Kawg Siab
Peb yuav tsum ua neeg raws Yexus uas muaj kev xyiv fab thiab zoo siab dawb paug nyob rau hauv peb tus kheej txoj kev ua thwj tim.
Tej lub sij hawm qhov yus paub yuav zoo li cas pab tau yus.
Thaum kawg ntawm Nws txoj hauj lwm qhuab qhia, Yexus qhia Nws cov Thwj Tim tias sij hawm nyuaj yuav los. Tiam sis Nws kuj hais tias, “Nej tsis txhob nyuaj siab.”1 Nws yuav mus, tiam sis Nws yuav tsis cia lawv nyob lawv tus kheej xwb.2 Nws yuav xa Nws tus Ntsuj Plig kom pab lawv nco qab, sawv ruaj nrees, thiab nrhiav kev nyob kaj siab lug. Tus Cawm Seej ua raws li Nws cog lus tias Nws yuav nrog nraim peb cov uas yog Nws cov thwj tim, tiam sis peb yuav tsum ntsia ntsoov Nws kom thiaj li pab peb paub thiab muaj kev zoo siab thaum peb nrog Nws nyob.
Yexus Khetos cov thwj tim ib txwm ntsib kev nyuaj siab.
Kuv tus phooj ywg zoo xa ib tsab ntawv qub rau kuv los ntawm Nebraska Advertiser, ib daim ntawv xov xwm los ntawm teb chaws Amelikas, Xya Hli Ntuj hnub tim 9, xyoo 1857. Daim ntawv xov xwm hais tias: “Tag kis no ib pab neeg Mormon tau los dhau peb lub zos thaum lawv mus rau Salt Lake. Cov poj niam (uas tsis qaug zog) rub lawv lub laub zoo li tsiaj nyaum, ib tug [poj niam] vau rau hauv av nkos thiab ua rau lwm tus nres me ntsis, me nyuam yaus taug kev ntawm lawv ib sab hnav lawv cov khaub ncaws txawv teb chaws, lawv mob siab ib yam li lawv niam.”3
Kuv tau xav ntau heev txog tus poj niam uas lo av nkos no. Vim li cas nws rub nws ib leeg? Nws puas yog ib leej niam tsis muaj txiv? Dab tsi ua rau nws muaj zog, thiab ua siab ntev taug ib txoj kev nyuaj hla av nkos, rub tag nrho nws cov khoom hauv lub laub mus rau ib lub tsev tsis paub hauv suab puam—tej lub sij hawm nws raug luag thuam nws?4
Tswj Hwm Joseph F. Smith hais txog lub zog uas nyob hauv cov poj niam pioneer no lub siab hais tias: “Nej puas muaj peev xwm ua kom cov poj niam no tig mus tawm ntawm lawv txoj kev ntseeg ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg? Nej puas txawj ua rau lawv lub siab tsaus txog tus Yaj Saub Joseph Smith txoj hauj lwm? Nej puas muaj peev xwm ua rau lawv dig muag kom tsis paub txog Yexus Khetos, uas yog Vajtswv Leej Tub, ntiag tug hauj lwm? Tsis yog, nej yeej ib txwm tsis muaj peev xwm ua li no. Vim li cas? Vim lawv paub tiag. Vajtswv qhia rau lawv, thiab lawv to taub, thiab tsis muaj hwj chim hauv ntiaj teb yuav tig tau lawv kom xyeej qhov lawv paub tias muaj tseeb.”5
Cov kwv tij thiab cov muam, qhov uas Vajtswv hu peb ua hauv lub caij nyoog no yog ua cov txiv neej thiab poj niam li ntawd—cov thwj tim uas khawv tob kom nrhiav zog rub thaum taug kev hauv roob moj sab qhua, ua cov thwj tim uas ntseeg tej kev tshwm sim uas Vajtswv pub rau peb, cov neeg uas coj raws li Yexus muaj kev zoo siab thiab ua siab dawb siab zoo thaum peb ua Nws cov thwj tim. Vim peb yog Yexus Khetos cov thwj tim, peb ntseeg thiab loj hlob ntawm peb qhov tseeb tseem ceeb.
Qhov thib Ib, Peb Ua Raws Li Peb tej Kev Khi Lus, Txawm Yog Tsis Yooj Yim Los
Thaum nej txoj kev ntseeg, nej tsev neeg, los sis nej lub neej yav tom ntej raug tej kev cov nyom—thaum nej xav tias vim li cas lub neej nyuaj heev thaum nej sim ua raws li txoj moo zoo—nco ntsoov tias tus Tswv hais tias peb yuav muaj teeb meem. Teeb meem yog ib feem ntawm Vajtswv txoj hau kev thiab tsis txhais hais tias nej tau raug tso tseg; yeej yog ib qho uas qhia tias nej yog Nws li.6 Vim Nws yeej yog “ib tug neeg muaj kev nyuaj siab, thiab paub kev tu siab.”7
Kuv kawm tias Leej Txiv Saum Ntuj Ceeb Tsheej txaus siab rau kuv txoj kev loj hlob ua Yexus Khetos ib tug thwj tim thiab Nws tsis txhawj txog kuv txoj kev xis nyob. Tej zaum kuv yuav tsis xav kom zoo li ntawd—tab sis yeej yog li ntawd xwb!
