Nrhiav Tau Yexus Khetos hauv Peb lub Neej
Tus Cawm Seej caw peb saib peb lub neej dhau ntawm Nws peb thiaj li pom tau Nws ntau dua hauv peb lub neej.
Cov viv ncaus thiab cov nus, kuv txo hwj chim hais lus pub rau nej tag kis no. Kuv nrog nej ua Vajtswv tsaug uas peb sib sau ua ke tau, txawm nej nyob qhov twg hauv lub ntiaj teb no, kom thiaj hnov tau cov lus los ntawm cov yaj saub, cov thwj tim, cov pom tau, cov txais kev tshwm sim, thiab cov thawj coj hauv Vajtswv lub nceeg vaj. Peb zoo ib yam li cov neeg hauv Vaj Ntxwv Npeyamis lub caij nyoog, vim peb tsa peb tej tsev pheeb suab ntaub tig mus rau Vajtswv tus yaj saub hauv lub ntiaj teb no,1 Thawj Tswj Hwm Russell M. Nelson.
Kuv ob lub qhov muag tsis tshua pom kev zoo txij thaum kuv me me los thiab kuv yeej los yuav tsum coj iav kom thiaj pom tau kev. Txhua txhia tag kis thaum kuv qhib qhov muag, lub ntiaj teb uas kuv pom tsis khav. Txhua yam kuv pom tsis tseeb, nws plooj plooj thiab txawv txawv. Twb yog thaum kuv saib kuv tus txiv nws zoo li daim duab plooj plooj xwb tsis zoo li kuv tus txiv uas hlub kuv thiab nplij kuv lub siab! Qhov uas kuv yuav tsum ua ua ntej tshaj plaws txhua txhia hnub yog ncav kom muab tau kuv lub tsom iav es kuv thiaj pom tau txhua yam ib ncig ntawm kuv khav khav thiab ua li ntawd kuv thiaj ua tau tej yam kuv ua thiab kuv lub tsom iav pab kuv nrhiav tau kev mus.
Tau ntau xyoo, kuv tau pom tias txhua txhia hnub kuv vam khom ob yam: qhov thib ib, ib rab cuab yeej uas pab kuv pom tau kev, pom khav khav, thiab saib tau qhov chaw puag ncig; thiab qhov thib ob, qhov uas kuv xav tau cov lus qhia kev kom thiaj taw kuv mus rau txoj kev yog. Qhov uas kuv ua txhua hnub no qhia kuv ib yam tseem ceeb txog peb txoj kev nrog peb tus Cawm Seej, Yexus Khetos, sib raug zoo.
Peb lub neej feem ntau muaj lus nug, kev txhawj xeeb, kev cov nyom, thiab tej cib fim, peb tus Cawm Seej txoj kev hlub peb uas yog Nws cov me nyuam uas tau khi lus lawm, ua ke nrog Nws cov lus qhia thiab tej kev cai, yog tej kev pab uas peb vam khom tau “qhov kaj uas cia ntsa iab, … ua rau [peb] pom tau kev [thiab] to taub txhua yam.”2 Thaum peb nrhiav kom tau tej koob hmoov ntawm tus Ntsuj Plig hauv peb lub neej, peb yuav muaj peev xwm ua li Yakhauj qhia, hais tias peb yuav pom tau “tej uas yeej muaj tiag, thiab … tej uas yuav muaj tiag.”3
Ua Vajtswv cov me nyuam uas tau nrog Nws khi lus, peb tau koob hmoov ntau uas peb muaj tej cuab yeej cuab tam kom thiaj pom tau kev ntawm peb sab ntsuj plig. Yexus Khetos cov lus qhia uas sau tseg hauv cov vaj lug kub thiab Nws cov yaj saub cov lus, thiab Nws tus Ntsuj Plig uas txais los ntawm kev thov Vajtswv txhua hnub, thiab kev mus tom lub tuam tsev, thiab kev noj lub cim nco txog txhua lub lim tiam, txhua yam no yuav pab kom peb muaj kev nyob kaj siab lug thiab pab peb txais lub txiaj ntsim ntawm kev paub qhov tseeb thiab qhov cuav uas coj Khetos qhov kaj los rau peb thiaj pom tau kev txawm tias pos pos huab li. Tus Cawm Seej kuj ua tau peb tus twj qhia kev thiab peb tus tsav nkoj thaum peb ntws mus tej dej tu thiab tej dej nthwv ntawm lub neej no. Tus Cawm Seej qhia tau txoj kev yog uas yuav coj peb mus rau peb lub neej nyob mus ib txhis li. Ces Nws yuav xav kom peb pom tau dab tsi, thiab Nws xav kom peb mus qhov twg?
