Peb Ntiag Tug Hauj Lwm Saib Xyuas lub Ntiaj Teb
Vajtswv cov lus tias cov uas hlub thiab saib xyuas lub ntiaj teb thiab lawv cov kwv tij thiab cov muam yuav txais tej koob hmoov loj rau lawv sab ntsuj plig.
Tsis ntev tas los, kuv tus poj niam thiab kuv wb tau coj wb ob peb tug xeeb ntxwv mus xyuas wb lub teb chaws Fabkis Teb mus pom ib lub vaj uas zoo nkauj heev hauv ib lub zos me hu ua Giverny. Peb taug tej kev hauv lub zos thiab zoo siab saib cov paj uas zoo nkauj, ib hom nroj hav dej, thiab pom txoj kev ci ntsa iab rau hauv cov pas dej me.
Ib tug kws pleev xim tseem ceeb hu uas Claude Monet yog tus tsim lub vaj uas xav tsis thoob no thiab tau 40 xyoo, nws maj mam cog thiab saib xyuas nws lub vaj kom nws pleev xim tau haud. Monet saib ib puag ncig muaj tej yam uas zoo tshaj plaws hauv lub vaj, ces nws mam muab tus pleev xim coj los pleev cov xim zoo thiab ci ci. Tau ntau xyoo, los ntawm nws tej kev tshoov siab ntawm nws lub vaj, nws tau tsim ntau puas daim duab uas zoo heev.
Water Lilies and Japanese Bridge, 1899, los ntawm Claude Monet
Cov kwv tij thiab cov muam, peb tej kev mus xyuas lub ntiaj teb no uas zoo nkauj heev yuav pab peb muaj tej kev tshoov siab thiab muaj kev zoo siab hauv peb lub neej. Tej yam tshoov siab hauv peb ua rau peb zoo siab ua tsaug rau peb Leej Txiv Saum Ntuj Ceeb Tsheej thiab Nws tus Tub, Yexus Khetos, tus uas tsim lub ntiaj teb zoo no—nrog tej roob hauv pauv thiab cov dej, tej nroj tsuag thiab cov tsiaj—thiab peb thawj niam txiv, Adas thiab Evas.1
Txoj kev tsim txhua yam tsis yog qhov kawg. Yog ib feem tseem ceeb ntawm Vajtswv txoj hau kev rau Nws cov me nyuam. Lub hom phiaj yog kom muaj ib qhov chaw uas txiv neej thiab poj niam raug kev sim siab, lawv siv tau lawv txoj kev ywj siab xaiv, nrhiav kev xyiv fab, thiab kawm thiab loj hlob tuaj, lawv tiaj muaj ib hnub rov qab mus cuag tus uas Tsim txhua yam thiab yuav muaj txoj sia nyob mus ib txhis
Tej kev tsim txhua yam zoo ntawm no yog tau npaj tag nrho rau peb thiab yog tus uas Tsim txhua yam txoj kev hlub Nws pub rau Nws cov me nyuam. Tus Tswv tshaj tawm, “Muaj tseeb tiag, txhua yam uas muaj los ntawm cov av … puav leej yog tsim los pab neeg thiab rau neeg siv, ua kom lub qhov muag nyiam thiab kom zoo lub siab.”2
Tiam sis, Vajtswv lub txiaj ntsim Kev Tsim Txhua Yam muaj tej dej num thiab kev lav ris nrog. Peb muab tej dej num no tiag tiag hu ua ntiag tug hauj lwm saib xyuas. Txoj moo zoo qhia tias lo lus ntiag tug hauj lwm saib xyuas txhais hais tias yog peb txoj kev saib xyuas ntawm sab ntsuj plig thiab ntawm sab cev nqaij daim tawv kom saib xyuas ib yam dab tsi uas los ntawm Vajtswv, uas peb lav ris.3
Ib yam li tau qhia hauv vaj lug kub dawb huv, peb ntiag tug hauj lwm saib xyuas lub ntiaj teb muaj tej ntsiab cai ntawm no:
Ntsiab cai thib ib yog: tag nrho lub ntiaj teb, thiab txhua yam uas muaj sia nyob rau haud, yog Vajtswv tug.
