Lub Hwj Chim ntawm Sab Ntsuj Plig txoj Kev Muaj Zog Zuj Zus Tuaj
Kuv xav qhia txog tsib yam uas peb ua tau kom peb sab ntsuj plig yuav muaj zog zuj zus tuaj tsis tu tsis tseg.
Kuv cov kwv tij thiab cov muam, kuv hlub nej. Kuv zoo siab kawg vim kuv muaj cib fim hais lus rau nej hnub no. Kuv thov Vajtswv txhua hnub kom Nws pov hwm nej ntawm tus yeeb ncuab tej kev tawm tsam thiab kom nej yuav muaj zog txiv mus lawm tom hauv ntej thaum nej raug teeb meem dab tsi los xij.
Muaj tej kev sim siab uas tsis muaj leej twg pom tsuas yog nej ib leeg xwb. Muaj lwm yam uas txhua tus hauv lub ntiaj teb pom tau. Xws li kev ua tsov rog hauv Yulauv sab hnub tuaj. Kuv twb mus rau lub teb chaws Ukraine thiab Russia ntau zaus. Kuv nyiam ob lub teb chaws no, cov neeg, thiab lawv tej yam lus. Kuv los kua muag thiab thov Vajtswv pab txhua tus uas raug txoj kev ua tsov rog no. Peb lub koom txoos ua txhua yam peb ua tau kom pab cov uas raug txom nyem thiab nyuaj rau lawv nyiaj kom dhau. Peb caw txhua tus kom yoo mov thiab thov Vajtswv pab cov neeg uas raug mob los ntawm xwm txheej ceev no. Kev ua tsov rog twg yeej yog kev txhaum txhua yam uas tus Tswv Yexus Khetos tau qhia thiab ua.
Tsis muaj ib tug neeg uas kav tau tej yam uas lwm lub teb chaws los sis lwm tus neeg los sis lwm tus hauv peb tsev neeg yuav ua. Tiam sis peb kav taus peb tus kheej. Kuv hais kom nej, kuv cov kwv tij thiab cov muam, muab tej kev tsis sib haum uas ntxhov hnyo hauv nej lub siab, nej tsev neeg, thiab nyob hauv nej lub neej tso tseg. Muab txhua yam kev xav ua rau lwm tus mob tso tseg—tsis hais kev chim siab, kev hais lus cem, los yog kev ntxub lwm tus vim nws ua rau nej tu siab los. Tus Cawm Seej txib kom peb tig lwm sab plhu rau lawv ntaus thiab,1hlub peb cov yeeb ncuab, thiab thov Vajtswv pab cov uas siv peb kom ua tsis zoo.2
Yog ib qho nyuaj rau peb tso kev chim siab tseg thaum peb xav tias tsim nyog uas peb yuav npau taws. Zoo li peb yeej yuav tsis muaj cuab kav zam txim rau cov neeg uas ua phem kom tsim txom cov neeg uas tsis muaj txim. Tiam sis, tus Cawm Seej hais kom peb “zam txim rau txhua tus neeg.”3
Peb yog cov uas coj raws li tus Tub Vaj Ntxwv ntawm Kev Thaj Yeeb. Peb haj yam xav tau txoj kev thaj yeeb uas Nws tib leeg coj tau. Vim li cas peb xav tias yuav muaj kev thaj yeeb thaum peb tsis nrhiav kev kom muaj kev thaj yeeb thiab kev sib haum xeeb? Cov kwv tij thiab cov muam, kuv paub qhov uas kuv hais yeej tsis yooj yim. Tiam sis cov uas coj raws li Yexus Khetos yuav tsum coj yam ntxwv rau neeg ntiaj teb ua. Kuv thov nej sawv daws kom ua txhua yam nej ua tau kom txiav txhua yam kev tsis sib haum uas ua rau nej chim siab nyob hauv nej lub neej.
Kuv xav piav txog txoj kev hais no los ntawm ib lub ntsiab cai uas kuv nco txog thaum kuv saib ib txoj kev sib tw basketball.
