Hnub No

Los ntawm Txwj Laug Ronald A. Rasband

Ntawm Pawg Kaum Ob tug Thwj Tim

Peb tus yaj saub yeej ua li nws ua tau kom muaj Phau Ntawv Maumoos puv lub ntiaj teb. Peb yuav tsum coj raws li nws.

Kuv cov kwv tij thiab cov muam, nyob hauv Phau Ntawv Maumoos lo lus “hnub no”¹ ua rau peb tsom ntsoov rau tej lus ntuas, tej lus cog tseg, thiab tej lus qhia tseem ceeb. Vaj Ntxwv Npeyamis, thaum nws hais zaum kawg, tau ntuas nws cov neeg, “Nej cov uas hnov kuv tej lus uas kuv yuav hais rau nej hnub no; … cuab nej lub pob ntseg xwv kom nej yuav hnov, thiab qhib nej lub siab xwv kom nej yuav to taub, thiab qhib nej lub cim xeeb xwv kom tej txuj ci uas neeg tsis paub txog Vajtswv yuav qhib los rau nej pom.”² Lub tuam rooj sab laj yeej zoo ib yam. Peb los mloog tej lus qhia rau “hnub no,” kom peb thiaj li yuav ua “ncaj txhua lub sij hawm”³ rau tus Tswv thiab Nws txoj moo zoo. Qhov uas kuv xav txog “hnub no” yog qhov uas peb yuav tsum rov qab mob siab siv Phau Ntawv Maumoos, phau uas Joseph Smith hu ua yog “phau raug tshaj txhua phau ntawv nyob hauv ntiaj teb no.”⁴

Phau Ntawv Maumoos uas yog Txwj Laug Rasband li

Kuv tuav ib Phau Ntawv Maumoos tam sim no. Yog phau uas luam nyob rau xyoo 1970, thiab phau no muaj nqis rau kuv. Yus pom tias yog ib phau uas ntuag thiab tev dai ncuv, tiam sis tsis muaj lwm phau ntawv uas tseem ceeb rau kuv lub neej thiab kuv zaj lus tim khawv npaum li phau no. Thaum kuv nyeem phau no, tus Ntsuj Plig tau ua tim khawv rau kuv tias Yexus Khetos yog Vajtswv Leej Tub,⁵ Nws yog kuv tus Cawm Seej,⁶ cov vaj lug kub no yog Vajtswv txoj lus,⁷ thiab tau muab txoj moo zoo txum tim rov qab los.⁸ Tej lus tseeb no yeej nyob hauv kuv lub siab tas li. Ib yam li tus yaj saub Nifais hais tias, “Kuv zoo siab kawg rau tej uas yog tus Tswv li.”⁹

Txwj Laug Rasband nrog nws qhov chaw tshaj tawm txoj moo zoo tus thawj tswj hwm thiab Txwj Laug Hanks

Sab laug mus rau sab xis: Txwj Laug Ronald A. Rasband, ib tug tub txib hluas; Thawj Tswj Hwm Harold Wilkinson, tus thawj tswj hwm ntawm Qhov Chaw Tshaj Tawm Txoj Moo Zoo Eastern States; thiab Txwj Laug Marion D. Hanks, tus Tuam Thawj Coj Xya Caum.