Tus uas Tsim txhua yam tau muab tej khoom ntawm lub ntiaj teb thiab txhua yam uas muaj sia nyob rau haud peb saib xyuas, tiam sis tag nrho yog tus Tswv li. Nws hais, “Kuv, tus Tswv, tau nthuav lub ntuj, thiab puab lub ntiaj teb, yog kiag kuv tes hauj lwm; thiab txhua yam nyob haud yog kuv li.”4 Txhua yam hauv ntiaj teb no yog tus Tswv li, tsis hais peb tsev neeg, peb cev nqaij daim tawv, thiab peb txoj sia los yog.5
Ntsiab cai thib ob: Vim peb yog cov saib xyuas tej uas Vajtswv tsim, peb muaj ib lub luag hauj lwm kom hwm thiab saib xyuas tej ntawd.
Vim peb yog Vajtswv cov me nyuam, peb tau txais txoj hauj lwm saib xyuas thiab tsom kwm tej yam uas Nws tau tsim. Tus Tswv hais tias Nws tau ua kom “txhua tus neeg muaj kev lav ris, ua ib tug saib xyuas tej koob hmoov hauv ntiaj teb, uas kuv tau ua thiab tau npaj rau kuv cov neeg.”6
Peb Leej Txiv Saum Ntuj Ceeb Tsheej cia peb siv tej yam hauv ntiaj teb raws li peb lub siab xav. Tiam sis peb yuav tsum tsis txhob xav tias qhov uas peb muaj txoj kev ywj siab xaiv ua rau peb muaj cai lam siv tag nrho tej yam zoo ntawm lub ntiaj teb yog tsis muaj tswv yim los yog kev tswj hwm. Tus Tswv tau hais cov lus ntuas no: “Thiab ua rau Vajtswv zoo siab uas Vajtswv tau muab tag nrho tej yam no pub rau neeg; vim tau tsim tej no los siv rau lub hom phiaj no, nrog kev xyuam xim, txhob siv tshaj, thiab txhob quab yuam.”7
Thawj Tswj Hwm Russell M. Nelson tau hais ib zaug: “Vim peb tau koob hmoov los ntawm tej uas Vajtswv tsim, peb yuav tsum ua dab tsi? Peb yuav tsum tu lub ntiaj teb, ua cov neeg uas saib xyuas nrog txoj kev txawj ntse, thiab tshwj tseg rau tej tiam neeg tom ntej.”8
Peb saib xyuas thiab tsom kwm lub ntiaj teb tsis yog vim cov kws tshawb fawb los yog cov tsoom fwv xav kom peb ua xwb, txoj hauj lwm no yog ib txoj hauj lwm dawb huv uas Vajtswv tau pub rau peb, qhov no ua rau peb rau siab thiab txo hwj chim. Yeej yog ib qho tseem ceeb rau peb txoj kev ua cov thwj tim. Peb yuav hwm thiab hlub peb Leej Txiv Saum Ntuj Ceeb Tsheej thiab Yexus Khetos li cas yog tias peb tsis hwm thiab saib txhua yam uas Nkawd tau tsim rau nqi?
Muaj ntau yam uas peb ua tau—ua ke thiab peb tus kheej—kom ua cov neeg saib xyuas zoo. Los ntawm peb lub neej, peb txhua tus siv tau tej yam hauv ntiaj teb nrog kev hwm thiab kev txawj ntse. Peb pab tau neeg zej zog saib xyuas lub ntiaj teb. Peb ua tau peb lub neej thiab coj cwj pwm kom hwm tau tag nrho tej yam Vajtswv tau tsim thiab ua peb qhov chaw nyob kom tsis txhob sw sw, zoo nkauj dua thiab tshoov tau peb lub siab.9
Ntawm peb ntiag tug hauj lwm saib xyuas tag nrho tej yam Vajtswv tau tsim qhov tseem ceeb tshaj yog peb lub luag hauj lwm dawb ceev los hlub, hwm, thiab saib xyuas tag nrho cov tib neeg hauv lub ntiaj teb no. Lawv yog Vajtswv cov tub thiab ntxhais, peb cov muam thiab tij laug, thiab lawv txoj kev zoo siab nyob mus ib txhis yog lub hom phiaj ntawm Vajtswv txoj kev tsim lub ntiaj teb no.