Nyob hauv kev sib tw ntawd, ob tog pheej sib pauv tog tod yeej ib chim, ces tog tod yeej ib chim. Ces, tsuas muaj tsib second xwb hauv nrab thib ib, ib tug tau cuam lub pob hauv lub vas tau peb point. Tsuas muaj ib chib xwb, ces ib tug hauv nws pawg nyiag txais lub pob ces rov qab cuam lub pob hauv lub vas ua ntej lub tswb nrov! Yog li ntawd thaum tog tod mus rau chav rau khoom lawv muaj plaub point ntxiv uas ua rau lawv muaj zog zuj zus tuaj. Lawv txawj muab dag zog uas loj zuj zus tuaj siv rau lub sij hawm ntawd ua rau lawv yeej kev sib tw ntawd.
Kev muaj zog zuj zus tuaj yeej yog ib lub ntsiab uas muaj hwj chim heev. Peb txhua tus paub txog qhov no—xws li, thaum ib lub tsheb khiav ceev zuj zus tuaj los yog thaum ib txoj kev tsis sib haum hloov los ua kev sib cav sib ceg.
Yog li ntawd kuv nug nej tias, muaj dab tsi uas yuav pab peb sab ntsuj plig muaj zog zuj zus tuaj? Peb txhua tus twb tau pom thaum tib neeg siv qhov no ua tej yam tsis zoo thiab tej yam zoo huv tib si. Peb paub tias cov uas coj raws li Yexus Khetos tau hloov siab los ntseeg ua rau lawv txoj kev ntseeg loj hlob zuj zus tuaj. Tiam sis peb kuj paub txog cov uas muaj siab ntseeg dhau los es lawv tau muab tso tseg lawm. Peb yuav muaj zog zuj zus los sis peb yuav qaug zog zuj zus tuaj.
Tam sim no peb yeej xav kom peb sab ntsuj plig muaj zog zus zuj tuaj kom ua zoo, xwv kom muaj peev xwm tawm tsam kev phem thiab tej cim ntawm lub caij nyoog no uas los sai zuj zus. Qhov uas peb sab ntsuj plig muaj zog zuj zus tuaj yuav pab peb mus tom ntej thaum tib neeg ntshai thiab paub tsis meej txog yav tom ntej vim muaj tej phaum mob, tej nthwv dej loj, cov roob hluav taws tawg, thiab tej kev ua tsov ua rog. Kev ua kom peb sab ntsuj plig muaj zog zuj zus tuaj yuav pab peb tiv taus tus yeeb ncuab tej kev ua lim hiam tawm tsam peb thiab tab kaum nws tej kev siv zog kom lub hauv paus ntawm peb sab ntsuj plig ploj mus.
Muaj ntau yam uas yuav pab peb sab ntsuj plig muaj zog zuj zus tuaj. Kev mloog lus, kev hlub, kev txo hwj chim, kev pab lwm tus, thiab kev ris txiaj4 yeej yog ib feem xwb.
Hnub no kuv xav qhia txog tsib yam uas peb ua tau kom peb sab ntsuj plig yuav muaj zog zuj zus tuaj tsis tu tsis tseg.
Yam thib ib: Taug txoj kev ua raws li nej tej kev khi lus thiab tsis txhob tso tseg.
Tsis ntev tas los, kuv tau ua npau suav ntsib ib pawg neeg coob heev. Lawv tau nug kuv ntau yam, qhov uas lawv nug ntau tshaj yog qhov uas vim li cas txoj kev ua raws li peb tej kev khi lus tseem ceeb heev.
Nyob hauv kuv zaj ua npau suav, kuv piav tias peb pib taug txoj kev ua raws li peb tej kev khi lus thaum peb ua kev cai raus dej thiab ua kev khi lus thib ib nrog Vajtswv.5 Txhua zaus peb txais lub cim nco txog, peb rov qab cog lus tias peb yuav ris tus Cawm Seej lub npe, nco ntsoov txog Nws, thiab ua raws li Nws cov lus txib.6 Ces Vajtswv qhia peb tias peb yuav muaj tus Tswv tus Ntsuj Plig nrog nraim peb nyob tas mus li.
