Nej txoj Kev Los Saum Ntuj Los thiab Nej txoj Hmoov Nyob Mus Ib Txhis Li
Kuv caw nej los tsom ntsoov rau Yexus Khetos thiab nco qab ntsoov txog tej lus tseeb nyob hauv Koom Haum Ntxhais Hluas zaj ntsiab lus.
Cov muam, ua nej tsaug vim nej nyob no. Kuv zoo siab kawg vim kuv nrog nej koom ua ke hauv tuas poj niam ntawm lub tuam rooj sab laj no. Tej lub sij hawm kuv kuj tau koob hmoov thaum kuv koom nrog nej hauv Koom Haum Ntxhais Hluas tej chav kawm. Tiam sis cia kuv qhia ib yam uas nej txhua tus paub lawm—kuv tsis hluas lawm, thiab kuv tsis yog ib tug ntxhais! Tiam sis kuv tau kawm hais tias kuv tsis tshua xav txog qhov uas kuv tsis haum yog kuv txawj hais Koom Haum Ntxhais Hluas zaj ntsiab lus nrog nej. Cov lus qhuab qhia tseem ceeb nyob hauv Koom Haum Ntxhais Hluas zaj ntsiab lus1 yeej tseem ceeb rau cov ntxhais hluas, tiam sis muaj nqis rau txhua leej txhua tus, tsis hais peb cov uas tsis yog ntxhais hluas.
Koom Haum Ntxhais Hluas zaj ntsiab lus pib li no hais tias, “Kuv yog ib tug ntxhais ntawm leej niam leej txiv saum ntuj ceeb tsheej uas hlub kuv thiab kuv muaj cwj pwm thiab txoj hmoov uas nyob mus ib txhis.”2 Cov lus no qhia plaub yam tseeb tseem ceeb. Qhov thib ib, nej yog cov ntxhais uas Vajtswv hlub. Tsis muaj ib yam dab tsi uas nej ua los sis tsis ua uas yuav hloov qhov ntawd. Vajtswv hlub nej vim nej yog Nws cov ntxhais ntsuj plig. Tej lub sij hawm peb tsis hnov Nws txoj kev hlub, tiam sis Nws yeej hlub nej. Vajtswv txoj kev hlub yeej zoo tag nrho.3 Peb txoj kev hnov txoj kev hlub ntawd los ntshe tsis zoo npaum li ntawd.
Tus Ntsuj Plig yeej muaj ib lub luag hauj lwm tseem ceeb kom qhia txog Vajtswv txoj kev hlub rau peb.4 Tiam sis ntshe peb tsis hnov tus Vaj Ntsuj Plig Dawb Huv lub hwj huam thaum “muaj tej kev xav hauv siab ntau heev, xws li thaum peb npau taws, peb chim siab, … [los sis] peb ntshai, … yeej zoo li thaum yus xav saj ib lub txiv hmab thaum yus noj kua txob jalapeño. … Yus tsuas saj kua txob xwb tsis saj lub txiv hmab hlo li.”5 Ib yam li ntawd, tej yam peb ua kom tus Vaj Ntsuj Plig Dawb Huv nyob deb, tsis hais kev ua txhaum,6 ua nyuaj rau peb paub txog Vajtswv txoj kev hlub rau peb.
Thiab ntshe tej xwm txheej nyuaj thiab kev mob kev nkeeg, thiab lwm yam yuav ua nyuaj rau peb txawj hnov tau Vajtswv txoj kev hlub thiab. Thaum muaj li no txhua zaus, cov thawj coj los sis cov kws ntuas zoo lawv cov lus qhia yeej pab tau. Peb kuj muaj peev xwm ua kom peb txawj hnov Vajtswv txoj kev hlub thaum peb nug peb tus kheej tias, “Puas yog kuv hlub Vajtswv tsis tu tsis tseg, los sis kuv hlub Nws thaum kuv nyob zoo xwb, tiam sis tsis tshua hlub Nws thaum kuv tsis zoo siab?”
Qhov tseeb thib ob yog qhov uas peb muaj leej txiv thiab leej niam nyob saum ntuj.7 Cov lus qhuab qhia txog ib Leej Niam Saum Ntuj Ceeb Tsheej yog los ntawm kev tshwm sim thiab yog ib txoj kev ntseeg uas muaj ntawm Tsoom Haiv Neeg Ntseeg hauv Hnub Nyoog Kawg xwb. Thawj Tswj Hwm Dallin H. Oaks piav tias qhov tseeb no yeej tseem ceeb npaum li cas: “Peb txoj kev ntseeg ntuj yeej pib ntawm leej txiv thiab leej niam saum ntuj. Qhov uas peb xav tau tshaj txhua yam yog kev ua neeg zoo li nkawd.”8
Vajtswv tsis tau qhia ntau pes tsawg txog Leej Niam Saum Ntuj Ceeb Tsheej, tiam sis tej yam uas peb paub los muaj nyob hauv txoj moo zoo zaj ntsiab lus uas muaj nyob hauv peb qhov application Txoj Moo Zoo cov Ntawv.9 Tom qab nej nyeem zaj ntawd, ces nej yuav paub txhua yam uas kuv paub txog qhov no. Kheev lam kuv paub ntxiv. Tej zaum nej tseem muaj lus nug thiab xav to taub ntxiv. Qhov uas nej nrhiav kom to taub ntxiv yog ib qho tseem ceeb ntawm peb txoj kev loj hlob ntawm sab ntsuj plig, tiam sis thov kom nej ceev faj. Kev xav mus xav los yeej pauv tsis taus kev tshwm sim.