Tus sau ntawv Antoine de Saint-Exupéry hais tias: Muaj ib hnub, thaum nws caij lub tsheb nqaj hlau, nws pom hais tias nws zaum ib puag ncig ib cov neeg tawg rog. Nws tau txais kev tshoov siab thaum nws pom ib tug me nyuam lub ntsej muag uas tsis muaj kev cia siab, nws hais tias: “Thaum ib lub paj ntshua nplaim pauv muv ua ib lub paj tshiab, tag nrho cov kws tu lub vaj zoo siab. Lawv muab lub paj ntshua nplaim tso deb, tu lub paj, thiab pab yug. Tiam sis tsis muaj ib tug pab tu tib neeg.”10
Kuv cov kwv tij thiab cov muam, puas tsim nyog peb yuav ua tus cov kws tu peb cov neeg zej zog? Peb puas yog cov uas saib xyuas peb tus kwv tij? Yexus tau txib peb kom hlub peb tus tus neeg zej zog ib yam li peb hlub peb tus kheej.11 Los ntawm Nws lub qhov ncauj, lo lus neeg zej zog tsis yog hais cov neeg nyob ze peb qhov chaw xwb; tiam sis lub ntsiab hais tias lawv nyob hauv peb lub siab. Neeg zej zog txhais tias yog cov tib neeg thoob plaws lub ntiaj teb no—txawm lawv nyob ze peb los nyob hauv ib lub teb chaws deb ntawm peb, thiab txawm lawv los qhov twg los, los lawv lub neej zoo li cas.
Vim peb yog Khetos cov thwj tim, peb muaj kev lav ris ua hauj lwm pab kom muaj kev thaj yeeb thiab kev sib haum nyob tag nrho cov teb chaws hauv ntiaj teb. Peb yuav tsum siv zog ua kom tiv thaiv thiab pab thiab nplij cov neeg uas tsis khov, cov xav tau kev pab, thiab tag nrho cov uas txom nyem thiab raug kev tsim txom. Qhov tseeb tiag, lub txiaj ntsim zoo tshaj plaws uas peb muab pub tau rau lwm tus yog pab lawv paub txoj kev zoo siab uas los ntawm txoj moo zoo thiab caw lawv los cuag lawv tus Cawm Seej ntawm tej kev khi lus thiab cov kab ke dawb huv.
Ntsiab cai thib peb: Vajtswv caw peb los koom ua ke ua txoj hauj lwm tsim tej yam.
Vajtswv tsis tau ua tus txheej txheem tsim txhua yam tiav lawm. Txhua hnub, tej yam Vajtswv tau tsim tseem loj hlob tuaj, vam meej, thiab muaj ntau ntxiv. Ib qho zoo kawg nkaus yog qhov uas peb Leej Txiv Saum Ntuj Ceeb Tsheej caw peb los koom ua ke ua nws txoj hauj lwm tsim tej yam.
Peb sib koom tes ua tau txoj hauj lwm uas tsim txhua yam thaum peb tu lub ntiaj teb los tsim tej yam zoo hauv ntiaj teb—tsuas yog peb hwm tej yam Vajtswv tau tsim. Tej yam uas peb pab yog tej zaum los ntawm tej yam uas peb tsim xws li cov duab zoo nkauj, kev ua tsev, cov nkauj zoo mloog, cov ntawv nyeem, thiab cov kab lig kev cai uas ua rau peb lub ntiaj teb zoo nkauj, uas ntxim saib, thiab ua rau peb zoo siab. Peb kuj pab los ntawm kev tshawb fawb science thiab tej kev kho mob kom pab lub ntiaj teb thiab cov muaj txoj sia nyob haud. Thawj Tswj Hwm Thomas S. Monson tau piav lub ntsiab cai ntawm no zoo li no: “Vajtswv tsim lub ntiaj teb tsis tau tas kom neeg siv lawv tej txuj ci ua hauj lwm rau … kom neeg thiaj paub kev xyiv fab thiab kev zoo siab uas los ntawm kev tsim tej yam no.”12
Nyob hauv Yexus zaj lus piv txwv txog tej choj nyiaj, thaum tus tswv rov qab los, nws qhuas thiab muab tej yam zoo rau ob tug tub qhe uas tau muab nkawd cov choj nyiaj kom muaj ntxiv. Tiam sis, nws hu tus tub qhe uas muab nws lub choj nyiaj faus rau hauv av tias nws “tsis muaj nqis,” thiab nws rov qab tshem lub choj nyiaj uas nws tau muab rau tus tub qhe ntawd.13
Ib yam li ntawd, peb uas yog cov saib xyuas tej yam tsim hauv ntiaj teb tsis yog kom peb tshwj cia thiab ceev xwb. Tus Tswv cia siab rau peb kom mob siab ua hauj lwm, mloog tus Ntsuj Plig Dawb Huv, kom thiaj loj hlob, pab kom zoo, thiab kho kom zoo dua tej yam siv uas Nws tau muab rau peb—tsis yog kom pab peb xwb tiam sis foom koob hmoov rau lwm tus thiab.