Nov yog dab neeg hais txog phau no. Thaum kuv yog ib tug tub txib, kuv tau ua raws li Txwj Laug Marion D. Hanks hais, thaum nws tuaj xyuas peb nyob hauv Qhov Chaw Tshaj Tawm Txoj Moo Zoo Eastern States. Nws yog tus thawj tswj hwm ntawm Qhov Chaw Tshaj Tawm Txoj Moo Zoo British dhau los, thiab nws ob tug tub txib nyob hauv sam thiaj no hnub no: kuv ob tug Tij Laug zoo, Txwj Laug Jeffrey R. Holland thiab Txwj Laug Quentin L. Cook.¹⁰ Ib yam li nws hais rau nws cov tub txib nyob Askiv Teb, nws tau hais kom peb nyeem ib Phau Ntawv Maumoos ob zaug. Kuv tau ua raws li nws hais. Thawj zaug kuv nyeem nws hais kom kuv khij kab hauv qab txhua yam uas hais txog los yog ua tim khawv txog Yexus Khetos. Kuv tau siv tus xaum liab khij kab hauv qab ntau nqe. Zaum thib ob, Txwj Laug Hanks hais kom peb khij tej lub ntsiab cai thiab cov lus qhuab qhia txog txoj moo zoo, es zaum no kuv tau siv xim xiav kom khij cov vaj lug kub. Kuv tau nyeem Phau Ntawv Maumoos ob zaug li no, ces kuv twb nyeem ob zaug ntxiv, kuv siv xim liab thiab xim dub kom khij tej nqe uas tshoov kuv lub siab.¹¹ Raws li nej pom tau, kuv tau khij ntau yam.

Phau Ntawv Maumoos uas tau khij rau tej kab lus

Tiam sis kuv txoj kev nyeem tsis yog kom kuv khij cov vaj lug kub xwb. Txhua zaus kuv nyeem Phau Ntawv Maumoos, ua rau kuv haj yam hlub tus Tswv. Kuv hnov hauv kuv lub siab tias Nws tej lus qhia muaj tseeb thiab muaj nqis rau “hnub no.” Phau no yeej phim lub npe, “Ib Zaj Lus Tim Khawv Ntxiv txog Yexus Khetos.”¹² Vim kuv tau kawm thiab txais kev tshoov siab los ntawm tus Ntsuj Plig li ntawd, kuv tau ua ib tug tub txib uas siv Phau Ntawv Maumoos thiab Yexus Khetos ib tug thwj tim.¹³

“Hnub no” ib tug tub txib zoo tshaj plaws uas siv Phau Ntawv Maumoos yog Thawj Tswj Hwm Russell M. Nelson. Thaum nws yog ib tug Thwj Tim tshiab, nws tau hais ib zaj lus nyob hauv Accra, Ghana.¹⁴ Muaj cov nom tswv uas tuaj mloog, tsis hais ib tug vaj ntxwv ntawm ib haiv neeg Afikas, uas siv ib tug neeg txhais lus kom sib tham. Tus vaj ntxwv nyiam kawm Phau Vaj Lug Kub Npaivnpaum thiab hlub tus Tswv heev. Tom qab Thawj Tswj Hwm Nelson hais lus, tus vaj ntxwv tuaj ntsib nws, thiab hais lus Askiv zoo nug hais tias, “Koj yog leej twg tiag?” Thawj Tswj Hwm Nelson piav tias nws yog ib tug Thwj Tim uas Yexus Khetos tsa.¹⁵ Tus vaj ntxwv nug hais tias, “Koj yuav qhia kuv dab tsi txog Yexus Khetos?”¹⁶

Thawj Tswj Hwm Nelson tau muab Phau Ntawv Maumoos nthuav rau 3 Nifais tshooj 11. Nyob ua ke Thawj Tswj Hwm Nelson thiab tus vaj ntxwv tau nyeem tus Cawm Seej zaj lus rau cov Neeg Nifais: “tus uas cov yaj saub ua tim khawv tias yuav los rau hauv lub ntiaj teb. … kuv yog txoj kev kaj thiab txoj sia ntawm neeg ntiaj teb.”¹⁷

Thawj Tswj Hwm Nelson tau muab tus vaj ntxwv Phau Ntawv Maumoos ntawd, thiab tus vaj ntxwv teb hais tias, “Txawm koj muab pov haum los yog nyiaj txiag pub rau kuv los, yeej tsis zoo npaum li qhov uas paub ntxiv txog kuv tus Tswv Yexus Khetos.”¹⁸

