Lub Ntsiab Cai uas Nyob Mus Ib Txhis ntawm Kev Hlub
Peb Leej Txiv Saum Ntuj Ceeb Tsheej txoj kev hlub Nws cov me nyuam los muaj tiag tiag. Nws nyob kom pab txhua leej txhua tus.
Peb pom lub ntsiab cai nyob mus ib txhis ntawm kev hlub nyob hauv ob txoj lus txib tseem ceeb: hlub Vajtswv kawg siab kawg ntsws, kawg plab kawg plawv thiab kawg lub dag lub zog thiab hlub nej tus neeg zej zog ib yam li nej tus kheej.1
Kuv nco qab thawj lub caij no no nyob hauv Utah, es muaj cov daus txhua qhov chaw. Vim kuv ib txwm nyob hauv tiaj suab puam qhuav Sonoran Desert, thawj ob peb hnub kuv nyiam heev, tiam sis tom qab ntawd, kuv paub tias kuv yuav tsum sawv ntxov dua kom tshem cov daus ntawm kev nres tsheb.
Muaj ib hnub sawv ntxov, thaum tab tom los daus hlob heev, kuv tawm hws, kaus cov daus, thiab kuv pom kuv tus neeg zej zog hla kev qhib nws chaw nres tsheb. Nws laus dua kuv, kuv thiaj li xav tias yog kuv ua tiav tsuag tsuag ces kuv pab tau nws. Yog li ntawd kuv hais lus nrov tias, “Tij laug, koj puas xav tau kev pab?”
Nws luag nyav thiab hais tias, “Ua tsaug, Txwj Laug Montoya.” Ces nws rub ib lub tshuab kaus cov daus tawm nws chaw nres tsheb los, qhib lub cav, ces ob peb feeb xwb, nws twb tshem tag nrho cov daus ntawm nws lub tsev ua ntej tas. Ces nws rub nws lub tshuab hla kev tuaj thiab nug kuv seb, “Txwj laug, koj puas xav tau kev pab?”
Kuv luag nyav thiab hais tias, “Xav mas, ua tsaug.”
Peb puas txaus siab sib pab vim tias peb ib leeg hlub ib leeg, thiab tej uas kuv tus tij laug xav tau yeej yog kuv li es kuv li yog nws li. Txawm yog kuv tus tij laug hais yam lus twg los sis tuaj lub teb chaws twg tuaj, peb ib leeg hlub ib leeg vim peb yog cov kwv tij, cov me nyuam los ntawm ib Leej Txiv.
Thaum Thawj Tswj Hwm Russell M. Nelson tau qhia txog kev txhawb pab, nws hais tias, “Peb yuav siv ib tug txheej txheem tshiab thiab dawb huv ntxiv kom saib xyuas thiab txhawb pab lwm tus.”2 Kuv xav tias, dawb huv ntxiv txhais tias yog ib yam uas siab dua, zoo li tus Cawm Seej txoj kev: “Ib leeg hlub ib leeg,”3 ib tug dhau ib tug.
Yog tias peb ua tib zoo ua kom tsis txhob ua rau lwm tus dawm taw xwb ntshe tsis txaus; yog peb pom ib tug neeg txom nyem ntawm txoj kev xwb thiab tsis nres pab nws, ntshe tsis txaus. Cia peb siv txhua lub sij hawm kom pab peb tus neeg zej zog, tsis hais yog thawj zaug los yog tib lub sij hawm xwb uas peb ntsib nws hauv lub neej no.
Vim li cas kev hlub Vajtswv yog thawj txoj lus txib tseem ceeb?
Kuv xav tias vim yog Nws muaj nqi rau peb npaum li cas. Peb yog Nws cov me nyuam, Nws saib xyuas peb, peb cia siab rau nws, thiab Nws txoj kev hlub pov hwm peb. Nws txoj hau kev cia peb muaj kev ywj siab xaiv; yog li ntawd, tej lub sij hawm peb yeej yuav ua yuam kev.
Nws kuj cia peb raug kev sim siab thiab raug kev ntxias. Tiam sis txawm yog peb ua yuam kev los sis ua txhaum, txoj hau kev no muab ib tus Cawm Seej peb thiaj li yuav txais kev txhiv dim thiab muaj cib fim rov qab mus cuag Vajtswv.