Kev twv seb zoo li cas los yuav tsis pab peb muaj kev txawj ntse ntawm sab ntsuj plig ntxiv, tiam sis ntshe yuav ntxias peb los sis ua rau peb tsom ntsoov rau lwm yam uas tsis yog qhov uas tau muab tshwm sim lawm.10 Piv txwv hais tias, tus Cawm Seej qhia Nws cov thwj tim tias, “Nej yuav tsum thov Leej Txiv tas mus li los ntawm kuv lub npe.”11 Peb ua li no thiab teev tiam peb Leej Txiv Saum Ntuj Ceeb Tsheej los ntawm Yexus Khetos lub npe thiab tsis txhob thov rau peb Leej Niam Saum Ntuj Ceeb Tsheej.12
Txij thaum Vajtswv tau tsa cov yaj saub, Nws tau tso cai rau lawv sawv Nws cev hais lus. Tiam sis lawv tsis tshaj tawm txog cov lus qhuab qhia uas los ntawm lawv “lub siab xav xwb”13 los sis qhia tej yam uas Vajtswv tsis tau muab tshwm sim. Cia li xav txog tus yaj saub hauv Phau Qub Npala-as cov lus, tus uas lwm tus xav muab nyiaj xiab rau nws kom foom phem rau cov Neeg Ixayees kom pab cov neeg Mau-as. Npala-as teb hais tias, “Txawm yog [Mau-as tus Vaj Ntxwv] muab tag nrho tej nyiaj thiab kub hauv nws lub loog rau kuv los kuv yuav tsis kam hla tus Tswv uas yog kuv tus Vajtswv ib lo lus li.”14 Cov yaj saub hauv hnub nyoog kawg no los kuj yuav tsum ua li ntawd thiab. Kev yuam kom Vajtswv muab dab tsi tshwm sim rau peb los yeej yog kev maub hlob thiab yuav tsis pab dab tsi. Tiam sis, peb tos ntsoov tus Tswv txog lub sij hawm uas Nws tau teem tseg kom siv Nws txoj kev tshwm sim Nws tej lus tseeb rau peb.15
Qhov tseeb thib peb nyob hauv thawj nqe lus ntawm Koom Haum Ntxhais Hluas zaj ntsiab lus qhia peb tias peb “muaj cwj pwm … uas los saum ntuj los.” Nov yog ib feem tseem ceeb ntawm peb. Yeej yog peb “keeb kwm” sab ntsuj plig uas peb txais los ntawm peb leej txiv thiab leej niam saum ntuj16 thiab peb tsis tas ua dab tsi. Qhov no yog qhov tseem ceeb tshaj plaws txog peb, tsis hais peb xav li cas txog peb tus kheej los yog. Peb txoj kev to taub qhov tseeb no yeej tseem ceeb rau txhua leej txhua tus, tiam sis qhov no yeej tseem ceeb tshaj rau cov neeg hauv tej pawg uas ib txwm raug tso tseg, raug tsim txom, los sis raug txom nyem. Nco ntsoov tias qhov uas qhia tias nej yog leej twg uas tseem ceeb tshaj yog qhov uas nej yog Vajtswv cov me nyuam.
Qhov tseeb thib plaub qhia tias peb muaj ib “txoj hmoov nyob mus ib txhis.” Yeej yuav tsis yuam peb txais tau txoj hmoov no. Tom qab peb tas sim neej no peb yuav txais tej yam uas peb tsim nyog txais thiab “zoo siab rau qhov uas [peb] txaus siab txais.”17 Yog tias yuav muaj raws li peb txoj hmoov mus ib txhis li ces nyob ntawm tej yam uas peb xaiv. Peb yuav tsum ua raws li peb tej kev khi lus dawb ceev. Txoj kev ua raws li peb tej kev khi lus no yog txoj kev uas peb los cuag Khetos thiab yog qhov tseeb thiab tej kev cai uas tsis hloov mus ib txhis li. Yog peb tsim ib txoj kev rau peb tus kheej ces peb txais tsis taus Vajtswv tej lus cog tseg. Qhov uas yus xav tias yus tseem txais tau Nws cov koob hmoov thaum tsis ua raws li Nws tej kev cai18 los yeej tsis muaj tseeb, zoo ib yam li thaum peb xav tias peb kov tau ib qho cub thiab “txiav txim siab” tias yuav tsis kub peb.
