj kev xyiv fab.
Tsis ntev tas los, ib tug phooj ywg zoo tau txais kev tshoov siab mus xyuas ib tug poj niam hauv nws pawg ntseeg. Nws tsis tshua paub tus poj niam no—nws thiaj li tsis to taub vim li cas nws yuav tsum ua li ntawd. Tiam sis vim nws pheej xav txog qhov no, nws txiav txim siab nws yuav ua raws li kev tshoov siab ntawd. Vim tias nws tsis tshua txaus siab mus, nws xav tias yog nws nqa ib yam dab tsi mus ces yuav pab kom nws tsis txhob txhawj dhau. Nws yeej yuav tsum nqa ib yam dab tsi thaum nws mus xyuas! Yog li ntawd nws tau yuav ib pob keelees thiab nws cia li sawv kev mus es nws ntshai tias nws yuav txaj muag heev.
Nws tau khob qhov rooj ces tus viv ncaus no teb. Kuv tus phooj ywg tau muab cov keelees ntim rau hauv ib lub hnab ntawv, ces nkawd pib sib tham. Tsis ntev ces kuv tus phooj ywg paub vim li cas nws yuav tsum tuaj xyuas. Thaum nkawd zaum ua ke, tus poj niam tau hais txog nws tej teeb meem ntau. Huab cua sov heev es tom qab nkawd sib tham ntev li ib teev ces kuv tus phooj ywg pom tias cov keelees yaj ntub lub hnab ntawv.
Nws hais tias, “Thov txim koj cov keelees yaj tas!”
Tus poj niam teb tias, “Tsis ua li cas! Kuv noj mis nyuj tsis haum!”
Nyob hauv ib zaj npau suav, tus Tswv tau qhia tus yaj saub, “Lihais koj tau koob hmoov, vim yog tej uas koj tau ua.”1
Kev ua Yexus Khetos tus thwj tim tsis yog kev cia siab los sis kev ntseeg xwb. Yuav tsum ua siv zog, mus lawm tom ntej, thiab cog lus. Yuav tsum ua ib yam dab tsi, vim peb yog cov uas “ua raws li Vajtswv txoj lus, tsis yog ua cov mloog xwb.”2
Hais txog cov keelees uas yaj tas, yam twg muaj nqis tshaj? Cov keelees? Los sis qhov uas kuv tus phooj ywg tau mus xyuas nws?
Muaj ib zaug ib tug ntxhais hluas tau nug ib lo lus uas nws xav paub tiag tiag: “Viv Ncaus Craven, koj ua li cas ho paub tias lub Koom Txoos muaj tseeb? Vim kuv tsis hnov dab tsi.”
Ua ntej kuv teb nws, kuv nug nws ob peb lo lus. “Qhia kuv txog koj txoj kev kawm vaj lug kub.”
Nws teb tias, “Kuv tsis nyeem cov vaj lug kub.”
Kuv nug hais tias, “Koj tsev neeg nev? Nej puas kawm Los, Nrog Kuv Mus ua ke?”
Nws hais tias, “Tsis kawm.”
Kuv nug txog nws txoj kev thov Vajtswv, “Koj hnov dab tsi thaum koj thov Vajtswv?”
Nws teb hais tias: “Kuv tsis thov.”
Kuv teb nws tias, “Yog koj xav paub ib yam dab tsi, koj yuav tsum ua ib yam dab tsi.”
Txhua yam uas peb xav kawm puas yog li no? Kuv tau caw kuv tus phooj ywg tshiab kom ua raws li Yexus Khetos txoj moo zoo: thov Vajtswv, kawm vaj lug kub, pab lwm tus, thiab tso siab rau tus Tswv. Yus yuav tsis hloov siab los ntseeg yog yus tsis ua dab tsi. Kev hloov siab los ntseeg yog los ntawm tus Vaj Ntsuj Plig Dawb Huv lub hwj chim thaum peb siv zog thov, nrhiav, thiab khob qhov rooj. Peb yuav tsum ua tas mus li.3
Nyob hauv phau Lus Qhuab Qhia thiab Kev Khi Lus, tus Tswv hais tias, “Tsis ua li cas.”4 Qhov no ua rau kuv xav tias yog Nws hais tias muaj tej yam uas tsis ua li cas, los yog tsis tshua muaj nqis, ces yeej muaj tej yam uas muaj nqis tshaj plaws. Thaum peb xav ua ib yam dab tsi, tej zaum peb yuav tsum nug peb tus kheej tias, “Yam twg muaj nqis tshaj plaws rau peb?”
