Tapweno Mwirin Jises Kraist fiti Ipwen Nuku
Kraist a tongeni mwarekich ikenai non fansoun weires. A fori ei fan iten ekkewe pioneer me mwan, me I a fori iei fan iten emon me emon kich.
Kinisou ngeni kemi, ekkewe chon kon, ren ami konu “Nuku non Ipw Meinisin.” Ewe kon me kapasen ena kon a mak me non 1996 me ren Brother Neweel Dayley1 ren amonnetan ewe apwapwan ewe 150en ierin achechemen ewe fansoun wareton ekkewe pioneer ngeni ewe Salt Lake Valley non 1847.
Ina mwo ika ei kon a mak fan iten amonetan ewe apwapwan na fansoun, porousen non a auchea ngeni unusen fonufan.
Uwa kan wesen sani ewe kores:
Fiti nuku non ipw meinisin, sia tapweno mwirin Kraist, ewe Samon;
Me uren apinukunuk me ren an tong mi unusoch, sia chufengen ne kon.2
Pwi me fefinei, ngang ua pwarata pwe nupwen sia tapweno mwirin Jises Kraist ren ipwen nuku, mi wor apinukunuk. Mi wor apinukunuk non ewe Samon Jises Kraist. Mi wor apinukunuk fan iten meinisin non ei manau. Mi wor apinukunuk ne okufu ach kewe mwaan, ach netipengaw, ach riaffou, me ach kewe weires me osukosuk. Mi wor apinukunuk non aier me musono me non ach omusano ekkoch. Uwa pwarata pwe mi wor apinukunuk me kinamwe non Kraist. A tongeni mwarekich ikenai non fansoun weires. A fori ei fan iten ekkewe pioneer me mwan, me I a fori iei fan iten emon me emon kich.
Ei ier a esisinata ewe 175en ierin achechemen wareton ekkewe pioneer akkom ngeni ewe Salt Lake Valley, ewe minne a fori ai upwe ekiek sefani usun ai kewe newo, ekkoch me neir ir mi fetan seni Nauvoo ngeni ewe Salt Lake Valley. Semen me inen semenapen me inenapen semei me inei kewe ra fetan won ekkewe sosonochun fonu mi aro fetin atun ir mi chok sarafo. Henry Ballard a chok 20 ierin;3 Margaret McNeill a 13 ieirin;4 me Joseph F. Smith, ewe a winiti ewe awonomonun Presetenin ewe Mwichefen, a chok 9 ierin nupwen a wareiti non ewe Salt Lake Valley.5
Ra kuna sokopaten riaffou won ewe aan, usun patapat non ekkewe maramen patapat, semwen, me osupwangen uf me mwongo mi nafangaw. Ren awewei, nupwen Henry Ballard a wareto non ewe Salt Lake Valley, a kan pwapwaiti pwe a kuna ewe “Fonu mi Pwon” nge a nuokus pwe emon epwe kuna i pun ufan kewe a ufeni a fokkun kamwakamwekis me ese tukutukuno inisin non. A opono nein ekkewe ira unusen ewe ran tori a rochono. Mwirin a feinno ngeni eu imw me tingor ren ufan pwe epwe tongeni sopweno ne sai ne kutta seman me inan. A kinsiou ngeni Kot pwe a wareto ngeni imwan we nge ese feiengaw.6
Semenapen me inenapen semei me inei kewe ra tapweno mwirin Jises Kraist ren ipwen nuku me non eu me eu ar kewe weires. Uwa kinisou ngenir pwe rese tongeni fangeta. Ar kewe ipwen nuku a kan efeiochuei me mwirimwir kewe, usun chok ami kewe ipwen nuku ikenai epwe efeiochu mwirimwirimi kewe.
