Jisas Kraes I Paoa blong Ol Yut

I Kam long Elda Dieter F. Uchtdorf

Blong Kworom blong Olgeta Twelef Aposol

Putum tras blong yu long Jisas Kraes. Bae Hem i lidim yufala long raet wei. Hem i paoa blong yu.

Taem mi stap rere long mesej ia tudei, mi bin filim strong blong toktok long ol yang woman mo yang man.

Mi stap toktok tu long olgeta we oli bin yang long wan taem, iven long olgeta we oli no moa save tingbaot.

Mo mi toktok long evriwan we oli lavem ol yang pipol mo oli wantem olgeta blong gat sakses long laef.

Blong jeneresen ia we i stap kam antap, mi gat wan spesel mesej blong yufala we i kam long Sevya blong yumi, Jisas Kraes.

Mesej blong Sevya long yufala

Ol dia yang fren blong mi, sapos Sevya i stap long ples ia naoia, bae i talem wanem long yufala?

Mi biliv bae Hem i stat wetem, talemaot bigfala lav blong Hem we i gat long yufala. Hem i maet talem long ol toktok, be bae i kamaot strong—aot long ples we i stap—we bae i no save mestem, blong go insaed long hat blong yufala, fulumap gud sol blong yufala!

Mo yet, from se yumi evriwan i no strong mo no stret evriwan, sam wari bae i kam insaed long maen blong yu. Maet bae yufala tingbaot ol mistek we yufala i bin mekem, taem yufala i bin foldaon long temtesen, ol samting we yufala i filim se spos yu no bin mekem nomo—o ol samting we yufala i filim se sapos yufala i bin mekem gud moa.

Sevya i save long ol samting ia, mo mi biliv Hem i save kamfotem yufala wetem ol toktok we Hem i bin talem insaed long ol skripja:

“yufala i no fraet.”¹

“No gat tu tingting.”²

“Leftemap hed mo stap glad.”³

“Hat blong yufala i no mas trabol.”⁴

Mi no ting se bae Hem i mekem ol eskius from ol mistek blong yufala. Bae Hem i no mekem se oli no impoten. No, bae Hem i askem yufala blong sakem sin—blong lego ol sin blong yufala biaen, blong jenis, blong mekem se Hem i save fogivim yufala. Bae Hem i rimaenem yufala se 2,000 yia i pas Hem i bin tekem ol sin ia long Hemwan mekem se yufala i save sakem sin. Hemia i pat blong plan blong stap glad olsem wan presen we i kam long yumi long Papa blong yumi long Heven we i lavem yumi.

Jisas i maet poenemaot se ol kavenan we yufala i mekem wetem Hem—taem yufala i kasem baptaes mo mekem i niu bakegen taem yufala i tekem sakramen—i givim wan spesel koneksen wetem Hem. Kaen koneksen ia we skripja i singaotem olsem putum yok long tu (2) man i wok tugeta, wetem help blong Hem, yufala i save karem eni samting we i hevi.⁵

Mi biliv se Sevya Jisas Kraes bae i wantem yufala blong luk, filim, mo save se Hem i paoa blong yufala. Se wetem help blong Hem, i no gat limit long wanem we yu wantem blong mekem i kam tru. Se wanem yu stap tingting blong go from o mekem i kam tru i no gat limit. Hem i wantem blong yufala i luk yufala long wei we Hem i luk yufala. Mo hemia i defren long wei we wol i luk long yufala.

Sevya bae i talemaot, stret se yufala i ol gel mo ol boe blong God we I Gat Olgeta Paoa. Papa blong yufala long Heven i gat olgeta paoa mo glori long ful wol, i fulap wetem lav, glad, klin fasin, tabu fasin, laet, gladhat, mo trutok. Mo wan dei Hem i wantem blong yufala blong gat evri samting ia we Hem i gat.⁶

Hemia nao risen from wanem yufala i stap long wol ia—blong lan, gro, mo progres mo kam evri samting we Papa blong yufala long Heven i bin krietem yufala from.

Blong mekem hemia i posibol, Hem i sendem Jisas Kraes blong stap olsem Sevya blong yufala. Hemia stamba tingting biaen long bigfala plan blong Hem blong stap glad, Jos blong Hem, Prishud blong Hem, ol skripja—evri samting ia.