Kev txom nyem hauv peb lub neej ua rau peb tsis tshua ntseeg tias yuav muaj raws li tej lus cog tseg uas Vajtswv cog lus rau peb. Thov kom nej tso siab rau peb Leej Txiv. Nws yeej ua raws li Nws cog lus, thiab peb kawm tau tej yam uas Nws xav qhia peb.
Txawm yog peb ua tej yam zoo los, tej xwm txheej zoo hauv lub neej no yeej hloov tau los ua tej xwm txheej phem, kev zoo siab yuav hloov rau kev tu siab. Vajtswv teb peb tej lus thov raws li Nws txoj kev muaj siab hlub tshua thiab raws li Nws lub sij hawm.
-
Cov dej uas Eliyas haus twb qhuav tas.4
-
Nifais ua rau nws rab hneev uas muab tseem kab ua lov.5
-
Lwm tus neeg ntxub ib tug tub hluas ces ua rau nws raug ntiab tawm ntawm lub tsev kawm ntawv.
-
Ib tug me nyuam mos liab tuag ob peb hnub tom qab nws tau yug los.
Tej xwm txheej yeej hloov.
Thaum tej xwm txheej hloov ntawm kev zoo mus rau kev phem, peb tseem muaj peev xwm zoo siab vim tias kev zoo siab tsis nyob ntawm seb peb raug dab tsi tiam sis yeej nyob ntawm peb xav li cas txog peb tej xwm txheej. Thawj Tswj Hwm Nelson hais tias: “Kev xyiv fab uas peb muaj tsis los ntawm peb lub neej qhov chaw puag ncig, tiam sis los ntawm tej yam uas peb tsom ntsoov saib rau nqi hauv peb lub neej.”6
Peb zaum twj ywm tos ntsoov seb tej xwm txheej puas yuav hloov los tau, los sis peb nrhiav thiab muab peb tej xwm txheej hloov los tau.
-
Eliyas mus rau pem lub nroog Xalefas, nyob ntawd ib tug poj ntsuam tau muab mov thiab dej rau nws haus.7
-
Nifais tau xuas ntoo los txua ua ib rab hneev thiab mus raws tsiaj kom tua noj.8
-
Tus tub hluas tau zaum ze lub qhov rais mloog zaj lus qhia thiab sau ntawv, es hnub no nws yog ib tug xib hwb qhia ntawv theem pib.
-
Khub niam txiv uas nkawd tus me nyuam xiam ntawd mas nkawd txoj kev ntseeg tus Cawm Seej Yexus Khetos loj tuaj thiab tso siab rau txoj hau kev cawm seej. Nkawd txoj kev hlub tus me nyuam uas nkawd tos ntsoov yeej loj tshaj nkawd txoj kev tu siab.
Thaum kuv hnov tej lus nug xws li “Leej Txiv Saum Ntuj Ceeb Tsheej, koj puas nyob ntawd tiag? Thiab koj puas hnov thiab teb txhua tus me nyuam zaj lus thov Vajtswv?,”9 kuv nyiam teb li no tias: “Nws yeej nyob kom pab nej thiab kuv tas mus li. Kuv yog Nws tus tub, Nws yog kuv Leej Txiv, thiab kuv tab tom kawm ua ib leej txiv zoo npaum li Nws.”
Kuv tus poj niam thiab kuv wb yeej sim muaj sij hawm rau wb cov me nyuam txhua lub sij hawm, tsis hais raug xwm txheej dab tsi los yog, yuav tsum ua li cas kom pab lawv los yog. Txhua tus me nyuam nyias muaj nyias tus yam ntxwv; Vajtswv saib lawv rau nqi ntau heev, thiab lawv muaj teeb meem, kev txhaum, thiab tej kev qaug zog twg, Vajtswv tseem hlub lawv, thiab wb kuj hlub lawv.
Thaum Vajtswv hu kuv los ua ib tug Tuam Thawj Coj, hnub kawg ua ntej yuav mus rau Salt Lake, tag nrho kuv cov me nyuam thiab lawv tsev neeg tau nyob ua ke ua tsev neeg hmo ua ke, es nyob ntawd peb ib leeg hais rau ib leeg txog peb txoj kev hlub thiab kev ris txiaj. Tom qab ib zaj lus kawm, kuv tau foom koob hmoov pov thawj hwj rau kuv cov me nyuam txhua tus. Txhua leej txhua tus tau los kua muag. Tom qab kuv tau foom koob hmoov rau lawv, kuv tus tub hlob tau sawv cev txhua tus hais ua tsaug rau qhov kuv thiab kuv tus poj niam tau hlub lawv txij thaum lawv yug los txog hnub no.
