Paoa blong Faea blong Spirit

I Kam long Presiden Russell M. Nelson

Presiden blong Jos Ia blong Jisas Kraes blong Ol Lata-dei Sent

Mi wantem tokbaot 5 spesifik wei we bae yumi save folem holemtaet gud paoa blong faea blong spirit.

Ol dia brata mo sista. Mi lavem yufala. Mi glad tumas long janis ia blong toktok wetem yufala tedei. Mi prea evri dei, se bae yufala i gat proteksen long ol strong atak blong enemi, mo gat paoa blong pusum yu i go fored tru long wanem jalenj yu fesem.

Sam tes, oli hevi tumas mo i blong yuwan we i no gat narawan i save luk. Ol narawan, oli kamaot long stej blong wol. Faet long Is Yurop i wan long olgeta ia. Mi bin go long Yukren mo Rasia plante taem. Mi lavem ol graon ia, ol pipol ia mo lanwis blong olgeta. Mi krae mo prea from evriwan we faet ia i tajem laef blong hem. Olsem wan Jos, yumi stap mekem evri samting blong helpem olgeta we oli stap safa mo gat hadtaem blong stap laef. Mifala i invaetem evriwan blong gohed blong livim kakae mo prea from ol pipol we nogud taem ia i spolem olgeta. Eni wo, i wan samting we i agensem evri samting we Lod Jisas Kraes i stanap from mo i agensem evri samting we hem i stap tijim.

I no gat wan long yumi we i save kontrolem ol nesen, o aksen blong ol narawan, o iven hemia blong ol memba blong stret famli blong yumi. Be yumi save kontrolem yumiwan. Singaot blong mi, tedei, ol brata mo sista, i blong endem ol raorao we oli stap strong insaed long hat blong yu, insaed long hom blong yu, mo insaed long laef blong yu. Berem eni tingting mo evri tingting blong spolem nara man—nomata tingting ia i blong gat sot maen, wan sap tang, o nogud filing long wan we i bin mekem nogud long yu. Be yet, Sevya i givim komanmen long yumi blong tanem narasaed fes,¹ blong lavem ol enemi blong yumi, mo blong prea from olgeta we oli stap yusum yumi long nogud fasin.²

I soa mo i had blong lego wan kros we yumi filim se i stret blong filim olsem. I luk se i no posibol blong fogivim olgeta we, aksen blong olgeta, i spolem olgeta we oli no gat rong. Mo yet, Sevya i askem strong long yumi blong fogivim evri man.³

Yumi ol man blong folem Prins blong Pis. Naoia bitim eni taem, yumi nidim pis we Hem nomo i save tekem i kam. ?Olsem wanem yumi ting blong gat pis long wol ia, taem we, wanwan long yumi, i no lukaotem pis mo kwaet laef? Ol brata mo sista. Mi save se wanem mi talem, i no isi. Be olgeta we oli folem Jisas Kraes, oli mas soem eksampol blong ful wol i stap folem. Mi askem strong long yufala blong yufala i mekem evri samting blong endem ol raorao blong yufalawan we oli stap strong insaed long hat blong yufala, insaed long hom blong yufala, mo insaed long laef blong yufala.

Bae mi save poenem gud singaot ia blong tekem aksen taem yumi toktok raon long wan tingting we i kambak long maen blong mi i no longtaem taem mi stap wajem wan basketbol gem.

Long gem ia, fas haf i olsem wan siso faet, i go i kam. Afta, long ol las faef seken blong fas haf, wan gad long wan tim i sutum wan naes tri poen basket. Wetem wan seken nomo i stap, tim fren blong hem i stilim balong, mo i sutum wan nara basket stret taem wesil i blo. Mekem se, taem tim i go long spel rum wetem fo poen i go fastaem, mo oli filim faea long stret taem ia. Oli tekem faea ia i go long seken haf mo winim gem.

Faea long wan taem, i gat rod we i gat paoa. Yumi evriwan i gotru long wan kaen, o nara kaen—eksampol: insaed long wan trak we i stap spid i go, o long taem blong no agri we i tanem i kam wan raorao.

So mi askem: “?Wanem i save statem wan faea blong spirit Yumi bin luk ol eksampol blong ol gud mo nogud faea long sot taem. Yumi save olgeta we oli folem Jisas Kraes we oli bin konvet mo oli bin groap long bilif blong olgeta. Be yumi save tu se i bin gat ol man we oli bin biliv we oli foldaon. Paoa blong faea ia i save swing long eni saed.

Yumi neva nidim gud paoa blong faea blong spirit moa bitim we yumi nidim naoia, blong stopem spid we ivel mo ol saen blong tudak blong taem, blong kam strong moa. Gud paoa blong faea blong spirit bae i kipim yumi muv go fored long medel blong fraet mo tu tingting, we ol wol sik, ol tsunami, ol volkeno i faerap mo ol wol oli krietem. Paoa blong faea blong spirit, i helpem yumi blong stanap agensem ol atak we oli no stop, mo oli nogud blong enemi ia, mo katemaot ol hadwok blong hem blong spolem fandesen blong spirit blong yumi.