Kev ua neej yooj yim yeej tsis ua rau yus txais tau lub hwj chim. Lub hwj chim uas peb xav tau kom tiv taus kev kub ntxhov ntawm peb lub caij nyoog yog tus Tswv lub hwj chim, thiab Nws lub hwj chim ntws los ntawm peb tej kev khi lus nrog Nws.8 Kev haj yam muaj kev ntseeg thaum cua hlob heev nplawm peb—rau siab txhua hnub kom ua tej yam uas peb tau khi lus nrog tus Cawm Seej hais tias peb yuav ua, txawm yog thaum peb nkees, txhawj xeeb, thiab xav mus xav los txog tej lus nug thiab tej teeb meem uas ntxhov siab—ces ua rau peb maj mam txais Nws txoj kev kaj, Nws lub zog, Nws txoj kev hlub, Nws tus Ntsuj Plig, Nws txoj kev nyob kaj siab lug.
Peb lub hom phiaj thaum taug txoj kev ua raws li kev khi lus yog kom peb mus cuag tus Cawm Seej. Nws yog qhov uas peb tsom ntsoov rau, tsis yog peb yuav ua zoo tag nrho tam sim no. Tsis yog ib txoj kev sib tw, thiab peb yuav tsum tsis txhob muab peb txoj kev piv rau lwm tus li. Txawm peb ntog los, Nws tseem nyob ntawd.
Qhov thib Ob, Peb Muaj Peev Xwm Ua Raws Li Kev Ntseeg
Vim peb yog Yexus Khetos cov thwj tim, peb to taub tias yuav tsum ua tej yam yog peb ntseeg Nws—qhov tshwj xeeb tshaj yog thaum raug xwm txheej nyuaj heev.9
Ntau xyoo tas los, kuv niam thiab txiv txiav txim siab muab cov ntaub pua plag tshiab hauv tsev. Hmo ua ntej cov ntaub pua plag tshiab tuaj txog, kuv niam hais kom kuv cov nus tshem cov rooj tog thiab rub tawm cov ntaub pua plag hauv chav pw kom muab tau cov ntaub pua plag tshiab tso rau haud. Kuv tus viv ncaus, Emily, uas muaj xya xyoo, twb pw lawm. Ces, thaum nws pw lawv ntsiag to tshem cov rooj ntawm nws chav pw, tsuas cia lub txaj nyob, thiab tom qab ntawd lawv rub tawm cov ntaub pua plag. Ib yam li cov nus nyiam ua, lawv txiav txim siab tso dag tso luag. Lawv muab cov khoom hauv nws lub txee dai khaub ncaws thiab nyob ntawm cov phab ntsa tshem tawm, kom tsis muaj dab tsi nyob hauv chav. Ces lawv sau ntawv thiab muab tso rau ntawm phab ntsa: “Nyob zoo Emily, peb twb tsiv tsev mus lawm. Ob peb hnub no peb mam li sau ntawv qhia koj tias peb nyob qhov twg. Hlub, koj tsev neeg.”
Tag kis sawv ntxov thaum Emily tsis tuaj noj tshais, kuv cov nus mus nrhiav nws—nws nyob ntawd, tu siab thiab nyob ib leeg hauv nws chav uas muaj lub qhov rooj tseem kaw. Emily xav txog tej yam uas muaj los: “Kuv tu siab. Tab sis yuav muaj dab tsi tshwm sim yog tias kuv tau qhib qhov rooj? Kuv yuav tau hnov dab tsi? Kuv yuav tau tsw ntxhiab dab tsi? Kuv yuav paub tias kuv tsis nyob kuv ib leeg. Kuv yuav paub tias muaj neeg uas hlub kuv heev. Kuv yeej tsis tau xav tias kuv yuav ua ib yam dab tsi kom hloov kuv qhov xwm txheej. Kuv tso tseg thiab pib quaj hauv kuv chav dai khaub ncaws. Tab sis kheev lam kuv tau qhib qhov rooj xwb.”10
Kuv tus niam hluas tau xav raws li qhov nws pom, tiam sis tsis yog txoj kev uas muaj tiag. Ntshe peb, ib yam li Emily, yuav muaj kev tu siab los sis kev nyuaj siab txhawj xeeb los sis kev poob siab los sis kev kho siab los yog kev chim siab ua rau peb tsis txawj xav tias peb muaj peev xwm ua ib yam dab tsi, kom qhib qhov rooj, kom ua raws li kev ntseeg Yexus Khetos?
Cov vaj lug kub muaj txiv neej thiab poj niam coob, Khetos cov thwj tim, uas cia li ua tej yam zoo thaum lawv raug tej xwm txheej nyuaj kawg nkaus—cov uas muaj kev ntseeg sawv thiab taug kev mus.11
Rau cov neeg mob ruas uas nrhiav kev kho mob, Khetos hais tias: “Nej cia li mus cuag cov pov thawj kom lawv saib nej. Thaum cov neeg mob ruas ntawd tab tom mus, lawv tej ruas twb zoo lawm.”12
Lawv mus cuag cov pov thawj kom lawv saib lawv zoo li lawv twb txais kev kho mob lawm, thiab thaum lawv tab tom mus ua li ntawd, lawv twb txais kev kho mob.
