I Le Faipaaga Ai ma le Alii
Ua folafola mai e le talalelei toefuataiina a Iesu Keriso le mataupu faavae o le faipaaga atoa i le va o se tamaitai ma se alii, i le olaga nei ma i le faavavau.
I totonu o ni nai masina talu ona ma faaipoipo, sa ta’u mai e si o’u toalua pele lona manao e a’oga faamusika. I le faamoemoe e faafiafia o ia, sa tonu ai ia te a’u e fuafua se faaofo telē mai le loto mo si a’u manamea. Sa ou alu i se faleoloa e faatau ai mea faimusika ma faatau mai sana piano e fai ma meaalofa. Sa ou tuuina ma le fiafia tele le lisiti na faatau mai ai i totonu o se atigipusa ma se lipine matagofie ma tuu atu ia te ia, ma le faamoemoe e vaaia se malena a’e o sana tali fiafia o le lotofaafetai mo lona toalua ua matuai gauai atu ma le alofa.
Ina ua ia tatalaina lena tamai pusa ma vaaia mea sa i ai, sa ia tilotilo mai ia te a’u ma le alofa ma faapea mai, “Oi, la’u pelē, ese lou lelei! Ae se’i ou fesili atu: o se meaalofa lenei po o se aitalafu?” I le mae’a ai ona ma fefautuaa’i faatasi e uiga i le mea na faaofo ai, sa tonu ia i ma’ua e faaleaoga le faatauga. Sa ma ola i se paketi faatamaiti a’oga, e pei o le tulaga o i ai le toatele o le autalavou faatoa faaipoipo. Na fesoasoani lea aafiaga ia te a’u e iloa ai le taua o le mataupu faavae o le faipaaga atoa i se sootaga faalefaaipoipoga ma le ala e mafai ai i lona faaaogaaga ona fesoasoani i lo’u toalua ma a’u ia tasi le loto ma tasi le mafaufau.1
Ua folafola mai e le talalelei toefuataiina a Iesu Keriso le mataupu faavae o le faipaaga atoa i le va o se tamaitai ma se alii, i le olaga nei ma i le faavavau. E ui e tofu i ai ni uiga faaalia patino ma tiutetauave ua tofia mai le lagi, ae e faatumuina tutusa e le tamaitai ma le alii ia matafaioi taua ma le tatau ai i le fuafuaga a le Atua o le fiafia mo Ana fanau.2 Na iloatino lenei mea mai lava i le amataga ina ua fetalai atu le Alii “e lē lelei ona nofo toatasi o le tagata; o le mea lea, [o le a Ia] faia ai se fesoasoani e tatau ai mo ia.”3
I le fuafuaga a le Alii o se “fesoasoani” o se soa lea e savavali soosootau’au ma Atamu i se faigapaaga atoa.4 O le mea moni, o Eva o se faamanuiaga faalelagi i le olaga o Atamu. E ala mai i lona natura paia ma uiga faaleagaga, sa ia musuia Atamu e galulue faapaaga ma ia e faataunuu le fuafuaga a le Atua mo le fiafia o tagata uma.5
Se’i o tatou mafaufau i mataupu faavae e lua e faamalolosia ai le faigapaaga i le va o le alii ma le tamaitai. O le mataupu faavae muamua o le ua tutusa i tatou uma i le Atua.6 E tusa ai ma le aoaoga faavae autu, o le eseesega i le va o le tamaitai ma le alii e le solipalaina ai folafolaga faavavau a le Atua mo Ona atalii ma afafine. E le sili a’e ni avanoa o se tasi mo le mamalu selesitila nai lo le isi i le faavavau.7 Ua valaaulia e le Faaola lava Ia i tatou uma, o fanau a le Atua, “e o mai ia te Ia, e tofo i Lona agalelei, ua le faafitia foi e Ia se tasi e sau ia te Ia.”8 O le mea lea, i lea matalalaga, ua manatulia ai i tatou uma e tutusa i Ona luma.
Pe a malamalama ta’itoalua ma faaaoga lenei mataupu faavae, latou te le tuuina i latou lava o se peresitene po o se sui peresitene o o latou aiga. E leai se tulaga maualuga pe faatauvaa i le sootaga faalefaaipoipoga, ma e leai foi se savali i luma po o tua o le isi. La te savavali faatasi, o ni fanau e tutusa, ma paia a le Atua. E avea i la’ua ua tasi i mafaufauga, naunauga, ma le faamoemoe faatasi ma lo tatou Tama Faalelagi ma Iesu Keriso,9 e taitai ma taialaina faatasi ai le iunite faaleaiga.