Tom qab ntawd, peb khi lus ntxiv nyob hauv lub tuam tsev, es Vajtswv cog lus tias peb yuav txais tej yam tseem ceeb tshaj. Cov kab ke thiab kev khi lus ua rau peb txais tau Vajtswv lub hwj chim. Txoj kev ua raws li peb tej kev khi lus yog tib txoj kev uas coj peb mus rau kev tso nto thiab txoj sia nyob mus ib txhis.
Hauv kuv zaj ua npau suav, ib tug poj niam nug kuv seb tus uas tau rhuav nws tej kev khi lus yuav ua li cas kom rov qab taug txoj kev ntawd. Cov lus teb lo lus no ua rau kuv xav txog yam thib ob:
Nrhiav kev xyiv fab uas los ntawm kev hloov siab lees txim txhua hnub.
Kev hloov siab lees txim tseem ceeb npaum li cas? Amas qhia tias peb yuav tsum “tsis txhob tshaj tawm txog ib yam dab tsi tsuas yog tshaj tawm txog kev hloov siab lees txim thiab kev ntseeg tus Tswv xwb.”7 Txhua tus neeg uas muaj hnub nyoog lav ris thiab xav tau yeeb koob mus ib txhis li yuav tsum hloov siab lees txim.8 Yuav tsis zam leej twg li. Nyob hauv kev tshwm sim rau tus Yaj Saub Joseph Smith, tus Tswv tau qhuab ntuas lub Koom Txoos cov thawj coj vim lawv tsis qhia txoj moo zoo rau lawv cov me nyuam.9 Kev hloov siab lees txim yog tus yuam sij ntawm kev vam meej. Kev ntseeg ua rau peb mus tom ntej ntawm txoj kev ua raws li peb tej kev khi lus.
Thov tsis txhob ntshai los sis tos kom hloov siab lees txim. Dab Ntxwg Nyoog nyiam thaum nej nyuaj siab. Tso nws tseg. Muab nws tso tseg tawm hauv nej lub neej mus. Pib hnub no kom muaj kev xyiv fab uas los ntawm kev tso tus neeg ntawm sab cev nqaij daim tawv tseg.10 Tus Cawm Seej yeej ib txwm hlub peb tiam sis qhov tseem ceeb Nws hlub peb thaum peb hloov siab lees txim. Nws tau cog lus tias “cov hauv roob thiab pov roob yuav tawg mus, tiam sis kuv txoj kev hlub [nej] yuav tsis paub kawg li.”11
Yog nej xav tias nej tau tawm txoj kev ua raws li nej tej kev khi lus ntev dhau lawm los sis tsis muaj ib txoj kev rov qab los, qhov ntawd yeej tsis muaj tseeb.12 Thov nrog nej tus npisov los yog ceg ntseeg tus thawj tswj hwm tham. Nws yog tus uas sawv cev rau tus Tswv thiab yuav pab nej muaj kev xyiv fab thiab kev txaus siab uas los ntawm kev hloov siab lees txim.
Tam sim no xav hais lus ceeb toom: Kev rov qab los taug txoj kev ua raws li nej tej kev khi lus tsis txhais hais tias nej lub neej yuav yooj yim. Txoj kev no yeej nyuaj taug thiab tej lub sij hawm yog ib txoj kev ntxhab.13 Tiam sis txoj kev nce siab no yuav sim peb lub siab thiab qhia peb, hloov peb lub siab ntsws, thiab pab peb los ua haiv neeg ntseeg. Yog tib txoj kev uas coj peb mus rau kev tso nto. Ib tug yaj saub14 tau hais tias “cov uas ua raws li Vajtswv tej lus txib tau koob hmoov thiab zoo siab. Vim saib seb, lawv tau koob hmoov rau txhua txhia yam, tsis hais sab cev nqaij daim tawv los sis sab ntsuj plig; thiab yog lawv rau siab ntseeg mus kom txog thaum kawg Vajtswv yuav txais lawv mus rau hauv ceeb tsheej, … [thiab] yuav nrog Vajtswv nyob hauv qhov chaw uas muaj kev zoo siab tsis txawj kawg.”15
Kev taug txoj kev ua raws li nej tej kev khi lus, nrog kev hloov siab lees txim txhua hnub, ua rau nej sab ntsuj plig muaj zog zuj zus tuaj.