Zaum no tsis yog tib lub sij hawm uas peb tus yaj saub tau qhia txog Phau Ntawv Maumoos. Nws tau muab Phau Ntawv Maumoos rau neeg coob heev, thiab nws yeej ua txim khawv txog Yexus Khetos txhua lub sij hawm. Thaum Thawj Tswj Hwm Nelson ntsib cov qhua, cov vaj ntxwv, cov nom tswv, cov thawj coj lag luam thiab koom haum thiab lwm lub koom txoos, tsis hais nyob hauv lub Koom Txoos lub hauv paus los yog nyob lwm qhov, nws yeej ib txwm muab phau vaj lug kub no rau lawv nrog kev tswm seeb. Nws muab tau ntau yam uas qhwv zoo zoo uas yuav nyob rau ntawm ib lub rooj los yog ib lub txee rau khoom kom nco qab txog thaum nws tuaj xyuas lawv. Tiam sis, nws muab qhov uas nws saib rau nqis tshaj rau lawv, muaj nqis tshaj cov pov haum los yog nyiaj txiag, ib yam li tus vaj ntxwv tau hais.

Thawj Tswj Hwm Nelson hais tias, “Tej qhov tseeb hauv Phau Ntawv Maumoos muaj lub hwj chim kho peb lub neej, nplij peb lub siab, coj peb rov qab los, txhawb nqa peb, ntxiv zog rau peb, ua rau peb zoo siab, thiab ua rau peb nyob kaj siab lug.”²⁰ Kuv tau saib cov uas tuav tej Phau Ntawv Maumoos no thaum lawv txais yuav los ntawm Vajtswv ib tug yaj saub. Yeej tsis muaj khoom plig uas zoo dua.

Thawj Tswj Hwm Nelson nrog tus thawj tswj hwm ntawm The Gambia tus poj niam

Tsis ntev tas los nws tau ntsib lub teb chaws The Gambia tus thawj tswj hwm tus poj niam thiab muab ib Phau Ntawv Maumoos rau nws. Thawj Tswj Hwm Nelson tsis tsum li ntawd xwb. Thawj Tswj Hwm Nelson tau nrog tus thawj tswj hwm tus poj niam nyeem ntawv, qhia thiab ua tim khawv txog Yexus Khetos, Nws txoj Kev Theej Txhoj, thiab Nws txoj kev hlub rau tag nrho Vajtswv cov me nyuam—nyob txhua qhov chaw.

Peb tus yaj saub yeej ua li nws ua tau kom muaj Phau Ntawv Maumoos puv lub ntiaj teb.²⁰ Tiam sis nws tsis txawj ua li no nws ib leeg xwb. Peb yuav tsum coj raws li nws.

Kuv txais kev tshoov siab los ntawm nws tus yam ntxwv, kuv thiaj li txo hwj chim siv zog muab Phau Ntawv Maumoos rau lwm tus ntxiv.

Txwj Laug Rasband nrog Mozambique tus thawj tswj hwm

Tsis ntev tas los kuv ua hauj lwm nyob hauv teb chaws Mozambique. Cov pej xeem hauv lub teb chaws zoo nkauj no pluag heev, tsis noj qab nyob zoo, tsis muaj hauj lwm ntau ua, muaj cua daj cua dub, thiab kev kub ntxhov hauv tseem fwv. Kuv tau ntsib lub teb chaws tus thawj tswj hwm, Filipe Nyusi. Raws li nws xav, kuv tau thov Vajtswv rau nws thiab nws lub teb chaws; kuv tau qhia nws tias peb yuav ua Yexus Khetos ib lub tuam tsev²¹ nyob hauv nws lub teb chaws. Tom qab wb sib tham tas lawm, kuv tau muab ib Phau Ntawv Maumoos uas tau txhais lus Portuguese, nws yam lus. Thaum nws lees txais phau ntawv ntawd, kuv tau ua tim khawv txog kev cia siab thiab tej lus cog tseg rau nws cov neeg uas muaj nyob hauv tus Tswv tej lus hauv phau ntawv ntawd.²²

