Balaanong Gugma diha sa Plano sa Amahan
Ang katuyoan sa doktrina ug mga palisiya niining gipahiuli nga Simbahan mao ang pag-andam sa mga anak sa Dios alang sa kaluwasan ug alang sa kahimayaan sa kinatas-an nga ang-ang niini.
Ang plano sa ebanghelyo nagpakita sa gugma sa atong Langitnong Amahan alang sa tanan Niyang mga anak. Aron makasabot niini, kita kinahanglang makasabot sa Iyang plano ug sa Iyang mga sugo. Siya nahigugma gayod sa Iyang mga anak nga siya mihatag sa Iyang Bugtong Anak, si Jesukristo, aron mahimo natong Manluluwas ug Manunubos, aron mag-antos ug mamatay alang nato. Sa gipahiuli nga Simbahan ni Jesukristo sa mga Santos sa Ulahing mga Adlaw, kita adunay talagsaong panabot bahin sa plano sa atong Langitnong Amahan. Kini naghatag nato og lahi nga panglantaw sa katuyoan sa mortal nga kinabuhi, sa balaanong paghukom nga mosunod niini, ug sa kataposan nga mahimayaong padulngan sa tanang anak sa Dios.
Ako nahigugma kaninyo, akong mga kaigsoonan. Ako nahigugma sa tanang anak sa Dios. Dihang si Jesus gipangutana, “Unsa man ang labing dakong sugo sa balaod?” Siya mitudlo nga ang paghigugma sa Dios ug ang paghigugma sa atong mga silingan mao ang una sa dakong mga sugo sa Dios.1 Kana nga mga sugo mao ang una tungod kay kini nagdapit nato aron molambo sa espirituhanon pinaagi sa pagsundog sa gugma sa Dios alang nato. Ako nanghinaot nga kita mas nakasabot sa mahigugmaon nga doktrina ug mga palisiya nga giestablisar sa atong Langitnong Amahan ug sa Iyang Anak, si Jesukristo, diha sa Ang Simbahan ni Jesukristo sa mga Santos sa Ulahing mga Adlaw. Unsay akong isulti dinhi maghatag og katin-awan kon giunsa sa gugma sa Dios pagpasabot nianang doktrina ug sa dinasig nga mga palisiya sa Simbahan.
I.
Usa ka komon nga sayop nga pagsabot bahin sa paghukom nga mosunod sa mortal nga kinabuhi mao nga ang buotan nga mga tawo moadto sa usa ka dapit nga gitawag og langit ug ang dautan nga mga tawo moadto sa walay kataposang dapit nga gitawag og impiyerno. Kining sayop nga pangagpas nga duha lamang ang padulngan nagpasabot nga kadtong dili makatuman sa tanang sugo nga gikinahanglan sa langit sa impiyerno gayod ang padulngan.
Ang mahigugmaon nga Langitnong Amahan adunay mas maayo nga plano alang sa Iyang mga anak. Ang gipadayag nga doktrina sa gipahiuli nga Simbahan ni Jesukristo nagtudlo nga ang tanang anak sa Dios—nga adunay limitado lang kaayo nga mga eksepsiyon nga ikonsiderar dinhi—sa kataposan mahidangat ngadto sa usa ka gingharian sa himaya.2 “Sa balay sa akong Amahan adunay daghang mga lawak,”3 si Jesus mitudlo. Gikan sa bag-o nga pagpadayag kita nasayod nga kadto nga mga balay mao ang tulo ka managlahi nga mga gingharian sa himaya. Sa Kataposang Paghukom matag usa nato pagahukman sumala sa atong mga binuhatan ug mga tinguha sa atong mga kasingkasing.4 Sa dili pa kana, kita kinahanglang mag-antos alang sa atong wala mahinulsoli nga mga sala. Ang mga kasulatan klaro kaayo bahin niana.5 Dayon ang atong matarong nga Maghuhukom mohatag nato og kapuy-an diha sa usa niadto nga mga gingharian sa himaya. Sa ingon, sama sa atong nasayran gikan sa bag-ong pagpadayag, ang tanan “pagahukman … , ug ang matag tawo makadawat sumala sa iyang kaugalingon nga mga buhat, alang sa iyang kaugalingon nga kamandoan, diha sa mga mansyon nga giandam.”6