Tag nrho tej yam uas tib neeg tau ua lawm, tsis muaj ib qho uas zoo npaum li cov uas tsim neeg nrog Vajtswv thaum lawv pab pub txoj sia rau lwm tus los pab ib tug me nyuam kawm, loj hlob, thiab ua neej zoo—txawm lawv yog cov niam txiv, cov xib hwb, thawj coj, los lwm tus uas pab. Tsis muaj ntiag tug hauj lwm saib xyuas uas dawb ceev dua, muaj nuj nqi dua, thiab nyuaj heev, npaum li kev koom ua ke nrog tus uas Tsim peb kom pab tsim tau lub cev rau Nws cov me nyuam ntsuj plig thiab pab lawv muaj peev xwm hloov los ua neeg zoo li Vajtswv.
Txoj kev lav ris pab tsim neeg yog ib qho uas pab peb nco ntsoov tias txoj sia thiab txhua tus lub cev dawb ceev, yog Vajtswv li tag nrho, thiab Nws tau cia peb ua cov tsom kwm los hwm, tiv thaiv, thiab saib xyuas lawv. Vajtswv cov lus txib, uas yog lub hwj chim tsim me nyuam thiab tsim tsa tsev neeg nyob mus ib txhis, yuav pab peb nrog ntiag tug hauj lwm dawb huv no, uas tseem ceeb heev rau Nws txoj hau kev.
Kuv cov kwv tij thiab cov muam, peb yuav tsum to taub hais tias tus Tswv pom tias txhua yam yog los ntawm sab ntsuj plig—tsis hais tej yam uas zoo li yog los ntawm sab cev nqaij daim tawv xwb. Kuv ua tim kawv tias Vajtswv cov lus tias cov uas hlub thiab saib xyuas lub ntiaj teb thiab lawv cov kwv tij thiab cov muam yuav txais tej koob hmoov loj rau lawv sab ntsuj plig. Thaum nej muab siab ua nej ntiag tug hauj lwm dawb ceev thiab ua raws li nej tej kev khi lus uas nyob mus ib txhis, nej yuav los paub tus Tswv thiab Nws Leej Tub, Yexus Khetos, thiab nej yuav paub txog Nkawd txoj kev hlub thiab nkawd lub hwj huam hauv nej lub neej. Tag nrho tej no yuav npaj nej mus nyob nrog Nkawd thiab txais hwj chim tawm tswv yim ntxiv14 hauv lub neej tom ntej.
Tom qab lub neej no, tus Tswv yuav nug peb kom peb qhia txog peb ntiag tug hauj lwm dawb ceev, xav paub tias peb tau ua li cas kom saib xyuas tej yam uas Nws tau tsim. Kuv thov hais tias peb yuav hnov Nws cov lus ntxhi rau peb lub siab tias: “Zoo heev, koj yog tus tub txib uas zoo thiab ncaj ncees: tej yam me me uas koj saib, koj ua ncaj, kuv yuav tsa koj ua tus saib yam uas loj: Koj cia li los nrog kuv nyob kaj siab lug.”15 Los ntawm Yexus Khetos lub npe, amees.