Txwj Laug Rasband nrog Lesotho tus vaj ntxwv thiab niam vaj ntxwv

Lwm lub sij hawm, kuv tus poj niam, Melanie, thiab kuv wb ntsib Vaj Ntxwv Letsie III ntawm lub teb chaws Lesotho thiab nws tus poj niam nyob hauv nkawd tsev.²³ Wb xav tias lub sij hawm zoo tshaj plaws ntawm wb txoj kev mus xyuas nkawd yog thaum wb muab ib Phau Ntawv Maumoos rau nkawd ces kuv tau hais lus tim khawv. Thaum kuv xav txog lub sij hawm ntawd thiab lwm lub sij hawm, ua rau kuv xav txog ib nqe vaj lug kub uas los ntawm hnub nyoog kawg no: “Xwv kom cov neeg qaug zog thiab cov neeg dog dig yuav plov meej txhij txhua ntawm kuv txoj moo zoo mus kom thoob ntiaj teb, thiab rau ntawm tej vaj ntxwv thiab tej neeg kav teb kav chaw xub ntiag.”²⁴

Txwj Laug Rasband nrog tus Sawv Cev Tsoom Fwv Pandey

Lub Koom Txoos cov thawj coj nrog tus Yawg Suab Dawb Huv Bartholomew

Kuv twb muab Phau Ntawv Maumoos rau tus Sawv Cev Tsoom Fwv, Indra Mani Pandey,²⁵ rau lub Koom Haum Ntiaj Teb United Nations nyob hauv Geneva tus Yawg Suab Dawb Huv Bartholomew²⁶ ntawm lub Koom Txoos Eastern Orthodox thiab neeg coob ntxiv. Kuv tau hnov tus Tswv tus Ntsuj Plig nrog peb nyob thaum kuv tau muab “lub plawv zeb ntawm peb txoj kev teev ntuj”²⁷ thiab ua tim khawv txog Yexus Khetos, tus ncej zeb tag ntawm peb txoj kev ntseeg.²⁸

Nim no, cov kwv tij thiab cov muam, nej tsis tas mus rau Mozambique los yog India los sis ntsib cov vaj ntxwv thiab cov nom tswv kom muab phau ntawv uas muaj tej lus qhia thiab tej lus cog tseg dawb ceev no rau lwm tus. Kuv caw nej, hnub no, kom muab ib Phau Ntawv Maumoos rau nej cov phooj ywg thiab tsev neeg, cov neeg tom hauj lwm, nej tus kws qhia ncaws pob, los yog tus uas tu khoom noj hauv tsev khw muag khoom. Lawv xav tau tus Tswv tej lus uas muaj nyob hauv phau ntawv no. Lawv xav tau tej lus teb txog tej lus nug ntawm lub neej no thiab txoj sia nyob mus ib txhis. Lawv yuav tsum paub txog txoj kev ua raws li kev khi lus thiab tus Tswv txoj kev hlub lawv tsis tu tsis tseg. Tag nrho tej no los twb sau cia nyob rau hauv Phau Ntawv Maumoos.

Thaum nej muab ib Phau Ntawv Maumoos rau lawv, nej qhib lawv lub siab lub ntsws rau Vajtswv txoj lus. Nej tsis tas nqa ib phau ntawv nrog nej. Nej siv tau nej tus xov tooj ntawm tes thiab muab ib nqe faib rau lawv los ntawm cov vaj lug kub hauv qhov app Txoj Moo Zoo cov ntawv.²⁹

Cia li xav txog cov uas yuav tau koob hmoov yog muaj txoj moo zoo hauv lawv lub neej, ces xa ib Phau Ntawv Maumoos rau lawv los ntawm koj lub xov tooj. Nco ntsoov kom sau koj zaj lus tim khawv thiab qhia tias phau no tau pab koj lub neej zoo li cas.