I se faigapaaga tutusa, “o le alofa e le o se meatotino ae o se auai faatasi, … o se itutino o lena foafoaga-faifaatasi o lo tatou valaauga lea faaletagata soifua.”10 “Faatasi ai ma le auai faatasi, e soofaatasi ai le tane ma le ava i se lotogatasi e sili ona lelei o se ‘puleaga e faavavau’ lea e ‘aunoa ma ni auala faamalosia’ o le a tafe mai ma le ola faaleagaga ia i latou ma a latou fanau ‘e faavavau ma faavavau lava.’”11
O le mataupu faavae taua lona lua o le Tulafono Auro lea, na aoao mai e le Faaola i le Lauga i luga o le Mauga: “Pei ona outou loto i tagata ia latou faia ia te outou, ia faapea lava ona outou faia ia te i latou.”12 Ua ta’u mai i lenei mataupu faavae se uiga o le lotomalamalama, feosia’i, lotogatasi, ma le fegalegalea’i ma e faavae i luga o le poloaiga sili lona lua: “Ia e alofa atu i le lua te tuaoi ia pei o oe lava ia te oe.”13 E soofaatasi ma isi uiga FaaKerisiano e pei o le tali-tiga, agavaivai, agamalu, ma le agalelei.
Ina ia malamalama atili i le faaaogaaga o lenei mataupu faavae, e mafai ona tatou tilotilo i le noataga paia ma le faavavau na faavaeina e le Atua i le va o o tatou uluai matua, o Atamu ma Eva. Na avea i la’ua ma tino e tasi,14 na foafoaina ai se elemene o le lotogatasi lea na mafai ai ona la savavali faatasi ma le faaaloalo, lotofaafetai, ma le alofa, ma faagalo ai i la’ua lava ae sailia le soifua manuia o le tasi ma le isi i la la’ua malaga i le faavavau.
O na lava foi uiga o mea ia tatou te taumafai malosi i ai i se faaipoipoga soofaatasi i ona po nei. A faamauina se alii ma se tamaitai i le malumalu, e ulufale atu i laua i le faatulagaga paia o le faaipoipoga i le feagaiga fou ma faavavau. O le faatulagaga lea o le perisitua, ua tuuina atu ai ia te i la’ua ia faamanuiaga e faavavau ma le mana paia e taitai ai mataupu a lo latou aiga a o latou ola e tusa ai ma feagaiga na la osia. Mai i lena taimi, la te agai atu ai i luma ma le fegalegalea’i ma i le faigapaaga atoa ma le Alii, aemaise e tusa ai ma o la tiutetauave taitasi na atofa mai le lagi mo le faafaileleina ma pulefaamalumalu ai i lo la’ua aiga.15 O le faafaileleina ma le pulefaamalumalu o ni tiutetauave e feāiāa’i ma fesilia’i, o lona uiga o tina ma tama “ua i ai le matafaioi e fesoasoani le tasi i le isi o se paaga tutusa”16 ma fefaasoaa’i se taitaiga paleni i lo la’ua aiga.
“O le faafailele o lona uiga ia fafaga, aoao, ma lagolago” tagata o le aiga, lea e faia e ala i le fesoasoani ia i latou e “aoao upumoni o le talalelei ma atia’e le faatuatua i le Tama Faalelagi ma Iesu Keriso” i se siosiomaga o le alofa. Ina ia pulefaamalumalu o lona uiga ia “fesoasoani e taitai tagata o le aiga ia toe foi atu e mau i le afioaga o le Atua. E faia lenei mea e ala i le auauna atu ma aoao atu i le agamaualalo, agamalu, ma le alofa mama.” E aofia ai le “taitaiina o tagata o le aiga i tatalo e le aunoa, suesue le talalelei, ma isi itu o le tapuaiga. E galulue matua i le lotogatasi, “e mulimuli i le faataitaiga a Iesu Keriso, “e faataunuu ai nei tiutetauave [sili e lua].”17
E taua le matau o loo mulimulita’i le puleaina o le aiga i le mamanu faapeteriaka, e ese i nisi itu o le taitaiga faaleperisitua i le Ekalesia.18 O le mamanu faapeteriaka e aofia ai le tali sa’o atu o ava ma tane i le Atua mo le faataunuuina o o latou tiutetauave paia i le aiga. E manaomia ai se faigapaaga atoa—se usiusitai atoa i mataupu faavae uma o le amiotonu ma le tali atu—ma maua ai avanoa mo le atina’ega i totonu o se siosiomaga o le alofa ma le fesoasoani fefaasoaa’i.19 O nei tiutetauave faapitoa e le o ta’u mai ai se faasausili, ma e matua’i le aofia ai lava soo se ituaiga o sauaga po o le faaaogaina le tatau o le pule.