Ang Ginoo mipili sa pagpadayag lang og diyutay mahitungod sa duha niining mga gingharian sa himaya. Sa sukwahi, ang Ginoo mipadayag og daghan mahitungod sa kinatas-an nga gingharian sa himaya, nga gihulagway sa Biblia isip “katahom sa adlaw.”7
Sa “celestial” nga himaya8 adunay tulo ka ang-ang.9 Ang kinatas-an niini mao ang kahimayaan diha sa celestial nga gingharian, diin kita mahimong sama sa atong Amahan ug Iyang Anak, si Jesukristo. Aron matabangan kita nga mapalambo ang diosnong mga hiyas ug ang kausaban sa kinaiyanhon nga gikinahanglan aron matuman ang atong balaanong potensiyal, ang Ginoo mipadayag og doktrina ug miestablisar og mga sugo nga gibase sa mahangtorong balaod. Mao kini ang atong gitudlo diha sa Ang Simbahan ni Jesukristo sa mga Santos sa Ulahing mga Adlaw tungod kay ang katuyoan sa doktrina ug mga palisiya niining gipahiuli nga Simbahan mao ang pag-andam sa mga anak sa Dios alang sa kaluwasan diha sa celestial nga himaya ug, ilabi na gayod, alang sa kahimayaan sa kinatas-an nga ang-ang niini.
Ang mga pakigsaad nga gihimo ug ang mga panalangin nga gisaad ngadto sa mga matinud-anon diha sa mga templo sa Dios mao ang yawe. Kini ang hinungdan sa atong pagtukod og mga templo sa tibuok kalibotan, nga ang kabahin niini maayo gayod nga pagkakanta sa choir. Ang uban naglibog nga kini gihatagan og gibug-aton, wala makasabot nga ang mga pakigsaad ug mga ordinansa sa templo mogiya nato ngadto sa pag-angkon sa kahimayaan. Kini masabtan lang diha sa konteksto sa gipahiuli nga kamatuoran bahin sa tulo ka ang-ang sa himaya. Tungod sa dako nga gugma sa atong Langitnong Amahan alang sa tanan Niyang mga anak, Siya naghatag og laing mga gingharian sa himaya—sama sa gipasabot ni Elder Quentin L. Cook kagahapon—ang tanan niini mas nindot gihapon kay sa matugkad sa atong mga hunahuna.10
Ang Pag-ula ni Jesukristo naghimong posible niining tanan. Siya mipadayag nga Siya “naghimaya sa Amahan, ug nagtubos sa tanan nga mga binuhat sa iyang mga kamot.”11 Nga ang kaluwasan ihatag diha sa lainlaing mga gingharian sa himaya. Kita nasayod sa bag-o nga pagpadayag nga ang “tanan nga mga gingharian adunay balaod nga gihatag.”12 Angayng mahibaloan nga:
“Siya kinsa dili makahimo sa pagsunod sa balaod sa celestial nga gingharian dili makalahutay sa celestial nga himaya.
“Ug siya kinsa dili makatuman sa balaod sa terrestrial nga gingharian dili makalahutay sa terrestrial nga himaya.
“Ug siya kinsa dili makatuman sa balaod sa telestial nga gingharian dili makalahutay sa telestial nga himaya.”13
Sa laing pagkasulti, ang gingharian sa himaya nga atong madawat sa Kataposang Paghukom gitino pinaagi sa mga balaod nga atong gipili nga tumanon diha sa mahigugmaong plano sa atong Langitnong Amahan. Ubos niana nga plano adunay daghang gingharian aron ang tanan Niya nga mga anak mahimong isangon ngadto sa gingharian diin sila makahimo sa “pagtuman.”
II.
Ang mga pagtulon-an ug mga palisiya sa gipahiuli nga Simbahan sa Ginoo naggamit niining mahangtoron nga mga kamatuoran sa paagi nga hingpit lamang nga masabtan diha sa konteksto sa mahigugmaon nga plano sa atong Langitnong Amahan alang sa tanan Niya nga mga anak.