Hemia nao wanem bae i hapen long yufala. Hemia nao i fiuja blong yufala. !Hemia nao i joes blong yufala!

Trutok mo Ol Joes

Samting we i moa impoten long plan blong God blong stap mekem yufala i glad hem i paoa blong yufala blong jusum samting.⁷ I tru, Papa blong yufala long Heven i wantem blong yufala i jusum glad we i no save finis wetem Hem, mo bae Hem i helpem yufala blong mekem i hapen, be bae i neva fosem yufala blong mekem hemia.

Mekem se Hem i letem yufala i jusum: ?Laet o tudak? ?Gud o ivel? ?Glad o harem nogud? ?Laef we i no save finis o ded long saed blong spirit?⁸

?I saon olsem wan joes we i isi nomo, no? Be samtaem, long wol ia, i luk olsem samting i moa had long wanem we i stap.

Problem i we oltaem yumi no stap luk ol samting klia olsem we yumi stap wantem. Aposol Pol i stap komperem hemia olsem blong luk “long wan glas, we i no klia gud.”⁹ I gat plante tingting we i fasfas long wol abaot wanem i raet mo rong. Oli twistim trutok blong mekem ivel i luk gud mo gud i luk ivel.¹⁰

Be taem yufala i stap lukaotem trutok wetem ful hat blong yufala—trutok we i no save finis, we i neva jenis—ol joes blong yufala oli kam moa klia. Yes, bae yu gohed blong gat temtesen mo ol hadtaem. Ol nogud fasin i gohed blong stap hapen. Ol samting oli hapen yumi no save from wanem. Ol disasta. Be yu save stap long kontrol taem yu save huia hem i yu, from wanem yu stap ia, mo taem yu trastem God.

?So weples nao yu faenem trutok?

I stap insaed long gospel blong Jisas Kraes. Mo fulnes blong gospel ia oli tijim insaed long Jos blong Jisas Kraes blong Ol Lata-dei Sent.

Jisas i talem: “Mi nao rod ya, mo mi mi stamba blong trutok, mo mi stamba blong laef. I no gat man i save kam long Papa blong mi, sapos mi mi no tekem hem i kam.”¹¹

Taem yufala i gat ol impoten joes blong mekem, Jisas Kraes mo gospel blong Hem we i kambak i nambawan joes. Taem yufala i gat ol kwestin, Jisas Kraes mo gospel blong Hem we i kambak oli ol nambawan ansa. Taem yufala i filim se yufala no strong, Jisas Kraes i paoa blong yufala.

Hem i givim paoa long olgeta we oli taet; mo long olgeta we oli filim se oli no gat paoa, Hem i givim moa paoa.

Olgeta we oli stap luk long Hae God bae Hem i givim paoa long olgeta.¹²

Blong Ol Yut Oli Kam Strong

Blong helpem yufala i faenem Wei mo blong helpem yufala i mekem doktrin blong Kraes i stap olsem samting we i stap lidim laef blong yufala, Jos Ia blong Jisas Kraes blong Ol Lata-dei Sent i rere long wan niu risos, wan vesen we oli riviu bakegen long hem, blong Blong Ol Yut Oli Kam Strong.

I gat ova 50 yia nao we, Blong Ol Yut Oli Kam Strong i stap olsem wan gaed blong ol jeneresen blong ol yut blong Ol Lata-dei Sent. Mi kipim wan kopi oltaem long poket blong mi, serem wetem ol pipol we oli wantem blong save abaot ol standet blong yumi Oli bin apdeitem mo mekem i kam niu blong i go wetem ol jalenj mo temtesen blong taem blong yumi tudei. Niufala vesen ia blong Blong Ol Yut Oli Kam Strong i gat i stap onlaen long 50 defren lanwis mo i gat tu i stap we oli save printim. Bae i helpem yufala bigwan blong save mekem gud joes long laef blong yufala. Plis akseptem olsem we i blong yu stret mo serem wetem ol fren blong yu.

Niufala vesen ia blong Blong Ol Yut Oli Kam Strong i smol taetol long Wan Gaed blong Mekem Ol Joes.