Plante aksen oli save statem gud paoa blong faea blong spirit. Fasin blong stap obei, lav, tingting i stap daon, seves mo fasin blong talem tangkyu,⁴ oli sam nomo.

Tedei, mi wantem tokbaot 5 spesifik wei we bae yumi save folem holemtaet gud paoa blong faea blong spirit.

Faswan: Kam long kavenan rod mo stap ia.

I no longtaem i pas, mi bin gat wan drim, we insaed long hem mi stap mitim wan bigfala grup blong ol pipol. Oli bin askem fulap kwestin long mi, mo plante oli abaot kavenan rod ia, mo from wanem hem i impoten.

Insaed long drim blong mi, mi bin eksplenem se yumi go insaed long kavenan rod ia, taem yumi kasem baptaes mi mekem fas kavenan blong yumi wetem God.⁵ Evri taem yumi tekem mo kakae sakramen, yumi promes bakegen blong tekem nem blong Sevya long yumi, blong yumi tingbaot Hem, mo blong obei ol komanmen blong Hem.⁶ Long narasaed, God i talem gud long yumi se bae yumi oltaem gat Spirit blong Hem i stap wetem yumi.

Afta, yumi mekem sam moa kavenan insaed long tempol, mo kasem sam moa bigfala promes. Ol odinens mo ol kavenan oli givim yumi rod blong yusum paoa olsem hemia blong god. Kavenan rod ia, hem i wan rod ia nomo we i lidim yumi long fasin blong kam olsem wan god mo laef we i no save finis.

Insaed long drim blong mi, wan woman i askem, olsem wanem, taem wan i brekem ol kavenan blong hem, i save gobak long kavenan rod ia. Ansa long kwestin ia blong woman ia i lidim yumi long seken tingting:

Faenemaot glad ia blong sakem sin evri dei.

?Hamas i impoten blong sakem sin? Alma i tijim se yumi sapos blong “no mas prijim eni samting be nomo fasin blong sakem sin mo fet long Lod ia we i bin pemaot ol pipol blong hem.”⁷ Fasin blong sakem sin i blong evriwan we i akaontebol we i wantem glori we i no save finis.⁸ I nogat wan eksepsen. Long wan revelesen we Hem i bin givim long Profet Josef Smit, Lod i tok mo stretem ol fas lida blong Jos from oli no stap tijim gospel long ol pikinini blong olgeta.⁹ Blong sakem sin, hem i ki blong progres. Fet we i klin gud i mekem se yumi gohed blong muv fored long kavenan rod ia.

Plis, no fraet o slo blong sakem sin. Setan i laekem we yu harem nogud. Katemsot hemia. Sakem paoa blong hem aot long laef blong yu. Stat tedei, blong stap gat glad ia blong sakem man we i folem fasin blong wol.¹⁰ Sevya i lavem yumi speseli nao, taem yumi sakem sin. Hem i bin promesem se “Ol bigfala hil bae oli aot mo ol smol hil bae oli tekemaot,” Jehova i talem, “ be kaen fasin blong mi bae i no aot long yu.”¹¹

Sapos yu filim se yu aot long kavenan rod ia i go longwe tumas, o blong longtaem tumas, mo yu no gat rod blong kambak, hemia i jes no tru.¹² Plis toktok wetem bisop o branj presiden blong yu. Hem, hem i man blong Lod, mo bae i helpem yu blong gat glad mo help blong sakem sin.

Naoia, wan woning: Blong kambak long kavenan rod, i no minim se laef bae i isi. Rod ia i strong mo samtaem bae i olsem wan stip hil.¹³ Blong go antap, i blong testem mo tijim wanwan long yumi, blong smutum fasin blong yumi, mo helpem yumi blong kam ol sent. Hem i wan rod ia nomo long laef we i lidim yumi i go long selestial kingdom blong God. Wan profet¹⁴ i bin singaotem: “gudfala mo hapi ples blong olgeta we oli obei ol komanmen blong God. From luk, Lod i blesem olgeta long evri samting, ol samting blong laef ia tugeta wetem blong spirit; mo sapos oli fetful kasem en, bae oli go insaed long heven, blong mekem se oli save stap wetem God long wan ples blong hapi we i neva gat en.”¹⁵

Blong stap wokbaot long kavenan rod, wetem fasin blong sakem sin evri dei, i laetem gud paoa blong faea blong spirit.

Nambatri tingting blong mi: Lanem abaot God mo hao Hem i wok.