Foom koob hmoov rau nej cov me nyuam txawm yog lawv muaj 5 xyoos los yog 50 xyoo los yog. Nrog nraim lawv nyob; ua neej zoo rau lawv. Txawm yog Vajtswv tau muab kev lav ris rau peb pub lawv tau noj tau haus, peb yuav tsum nco ntsoov siv sij hawm zoo siab nrog peb cov me nyuam.
Peb Leej Txiv Saum Ntuj Ceeb Tsheej txoj kev hlub Nws cov me nyuam los muaj tiag tiag. Nws nyob kom pab txhua leej txhua tus. Xyov tsis paub Nws ho txawj ua li no li cas, tiam sis Nws yeej muaj peev xwm. Nws thiab Nws Tib Leeg Tub koom ib lub siab ua Leej Txiv txoj hauj lwm thiab yeeb koob “ua kom tib neeg tsis txawj tuag thiab tau txoj sia nyob mus ib txhis.”10 Nkawd tau txib tus Vaj Ntsuj Plig Dawb Huv los coj peb, ceeb toom peb, thiab nplij peb lub siab.
Nws qhia Nws Tib Leeg Tub kom tsim lub ntiaj teb zoo nkauj no. Nws qhia Adas thiab Evas thiab muab kev ywj siab rau nkawd. Nws tau txib cov tub xa xov rau ntau xyoo kom peb thiaj txais tau Nws txoj kev hlub thiab Nws cov lus txib tag nrho.
Vajtswv nyob hauv Koog Ntoo Dawb Ceev teb tus tub hluas Joseph tej lus nug thiab hu nws lub npe. Nws hais tias: “Tus no yog Kuv Leej Tub uas Kuv Hlub. Cia li mloog Nws hais!”11
Kuv ntseeg tias lub sij hawm uas qhia tias Vajtswv hlub peb loj tshaj plaws yeej nyob hauv Khexemanes, thaum Vajtswv Leej Tub thov hais tias, “Kuv Txiv, yog koj pom zoo, thov koj tshem lub khob no ntawm kuv mus. Txawm yog li cas los thov koj tsis txhob ua raws li kuv lub siab nyiam, tiam sis cia ua raws li koj lub siab nyiam xwb.”12
Kuv tau pom tias qhov me me uas kuv to taub txog Yexus Khetos txoj Kev Theej Txhoj ua rau kuv hlub Leej Txiv thiab Nws Leej Tub ntxiv, ua rau kuv tsis xav ua txhaum thiab ua rau kuv xav mloog lus, thiab ua rau kuv txaus siab ua neeg zoo dua.
Yexus tsis tau ntshai thiab tsis ua xyem xyav thaum Nws mus rau Khexemanes, Nws tso siab rau Nws Leej Txiv, vim Nws paub tias Nws yuav tsum ua qhov ntawd Nws ib leeg xwb. Nws tau nyiaj tag nrho txhua yam mob thiab txhua yam kev thuam. Nws raug liam, txiav txim, thiab raug ntsia saum ntoo khaub lig. Thaum Nws raug txom nyem saum ntoo khaub lig, Yexus tau tsom ntsoov rau Nws niam thiab Nws tus thwj tim tej kev xav tau. Nws txo Nws txoj sia pub rau peb.
Hnub peb Nws tau sawv rov los. Tsis muaj leej twg hauv lub ntxa; Nws sawv ntawm Nws Leej Txiv sab tes xis. Nkawd cia siab xav kom peb xaiv ua raws li peb tej kev khi lus thiab rov qab mus cuag Nkawd. Lub neej thib ob no yeej tsis yog peb lub neej kawg; lub neej hauv ntiaj teb no tsis yog peb teej tug, tiam sis peb yog cov neeg nyob mus ib txhis li uas ua neej nyob rau ib ntus hauv lub ntiaj teb no xwb.
Yexus yog tus Khetos, Vajtswv Leej Tub. Nws muaj txoj sia nyob, thiab vim Nws muaj txoj sia nyob, tag nrho Vajtswv cov me nyuam yuav nyob tas mus li. Vim peb muaj Nws txoj kev txheej txhoj, ces peb puav leej yuav nrog Nkawd nyob ua ke. Los ntawm Yexus Khetos lub npe, amees.