Yam thib peb: Kawm txog Vajtswv thiab Nws ua Nws txoj hauj lwm zoo li cas.
Peb ib qho teeb meem loj tshaj niaj hnub no yog kev paub Vajtswv tej lus tseeb thiab Dab Ntxwg Nyoog tej lus cuav txawv li cas. Yog li ntawd tus Tswv ceeb toom peb kom “Thov Vajtswv tas mus li, … xwv kom [peb] yuav kov yeej Dab Ntxwg Nyoog, thiab … dim ntawm Dab Ntxwg Nyoog cov tub qhe txhais tes uas txhawb nqa nws txoj hauj lwm.”16
Mauxes tau coj yam ntxwv zoo kom peb paub tias Vajtswv thiab Dab Ntxwg Nyoog tsis zoo ib yam. Thaum Dab Ntxwg Nyoog los ntxias Mauxes, Mauxes tau paub vim nws nyuam qhuav tab meeg nrog Vajtswv tham. Yog li ntawd, Mauxes paub sai sai tias Dab Ntxwg Nyoog yog leej twg thiab txib nws tawm mus.17 Thaum Dab Ntxwg Nyoog tsis tau thim, Mauxes paub hu Vajtswv los pab nws. Mauxes tau txais dag zog thiab cem tus dab phem ib zaug ntxiv, hais tias, “Dab Ntxwg Nyoog, cia li khiav ntawm kuv mus, rau qhov Vajtswv yog tib tug uas kuv yuav pe hawm.”18
Peb yuav tsum ua raws li nws tus yam ntxwv. Muab Dab Ntxwg Nyoog tso tseg tawm hauv nej lub neej mus! Tsis txhob coj raws li nws kom mus rau nws “tus kwj tob tob ntawm kev nyuaj siab thiab kev txom nyem uas tsis muaj qhov kawg.”19
Ib zaj lus tim khawv uas yus tsis tu txhua hnub los ntawm “Vajtswv txoj lus zoo”20 yuav ploj mus sai heev. Yog li ntawd, txoj kev tawm tsam Dab Ntxwg Nyoog lub tom txwv yeej meej heev: peb yuav tsum teev tiam tus Tswv thiab kawm txog Nws txoj moo zoo txhua hnub. Kuv thov kom nej yuav cia Vajtswv yeej hauv nej lub neej. Siv ib feem ntawm nej lub sij hawm pub rau Nws. Thaum nej ua li ntawd, cia li saib nej sab ntsuj plig yuav muaj zog zuj zus tuaj.
Yam thib 4: Nrhiav thiab tos ntsoov tej txuj ci tseem ceeb.
Maulaunais tau hais rau peb tias “Vajtswv tseem yog ib tug Vajtswv uas ua tej txuj ci tseem ceeb.”21 Txhua phau ntawv hauv cov vaj lug kub qhia tias tus Tswv txaus siab pab cov neeg uas ntseeg Nws.22 Nws tau muab Hiav Txwv Liab cais rau Mauxes, pab Nifais nqa cov phiaj toog, thiab muab Nws lub Koom Txoos txum tim rov qab los dhau los ntawm tus Yaj Saub Joseph Smith. Txhua qhov txuj ci tseem ceeb los twb siv sij hawm ua thiab tej zaum tsis yog raws li cov neeg tau thov tus Tswv muab rau lawv thaum xub thawj.