Kuv kuj xav hais tias yog nyuaj dhau rau nej xav tias nej yuav tsum ua dab tsi, thov kom nej cia li hu lwm tus los pab—hu ib tug phooj ywg, ib tug neeg hauv tsev neeg, ib tug thawj coj ntawm pawg ntseeg, ib tus kws tshaj lij. Qhov no yog thawj kauj ruam kom tau kev cia siab.
Qhov thib Peb, Thaum Peb Muab Siab Npuab tus Tswv Peb Muaj Peev Xwm Ua Kom Kawg Siab thiab Muaj Kev Xyiv Fab13
Thaum lub sij hawm nyuaj los, kuv sim nco ntsoov tias kuv twb txiav txim siab coj raws li Khetos ua ntej kuv los rau hauv lub ntiaj teb thiab nco ntsoov tias kev nyuaj rau kuv txoj kev ntseeg, kuv txoj kev noj qab nyob zoo, thiab kuv txoj kev nyiaj mus, tag nrho yog ib feem ntawm vim li cas kuv nyob ntawm no. Thiab kuv yuav tsum tsis txhob xav tias kev sim siab ua rau kuv tsis ntseeg Vajtswv txoj kev hlub rau kuv los yog cia kev sim siab hloov kuv txoj kev ntseeg Nws mus rau kev tsis ntseeg. Kev sim siab tsis txhais hais tias txoj hau kev tsis zoo lawm; kev sim siab yog ib feem ntawm Vajtswv txoj hau kev uas yuav pab kuv nrhiav Nws. Kuv ua neeg zoo li Nws thaum kuv ua siab ntev, thiab vam thiab cia siab tias, ib yam li Nws, kuv ua siab ncaj thov Vajtswv thaum kuv raug kev txom nyem.14
Yexus Khetos coj tus yam ntxwv zoo tag nrho txog kev hlub peb Leej Txiv Saum Ntuj Ceeb Tsheej kawg siab kawg ntsws—tus uas coj yam ntxwv zoo tshaj txog kev ua raws li Leej Txiv lub siab nyiam, tsis hais yuav tsum them tus nqi npaum li cas los.15 Kuv xav ua raws li Nws tus yam ntxwv ua ib yam li ntawd.
Kuv txais kev tshoov siab los ntawm tus poj ntsuam txoj kev ua ib tug thwj tim ua siab dawb paug uas tso nws ob lub txiaj toog rau hauv lub tuam tsev txhab ceev nyiaj. Nws muab txhua yam.16
Yexus Khetos pom tias nws tau muab tag nrho thaum lwm tus tsuas pom qhov nws tsis muaj. Qhov no muaj tseeb rau peb txhua tus. Nws tsis saib qhov uas peb tsis muaj yog ib yam tsis zoo tiam sis yeej yog ib lub cib fim kom peb muab siab rau ntseeg thiab loj hlob tuaj.
Lus Xaus
Kuv cov phooj ywg uas yog Yexus Khetos cov thwj tim, kuv xaiv los sawv nrog tus Tswv kawg siab kawg ntsws. Kuv xaiv los sawv nrog Nws cov tub qhe uas Nws xaiv—Thawj Tswj Hwm Russell M. Nelson thiab cov Thwj Tim uas koom nrog nws—rau qhov lawv sawv tus Tswv cev hais lus rau peb thiab lawv yog cov saib xyuas cov kab ke thiab kev khi lus uas khi kuv rau tus Cawm Seej.
Thaum kuv ntog, kuv yuav sawv, thiab kuv yuav tso siab rau Tswv Yexus Khetos txoj kev tshav ntuj thiab lub hwj chim kho. Kuv yuav ua raws nraim li kuv tej kev khi lus nrog Nws thiab kuv yuav kawm txog kuv tej lus nug los ntawm kev kawm Vajtswv txoj lus, los ntawm kev ntseeg, thiab los ntawm kev pab ntawm tus Vaj Ntsuj Plig Dawb Huv uas kuv ntseeg. Kuv yuav nrhiav Nws tus Ntsuj Plig txhua hnub los ntawm kev ua tej yam me me thiab yooj yim.
Nov yog kuv txoj kev ua thwj tim.
Mus txog rau thaum txoj kev mob uas raug txhua hnub hauv lub neej no yuav zoo, kuv yuav tos tus Tswv thiab tso siab rau Nws—Nws txoj kev teem sij hawm, Nws txoj kev txawj ntse, Nws txoj hau kev.17
Tuav tes nrog nej, kuv xav sawv nrog Nws mus ib txhis. Kawg siab. Vim kuv paub tias thaum peb hlub Yexus Khetos nrog tag nrho peb lub siab lub ntsws, Nws muab txhua yam rau peb rov qab los.18 Los ntawm Yexus Khetos lub npe, amees.