Tej zaum nej paub tias kuv twb tau pab cov neeg mob plawv. Lawv yeej yuav txais kev kho mob zoo tshaj plaws yog lawv ua raws li tej kev kho mob uas twb tau ua ntev lawm thiab paub tias tau pab neeg coob dhau los lawm. Txawm yog lawv paub qhov no, cov neeg mob ib txhia tau xav kom txais kev kho mob txawv. Lawv tau hais tias, “Kuv tsis xav noj tshuaj ntau ua luaj” los sis “Kuv tsis xav kuaj mob ntau zaus.” Tiam sis, cov neeg mob yeej muaj kev ywj siab txiav txim siab rau lawv tus kheej, tiam sis yog tias lawv tau ua txawv li tus kws kho mob hais, ces lawv tau raug mob ntxiv. Cov neeg uas mob plawv xaiv tsis taus tej kev tsis zoo ces liam tus kws kho mob plawv thaum lawv raug xwm txheej.
Qhov no muaj tseeb rau peb thiab. Leej Txiv Saum Ntuj Ceeb Tsheej txoj kev yeej coj peb mus rau tej yam zoo tshaj plaws. Peb muaj kev ywj siab xaiv, tiam sis peb tsis muaj peev xwm xaiv tej yam uas peb yuav raug tom qab peb xaiv ib txoj kev.19 Tus Tswv hais tias, “Tus uas rhuav kev cai, thiab tsis coj raws li kev cai, tiam sis nrhiav kev kom tsim ib txoj kev cai rau nws tus kheej, … tsis muaj peev xwm muab tus ntawd hloov ua dawb huv los ntawm kev cai, los yog ntawm kev hlub tshua, kev txim lij, los yog kev txiav txim.”20 Tsis tsim nyog uas peb tawm Leej Txiv Saum Ntuj Ceeb Tsheej txoj kev mus ces liam Nws thaum peb raug tej yam tsis zoo.
Nqe lus thib ob nyob hauv Koom Haum Ntxhais Hluas zaj ntsiab lus hais tias: “Vim kuv yog Yexus Khetos tus thwj tim, kuv siv zog ua neeg zoo li Nws. Kuv xav txais thiab ua raws li kev tshwm sim thiab kuv xav txhawb pab lwm tus los ntawm Nws lub npe dawb huv.” Peb yuav paub tseeb txog Yexus Khetos thaum peb ua raws li kev ntseeg.21 Peb yuav muaj lub txiaj ntsim kom qhia tias peb “paub hais tias Yexus Khetos yog Vajtswv Leej tub, thiab paub tias nws raug ntsia rau saum ntoo khaub lig rau neeg ntiaj teb tej kev txhaum.” Los sis peb txais tau lub txiaj ntsim kom ntseeg tej lus ntawm cov uas peb paub,22 mus txog thaum peb paub ntawm peb tus kheej. Peb muaj peev xwm coj raws li tus Cawm Seej tej lus qhia thiab pab lwm tus los cuag Nws. Los ntawm txoj kev no, peb koom ua Nws txoj hauj lwm ua ke.23
Koom Haum Ntxhais Hluas zaj ntsiab lus hais ntxiv tias, “Kuv yuav ua tim khawv txog Vajtswv txhua lub sij hawm thiab ua tim khawv txog txhua yam nyob hauv txhua qhov chaw.” Txhua tus mej zeej hauv lub Koom Txoos yuav tsum ua tim khawv txog Vajtswv,24 txawm yog cov Thwj Tim thiab cov Xya Caum yog cov uas tau kev tso cai ua cov tim khawv tshwj xeeb txog Khetos lub npe.25 Cia li xav txog ib txoj kev sib tw ncaws pob uas muaj ib tug neeg tiv thaiv lub hom phiaj xwb. Yog tsis muaj lwm tus hauv nws pawg pab nws, ces nws yuav tsis muaj peev xwm tiv thaiv lawv lub hom phiaj ces nws pawg yuav swb txhua zaus xwb. Yog li ntawd yuav tsum muaj txhua tus uas nyob hauv tus Tswv pawg los pab.26
Cov lus kawg ntawm Koom Haum Ntxhais Hluas zaj ntsiab lus hais tias, “Thaum kuv siv zog ua neeg tsim nyog txais kev tsa nto, kuv xav tau lub txiaj ntsim kev hloov siab lees txim thiab xav ua zoo ntxiv dua txhua hnub.” Vim tus Cawm Seej tau theej peb lub txhoj, peb muaj cib fim hloov siab lees txim, kawm los ntawm peb tej kev txhaum, thiab peb yuav tsis raug txim. Thawj Tswj Hwm Russell M. Nelson qhia hais tias: “Neeg coob xav tias kev hloov siab lees txim yog kev raug txim. … Tiam sis Dab Ntxwg Nyoog yog tus uas ua rau yus xav tias yus raug txim. Nws xav kom peb tsis txhob ntsia Yexus Khetos, tus uas qhib caj npab tos nej, cia siab thiab txaus siab kom kho mob, zam txim, ua kom huv, txhawb zog, thiab muab peb hloov ua dawb huv.”27