O le aafiaga o Atamu ma Eva, ina ua la tuua le Faatoaga o Etena, o loo matagofie le faapupula mai ai o le manatu faavae o le fegalegalea’i i le va o se tina ma se tama i le faafaileleina ma le pulefaamalumalu ai i lo la’ua aiga. E pei ona aoao mai i le tusi a Mose, sa la galulue faatasi e galueaiina le eleele i le afu o o la’ua muaulu ina ia mafai ai ona maua mea mo le soifua manuia faaletino o lo la’ua aiga;20 sa la aumaia fanau i le lalolagi;21 sa la valaau atu i le suafa o le Alii faatasi ma sa faalogoina Lona siufofoga “mai le ala agai i le Faatoaga o Etena”;22 sa la talia poloaiga na tuu atu e le Alii ia te i la’ua ma sa la taumafai faatasi e usita’ia.23 Ona la “faailoa atu lea o [nei] mea i o la’ua atalii ma afafine”24 ma “sa le tuua le valaau atu i le Atua” faatasi e tusa ai ma o la’ua manaoga.25
O’u uso e ma tuafafine pele, o le faafailele ma le pulefaamalumalu o ni avanoa, e le o ni faatapulaaga faapitoa. Atonu o le tasi tagata e i ai se tiutetauave mo se mea ae atonu e le na o le pau lea o le tagata e faia. A oo ina malamalama lelei matua alolofa i nei tiutetauave taua e lua, o le a la taumafai malosi faatasi e puipui ma tausia mo le soifua manuia faaletino ma faalelagona o a latou fanau. Latou te fesoasoani foi ia i latou e faafetaia’ia mea matautia faaleagaga o o tatou taimi e ala i le faafaileleina o i latou i le afioga lelei a le Alii e pei ona faaalia mai i Ana perofeta.
E ui ina lagolago e le tane ma le ava le tasi ma le isi i o laua tiutetauave e tofia mai le lagi, “o mea e faaletonu, oti, po o nisi mea e tula’i mai, e alagatatau ai ona fetuutuunai tagata taitoatasi.”26 O nisi taimi o le tasi po o le isi o le toalua o le a i ai le tiutetauave o le faatinoina i le taimi e tasi o matafaioi e lua, pe mo se taimi po o le taimi atoa.
Talu ai nei na ou feiloai ai i se tuafafine, ma se uso e tofu ola i le tulaga lenei. O le avea ai ma matua e taitoatasi, o i la’ua taitoatasi, e i totonu o se siosiomaga faaleaiga ma i le faipaaga ai ma le Alii, ua tonu e tuuto o la’ua olaga atoa i le tausiga faaleagaga ma le faaletino o a la’ua fanau. E le’i misi ia i la’ua a la feagaiga na osia ma le Alii i le malumalu ma Ana folafolaga faavavau e ui i tatalaga faigata o a la’ua faaipoipoga. Na la taufai sailia le fesoasoani a le Alii i mea uma a o la taumafai pea e onosa’ia o la luitau ma savavali ai i le ala o feagaiga. La te talitonu o le a taulima e le Alii o la’ua manaoga, e le gata i lenei olaga, ae i le faavavau atoa. Sa la taufai faafaileleina a la’ua fanau e ala i le aoaoina o i latou ma le agamaualalo, agamalu, ma le alofa mama e oo lava i taimi e feagai ai ma tulaga faigata i le olaga. Mai le mea ua ou iloaina, e le o tuua’ia e nei matua ua nonofo taitoatasi le Atua i o la’ua malapagā. Nai lo lena, o loo la’ua sagisagi atu ma se faamoemoe susulu atoatoa ma le talitonu mautinoa i faamanuiaga o loo teuina e le Alii mo i la’ua.27
Uso e ma tuafafine, ua faatuina e le Faaola le faataitaiga atoatoa o le lotogatasi ma le ogatasi o faamoemoega ma aoaoga faavae ma lo tatou Tama oi le Lagi. Sa Ia tatalo e fai ma sui o Ona soo, ma fetalai atu, “Ina ia tasi i latou uma; faapei o oe le Tama o i totonu ia te au, o au foi o i totonu ia te oe, ina ia tasi i latou i totonu ia te i matou: … ina ia tasi i latou, e pei lava ona tasi i tatou.”28
Ou te molimau atu ia te outou, a o tatou—galulue faatasi o ni tamaitai ma alii—i se tulaga faapaaga moni ma le tutusa, o le a tatou olioli i le lotogatasi na aoao mai e le Faaola a o tatou faataunuuina ia tiutetauave paia i a tatou sootaga faalefaaipoipoga. Ou te folafola atu ia te outou, i le suafa o Keriso, o le a “lagaina faatasi loto i le lotogatasi ma i le alofa o le tasi ma le isi,”29 o le a tatou maua le olioli sili atu i la tatou malaga i le ola e faavavau, ma o le a matuai faateleina lo tatou malosi e auauna atu ai le tasi i le isi, ma auauna faatasi ma le tasi ma le isi.30 Ou te molimau atu ai i nei upumoni i le suafa paia o le Faaola o Iesu Keriso, amene.