Cov neeg uas ua kev qhauxabnas siv tej lus xws li “Tseem Ceeb” los sis “Yuav Tsum Muaj” kom ntxias tau peb ntseeg tias yuav tsum muaj tej khoom uas lawv muag kom peb zoo siab los sis kom peb nyob zoo. Tiam sis tej yam uas lawv muag puas tseem ceeb tiag tiag? Puas yog peb yuav tsum muaj tej yam no tiag? Puas muaj nqis tiag tiag?
Cia li xav txog tej lub tswv yim no. Qhov twg muaj nqis tshaj plaws?
-
Muaj pes tsawg tus neeg “nyiam” tej yam uas peb sau hauv social media? Los sis peb Leej Txiv Saum Ntuj Ceeb Tsheej hlub peb thiab saib peb rau nqi npaum li cas?
-
Puas hnav cov khaub ncaws uas muaj neeg coob nyiam? Los sis yuav tsum saib peb lub cev rau nqi thaum peb hnav khaub ncaws npog peb lub cev?
-
Nrhiav tej lus teb thaum nrhiav hauv internet? Los sis txais Vajtswv tej lus teb los ntawm tus Vaj Ntsuj Plig Dawb Huv?
-
Puas xav tau ntxiv? Los sis txaus siab rau tej yam uas muaj lawm?
Thawj Tswj Hwm Russell M. Nelson qhia hais tias:
“Thaum tus Vaj Ntsuj Plig Dawb Huv nrog nej nyob, nej yuav txawj pom dhau txoj kev qhuas cov uas muaj koob muaj npe raws li peb cov neeg nyiam ua. Nej yuav txawj ntse tshaj tej tiam neeg uas muaj ua ntej.
“Cia li coj yam ntxwv rau lwm tus hauv ntiaj teb no!”5
Peb yuav tsum siv zog kom tsom ntsoov rau tej yam uas tseem ceeb tiag kom muaj kev xyiv fab uas kav ib txhis. Dab Ntxwg Nyoog xav kom peb tso tej yam uas muaj nqis mus ib txhis li tseg, ua rau peb siv sij hawm, txuj ci, los sis lub zog ntawm sab ntsuj plig rau tej yam uas tsis muaj nqis hlo li. Kuv caw nej txhua tus xav txog tej yam uas yuav ua rau nej tsis txhob ua tej yam uas tsis muaj nqis tshaj.
Kuv tus tub hlob tus xib hwb tau qhia nws hoob kawm ntawv qib peb kom lawv “tswj lawv lub hlwb.” Ua rau nws cov tub ntxhais kawm ntawv hais tias lawv txawj tswj lawv tej kev xav yog li ntawd lawv txawj tswj tej yam uas lawv yuav ua. Kuv hais rau kuv tus kheej kom “tswj kuv lub hlwb” thaum kuv pib xav txog tej yam uas tsis tshua muaj nqis.
Ib tug ntxhais kawm ntawv tau qhia kuv tias cov tub hluas ntxhais hluas hauv lub Koom Txoos ib txhia xav tias lawv yuav tsis ua raws li cov lus txib tiam sis lawv yuav hloov siab lees txim tom qab ntawd. Nws hais tias, “Lawv xav tias ua li ntawd yog ib lub sam xeeb.” Tus Tswv yeej yuav zam txim pub rau cov uas txo hwj chim hloov siab lees txim “tiag tiag.”6 Tiam sis tsis tsim nyog thuam tus Cawm Seej txoj Kev Theej Txhoj li ntawd. Peb paub zaj lus piv txwv txog ib tug yaj uas ploj mus. Muaj tseeb tiag, ib tus neeg yug yaj yuav ncaim 99 tus yaj kom nrhiav tus uas tau poob zoo lawm. Tiam sis nej puas paub tus Tswv Yug Yaj Zoo yuav xyiv fab npaum li cas txog cov uas xaiv koom nrog 99 tus yaj? Cov uas koom siab ua ke ib leeg pab ib leeg ua raws li lawv tej kev khi lus? Nej puas txawj xav tias lub ntiaj teb los sis nej lub tsev kawm ntawv los sis qhov chaw ua hauj lwm los sis nej lub tsev yuav zoo li cas yog tias kev mloog Vajtswv lus yog qhov uas txhua tus nyiam ua? Tsis yog peb yuav tsum ua neej zoo tag nrho—peb yuav tsum muaj kev xyiv fab thaum peb ua zoo npaum li peb ua tau kom ua raws li peb tej kev khi lus nrog tus Tswv.
Vim neeg ntiaj teb tab tom ua xyem xyav ntxiv txog Vajtswv, thiab tej kev ntxhov hnyo loj tuaj ntxiv, ces lub sij hawm no peb yuav tsum nyob ze ze tus yaj saub. Vim nws yog tus uas cev tus Tswv lus, peb ntseeg tau hais tias tej yam uas nws hais, ntuas,thiab thov kom peb ua yog tej uas muaj nqis tshaj.