Ewe kapas pioneer a tongeni epwe wewen eu mettoch me pwan foffor. Ika eu mettoch a tongeni wewe ngeni emon aramas ewe a nom nein ekkewe akkaewin aramas ra kuna ika nomono non eu minafon neni non ewe fonu. Ika wewen foffor, a tongeni wewe ngeni suki ika amonata ewe aan fan iten ekkoch repwe tapweno mwirin.7
Nupwen uwa ekieki usun pioneer kewe mi amonnata ewe aan fan iten ekkoch, akkom ua ekieki usun ewe Soufos Joseph Smith. Joseph a emon pioneer pun an kewe ipwen nuku a emweni i ngeni nein ekkewe ira, ikewe a fotupukutiw non iotek me a suki ewe aan fan itach pwe sipwe tongeni angei unusen ewe kapas allimen Jises Kraist. An Joseph nuku ne “tingor ngeni Kot”8 non ena sosoren ewe ier 1820 a suki ewe aan fan iten ewe niwinsefaniton unusen ewe kapas allimen Jises Kraist, ewe a pachenong soufos me aposel mi koko ar repwe angang sefan won fonufan.9 Uwa sinei pwe Joseph Smith i emon soufosun Kot. Uwa sinei an kewe eipweip mi uren nuku a emweni i ne fotupukutiw me mwen Kot ewe Sam me Noun we At mi Achengicheng, Jises Kraist.
An ewe Soufos Joseph ipwen nuku a atufichi an epwe eu pisekin angangen ewe Samon ne wato ewe Puken Mormon, minne a pwan eu kapasen pwarata usun Jises me An achasefan mi chen.
Ren an Joseph Smith nuku me nikitu non fansoun watten riaffou me ungeni, a tongeni an epwe eu pisekin angang non poun ewe Samon ne forsefanieta ewe Mwichefenin Jises Kraist won ewe fonufan.
Non ewe mwichenap a karen no, uwa kapas won ifa usun ai kewe angangen misineri ra efeiochuei. Uwa feioch nupwen uwa osukuna ussun amwararen an Semach won Nang kokkotun manau ese much, an Joseph Smith Aewin Nemasepwi, me an angangen chiakuni ewe Puken Mormon. Ekkei osukun me nongonong mi niwinsefan ir mi emweni ai kewe ipwen nuku ne osukuna ekkana ra mochen ausening ngeni porausen ewe Niwinsefaniton ewe kapas allim.
Nouch kewe misineri ikenai ir ekkewe pioneer non ekkei ran pun ra aporausa ei poraus amwarar ngeni aramas non unusen fonufan, iwe iei a suki ewe aan ngeni noun Semach won Nang kewe semerit repwe sinei I me Noun we, Jises Kraist. Etiwa ewe kapas allimen Jises Kraist a suki ewe aan ngeni meinisin ar repwe amonneta ne angei pwon mi pwin me feiochun ewe Mwichefen me ewe tempel.
Ewe mwichenap a keran no, Preseten Russell M. Nelson a afata sefani “pwe ewe Samon a tingor ngeni anuon meinisin mi nimenimoch, mi tufich ar repwe amoneta ngeni me fori eu angangen misin” me ena “eu misin pwan eu fokun pochokunen, nge a nemenian, tufich” ren “ekkewe fopun mi tongeni.”10
Anuon me fopun mi achengicheng, ami kewe ipwen nuku epwe anisikemi ne tapweno mwirin an ewe Samon tingor ne fori eu misin—pwe oupwe chon pioneer non ei fansoun—me ren ami suki ewe aan ngeni Noun Kot kewe semerit pwe repwe kuna me nom won ewe aanen pwon mi pin minne a emweni sefan ngeni An nonnom mi amwarar.