Ib yam li no, tus Tswv yuav foom koob hmoov rau nej kom nej tau tej txuj ci tseem ceeb uas nej xav tau yog nej tseeg Nws, “tsis ua xyem xyav rau dab tsi li.”23 Ua tej hauj lwm ntawm sab ntsuj plig kom nej txais tau tej txuj ci tseem ceeb. Thov Vajtswv kom pab nej muab siab rau ntseeg li ntawd. Kuv cog lus tias nej yuav paub ntawm nej tus kheej tias Yexus Khetos “ntxiv zog rau tus uas qaug zog thiab tus tsaug leeg kom tus ntawd rov muaj zog tuaj.”24 Yeej tsis muaj lwm yam uas pab tau nej sab ntsuj plig muaj zog zuj zus tuaj tshaj qhov uas nej paub tias tus Tswv pab nej muab ib lub roob txav mus hauv nej lub neej.
Yam thib 5: Muab tej kev tsis sib haum tso tseg.
Kuv rov qab hais kom nej muab nej tej kev tsis sib haum tso tseg. Cia li txo hwj chim, ua siab loj, thiab txhawb nej dag zog kom nej zam txim pub rau lwm tus thiab thov lwm tus zam txim pub rau nej. Tus Cawm Seej tau cog lus tias “yog [peb] zam txim rau neeg tej kev txhaum ces [peb] Leej Txiv tus uas nyob saum ntuj ceeb tsheej kuj yuav zam txim rau [peb] thiab.”25
Ob lub lim tiam tom ntej peb yuav ua koob tsheej txog Easter. Txij no mus txog thaum ntawd, kuv caw nej nrhiav kev ua kom muab ib txoj kev tsis sib haum xeeb tso tseg. Puas muaj ib yam dab tsi tsim nyog tshaj kom qhia tias nej ris Yexus Khetos txiaj rau Nws txoj Kev Theej Txhoj? Yog tias nej xav tias nej tsis muaj peev xwm zam txim pub rau lwm tus, thov kom muaj hwj chim los ntawm Yexus Khetos txoj kev theej txhoj los pab nej. Thaum nej ua li ntawd, kuv cog lus tias nej yuav nyob kaj siab lug thiab nej sab ntsuj plig yuav muaj zog zuj zus tuaj.
Thaum tus Cawm Seej tau theej peb txhua tus lub txhoj, Nws tau qhib kev rau cov uas coj raws li Nws kom lawv txais tau Nws lub hwj chim kho mob, txhawb zog, thiab txhiv dim. Tej koob hmoov no los muab rau tag nrho cov uas xav mloog Nws hais thiab coj raws li Nws.
Kuv cov kwv tij thiab cov muam, kuv thov nej kawg siab kawg ntsws, kom nej taug txoj kev ua raws li nej tej kev khi lus thiab tsis txhob tso tseg hlo li. Cia li muaj kev xyiv fab uas los ntawm kev hloov siab lees txim txhua hnub. Kawm txog Vajtswv thiab Nws ua Nws txoj hauj lwm zoo li cas. Nrhiav thiab tos ntsoov tej txuj ci tseem ceeb. Siv zog kom muab tej kev tsis sib haum tso tseg.
Thaum nej ua kom muaj raws li tej lub hom phiaj no, kuv cog lus tias nej yuav muaj peev xwm thiab muaj zog mus tom ntej nyob ntawm txoj kev ua raws li nej tej kev khi lus, txawm yog muaj dab tsi tab kaum nej los yog. Thiab kuv cog lus rau nej tias nej yuav muaj zog ntxiv kom tiv tau kev ntxias, nyob kaj siab lug ntxiv, tsis ntshai dab tsi li, thiab yuav koom siab koom ntsws nrog nej tsev neeg ntxiv.
Vajtswv muaj txoj sia nyob! Yexus yog tus Khetos! Nws muaj txoj sia nyob! Nws hlub peb thiab yuav pab peb. Kuv ua tim khawv txog qhov no los ntawm peb tus Txhiv Dim, Yexus Khetos lub npe dawb ceev, amees.