Peb tus yaj saub tau qhia peb tias “peb yuav tsum tsom ntsoov rau tus Cawm Seej thiab Nws txoj moo zoo” thiab tias peb yuav tsum “ntsia ntsoov Nws nrog txhua txoj kev xav.”4 Thawj Tswj Hwm Nelson kuj tau cog lus hais tias “tsis muaj dab tsi uas pab kom muaj tus Ntsuj Plig ntau npaum li qhov uas nej tsom ntsoov rau Yexus Khetos. … Nws yuav coj nej lub neej yog nej yuav los muab sij hawm rau Nws—txhua txhia hnub.”5 Kuv cov phooj ywg, Yexus Khetos yog lub ntsiab uas peb tsom ntsoov thiab qhov chaw uas peb peem mus kom txog. Kom thiaj pab peb tsom ntsoov txoj kev yog, tus Cawm Seej caw peb saib peb lub neej dhau ntawm Nws, es peb thiaj li pom tau Nws ntau dua hauv peb lub neej. Kuv tau kawm ntxiv txog txoj lus caw no dhau ntawm qhov uas kuv kawm Phau Qub.
Txoj kev cai Mauxes yog muab pub rau cov Neeg Ixayees yav thaum ub ua ib txoj moo zoo npaj kev, lub ntsiab yog kom npaj cov neeg nrog Vajtswv sib khi lus siab zog dhau los ntawm Yexus Khetos.6 Txoj kev cai no muaj ntau lub cim uas qhia cov ntseeg kom “tos ntsoov qhov uas Yexus yuav los” thiab Yexus Khetos txoj Kev Theej Txhoj,7 thiab lub ntsiab yog kom pab cov neeg Ixayees tsom ntsoov tus Cawm Seej dhau ntawm txoj kev xyaum muaj siab ntseeg, Nws txoj kev txi, thiab Nws tej kev cai thiab kev txib hauv lawv lub neej8—kom lawv thiaj tom taub txog lawv tus Txhiv Dim zoo dua.
Ib yam li peb niaj hnub nim no, Vajtswv caw Nws cov neeg thaum ub saib lawv lub neej dhau ntawm Nws kom thiaj pom tau Nws ntau dua hauv lawv lub neej. Tiam sis txog thaum tus Cawm Seej nyob hauv lub ntiaj teb ua Nws tej dej tej num, cov neeg Ixayees tej kab ke tsis tsom ntsoov Khetos, es lawv muab Nws tso tseg thiab ntxiv tej yam rau txoj kev cai uas tsis muaj tej cim uas sawv tam rau tib qho hauv paus ntawm lawv txoj kev cawm seej thiab kev txhiv dim—twb yog Yexus Khetos.9
Tej yam uas cov neeg Ixayees pom txhua hnub zoo li pom zem zuag xwb thiab yam plooj plooj li. Ua li no, cov Neeg Ixayees, ntseeg tias tej kev xyaum ua thiab tej kab li kev cai ntawm txoj kev cai yog txoj kev taug kom tau kev cawm seej thiab feem ntau lawv siv tej kev cai Mauxes kom tswj hwm cov pej xeem lub neej.10 Ua li no tus Cawm Seej yuav tsum pab lawv tsom ntsoov thiab to taub zoo txog Nws txoj moo zoo.
Thaum kawg cov Neeg Ixayees feem coob tsis txais Yexus cov lus qhia, twb yog npaum li tias lawv liam tias tus Cawm Seej—tus uas muab txoj kev cai pub rau lawv thiab tau tshaj tawm tias Nws yog “txoj kev cai, thiab qhov kaj”11—liam tias Nws ua txhaum kev cai. Tiam sis thaum Yexus Qhia Nyob pem Roob, hais txog txoj kev cai Mauxes, Nws hais tias, “Nej tsis txhob xav hais tias yog kuv los rhuav Mauxes txoj Kev Cai thiab tej lus uas cov [yaj saub] tau qhia tseg lawm. Tsis yog kuv los rhuav tej lus ntawd, tiam sis yog kuv los ua kom tej lus ntawd tiav.”12 Ces tus Cawm Seej, dhau ntawm Nws txoj Kev Theej Txhoj nyob mus ib txhis li, ua kom tej kab li kev cai uas yog cov Neeg Ixayees coj tiav tas lawm. Yexus txoj kev txi ua kom lawv tsis tas txi cov tsiaj txhu ntxiv es hais tias peb yuav tsum txi “ib lub siab puas tas thiab lub siab xav ua zoo,”13 los ntawm txoj kab ke txi thiab txoj kab ke noj lub cim nco txog.
Thawj Tswj Hwm M. Russell Ballard, qhia txog lub tswv yim no, tau hais tias, “Ua lwm yam hais, txoj kev txi hloov los ntawm qhov uas yog muab txi mus rau tus uas muab txi.”14 Thaum peb muab peb tus kheej txi rau tus Cawm Seej, twb yog Vajtswv caw peb los pom Yexus Khetos ntau dua hauv peb lub neej, thaum peb txo hwj chim thiab nyoo Nws es hawm thiab to taub qhov uas Nws nyoo ua raws li Nws Leej Txiv lub siab nyiam. Thaum peb tsom ntsoov Yexus Khetos, peb pom tau thiab to taub tau hais tias Nws yog ib lub hauv paus thiab tib txoj kev txais kev zam txim thiab kev txhiv dim, twb yog kom txais tau lub neej nyob mus ib txhis li thiab kev tsa nto.