Blong mekem i moa klia, nambawan gaed we yufala i save gat blong mekem ol joes hem i Jisas Kraes. Jisas Kraes i paoa blong yut.

So Stamba tingting blong Blong Ol Yut Oli Kam Strong i blong helpem yufala go long Hem. I tijim yufala ol trutok we i no save finis blong gospel blong Hem we i kambak—trutok abaot huia yufala, huia Hem, mo wanem yufala i save mekem i kam tru wetem paoa blong Hem. I tijim yufala olsem wanem blong mekem ol joes we i stret mo gud we oli stanap long ol trutok wei no save finis.¹³

I impoten tu blong yufala i save wanem Blong Ol Yut Oli Kam Strong i no mekem. I no mekem ol desisen blong yufala. I no givim long yufala wan “yes” o “no” abaot evri joes we yufala i stap fesem. Blong Ol Yut Oli Kam Strong i fokas long fandesen blong ol joes blong yufala. I fokas long ol valiu, ol prinsipol, mo ol doktrin be i no evri wanwan fasin.

Lod, tru long ol profet blong Hem, i lidim yumi oltaem long rod ia. Hem i stap askem strong long yumi blong “kam antap long paoa blong [yumi] long saed blong spirit blong kasem revelesen.”¹⁴ Hem i invaetem yumi blong “harem Him.”¹⁵ Hem i stap singaotem yumi blong folem Hem long ol rod we i moa hae mo i moa tabu.¹⁶ Mo yumi stap lanem long wan semmak wei long evri wik long Kam folem Mi.

Mi save se gaed ia bae i save givim wan longfala lis blong ol klos we yufala i no sapos blong werem, ol toktok we yufala i no sapos blong talem, mo ol muvi we yufala i no sapos blong wajem. ?Be hemia, i save help long wan jos we i stap long ful wol? ?Kaen tijing olsem bae i save helpem yufala blong laef folem eksampol blong Kraes blong wan ful laef?

Josef Smit i talem: “mi tijim olgeta ol prinsipol we oli stret, mo olgeta nomo oli rulum o kontrolem olgeta.”¹⁷

Mo King Benjamin i talem long ol pipol blong Hem long Buk blong Momon, “mi no save talem long yufala evri samting we yufala i save mekem sin long hem; from i gat plante defren wei mo plante fasin, hem i plante tumas mekem se mi no save kaontem olgeta.”¹⁸

King Benjamin i go hed blong talem, “Be hemia nomo mi save talem long yufala, … lukaot gud long yufalawan, mo long ol tingting blong yufala, mo long ol toktok blong yufala, mo long ol wok blong yufala, mo yufala i obei ol komanmen blong God, mo gohed long fet … blong Lod blong yumi go kasem en.”¹⁹

?hem i rong blong gat ol rul? Yes, i no rong. Yumi evriwan i nidim olgeta evri dei. Be hem i rong blong stap fokas nomo long ol rul be no fokas long Sevya. Yufala i nid blong save from wanem mo olsem wanem, mo afta tingting long wanem bae i hapen afta long ol joes we yufala i stap mekem. Yufala i nid blong putum tras blong yufala long Jisas Kraes. Bae Hem i lidim yufala long raet wei. Hem i paoa blong yufala.²⁰

Paoa blong Tru Doktrin

Blong Ol Yut Oli Kam Strong i talemaot doktrin blong Jisas Kraes wetem strong tingting. Oli invaetem yufala blong mekem ol joes we i folem doktrin blong Kraes wetem strong tingting. Mo wetem strong tingting oli eksplenem ol blesing blong Jisas Kraes we i promesem olgeta we oli folem ol Wei blong Hem.²¹

Presiden Russell M. Nelson i tijim: “Taem bigfala tingting blong hat blong yu i blong letem God i stap win [long laef blong yu], … plante desisen bae oli kam isi moa. … !Plante trabol, oli nomo ol trabol! Yu save gud olsem wanem blong yu presentem yuwan. Yu save wanem blong wajem mo ridim, weaples blong spendem taem blong yu mo huia blong fren wetem. Yu save wanem yu wantem mekem i kamtru. Yu save kaen man o woman we yu …wantem kam olsem.”²²

Wan Standet We I Moa Hae

Jisas Kraes i gat ol standet we i hae tumas blong olgeta we oli stap folem Hem. !Mo invitesen ia blong lukaotem wil blong Hem mo laef folem ol trutok blong Hem, hemia nao hem i ol standet we i moa hae!