Txawm yog ua nyuaj rau peb los, yeej muaj ib txoj kev kom ua qhov yog. Thaum ib tug ntxhais hluas nrog ib co phooj ywg tham hauv tsev kawm ntawv, nws poob siab thaum lawv pib hais lus cem tej kev cai ntawm lub Koom Txoos. Nws paub tias nws nyob tsis taus twj ywm—nws yuav tsum ua ib yam dab tsi. Nws hais lus txog Leej Txiv Saum Ntuj Ceeb Tsheej txoj kev hlub thiab vim li cas Nws cov lus txib pov hwm Nws cov me nyuam kom lawv tau koob hmoov. Yeej yuav yooj yim dua yog nws tsis tau hais dab tsi. Tiam sis yam twg muaj nqis tshaj? Kev sib xyaws nrog pawg neeg coob? Los sis nws sawv nws ib leeg ua tim khawv txog Vajtswv “txhua lub sij hawm thiab nyob hauv txhua yam, thiab nyob txhua qhov chaw”?7
Yog tias Yexus Khetos lub Koom Txoos yuav tawm hauv txoj kev pom tsis tseeb los, ces peb yuav tsum tawm hauv txoj kev pom tsis tseeb los. Vim peb yog cov poj niam uas ua raws li peb tej kev khi lus, peb yuav tsum muab lub teeb ntawm txoj moo zoo ci rau tag nrho lub ntiaj teb thaum peb ua tib zoo coj yam ntxwv zoo. Peb ua tej yam no ua ke vim peb yog Vajtswv cov ntxhais—muaj 8.2 plhom tus poj niam uas muaj 11 xyoos rov saud uas koom ua ib txoj hauj lwm. Peb muab Ixayees sau los ua ke thaum peb ua txoj hauj lwm cawm seej thiab kev tsa nto: peb siv zog ua raws li Yexus Khetos txoj moo zoo, pab lwm tus, caw txhua tus txais txoj moo zoo, thiab muab tej tsev neeg koom ua ke mus ib txhis li.8 Yexus Khetos txoj moo zoo yog ib txoj moo zoo ntawm kev siv zog thiab kev xyiv fab! Thov kom peb tsis txhob xav tias peb tsis muaj peev xwm ua tej yam uas muaj nqis tshaj. Peb caj ceg saum ntuj ceeb tsheej ua rau ntseeg tias peb ua tau txhua yam uas peb Leej Txiv Saum Ntuj Ceeb Tsheej paub tias peb muaj peev xwm ua.
Cov tub hluas ntxhais hluas lub ntsiab lus rau xyoo no yog Paj Lug 3:5–6:
“Cia siab rau tus Tswv kom kawg koj lub siab lub ntsws. Tsis txhob cia siab rau koj tej kev txawj ntse.
“Txhua yam uas koj ua koj yuav tsum nco ntsoov tus Tswv, nws thiaj yuav coj koj taug txoj kev uas yog txoj tseeb.”
Ib qho tseem ceeb ntawm kev tso siab rau tus Tswv yog kev mus tom ntej, vim peb ntseeg tias Nws yuav coj peb kev tsis hais thaum peb tsis paub txhua yam los yog.
Cov viv ncaus, tsis yog cov kislees. Thiab tsis yog yus yuav tsum ua ntxiv. Yuav tsum ua tej yam uas muaj nqis xwb. Yuav tsum ua raws li Yexus Khetos cov lus qhuab qhia thaum peb siv zog hloov los ua neeg zoo li Nws.
Thaum peb taug raws nraim li txoj kev ua raws li peb tej kev khi lus, ces peb txoj kev ntseeg Yexus Khetos yuav loj tuaj ntxiv. Thaum peb txoj kev ntseeg loj tuaj ntxiv lawm, ces peb yuav xav hloov siab lees txim ntxiv. Thiab yog peb hloov siab lees txim ntxiv, ces peb tej kev khi lus nrog Vajtswv yuav muaj zog zuj zus. Qhov uas peb nrog Vajtswv khi lus ua rau peb xav mus rau lub tuam tsev vim kev ua raws li tej kev khi lus hauv lub tuam tsev yuav pab peb nyiaj mus kom txog thaum kawg.
Thaum peb ua neej thiab tsom ntsoov rau Yexus Khetos, ces Nws yuav coj peb mus ua tej yam uas muaj nqis tshaj. Thiab peb yuav tau koob hmoov muaj zog ntawm sab ntsuj plig, peb yuav txaus siab, thiab muaj kev xyiv fab! Los ntawm Yexus Khetos lub npe, amees.