Ua ib tug uas tau ua raws li txoj moo zoo thaum ntxov, kuv tau ntsib coob tug neeg uas pom tias kuv tau hloov tej yam kuv ua, thiab kuv tus cwj pwm, thiab tej yam kuv xaiv tom qab uas kuv koom lub Koom Txoos. Cov neeg no xav paub “yog vim li cas” thiaj muaj tej yam uas lawv pom ntawd—yog vim li cas kuv thiaj xaiv los ua kev cai raus dej thiab koom cov neeg ntseeg no, twb yog Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg; yog vim li cas kuv hwm Hnub Caiv kom dawb huv; yog vim li cas kuv thiaj ua raws li Txoj Lus Txawj Ntse; yog vim li cas kuv thiaj nyeem Phau Ntawv Maumoos; yog vim li cas kuv thiaj ntseeg cov yaj saub thiab cov thwj tim niaj hnub nim no cov lus qhia thiab nruab tej lus qhia ntawd hauv kuv lub neej; yog vim li cas kuv thiaj mus koom lub koom txoos txhua lub lim tiam; yog vim li cas kuv thiaj caw lwm tus neeg “los saib, los pab, … los koom,”15 thiab “los ua ib tug mej zeej.”16
Thaum lub sij hawm ntawd, cov lus nug ntawd yeej xeeb txob kuv me ntsis, thiab yeej zoo li ntxig nug yam li liam tias kuv ua dab tsi yuam kev. Tiam sis thaum kuv tiv kom tau lwm tus neeg ntsuam xyuas kuv, kuv pom tias qhov uas lawv ntxig nug ntawd yog thawj qhov kev caw rau kuv coj kuv lub tsom iav ntawm sab ntsuj plig thiab pom tseeb saib yog vim li cas kuv thiaj ua raws li txoj moo zoo tej kab li kev cai. Lub hauv paus ntawm kuv zaj lus tim khawv yog dab tsi? Puas yog kuv ua tej yam “coj sab nraud” no es tsis cia tej kev xyaum ua raws li Vajtswv cov kev cai no “ntxiv dag zog rau [kuv] txoj kev ntseeg rau ntawm Khetos,”17 los sis qhia tias kuv to taub tias Yexus Khetos yog tib lub hauv paus ntawm lub hwj chim ntawm tej yam kuv coj ua ntawd?
Kuv rau rau siab nrhiav kom tau thiab tsom ntsoov Yexus Khetos nyob hauv tej yam kuv xav thiab tej yam kuv ua, es thaum ua li ntawd kuv qhov muag qhib, thiab kuv to taub hais tias Yexus Khetos hu kom kuv “los cuag Nws.”18 Thaum lub sij hawm kuv tseem ua ntxhais hluas ntawd, kuv nco tau tias cov tub txib tau caw kuv koom nkawd qhia txoj moo zoo rau ib pab ntxhais hluas uas muaj hnub nyoog li kuv. Muaj ib hmo, thaum peb sawv daws sib tham ua ke, muaj ib tug ntxhais uas nug saib yog vim li cas kuv ntseeg es lo lus nug ntawd chob nkaus kuv lub siab, thiab cia kuv ua tim khawv rau lawv hais txog kuv txoj kev ua ib tug ntseeg, thiab ua li ntawd tau pab ntxiv dag zog rau kuv zaj lus tim khawv tom ntej mus.
Kuv tau kawm thaum lub sij hawm ntawd, thiab kuv paub tam sim no, hais tias peb tus Cawm Seej, Yexus Khetos, coj peb kev mus rau tej tsev teev ntuj txhua lub lis piam kom noj Nws lub cim nco txog, coj peb kev mus rau tej tuam tsev kom thiaj nrog Nws sib khi lus, coj peb kev mus rau cov vaj lug kub thiab cov yaj saub cov lus kom thiaj kawm tau Nws cov lus. Tus Tswv pab peb ua tim khawv txog Nws, pab peb ua hauj lwm pab lwm tus neeg ib yam li Nws yuav pab, pab peb pom lub ntiaj teb thiab sawv daws ib ncig ntawm peb ib yam li Nws pom—“tej uas yeej muaj tiag, thiab … tej uas yuav muaj tiag.”19 Thiab thaum peb cia Nws coj peb kev rau ntawm txhua yam, peb yuav txais ib zaj lus tim khawv hais tias “txhua yam qhia tias muaj Vajtswv tiag,”20 vim nyob rau peb qhov chaw uas peb nrhiav kom tau Nws peb yuav pom Nws nyob ntawd21—txhua txhia hnub. Kuv ua tim khawv txog qhov no los ntawm Yexus Khetos lub npe dawb ceev, amees.