Kuv cov phooj ywg zoo, vim kuv yog tus Tswv ib tug Thwj Tim, kuv caw nej kom coj raws li peb tus yaj saub, Thawj Tswj Hwm Nelson, hais kom peb muab Phau Ntawv Maumoos rau neeg kom puv lub ntiaj teb. Neeg coob xav tau qhov no; peb yuav tsum ua tam sim no. Kuv cog lus rau nej tias nej yuav koom “txoj hauj lwm tseem ceeb tshaj plaws hauv lub ntiaj teb … kev muab Ixayees sau los ua ke”³⁰ thiab nej tau txais kev tshoov siab kom hais lus tshaj tawm rau cov uas “lawv tsis paub mus nrhiav qhov tseeb nyob rau qhov twg.”³¹ Lawv xav tau nej zaj lus tim khawv txog qhov uas phau ntawv no tau hloov nej lub neej li cas thiab pab nej txav los nyob ze Vajtswv, Nws txoj kev kaj siab lug,³² thiab Nws “txoj moo zoo uas yog txoj kev zoo siab kawg nkaus.”³³

Kuv ua tim khawv tias Vajtswv tau npaj Phau Ntawv Maumoos nyob hauv Amelikas puag thaum ub kom tawm los tshaj tawm Vajtswv tej lus, kom cov neeg yuav los cuag tus Tswv Yexus Khetos thiab lees txais Nws txoj moo zoo uas tau muab txum tim rov qab los “hnub no.” Los ntawm Yexus Khetos lub npe, amees.

Lus Cim

1. Saib Yakhauj 2:2–3; Mauxiyas 2:14, 30; 5:7; Amas 7:15; thiab lwm nqe vaj lug kub nyob hauv Phau Ntawv Maumoos.

2. Mauxiyas 2:9.

3. Amas 53:20.

4. Teachings of Presidents of the Church: Joseph Smith (2007), 64. Tus Yaj Saub Joseph Smith tau hais li no tag nrho thaum lub Kaum Ib Hlis Ntuj 28, 1841, thaum nws sib sab laj nrog Kaum Ob tug Thwj Tim: “Kuv tau hais rau cov kwv tij tias Phau Ntawv Maumoos yog phau uas raug tshaj txhua phau ntawv nyob hauv ntiaj teb no, thiab yog lub plawv zeb ntawm peb txoj kev teev ntuj, thiab tus neeg uas ua raws li phau ntawv no tej lus ntsiab cai yuav txav tau los ze rau Vajtswv dua lwm phau ntawv.” Cov lus “raug tshaj” yeej hais txog kev tshwm sim uas tau txais thaum muab txhais lus thiab cov lus qhuab qhia uas tau qhia los ntawm Phau Ntawv Maumoos uas yeej qhia tej yam tseeb ntawm txoj moo zoo uas “meej thiab muaj nqis” zoo dua li lwm phau ntawv (saib 1 Nifais 13:40)

5. Saib “Tus Khetos uas Muaj Txoj Sia Nyob: Cov Thwj Tim tej Lus Tim Khawv,” uas yog ib zaj lus tshaj tawm los ntawm Thawj Pawg Thawj Tswj Hwm thiab Pawg Kaum Ob tug Thwj Tim, nyob rau lub Ib Hlis Ntuj hnub tim 1, xyoo 2000: “Peb ua Nws cov Thwj Tim uas tau raug tsa li kev cai hais lus tim khawv—tias Yexus yog tus Khetos uas muaj txoj sia nyob, Vajtswv Leej Tub uas tsis txawj tuag. Nws yog tus Vaj Ntxwv Emanu-es zoo, uas niaj hnub sawv ntawm Nws Leej Txiv sab tes xis. Nws yog qhov kaj, yog txoj sia, thiab kev cia siab rau lub ntiaj teb. Nws txoj kev yeej yog txoj kev uas coj peb mus rau txoj kev zoo siab hauv lub neej no thiab rau txoj sia nyob mus ib txhis hauv lub ntuj tom ntej no. Peb ua Vajtswv tsaug rau Nws lub txiaj ntsim zoo tshaj plaws uas yog Nws Leej Tub” (ChurchofJesusChrist.org).

