Ewe Manamanen Amwokutun Pekin Ngun
Ua mochen upwe apasa nimu tichikin foffor sia tongeni aea epwe anisi kich ne sopweno amwokutun pekin ngun mi och.
Achengicheng pwi me fefinei, ua pwarata ai tong ngenikemi. Ua pwapwaiti ei tufich ne kapas ngeni kemi ikenai. Ua iotek iteitan fanitemi ami oupwe tumun seni ekkewe nini an ewe chon koum me epwe wor ami pochokun ne feino seni met chok sosot oupwe weri.
Ekkoch sosot amen fokkun wate monomonan ese wor emon epwe tongeni kuna. Ekkoch rakan fis non ewe fonufan. Ewe osukosuken mwoun non otiwen Europe ina eu me neir. Ua nono ngeni Ukraine me Russia non chommong fansoun. Ua tongei ekkei fonu, ekkei aramas, me ar kapas. Ua kechiw me iotek faniten meinisin ekkewe ra riaffou ren ei mwoun. Ewe mwichefen a fori mettoch meinisin sia tongeni ne anisi ekkewe ra riaffou me weires ar repwe manau. Sia tingor ngeni ami meinisin opwe sopweno ne echikifel me iotek faniten ekkewe aramas ra feiengaw ren ei osukosuk. Mwoun meinisin mi ew osukosuk amen onuokus ren meinisin met ewe Samon Jises Kraist a afanafana me esisinata.
Ese wor me neich a tongeni nemeni ekkewe muun ika mokutun ekkoch ika fen chochon non ach kewe famini. Nge sia tongeni nemeni pusin kich. Kokoi ikenai, achengicheng pwi me fefinei, pwe oupwe akouono ewe osukosuk mi fis nonnetipom, nonimwom, me nonmanauom. Ireno och me meinisin mochenin efeiengawa ekkoch—ika pwe ekkena mochen pokiten nisosong, awangaw, ika koputen emon a ametekuk. Ewe Chon Amanau a annuku ngeni kich sipwe okunu sapach we epek,1 ach sipwe tongeni chon oput kich, me iotek fanniten ekkewe ra eitengawa kich.2
Mi tongeni weires ach sipwe nikitano ach song minne kich mi mefi mi pung. Epwe nikinikin weires ne omusano ekkewe ra aweiresi ekkewe ese wor tipisir. Me iei, ewe Chon Amanau a fonou kich sipwe “omusano meinisin aramas.”3
Kich chon tapweno mwirin ewe Kingen Kinamwe. Iei a murino, a auchea ngeni kich ewe kinamwe I chok a tongeni wato. Ifa usun ach sipwe ekieki an epwe wor kinamwe non ei fonufan nupwen emon me emon kich sise kuta kinamwe me mosonoson? Pwi me fefinei, Ngang mi sinei pwe metei ua apasa ese mecheres. Nge chon tapweno mwirin Jises Kraist ra awora ew nenien apiru ngeni unusen fonufan ar rewpe fori. Upwe tingor ngeni kemi ami opwe fori ukukun ami tongeni ne akouono ami pwisin sokkun osukosuk mi nonom non manauemi.
Upwe apochokuna ei koko ngeni angangan ren ai upwe awewei ew ekiek a achemato kukuto chok nupwen ua katon ew keimen pasket.
Non ena keim, ewe aewin esopw a chok eniwin nefiner ion epwe watte an poin. Iwe, nupwen ewe saingonon nimu seken ren ewe aewin esopw, emon chon eppeti won ew team a mwoneochuenong efou unungat poin. Ren ew seken nusun, chienan we a angei ewe foun pwor a pas ngeni me a pwan mwonenong non ewe nenien sut atun a tik ewe kunok! Iwe ena team ra feino ngeni ewe rumwen locker ren ruanu poin ra napono ren ew pochokunen amwokutun . Ra tufichin sopweno ena amwokutun ngeni non ewe oruwen esopw me ra wineni ewe keim.
Amwokutun a eu pechekunen mettoch. Kich meinisin sia fen mefi non ew napanap ika pwan ekkoch—ren awewe, non efoch taraku a mwitirino ika tipengaw a mwitir okunu ngeni anini.
Iwe upwe eis, met epwe tongeni apochokuna amwokutun pekin ngun? Sia fen kuna ekkoch awewe ren me ir me ruu amwokutun mi och me mi ngaw. Sia sinei chon tapweno mwirin Jises Kraist ekkewe ra ekkesiwin me fefeita non ar nuku. Nge sia pwan sinei ekkewe ra chon nukuchar akkom ra pwan rikino. Amwokutun a tongeni morokun fetan.
Sise kon aucheani amwokutun pekin ngun mi och nap seni a kon auchea ngeni kich iei, ne okufu mwitirin ewe ngaw me rochopwaken esisin ren ekkewe fansoun ra napeno. Amwokutun pekin ngun mi och epwe anisi kich ach sipwe pwaracho ngeni ach nuokus me ekkewe mettoch mi fisita seni pademic, taifun, volcano, tan fonu, me feiengaw. Amwokutun pekin ngun a tongeni anisi kich ach sipwe pochokun ngeni ekkewe riaffou, efeiengawen ewe chon koput me eppeti an achocho ne atano ach pwisin nongongongen pekin ngun.