Thaum peb hloov siab lees txim tiag tiag, yeej tsis muaj caws pliav ntawm sab ntsuj plig, tsis hais peb tau ua phem npaum li cas, los sis peb tau ua pes tsawg zaus los yog.28 Thaum twg peb hloov siab lees txim thiab xav txais kev zam txim tiag tiag, ces tus Tswv yuav xam txim rau peb.29 Qhov no yeej yog ib lub txiaj ntsim zoo kawg nkaus los ntawm peb tus Cawm Seej, Yexus Khetos!30 Tus Vaj Ntsuj Plig Dawb Huv yuav nplij peb lub siab qhia peb tias peb tau txais kev zam txim lawm. Thaum peb muaj kev xyiv fab thiab nyob kaj siab lug,31 peb lub txim ploj mus,32 thiab peb tej kev txhaum tsis tsim txom peb ntxiv.33
Tiam sis peb tseem dawm taw tom qab peb hloov siab lees txim tiag tiag. Thaum peb dawm taw qhov no tsis txhais tias peb tsis tau hloov siab lees txim txaus, tiam sis qhov no qhia tias peb muaj tej kev qaug zog. Qhov uas, “tus Tswv pom tej kev qaug zog txawv ntawm Nws pom kev ntxeev siab” yeej nplij peb lub siab. Peb yuav tsum ntseeg tus Cawm Seej txoj kev txawj pab peb kov yeej peb tej kev qaug zog vim “thaum tus Tswv hais txog kev qaug zog, Nws yeej hais los ntawm Nws txoj kev hlub tshua.”34
Koom Haum Ntxhais Hluas zaj ntsiab lus xaus li no tias, “Nrog kev ntseeg, kuv yuav txhawb kuv tsev neeg dag zog, ua thiab ua raws li tej kev khi lus dawb ceev, thiab txais cov kab ke thiab cov koob hmoov los ntawm lub tuam tsev dawb huv.” Tej zaum kev txhawb tsev neeg dag zog txhais tias nej yuav tsum ua thawj tus uas rau siab ntseeg, nej tseem muaj kev ntseeg mus ntxiv, los sis rov qab ntseeg.35 Txawm li ntawd los, kev muaj zog yeej los ntawm kev ntseeg Yexus Khetos thiab thaum nej ua
Nyob hauv lub tuam tsev, peb kawm tias peb yog leej twg thiab peb tau nyob qhov twg ua ntej. Tus kws tawm tswv yim Loos hu ua Cicero hais tias, “Qhov uas yus tsis paub tias yus lub neej ua ntej yus tau yug los zoo li cas yeej ua rau yus rau txim ua ib tug me nyuam tas lub neej no.”36 Nws hais txog tib neeg zaj keeb kwm thaum nws hais li no, tiam sis peb yeej siv tau nws tej lus no. Peb yuav ua zoo li cov me nyuam tas mus li yog tias peb tsis quav ntsej txog txoj sia nyob mus ib txhis uas peb kawm hauv lub tuam tsev. Nyob ntawd peb yuav loj hlob los ntawm tus Tswv, txais tus Vaj Ntsuj Plig Dawb Huv tag nrho,37 thiab rau siab ua tus Cawm Seej cov thwj tim.38 Thaum peb ua raws li peb tej kev khi lus, peb txais Vajtswv lub hwj chim hauv peb lub neej.39
Kuv caw nej los tsom ntsoov rau Yexus Khetos thiab nco qab ntsoov txog tej lus tseeb nyob hauv Koom Haum Ntxhais Hluas zaj ntsiab lus. Yog tias nej kam, ces tus Vaj Ntsuj Plig Dawb Huv yuav coj nej kev. Peb Leej Txiv Saum Ntuj Ceeb Tsheej xav kom nej txais Nws tej qub txeeg qub teg thiab txais tag nrho txhua yam uas Nws muaj.40 Nws muab tsis taus dab ntsi ntxiv rau nej. Nws cog lus tias nej yuav txais txhua yam. Nws hlub nej tshaj qhov nej xav thiab xav kom nej zoo siab hauv lub neej no thiab hauv lub neej tom ntej. Los ntawm Yexus Khetos lub npe, amees.