6. Saib Yaxayas 49:26; 1 Nifais 21:26; 22:12; Lus Qhuab Qhia thiab Kev Khi Lus 66:1.

7. Vajtswv txoj lus nyob hauv cov vaj lug kub. Piv txwv tias, nyob hauv Phau Ntawv Maumoos, Lamas thiab Lemuyees nug tias “Tus nqaj hlau … txhais li cas?” hais txog Lihais zaj ua npau suav. Nifais teb hais tias, “Tus nqaj hlau yog Vajtswv txoj lus; thiab cov uas mloog Vajtswv txoj lus, thiab tuav txoj lus no tsis tso, lawv yuav tsis piam sij ib zaug li; thiab tej kev haub ntxias thiab tus yeeb ncuab tej xib xub hluav taws yuav kov tsis yeej lawv ua rau lawv dig muag, kom coj lawv mus rau txoj kev puas tsuaj” (1 Nifais 15:23–24).

8. Saib “Kev Muab Yexus Khetos Txoj Moo Zoo uas Muaj Txhij Txhua Txum Tim Rov Qab Los: Ib zaj Lus Tshaj Tawm rau lub Ntiaj Teb Thaum Nco txog Ob Puas Xyoo Tas Los” uas hais li no tias: “Peb tshaj tawm hais tias Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, uas tau txhim tsa thaum lub Plaub Hlis Ntuj hnub tim 6, xyoo 1830, yog Khetos lub Koom Txoos hauv Phau Tshiab uas Nws tau muab txum tim rov qab los. Lub Koom Txoos yeej txheem rau Yexus Khetos lub neej zoo tag nrho, uas yog lub Koom Txoos tus ncej zeb tag, thiab txheem rau Nws txoj Kev Theej Txhoj uas kav ib txhis thiab Nws txoj Kev Sawv Rov Los. Yexus Khetos twb tau rov qab hu cov Tim Thawj thiab tau muab txoj cai pov thawj hwj rau lawv. Nws caw peb txhua tus los cuag Nws thiab Nws lub Koom Txoos, txais tus Vaj Ntsuj Plig Dawb Huv, cov kab ke cawm seej, thiab muaj kev xyiv fab uas kav ib txhis. … Peb zoo siab tshaj tawm tias lub Caij Nyoog Txum Tim Rov Qab Los no tseem muaj mus tom ntej los ntawm kev tshwm sim uas tsis tu tsis tseg. Lub ntiaj teb yeej yuav tsis zoo li qub, vim Vajtswv yuav ‘sau txhua yam los ua ib ke rau Khetos ua tus thawj’ (Efexus 1:10)” (ChurchofJesusChrist.org).

9. 2 Nifais 4:16.

10. Saib Quentin L. Cook, “Be Not Weary in Well-Doing” (Brigham Young University kev sib ntsib hawm Vajtswv, Yim Hli Ntuj 24, 2020), speeches.byu.edu; Eliza Smith-Driggs, “This Week on Social: How to Develop a Love for the Lord, Yourself and Others,” Church News, Xya Hli Ntuj 17, 2020, thechurchnews.com.

11. Nyeem zaum peb, xim daj: lub ntiaj teb keeb kwm los yog tej qhov chaw; nyeem zaum plaub: dab neeg hauv Phau Ntawv Maumoos.

12. Tau sau cov lus “Ib zaj Lus Tim Khawv Ntxiv txog Yexus Khetos” ntxiv rau txhua Phau Ntawv Maumoos. Cov thawj coj hauv lub Koom Txoos tau ua li no kom tib neeg paub lub hom phiaj ntawm phau ntawv no raws li hais nyob hauv phau ntawv qhia npe: “Thiab yog qhov uas yaum cov Neeg Yudais thiab Lwm Haiv Neeg hais tias Yexus yog tus Khetos, tus Vajtswv uas Nyob Mus Ib Txhis, uas tshwm sim nws tus kheej los rau txhua haiv neeg.”