Wan long ol bigfala jalenj tedei, i blong luksave wanem i ol trutok blong God mo ol giaman blong Setan. From hemia nao Lod i givim woning long yumi blong “prea oltaem, … blong yu save winim Setan, mo blong yu save ronwe long ol han blong ol wokman blong Setan we oli stap sapotem wok blong hem.”¹⁶

Moses i givim eksampol blong stap lanem hao blong luksave bitwin God mo Setan. Taem we Setan i kam, i temtem Moses, Moses i luksave giaman from se hem i jes toktok fes tu fes wetem God. Kwiktaem Moses i luksave huia i Setan, mo i givim komanmen long hem blong hem i aot.¹⁷ Taem we Setan i gogohed, Moses i bin save olsem wanem blong singaot long God blong kasem moa help. Moses i kasem paoa long heven mo i sakemaot ivel wan ia, bakegen, i talem: “Setan, yu kamaot long mi, from se wan God ia nomo bae mi wosipim, we i God we i gat glori.”¹⁸

Yumi mas folem eksampol ia. Sakem paoa blong Setan aot long laef blong yu. Plis, no folem hem i go daon long “bigfala hol blong harem nogud mo trabol we i no gat en.”¹⁹

Wetem wan hae spid, wan testemoni we oli no fidim evri dei wetem gud toktok blong God,²⁰ i save foldaon. From hemia, samting blong agensem plan blong Setan i klia: yumi nidim blong gat eksperiens evri dei blong stap wosipim Lod mo stap stadi long gospel blong Hem. Mi plis long yu blong letem God i stap win insaed long laef blong yu. Givim Hem wan gudfala pat blong taem blong yu. Taem yu mekem olsem, teknot long wanem i hapen long gud paoa blong faea blong spirit.

Tingting nambafo: Lukaotem mo wet ol merikel.

Moronae i talem gud long yumi se “God i no stop blong stap wan God blong ol merikel.”²¹ Evri buk blong ol skripja oli soem olsem wanem Lod i wantem blong help insaed long laef blong olgeta we oli stap biliv long Hem.²² Hem i seraotem Red Si blong Moses, i bin helpem Nifae blong karembak ol bras buk, mo i putumbak Jos blong Hem tru long Profet Josef Smit. Wanwan long ol merikel ia i bin tekem taem, mo maet i no bin stret samting we wanwan man o woman i bin askem long Lod.

Long sem wei, Lod bae i blesem yu wetem ol merikel we yu nidim sapos yu biliv long Hem, “we yu no gat tu tingting long eni ting.”²³ Mekem wok long saed blong spirit blong lukaotem ol merikel. Prea mo askem God blong helpem yu blong praktisim kaen fet ia. Mi promes se yu save gat eksperiens yuwan se Jisas Kraes “i stap givim paoa long olgeta [we oli taed], mo olgeta we oli no strong hem i stap mekem olgeta oli strong bakegen.”²⁴ I gat samfala samting we bae i spidim paoa blong faea blong spirit moa kwik bitim we bae yu luksave se Lod i stap helpem yu blong muvum wan maonten insaed long laef blong yu.

Tingting namba 5: Endem raorao insaed long laef blong yuwan.

Mi ripitim singaot blong mi blong endem ol raorao insaed long laef blong yu . Praktis blong gat tingting i stap daon, paoa long tingting mo paoa we i nid blong save fogiv mo askem fogivnes. Sevya i bin promesem se “sapos yumi fogivim ol man long ol rong blong olgeta, Papa blong yumi long heven bae i fogivim yumi tu].”²⁵

Tu wik stat tedei yumi selebretem Ista. Bitwin naoia mo taem ia, mi invaetem yufala blong putum wan stop long wan raorao o hevi samting insaed long yu. ?Bae i save gat wan moa stret aksen blong talem tangkyu long Jisas Kraes from Atonmen blong Hem, we i moa stret? Sapos fogivnes naoia, i no posibol, askem strong paoa tru long blad blong Jisas Kraes we i pemaot man, blong i helpem yu. Taem yu mekem olsem, mi promesem se bae yu gat pis long yuwan mo moa strong paoa blong faea blong spirit.

Taem we Sevya i bin pem praes blong evri kaen man, Hem i bin openem wan rod blong olgeta we oli folem Hem blong save kasem hiling, paoa blong Hem mo paoa we i pemaot man. Ol spesel janis ia oli stap long evriwan we oli wantem lisingud Hem mo folem Hem.

Ol dia brata mo sista blong mi, wetem evri paoa blong hat blong mi, mi askem strong yufala blong kam long kavenan rod mo stap ia. Filim glad blong sakem sin evri dei. Lanem abaot God mo hao Hem i wok. Lukaotem mo wet long ol merikel. Endem ol raorao insaed long laef blong yu.

Taem yu tekem aksen folem ol samting we yu stap wok from, mi promesem yu se bae yu gat paoa blong muv fored long kavenan rod ia, wetem moa paoa blong faea blong spirit, nomata wanem samting yu fesem. Mo mi promesem se bae yu gat moa paoa blong stanap agensem temtesen, moa pis long maen, yu fri long fraet, mo gat moa yuniti insaed long famli blong yufala.

!God i stap laef! !Jisas Hem i Kraes! !Hem i stap laef! Hem i lavem yumi mo oltaem i stap helpem yumi. Long hemia, mi testifae long tabu nem blong Jisas Kraes, amen.