Chommong foffor a tongeni apochokuna amwokutun pekin ngun mi och. Aneasosich, tong, tipetekison, aninis, me kinisou4 ir chok ekkoch.
Ikenai ua mochen upwe apasa nimu tichikin foffor sia tongeni aea epwe anisi kich ne sopweno amwokutun pekin ngun mi och.
Ewin: Ani ewe anen pwon mi pin me manaueni.
Ekis fansoun ano, ua tani eu tan mi fatafatoch pwe ua churi eu mwichen aramas mi watte. Ra kapas eis ngeniei, ra sou eiseniei usun ewe anen pwon mi pin me pwata mi fokkun auchea.
Non ai tan, ua awewei pwe sia fiti ewe anen pwon mi pin ren ach papatais me fori ach akaiwen pwon mi pin ren Kot.5 Iteiten fansoun sia angei ewe sakrament, sia pwon sefan ne angei ewe iten ewe Chon Amanau wata woch, nechechemeni I, me aponueta An kewe annuk.6 Non eniwinin, Kot a mochen kich pwe iteitan ewe Ngun mi Fel epwe nonom rech.
Mwirin sia pwan fori ekkoch pwon mi pin non ewe tempel, ikewe ie sia angei ekkoch pwon mi nap. Annuk me pwon mi pin ra ngeni kich an Kot kewe manaman. Ewe anen pwon mi pin iei ewe chok an a emweni kich ngeni manau fefeita me manau ese much.
Non ai tan, emon fefin a kapas eis ifa usun emon ese aponuweta an kewe pwon mi pin a tongeni fitisefan ewe an. Ai ponuweni an kapas eis epwe emweni ngeni oruwen mettoch ua kapas won:
Kuna ewe pwapwan aier iteitan.
Ifa usun auchean aier? Alma a aiti kich pwe sisap “aitir mettoch tiwenon chok pwe epwe aier me nuku non ewe Samon.”7 Aier a namot ngeni emon me emon a sinei me weweiti mettoch ekkewe ra mochen ewe ning ese much.8 Ese wor tiwenon. Non ew pwarata ngeni ewe Soufos Joseph Smith, ewe Samon a auraura ekkewe souemwenin Mwichefen ren ar rese aiti ngeni nour semirit ewe kapas allim.9 Aier iei ewe kien fefeita. Ennetin nuku a anisi kich ach sipwe feino mwach won ewe anen pwon mi pin.
Kose mochen kosapw nuokus me ammangano om aier. Setan a pwapwa non om riaffou. Amochano. Aturau an pochokun seni non manauom! Poputa ikenai ne mefi ewe pwapwa ren om nikitano ewe inisin aramas.10 Ewe Chon Amanau amen unusen tongei kich nge akkaewin nupwen sia aier. A pwon pwe inamo “ekkewe chuk tekia repwe su, me ekkewe chuk kisikis repwe mwokut … ai umoumoch esapw tongeni epwe susonuk.”11
Ika pwe en mi mefi pwe en mi towawono ika fansoun nakatam seni ewe anen pwon mi pin me ese wor anen om kopwe niwinsefan, ena ese fokkun pung.12 Kose mochen kapas ngeni noum pisop ika presetenin pranch. I noun ewe Samon chon angang me epwe anisuk kopwe mefi ewe pwapwa me ngaseno ren aier.
Iei, ew esinesin: Niwinsefan ngeni ewe anen pwon ita esapw wewen pwe manau epwe mecheres. Ei aan amen tichik me fan ekkoch sipwe mefi nge epwe weires ne tota won.13 Ei aneta, nge, a for an epwe tesini kich me aiti kich, ne awenewenochu napanapach, me anisi kich ne winiti souneng. Iei ewe chok an a emwen ngeni manau ese much. Emon soufos14 a eita ngeni “feioch me pwapwan nikinikin ekkewe ra aneasochisi ekkewe annukun Kot. Pun nengeni, ra feioch non mettoch meinisin, ren pekin inis me pekin ngun; iwe ika ir mi achocho ne nikitu ngeni nesoponon repwe mumuta ne tonong non nang … [me] nonnom ren Kot non ew nikinikin pwapwa ese tongeni much.”15
Fetan won ewe anen pwon mi pin, fiti aier iteiten ran, a apochokuna amwokutun pekin ngun mi och.
Ounungatin met ua ekieki: Kaeo usun Kot me usun An kewe angang.