Preseten Nelson a pwan emon pioneer non ewe Mwichefen. Ren emon Aposel a feino ngeni me suki chommong fonu fan iten afanafanen ewe kapas allim. Mwirin chok ekis fansoun an a winiti ewe soufos me Presetenin ewe Mwichefen, a titingorei kich pwe sipwe “anapano [ach] tufich non pekin ngun ach sipwe angei pwarata.”11 A sopweno ne aitikich ifa usun sipwe apochokuna ach kewe kapasen pwarata. Non eu mwich faniten sarafo, a apasa:
“Uwa tingorekemi pwe oupwe wisen tumunu ami kewe kapasen pwarata. Angang ngeni. Nemeni. Tumunu. Amari pwe epwe mar. …
“[Iwe] mwirin mamasa ren manaman epwe fis non manauemi.”12
A aitikich ifa usun sipwe anapano ach pwisin tufich won pekin ngun. A pwan apasa, “non ekkewe ran epwe feito, esap tufich ach sipwe manau non pekin ngun nge ese wor ewe emwen, nemenem, ourur, me amemefin ewe Ngun mi Fel fansoun meinisin.”13
Ua pwarata pwe Preseten Russell M. Nelson I ewe soufosun Kot won fonufan ikenai.
Ach Chon Amanau, Jises Kraist, i ewe akkaewin pioneer non amonetan ewe aan. Ren ennetin, I a “ewe aan”14 ren ewe kokkotun manau ese much epwe pwonueta pwe kich sipwe tongeni aier me, seni nuku non I, niwin ngeni Semach won Nang.
Jises a apasa, “Ngang ewe aan, ewe ennet, o ewe manau: ese wor emon epwe feino ren ewe Sam, ika esap punun ngang.”15 A pwon pwe esap nikitano kich non ach riaffou; I epwe feito rech non ach kewe riaffou.16 A pwan etiwa kich pwe sipwe “feito ngeni [I] ren ennetin popun netip, me [I] epwe echikarata [kich].”17
Uwa pwarata pwe Jises Kraist i ach Chon Amanau me ach Chon Angasano, nouch Chon Peni me ren ewe Sam. Semach won Nang a suki ewe aan fan iten ach sipwe niwin ngeni I ren ach tapweno mwirin Noun we mi Achengicheng, Jises Kraist, fiti nuku non ipw meinisin.
Semen me inen semenapen me inenapen semei me inei kewe me pwan ekkoch ekkewe pioneer akkom ra kuna weires ren ar sai won waken, handcart, me fetan ngeni ewe Salt Lake Valley. Kich sipwe pwan kuna weires non an emon me emon pwisin sai non manauach. Sisap pusei handcart ika untengi ekkewe woken mi opwonuno won ekkewe chukuchukuta me watten snow; iwe sia achocho usun ir mi fori ne pworacho won pekin ngun ekkewe sossot me weiresin ach ran ikenai. A wor ach kewe aan sipwe fetan won; a wor paneta—me fan ekkoch chuk—sipwe tokata. Ina mwo ika ekkewe sossot ikenai a sokkono seni ekkewe sossot an ekkewe pioneer me mwan, ese kukkun aweiresir ngeni kich .
Mi auchea sipwe tapweno mwirin ewe soufos me apochokuna ne fotukatiw pechech kewe won ewe aanen pwon ren nukuchar, usun nge fan iten ekkewe pioneer me mwan.
Sipwe tapweno mwirin Jises Kraist ren nuku non ipw meinisin. Mi namwot sipwe angang ngeni ewe Samon me ngeni emon me emon kich. Mi namwot sipwe apochokuna kich pwisin won pekin ngun me ren ach apwonueta me asufonu ach kewe pwon mi pin. Sisap nikitano ewe memmefin auchean ach sipwe apwonueta ekkewe annuk. Setan a sotuni ne ekkisetiw ach pochokunen mochen me tong fan iten Kot me ewe Samon Jises Kraist. Ouse kan mochen oupwe chechemeni ika emon epwe morukono seni ewe aan, Sisap tongeni sipwe poutuno seni ewe Chon Amanau. Ren ewe feiochun aier, sia tongeni kun ngeni Ii. I epwe anisikich ne kaeo, mwar, me siwin nupwen ach achocho ne nom won ewe anen pwon mi pin.
Amo sipwe tapweno mwirin ipwen Jises Kraist me, fiti nuku non ipw meinisin, anonga ach ekiek won I, apochokuna ne fotukatiw pechech kewe won ewe aanen pwon mi pin, iei ai tipetekisonun iotek non iten Jises Kraist, amen.