Muaj Dab Tsi Thiaj Tseeb?
Vajtswv yog lub hauv paus ntawm qhov tseeb tag nrho. Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg txais yuav txhua qhov tseeb uas Vajtswv qhia rau Nws cov me nyuam.
Kuv cov kwv tij thiab cov muam, kuv ua sawv daws tsaug rau tuas rooj sab laj no! Txij thaum lub tuam rooj sab laj lub Plaub Hlis Ntuj tas los no, peb ua tim khawv pom ntau yam hauv lub ntiaj teb, tej qhov ntxim tu siab heev tej qhov zoo kawg.
Peb zoo siab uas peb cov tub hluas ntxhais hluas coob sib sau ua ke thoob ntiaj teb no hauv tej rooj sab laj.1 Nyob ntawm tej rooj sab laj rau cov hluas no, peb cov tub hluas ntxhais hluas kawm tias lawv lub dag zog loj tshaj plaws los ntawm tus Tswv los.2
Peb zoo siab uas peb ua tau ntau lub tuam tsev thoob plaws lub ntiaj teb. Thaum peb fij ib lub tuam tsev tseg rau Vajtswv zuj zus mus, Vajtswv lub hwj chim los rau hauv lub ntiaj teb es ntxiv dag zog rau peb thiab tawm tsam tus yeeb ncuab tej hauj lwm.
Kev tsim txom muaj vim yog tus yeeb ncuab txoj kev kav tib neeg lub siab. Kev tsim txom yog ib txoj kev txhaum loj heev.3 Ua tus Thawj Tswj Hwm ntawm lub Koom Txoos, kuv pom zoo rau tus Tswv Yexus Khetos cov lus qhia txog qhov kev txhaum no. Cia kuv hais meej meej li: txoj kev tsim txom poj niam, me nyuam, los sis leej twg hlo li yog ib txoj kev qias rau tus Tswv. Tus Tswv tu siab thiab kuv los tu siab thaum twg muaj leej twg raug tsim txom. Nws quaj, thiab peb puav leej quaj, rau txhua tus neeg uas raug tsim txom li cas. Lawv cov uas ua tej kev qias no uas tsim txom tib neeg yeej tsim nyog raug txim raws li tib neeg tej kev cai tiam sis kuj yuav ntsib Vajtswv uas Muaj Hwj Chim Tag Nrho txoj kev npau taws thiab.
Rau ntau xyoo los lawm, lub Koom Txoos tau ua ntau yam kom pov hwm me nyuam yaus thiab lwm cov neeg los ntawm kev tsim txom. Yeej muaj ntau txoj kev pab nyob saum lub Koom Txoos qhov website. Kuv caw nej kawm tej kev pab ntawd.4 Tej tshooj lus teev cia muaj kom thiaj pov hwm cov uas tsis paub kev txhaum. Kuv yaum kom peb sawv daws xam ncig lees thiab pab tus neeg twg uas raug tsim txom thiab pov hwm tus ntawd. Tus Cawm Seej nyiaj tsis tau kev tsim txom tib neeg, thiab ua Nws cov thwj tim, peb nyiaj tsis taus thiab.
Tus yeeb ncuab yeej muaj lwm yam nws ua thiab. Ib qho yog nws sim ua rau yus tsis paub tseeb saib dab tsi thiaj muaj tseeb thiab dab tsi tsis muaj tseeb. Tej ntaub ntawv xov xwm uas peb muaj niaj hnub nim no hauv koospistawj ua rau peb txiav txim siab yam nyuaj nyuaj li saib dab tsi thiaj muaj tseeb.
Qhov kev cov nyom no ua rau kuv nco qab txog ib yam uas muaj los rau Muam Nelson wb thaum wb mus ntsib ib tug nom tswv hauv ib lub teb chaws uas tsuas muaj neeg tsawg tsawg xwb thiaj hnov txog Yexus Khetos. Tus phooj ywg ntawd tau muaj mob tsis ntev ua ntej wb ntsib nws ntawd. Nws qhia wb tias thaum nws pw hauv nws lub txaj, feem ntau nws ntsia saud thiab nug hais tias, “Muaj dab tsi thiaj tseeb?”
Neeg coob heev hauv lub ntiaj teb no “tsis paub qhov tseeb tsuas yog vim lawv tsis paub mus nrhiav qhov tseeb nyob rau qhov twg.”5 Tej tug neeg xav kom peb ntseeg tias nyias muaj nyias qhov tseeb—hais tias txhua tus neeg yuav txiav txim siab rau nws tus kheej saib dab tsi muaj tseeb los tsis muaj. Txoj kev ntseeg li ntawd yog lam tau lam xav kom tau rau lawv cov uas yuam kev xav tias lawv yuav tsis lav ris rau Vajtswv txog tej yam lawv ua.
Kuv cov kwv tij thiab cov muam, Vajtswv yog lub hauv paus ntawm tag nrho txhua qhov muaj tseeb. Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg txais yuav txhua qhov tseeb uas Vajtswv qhia rau Nws cov me nyuam, txawm yog kawm hauv ib qho chaw kawm txuj ci los sis txais kev tshwm sim ncaj qha los ntawm Vajtswv los.
Los ntawm lub sam thiaj no hnub no thiab tag kis nej yuav hnov qhov tseeb txuas ntxiv mus. Thov kom nej sau tseg tej yam uas tseem ceeb rau nej thiab nkag nej lub paj hlwb thiab lub siab ntsws. Thov Vajtswv qhia nej saib tej yam uas nej hnov puas muaj tseeb.
Kuv hlub nej, cov kwv tij thiab cov muam. Kuv thov kom lub tuam rooj sab laj no yuav pab ntxiv dag zog rau nej sab ntsuj plig. Los ntawm Yexus Khetos lub npe dawb ceev, amees.