13. Kev ua ib tug thwj tim yog ib txoj kev qhia tias peb hlub Nws. Cov thwj tim ua kev cai raus dej; lawv ris Yexus Khetos lub npe; lawv siv zog coj raws li Nws thaum lawv muab siab npuab Nws tej cwj pwm raws li tus Thwj Tim Petus hais: “Twb yog vim li ntawd nej cov uas ntseeg Vajtswv, nej yuav tsum muab siab rau ua tej hauj lwm zoo; nej ua hauj lwm zoo lawm, nej yuav tsum muaj tswv yim; nej muaj tswv yim lawm, nej yuav tsum tswj nej lub siab; nej tswj nej lub siab lawm, nej yuav tsum ua siab ntev; nej ua siab ntev lawm, nej yuav tsum ua nej lub neej kom haum Vajtswv siab; nej ua haum Vajtswv siab lawm, nej yuav tsum sib hlub li kwv tij sib hlub; nej sib hlub li kwv tij sib hlub lawm, nej yuav tsum sib hlub li cov ntseeg sib hlub” (2 Petus 1:5–7; kuj saib Qhia Kuv txoj Moo Zoo: Phau Ntawv Qhia cov Tub Txib [2019], 121–32).

14. Thawj Tswj Hwm Russell M. Nelson, uas neeg paub thoob plaws lub ntiaj teb vim nws yog ib tug kws phais plawv ua ntej tau hu nws lso rau Pawg Kaum Ob tug Thwj Tim nyob rau xyoo 1984, tau hais ib zaj lus hauv lub tsev kawm kho mob hauv Accra, Ghana, nyob rau xyoo 1986 txog keeb kwm ntawm kev phais plawv. Tom qab ntawd thaum cov kws sau xov xwm xam phaj nws, nws piav tias nws nyob “ua tus Tswv ib tug tub qhe kom pab [cov neeg] los ua cov pej xeem zoo dua, kom txhawb nqa tsev neeg kom muaj zog, kom muaj kev zoo siab tiag, thiab vam meej hauv thaj av.” Nws tau rov qab mus rau Accra, Ghana, thaum lub Kaum Ib Hlis Ntuj 16, 2001, thaum ua kab ke dig av rau lub Tuam Tsev Accra Ghana (saib “Ground Broken for First Temple in West Africa,” Church News, Kaum Ib Hlis Ntuj 24, 2001, thechurchnews.com).

15. Saib General Handbook: Serving in The Church of Jesus Christ of Latter-day Saints, 5.1.1.1: “Niaj hnub no, tus Tswv hu cov txiv neej dhau los ntawm lub Koom Txoos tus Thawj Tswj Hwm los ua cov Thwj Tim thiab ua hauj lwm hauv Pawg Kaum Ob tug Thwj Tim (saib Lus Qhuab Qhia thiab Kev Khi Lus 18:26–28)” (ChurchofJesusChrist.org).

16. Saib Russell M. Nelson, “Phau Ntawv Maumoos: Nej lub Neej Yuav Zoo Li Cas Yog Tias Tsis Muaj?,” Liahona, Kaum Ib Hlis Ntuj 2017, 60.

17. 3 Nifais 11:10–11.

18. Saib Russell M. Nelson, “Phau Ntawv Maumoos: Nej lub Neej Yuav Zoo Li Cas Yog Tias Tsis Muaj?,” 61.

19. Russell M. Nelson, “Phau Ntawv Maumoos: Nej lub Neej Yuav Zoo Li Cas Yog Tias Tsis Muaj?” 62.

20. Saib Mauxes 7:62.

21. Thawj Tswj Hwm Russell M. Nelson tau tshaj tawm txog lub Tuam Tsev Beira Mozambique thaum lub Plaub Hlis Ntuj 4, 2021. Muaj ib nrab lab neeg nyob hauv Beira, uas nyob ntawm ntug Dej Hiav Txwv Indian.

22. Piv txwv txog kev cia siab thiab tej lus cog tseg nyob hauv Phau Ntawv Maumoos muaj xws li 2 Nifais 31:20; Yakhauj 4:4–6; Amas 13:28–29; 22:16; 34:41; Ethaws 12:32; Maulaunais 7:41; 8:26.

23. Txwj Laug thiab Muam Rasband tau ntsib vaj ntxwv tsev neeg thaum lub Ob Hlis Ntuj 10, 2020, thaum txib nkawg mus rau Afikas muab lub Tuam Tsev Durban South Africa fij tseg.