Sa ingon, kita nagtahod sa tagsa-tagsa nga kabubut-on. Kadaghanan nahibalo bahin sa dakong mga paningkamot niini nga Simbahan sa pagpasiugda og kagawasan sa relihiyon. Kini nga mga paningkamot nagtabang sa pagsuporta sa plano sa Langitnong Amahan. Kita nagtinguha sa pagtabang sa tanan Niya nga mga anak—dili lang sa atong kaugalingong mga miyembro—nga matagamtam ang bililhong kagawasan sa pagpili.
Ingon man, kita usahay pangutan-on nganong magpadala kita og mga misyonaryo sa daghang kanasoran, gani ngadto sa Kristiyanong mga katawhan. Kita pangutan-on usab nganong mohatag kita og dakong makitawhanong tabang sa mga tawo nga dili mga miyembro sa atong Simbahan nga dili molambigit niini sa atong misyonaryo nga mga paningkamot. Kita mihimo niini tungod kay ang Ginoo mitudlo kanato sa pagtagad sa tanan Niya nga mga anak isip atong mga kaigsoonan, ug gusto natong ipaambit ang atong espirituwal ug temporal nga kaabunda ngadto sa tanan.
Ang mahangtoron nga doktrina nagahatag usab og talagsaon nga panglantaw bahin sa mga anak. Pinaagi niini nga panglantaw atong gitan-aw ang pagbaton ug pag-amuma sa mga anak isip kabahin sa balaanong plano. Kini usa ka malipayon ug sagrado nga katungdanan niadtong gihatagan og gahom sa pag-apil niini. Busa, kita gimandoan nga itudlo ug depensahan ang mga baroganan ug mga buhat nga naghatag og labing maayong mga kahimtang alang sa kalamboan ug kalipay sa mga anak ubos sa plano sa Dios.
III.
Sa kataposan, Ang Simbahan ni Jesukristo sa mga Santos sa Ulahing mga Adlaw nailhan na gayod nga usa ka Simbahan nga nagsentro sa pamilya. Apan ang wala kaayo masabti mao ang kamatuoran nga ang pagsentro sa atong pamilya dili lang kutob sa mortal nga mga relasyon. Ang mahangtorong mga relasyon mahinungdanon usab sa atong teyolohiya. Ang misyon sa gipahiuli nga Simbahan mao ang pagtabang sa tanang anak sa Dios nga mahimong angayan sa unsay gitinguha sa Dios isip ilang kataposang padulngan. Pinaagi sa pagtubos nga nahatag pinaagi sa Pag-ula ni Kristo, ang tanan mahimong makaangkon og kinabuhing dayon (kahimayaan diha sa celestial nga gingharian), nga gipahayag ni Inahang Eva nga “gihatag sa Dios ngadto sa tanan nga masulundon.”14 Labaw pa kini sa kaluwasan. Si Presidente Russell M. Nelson mipahinumdom kanato nga “sa mahangtorong plano sa Dios, ang kaluwasan usa ka butang nga may kalabotan sa indibidwal; [apan] ang kahimayaan usa ka butang nga may kalabotan sa pamilya.”15
Mahinungdanon nato ang pagpadayag sa Dios nga ang kahimayaan maangkon lamang pinaagi sa pagkamatinud-anon sa mga pakigsaad sa mahangtoron nga kaminyoon tali sa usa ka lalaki ug usa ka babaye.16 Kanang balaanong doktrina ang hinungdan nga kita nagtudlo nga “ang gender usa ka mahinungdanon nga kinaiya sa tagsa-tagsa sa kinabuhi nga wala pa dinhi sa yuta, sa pagkamortal, ug sa walay kataposan nga pag-ila ug katuyoan.”17
Kana usab ang hinungdan nganong ang Ginoo nanginahanglan sa Iyang gipahiuli nga Simbahan sa pagsupak sa sosyal ug legal nga mga pagpamugos nga ihunong ang Iyang doktrina bahin sa kaminyoon tali sa usa ka lalaki ug usa ka babaye, sa pagsupak sa mga kausaban nga maghimong wala nay kalainan tali sa mga lalaki ug mga babaye o magpalibog o mag-usab sa gender.