Ol joes ia we oli impoten long saed blong bodi mo long spirit man i no mekem olgeta folem tingting blong hem nomo, o folem wanem hem i ting se i stret o folem majoriti.²³ Lod i no talem se, “Mekem wanem yu wantem.”

Hem i talem, “Letem God i win.”

Hem i talem, “Kam Folem Mi.”²⁴

Hem i talem, “Laef folem wan laef we i moa tabu, we i moa hae, wan wei we i moa rere.”

Hem i talem, ‘Obei ol komanmen blong mi.’”

Jisas Kraes i stret eksampol blong yumi, mo yumi traehad wetem evri paoa blong sol blong yumi blong folem Hem

Ol dia fren blong mi letem mi ripitim, sapos Sevya i stap long ples ia tudei, bae Hem i talemaot lav blong Hem we i no gat en from yufala, ful tras blong Hem long yufala. Bae Hem i talem long yufala se yufala i save mekem hemia. Yufala i save bildim wan laef we i gat glad mo hapi from se Jisas Kraes i paoa blong yufala. Yufala i save faenem tras, pis, sefti, hapines, blong gat pat long laef ia mo laef we i no save finis, from bae yu fanem evri samting ia long Jisas Kraes, insaed long gospel blong Hem, long Jos blong Hem.

Long hemia mi talem tru witnes blong mi olsem wan Aposol blong Lod Jisas Kraes mo givim long yufala blesing blong bigfala tankyu mo lav blong mi, long nem blong Jisas Kraes, amen.

Ol Not

1. Luk 5:10; 8:50; 12:7; Doktrin mo Kavenan 38:15; 50:41; 98:1.

2. Doktrin mo Ol Kavenan 6:36

3. Matiu 14:27; Jon 16:33; Doktrin mo Ol Kavenan 61:36; 68:6; 78:18.

4. Jon 14:1, 27.

5. Luk long Matiu 11:28–30

6. Luk long Doktrin mo Ol Kavenan 84:38

7. Maet bae yu talem se plan blong Papa i bin disaen blong yu save jusum blong mekem wanem yu wantem, blong mekem se yu save kasem ful risal blong wanem yu wantem blong kasem. Olsem Elda Dale G. Renlund i bin tijim, “Gol blong Papa long Heven long saed blong rol blong papa mo mama i no blong mekem ol pikinini blong Hem oli mekem wanem i raet; hem i blong ol pikinini blong Hem oli jusum blong mekem wanem i raet mo blong kam olsem Hem” (“Choose You This Day,” Liahona, Nov. 2018, 104).

8. Luk long 2 Nifae 2:26–27

9. 1 Korin 13:12

10. Luk long Aesea 5:20

11. Jon 14:6

12. Luk long Aesea 40:29–31

13. Olsem ol Lata-dei sent, oli save long yumi oltaem long wanem yumi mekem mo wanem yumi no mekem—ol fasin blong yumi. Hemia bae i gud, be i moa gud blong save yumi long wanem yumi save (trutok we i lidim ol fasin blong yumi) mo from huia yumi save (Sevya—mo olsem wanem lav blong yumi long Hem i lidim ol fasin blong yumi).

14. Russell M. Nelson, “Revelesen blong Jos, Revelesen blong Ol Laef blong Yumi,” Liahona, Mei 2018, 96.

15. Luk long Russell M. Nelson, “Lisin Gud Long Hem,” Liahona, Mei 2020, 88–92.

16. Stamba prinsipol we oli wok folem long niufala gaed blong Blong Ol Yut Oli Kam Strong i semmak wetem ol narafala gaed we Jos blong Sevya i stap putumaot, olsem Prijim Gospel blong Mi, wok blong givhan, we hom i sapotem Kam Folem Mi Kurikulom, program blong Ol Pikinini mo Yut, Teaching in the Savior’s Way, mo niufala Jeneral Hanbuk. Lod i stap bildim yumi long saed blong spirit. Hem i stap soemaot tras we i gohed blong kam antap long ol kavenan pipol blong Hem long ol las dei ia.

