Ko e Taimí ʻEni
Ko e taimi ʻeni ke tau ako aí. Ko e taimi ʻeni ke tau fakatomala aí. Ko e taimi ʻeni ke tau tāpuekina ai ʻa e niʻihi kehé.
Siʻoku ngaahi tokoua mo e tuofāfine ʻofeina, kuo fakahisitōlia ʻa e konifelenisí ni ʻi ha ngaahi founga lahi. Kuo tau mohu tāpuekina ʻi he ngaahi lotú, ngaahi pōpoakí, mo e hivá. Kuo ueʻi fakalaumālie kitautolu ʻe he kau tamaioʻeiki ʻa e ʻEikí.
Kuo tau maʻu ha fakahinohino mahuʻinga ki he kahaʻú. Ko ʻeku lotú ke folofola fakahangatonu atu ʻa e Laumālié fekauʻaki mo e meʻa ʻe finangalo ʻa e ʻEikí ke ke faí.
ʻOku taʻepau maʻu pē ʻa e kahaʻú. ʻOku feliliuaki ʻa e ʻeá. ʻOku fakaʻalongaua ʻa e ngaahi tuʻunga fakaʻekonōmiká. ʻE lava ke liliu vave e moʻuí ʻi he ngaahi fakatamaki fakaenatulá, fakatamaki fakatuʻupakeé mo e mahamahakí. ʻOku ope atu ʻa e ngaahi meʻá ni ʻi he meʻa ʻoku tau lava ʻo mapuleʻí. Ka ʻoku ʻi ai ha ngaahi meʻa ʻe niʻihi te tau lava ʻo mapuleʻi, kau ai ʻetau fakaʻaongaʻi fakaʻaho hotau taimí.
ʻOku ou saiʻia ʻi he maau ko ʻeni ne faʻu ʻe Henelī Vani Taiki, naʻe hiki ʻi ha uasi laʻā ʻi he Kolisi Ueló ʻi Niu ʻIoke. ʻOku pehē:
Ko e ʻata hoku nimá
Vaheʻi ai e kahaʻú mei he kimuʻá:
ʻI muʻa aí, ko e houa ʻoku teʻeki hokó
Pea ʻikai haʻo mālohi ke fakahokó:
ʻI mui aí ko e houa kuo mahilí,
Mole pea ʻosi, ʻo ʻikai toe fokí:
Ko e houa pē ʻe taha ʻi ho nimá,—
Ko ʻENI ia ʻoku ʻi ai hoku ʻatá.1
ʻIo, ʻoku totonu ke tau ako mei he kuohilí, pea ʻio, ʻoku totonu ke tau teuteu ki he kahaʻú. Ka ko e taimi pē ʻeni te tau lava aí. Ko e taimi ʻeni ke tau ako aí. Ko e taimi ʻeni ke tau fakatomala aí. Ko e taimi ʻeni ke tau tāpuekina ai ʻa e niʻihi kehé mo “hiki hake ʻa e ngaahi nima ʻoku tautau ki laló.”2 Hangē ko e akonaki ʻa Molomona ki hono foha ko Molonaí, “ʻAi ke ta ngāue faivelenga; … he ʻoku ʻi ai ha ngāue ke ta fai lolotonga ʻokú ta ʻi he sinó ni ʻo e kelekelé, ke ta ikuna ʻa e fili ʻo e māʻoniʻoni kotoa pē, pea fakafiemālieʻi hota laumālié ʻi he puleʻanga ʻo e ʻOtuá.”3
ʻOku ʻikai teitei mohe ʻa e filí. ʻE ʻi ai maʻu pē ʻa e fakafepaki ki he moʻoní. ʻOku ou toe fakaongo atu ʻeku tapou mei he pongipongí ni ke fakahoko ʻa e ngaahi meʻa ʻe fakalahi ai hoʻo tupulaki lelei fakalaumālié, ʻa e mahiki naʻe lave ki ai ʻa ʻEletā Tieta F. ʻUkitofá, ʻa ia te ne kei ueʻi ai pē koe ki muʻa neongo e ngaahi pole mo e faingamālie ʻe hoko maí.
ʻOku fakalahi ʻa e tupulaki lelei fakalaumālié ʻi heʻetau moihū ʻi he temipalé mo fakalakalaka ʻetau mahino ki he loloto mo e fakaofo ʻo e ngaahi tāpuaki ʻoku tau maʻu ʻi aí. ʻOku ou kōlenga atu ke mou fehangahangai mo e ngaahi founga ʻa e māmaní ʻaki homou nofotaha ʻi he ngaahi tāpuaki taʻengata ʻo e temipalé. ʻOku ʻomi ʻe hoʻo taimi ʻi he temipalé ha ngaahi tāpuaki ki ʻītāniti.
ʻI he tupulaki ʻa e Siasí, ʻoku tau feinga ke tulituli ki ai ʻaki hano langa ha ngaahi temipale lahi ange. ʻOku lolotonga langa ha ngaahi temipale ʻe fāngofulu mā fā. ʻOku lahi mo ha ngaahi temipale ʻoku fakafoʻou. ʻOku ou lotua ʻa e kakai taukei ʻoku nau kau ʻi he ngaahi ngāué ni ʻi he funga ʻo e māmaní.
ʻI he laumālie ʻo e fakafetaʻi ʻi he faʻa lotu, ʻoku ou fiefia ke fanongonongo ʻemau ngaahi palani ke langa ha temipale foʻou ʻi he ngaahi feituʻu takitaha ko ʻení: Wellington, New Zealand; Brazzaville, Republic of the Congo; Barcelona, Spain; Birmingham, United Kingdom; Cusco, Peru; Maceió, Brazil; Santos, Brazil; San Luis Potosí, Mexico; Mexico City Benemérito, Mexico; Tampa, Florida; Knoxville, Tennessee; Cleveland, Ohio; Wichita, Kansas; Austin, Texas; Missoula, Montana; Montpelier, Idaho; pea mo Modesto, California.
ʻE tāpuekina ʻe he temipale foʻou ʻe 17 ko ʻení e moʻui ʻa ha kakai taʻefaʻalaua ʻi he ongo tafaʻaki fakatouʻosi ʻo e veilí. ʻOku ou ʻofa atu, siʻoku ngaahi tokoua mo e tuofāfine ʻofeina. Kae mahulu hake aí, ʻoku ʻofeina kimoutolu ʻe he ʻEikí. Ko Ia homou Fakamoʻuí mo homou Huhuʻí. Ko Ia ʻokú Ne taki mo fakahinohino Hono Siasí. ʻOfa ke tau hoko ko ha kakai ʻoku taau mo e ʻEikí, ʻa ia naʻe folofola, “Te mou hoko ko hoku kakai, pea te u hoko ko homou ʻOtua.”4
ʻOku ou lotua ʻeni, ʻi he huafa toputapu ʻo Sīsū Kalaisí, ʻēmeni.