Ew watten sosot ngeni kich ikenai sia esina nefinen ewe ennet an Kot me ekkewe chofona an Setan. Ina popun ewe Samon a fonou kich sipwe iotek iteitan pwe sipwe akkufu Setan, me suseni nepoun noun Setan kewe chon angang ekkewe ra fori an we angang.16
Moses i ewe nenien apiru ren ifa usun sipwe esina nefinen Kot me Setan. Nupwen Setan a eto sotuni Moses a esina ewe nikatuputup pokiten mi keran chok kapas ngeni Kot ne nenefengen. Moses a mwitir ne esina ion Setan me annuku ngeni an epwe suseni.17 Nupwen Setan a sopweno an sotuni, Moses a sinei an epwe kokkori Kot ren an aninis. Moses a angei pochokun seni nang me apungu ewe emon mi ngaw sefan, a apasa, Suseni ei, Setan, ren ei emon i chok ua pin ngeni.18
Sipwe tapweno mwirin i ita repwe fori usun chok. Oturau an Setan pochokun seni non manauom! Kose mochen kosapw tapweno mwirin ne feitiw non an we “pwangen riaffou me riaffou esemuch.”19
Ren anuokusun mwitir, ew kapasen pwarata ese tumun iteiten ran “me ren ewe kapas mi och an Kot”20epwe tano. Iwe, ewe safei ren an Setan kewe kokkot mi fatono: a auchea ach sipwe pin ngeni ewe Samon me kaeo An we kapas allim iteitan. Upwe tingor ngeni kemi opwe mut ngeni Kot epwe nemenem non manauom. Ngeni I och fansoun me non om fansoun. Nupwen kopwe fori, apareni met a fis ngeni om amwoktun pekin ngun mi och.
Nampa 4 ua ekieki: Kuta me esuku manaman.
Moronai a affata ngeni kich pwe “Kot esamo kouno an epwe emon Koten manaman.”21 Meinisin ekkewe pukefel ra awewei usun an ewe Samon mochen tonong me eppeti manauen ekkewe chon nuku non I.22 A eimufeseni ewe Setipar ren Moses, anisi Nifai ne angei ekkewe piras seleich, me eniwinsefanieto An we Mwichefen me ren ewe Soufos Joseph Smith. Ew me ew ekkei manaman a fis me meni esap ina wesewesen met ekkewe aramas ra tingorei ewe Samon.
Non ena chok napanap, ewe Samon epwe efeiochu ngonuk ren ekkewe manaman a auchea ngonuk ika ke nuku non I, “ese wor tipemwaramwar.”23 Fori ewe angangen pekin ngun ne kuta manaman. Achocho ne iotek me tingorei Kot epwe anisuk om kopwe kaeo aea ena sokkun nuku. Ua pwon ngonuk pwe ka tongeni pusin mefi pwe Jises Kraist “a apochokuna ekkewe mi apwangapwang; me ngenir ekkewe ese wor ar pochokun i epwe apochokuner.”24 Ekkoch mettoch epwe amwitiri om amwokutun pekin ngun nap seni om asinna pwe ewe Samon a anisuk ne omokutu ew chuk non manauom.
Ekiek nampa 5: Okouono osukosuk non pwisin manauom.
Upwe eniwini ai koko ne okouono ekkewe osukosuk non manau om. Anganga ewe tipetekison, pwaracho, me pochokun mi auchea ren ir me ruu ne omusano me kuta omusomus. Ewe Chon Amanau a pwon pwe “ika [sia] omusano aramas ren ar tipis, Samach won Nang epwe pwan omusano [kich].”25
Ruu wik seni ikenai sipwe achechema Ister. Nefinen iei me feino, ua etiwok kopwe kuta om kopwe asopwano om kewe osukosuk mi ochouketiw. Epwe pwan wor sokkun fofforun kinisou mi murino ngeni Jises Kraist ren An we Achasefan? Ika omusomus epwe nikinikin esap tufich, tingor ren manaman seni ewe achasefanin chan Jises Kraist epwe anisuk. Nupwen ka fori ei, ua pwon pwe ami oupwe kinamwe me sip non amwokutun ngun mi fel.
Nupwen ewe Chon Amanau a achasefan fan iten aramas meinisin, A suki ew aan pwe ekkewe ra tapweno Mwirin ra tongeni angei An echikar, pochokun, me manamanen ngaseno. Ekkei tufichin pekin ngun ra tufich ngeni meinisin ekkewe ra kutta ne ausening ngeni I me tapweno Mwirin.
Pwi me fefinei achengicheng, ren unusen netipei ua tingor, Ua pesei kemi opwe tota won ewe aanen pwon mi pin me nomono ikewe. Mefi ewe pwapwa ren aier iteitan. Kaeo seni Kot me ifa usun An angang. Kutta me ekieki manaman. Engino ngeni ekkewe osukosuk non manauom.
Ika pwe ka fori ei kokot, ua pwon ngonuk ewe tufichin om kopwe feino mwom won ewe anen pwon mi pin epwe wateno fansoun, me nukun ekkewe sokun osukosuk mi toruk. Me ua pwon ngonuk waten pochokun epwe angasok seni sosot, wate kinamwen ekiek me pochokun seni nuokus, me wachemuken chufengen non om famini.
Kot mi manau! Jises ii ewe Kraist! I mi manau! Mi tongei kich me epwe anisi kich. Usun ei ua pwarata non ewe it mi pin ach Chon Angasano, Jises Kraist, amen.