24. Lus Qhuab Qhia thiab Kev Khi Lus 1:23.

25. Txwj Laug Rasband ntsib tus Sawv Cev Tsoom Fwv Indra Mani Pandey, tus Sawv Cev Tas Li ntawm India rau lub Koom Haum Ntiaj Teb thiab Lwm lub Koom Haum Teb Chaws (Permanent Representative of India to the United Nations and Other International Organizations) nyob hauv Geneva, thaum txib nws mus koom Interfaith Forum nyob hauv Bologna, Italy, thaum lub Cuaj Hlis Ntuj 17, 2021.

26. Txwj Laug Rasband tau ntsib His All Holiness Ecumenical Patriarch Bartholomew ntawm lub Koom Txoos Eastern Orthodox thaum txib nws mus rau Interfaith Forum nyob hauv Bologna, Italy, thaum lub Cuaj Hlis Ntuj 13, 2021.

27. Teachings: Joseph Smith, 64. Ib lub plawv zeb yog ib lub pob zeb zoo li tus tsuas nyob saum cov peb zeb uas nqeg, ua rau txhua lub pob zeb khov thaum nyob ua ke. Tus Yaj Saub Joseph piav tias Phau Ntawv Maumoos yog “lub plawv zeb ntawm peb txoj kev teev ntuj” vim tias yog ib qho tseem ceeb kom pab cov mej zeej ntawm lub Koom Txoos koom siab ua cov ntsiab cai thiab cov kab ke. Phau Ntawv Maumoos yog “lub plawv zeb” rau peb cov mej zeej lub neej, vim phau no pab lawv ua raws nraim li lawv tej kev khi lus.

28. Saib Efexus 2:19–20. Yexus Khetos yog tus ncej zeb tag ntawm peb lub Koom Txoos, uas ris Nws lub npe. Tib yam li peb txoj kev pua lub ncej zeb tag ntawm lub tuam tsev yog ib lub cim txog ib lub pob zeb uas nyob ntawm ceg kaum ntawm Vajtswv lub tsev, Yexus Khetos yog tus ncej zeb tag ntawm peb txoj kev ntseeg thiab txoj kev cawm seej. Nws tau txo Nws txoj sia kom peb muaj sia nyob; tsis muaj leej twg uas muaj zog, muaj hwj chim, los yog muaj kev hlub npaum li Nws.

29. Nej faib tau los ntawm nej tus xov tooj ntawm tes. Ib txoj kev yog kev qhib qhov app Gospel Library, mus rau pawg ntawv “Cov Vaj Lug Kub”, ces nias “Faib Tam Sim No” nyob sab saud. Los yog nyob hauv qhov app Phau Ntawv Maumoos, nej nias tau lub cim rau “Faib” uas muab ib qho digital code uas ib tug phooj ywg thaij tau thaum siv nws tus xov tooj.

30. Russell M. Nelson, “Hope of Israel” (kev tshaj tawm rau cov neeg hluas thoob ntiaj teb, Rau Hli Ntuj 3, 2018), HopeofIsrael.ChurchofJesusChrist.org. “Thaum lub Rau Hli Ntuj 3, 2018, Thawj Tswj Hwm Russell M. Nelson thiab nws tus poj niam, Wendy W. Nelson, tau caw cov tub hluas ntxhais hluas kom ‘kom tso npe rau hauv tus Tswv pawg tub rog hluas’ thiab koom ua ke ua ‘qhov tseem ceeb tshaj plaws, lub hom phiaj tseem ceeb tshaj plaws, txoj hauj lwm tseem ceeb tshaj plaws hauv lub ntiaj teb no hnub no.’ Thiab qhov tseem ceeb tshaj plaws no yog dab tsi? Kev muab Ixayees sau los ua ke” (Charlotte Larcabal, “A Call to Enlist and Gather Israel,” New Era, Peb Hlis Ntuj 2019, 24).

31. Lus Qhuab Qhia thiab Kev Khi Lus 123:12.

32. Saib 2 Nifais 4:27; Mauxiyas 4:3; 15:18; Amas 46:12.

33. 1 Nifais 13:37.