17. Teachings of Presidents of the Church: Joseph Smith (2007), 284.

18. Mosaea 4:29 Long wan wei, hemia wanem ol Farisi long taem blong Jisas oli stap traem blong mekem. Blong stopem ol pipol blong no stap brekem ol loa, oli putum tugeta ol handred rul folem wanem oli andastanem insaed long ol tabu buk. Wanem we ol Farisi oli tekem nogud i we oli ting se ol rul ia bae i sevem olgeta. Mekem se taem Sevya i kam, oli no luksave Hem.

19. Mosaea 4:30; oli ademap italik.

20. Narafala risen yumi nidim wan stamba prinsipol blong wok folem tudei, hem i ol defdefren kalja blong Jos blong Lod we i stap kam antap. Ol prinsipol oli stap long evri ples mo oli no save finis. Ol stret rul o aplikesen blong ol prinsipol ia, oli wok gud long wan ples mo no wok gud long nara ples. Wanem i yunaetem yumi hem i Jisas Kraes mo ol trutok we Hem i bin tijim, iven sapos wanwan long ol aplikesen i jenis ova long taem mo folem ol kalja. So problem blong stap mekem lis blong ol samting blong mekem mo no mekem i no se oli no stap mekem o no sapotem. Problem i we i karemaot fokas blong yumi aot long tru Sos blong paoa blong yumi, Sevya blong yumi, Jisas Kraes.

21. Plante yia i pas, Presiden Boyd K. Packer i talem ol toktok ia we i gat bigfala paoa: “Taem man i andastanem tru doktrin, i jenisim tingting mo fasin blong hem. Stadi blong ol doktrin blong gospel bae i jenisim ol fasin kwiktaem moa bitim we wan stadi long saed blong fasin bae i jenisim fasin” (“Do Not Fear,” Liahona, Mei 2004, 79).

    Presiden Ezra Taft Benson i bin tijim wan semmak trutok: “Lod i wok stat insaed i kam aotsaed. Wol i wok aotsaed i kam insaed. … Wol bae i jenisim fasin blong man, be Kraes i jenisim laef blong man” (“Born of God,” Ensign, Nov. 1985, 6).

    Taem profet Alma insaed long Buk blong Momon i luk ivel long wol i raonem hem i tanem i go long toktok blong God from se hem i save se i “gat moa bigfala paoa long tingting blong ol pipol bitim naef blong faet, o eni narafala samting, we i bin hapen finis long olgeta—from hemia, Alma i ting se i gat nid se oli mas traem paoa blong toktok blong God” (Alma 31:5).

22. Russell M. Nelson, “Letem God I Win,” Liahona, Nov. 2020, 94. Presiden Nelson i mekem eksampol blong tingting ia taem hem i tijim yumi abaot ona long Sabat dei: “Taem mi mi bin yangfala, mi bin stadi long wok blong ol narafala pipol we oli bin putum tugeta wan lis blong ol samting blong mekem, mo ol samting blong no mekem long Sabat. Afta nomo, mi lanem aot long ol skripja se wei we mi stap mekem samting mo fasin blong mi long Sabat i stap olsem wan saen bitwin mi mo Papa blong mi long Heven. Wetem samting ia we mi andastanem, mi nomo nidim ol lis blong ol samting blong mekem mo blong no mekem. Taem mi mas mekem desisen se wan aktiviti i stret o no long Sabat dei, mi stap askem miwan nomo: ‘Wanem saen mi wantem givim long God?’ Kwestin ia i mekem joes blong mi abaot Sabat dei i kam moa klia” (“The Sabbath Is a Delight,” Liahona, May 2015, 130).

23. Elda David A. Bednar i bin tijim se “ol prinsipol blong stret mo gud fasin… oli helpem yumi tu blong luk i go bitim ol samting we yumiwan nomo i laekem, mo wantem, taem yumi givim bigfala lukluk ia blong trutok we i no save finis taem yumi gotru long ol defren situesen, jalenj, desisen, mo eksperiens blong laef long wol ia” (“The Principles of My Gospel,” Liahona, Mei 2021, 123–24).

24. Luk 18:22