Ang mga baroganan sa Simbahan bahin niining mga butanga kanunay nga nakapasuko sa oposisyon. Kita nakasabot niana. Ang plano sa atong Langitnong Amahan nagtugot nga “adunay katugbang sa tanan nga mga butang,”18 ug ang labing makapaugtas nga pagsupak ni Satanas gitumong ngadto sa unsa man ang labing importante niana nga plano. Busa, naningkamot siya sa pagsupak sa kalamboan paingon sa kahimayaan pinaagi sa pagguba sa kaminyoon, dili pag-awhag sa pagbaton og mga anak, o pagpalibog sa gender. Hinoon, kita nasayod nga sa kadugayan, ang balaanong katuyoan ug plano sa atong mahigugmaon nga Langitnong Amahan dili mausab. Ang personal nga mga kahimtang mahimong mausab, ug ang plano sa Dios nagpasalig nga sa kadugayan, ang mga matinud-anon kinsa nagtuman sa ilang mga pakigsaad makabaton og oportunidad nga mahimong angayan alang sa matag gisaad nga panalangin.19
Usa ka talagsaong mahinungdanon nga pagtulon-an aron matabangan kita sa pagpangandam alang sa kinabuhing dayon, “ang labing mahinungdanon sa tanan nga mga gasa sa Dios,”20 mao ang 1995 nga pamahayag bahin sa pamilya.21 Ang mga pamahayag niini, sa tinuod, lahi sa pipila ka balaod, binuhatan, ug adbokasiya sa kasamtangan, sama sa pagpuyo-puyo ug kaminyoon sa sama og sekso. Kadtong wala gayod makasabot sa mahigugmaong plano sa Amahan alang sa Iyang mga anak tingali mokonsiderar niining pamahayag bahin sa pamilya nga usa lang ka pamahayag sa palisiya nga kinahanglang usbon. Sa sukwahi, kita nagmatuod nga ang pamahayag bahin sa pamilya, nga gibase sa dili mausab nga doktrina, naghulagway sa matang sa mga relasyon sa pamilya diin ang labing importante nga bahin sa atong mahangtorong kalamboan mahitabo.
Kana ang konteksto sa talagsaong doktrina ug mga palisiya sa gipahiuli nga Simbahan ni Jesukristo sa mga Santos sa Ulahing mga Adlaw .
IV.
Sa daghang relasyon ug mga kahimtang sa mortal nga kinabuhi, matag usa nato kinahanglan nga magpuyo nga adunay mga panaglahi. Isip mga sumusunod ni Kristo nga kinahanglang mohigugma sa atong isigkatawo, kita kinahanglang malinawon nga magpuyo uban niadtong wala magtuo sama sa atong gituohan. Kitang tanan mga anak sa usa ka mahigugmaong Langitnong Amahan. Alang natong tanan, Siya mipahimutang og kinabuhi human sa kamatayon ug, sa kataposan, usa ka gingharian sa himaya. Ang Dios nagtinguha nga kitang tanan maningkamot sa Iyang kinatas-ang posible nga mga panalangin pinaagi sa pagtuman sa Iyang kinatas-ang mga sugo, mga pakigsaad, ug mga ordinansa, ang tanan niini ipahigayon diha sa Iyang balaan nga mga templo nga gitukod sa tibuok kalibotan. Kita magtinguha sa pagpaambit niini nga mga kamatuoran bahin sa kahangtoran ngadto sa uban. Apan uban sa gugma ngadto sa tanan natong mga silingan, atong dawaton kanunay kon unsay ilang mga desisyon. Sama sa gitudlo sa propeta sa Basahon ni Mormon, magpadayon kita sa unahan, uban sa “gugma sa Dios ug sa tanan nga mga tawo.”22
Sama sa gipahayag ni Presidente Russell M. Nelson sa atong miagi nga komperensiya, “Wala pa gayoy panahon sa kasaysayan sa kalibotan nga ang kaalam bahin sa atong Manluluwas adunay mas personal nga kaimportante ug may kalabotan ngadto sa matag kalag sa tawo. … Ang putli nga doktrina ni Kristo gamhanan. Kini makapausab sa kinabuhi sa tanan kinsa makasabot niini ug magtinguha sa paggamit niini sa iyang kinabuhi.”23
Hinaot nga kitang tanan moimplementar nianang sagrado nga doktrina diha sa atong kaugalingong kinabuhi, ako nag-ampo sa ngalan ni Jesukristo, amen.