Nws tus Quab Yooj Yim Kwv thiab Nws lub Nra Tsis Hnyav
Cia peb nco ntsoov tias txhua tus neeg hauv lub ntiaj teb no yog Vajtswv ib tug me nyuam thiab Nws hlub lawv txhua leej txhua tus.
Muaj ib zaj dab neeg txog ib tug txiv neej hu ua Jack uas muaj ib tug aub uas tua noog hu ua Cassie. Jack txaus siab rau Cassie thiab nws khav hais tias nws tus aub txawj ntse npaum li cas. Nws xav ua pov thawj txog qhov no, ces Jack caw nws cov phooj ywg los saib Cassie ua txuj ci. Tom qab nkawd tuaj txog ntawm qhov chaw tua tsiaj, Jack cia Cassie khiav nraum zoov thaum nws mus sau npe qhib kev sib tw ntawd.
Thaumtxog lub sij hawm pib, Jack tau xav xav kom lwm tus saib Cassie tej txuj ci. Tiam sis, Cassie coj txawv txawv. Nws tsis ua raws li Jack cov lus txib ib yam li nws ib txwm ua. Nws tsuas xav nyob ntawm Jack ib sab xwb.
Nws chim thiab txaj muag thiab npau taws rau Cassie, tsis ntev nws hais kom nkawd tawm mus. Cassie tsis dhia mus rau tom qab ntawm lub tsheb zoo li nws ib txwm ua, yog li ntawd Jack ua siab luv nqa nws thiab thawb nws mus rau hauv lub thawv. Thaum lawv mus tsev nws chim heev vim cov neeg uas nrog nws nyob thuam nws txog qhov uas nws tus aub coj li ntawd. Jack tsis nkag siab tias vim li cas Cassie tsis coj zoo. Nws cob qhia Cassie zoo, thiab tag nrho Cassie xav thaum yav dhau los yog kom Jack zoo siab thiab ua hauj lwm rau nws.
Tom qab tuaj txog tsev, Jack pib xyuas seb Cassie puas raug mob, muaj zuam, los lo nrhab, ib yam li nws ib txwm ua. Thaum nws muab nws txhais tes rau ntawm Cassie lub hauv siab, nws hnov ib yam dab tsi ntub thiab pom tias nws txhais tes lo ntshav. Ua rau nws txaj muag thiab ntshai heev, nws pom tias Cassie tau raug mob ntawm nws lub hauv siab tob txaus kom pom pob txha. Nws pom lwm qhov raug mob ntawm Cassie txhais ceg sab xis, kuj tob cuag pom pob txha thiab.
Jack puag Cassie thiab pib quaj. Nws txaj muag rau qhov nws tau txiav txim siab thiab ua phem rau nws. Hnub ntawd Cassie tau coj txawv ua ntej vim nws raug mob. Nws tus cwj pwm raug cuam tshuam los ntawm nws qhov mob, nws txoj kev txom nyem, thiab nws qhov txhab. Tsis yog vim nws tsis muaj lub siab xav mloog Jack los sis tsis hlub nws.1
Kuv hnov zaj dab neeg no ntau xyoo dhau los thiab kuv yeej nco ntsoov. Muaj pes tsawg tus neeg raug mob nyob ib puag ncig peb? Peb txiav txim siab pes tsawg zaus rau lwm tus raws li lawv ntsej muag sab nraud thiab tej yam lawv ua, los sis tej yam lawv tsis ua, thaum uas yog peb to taub tiag tiag, peb thiaj li muaj kev khuv leej thiab lub siab xav pab es tsis txhob muab lub nra ntxiv rau tej uas lawv twb ris lawm los ntawm peb txoj kev txiav txim.
Kuv tau ua txhaum no ntau zaus hauv kuv lub neej, tiam sis tus Tswv tau ua siab ntev qhia kuv los ntawm kev paub ntawm kuv tus kheej thaum kuv mloog lwm tus qhia txog lawv lub neej. Kuv tau los txais kev txaus siab rau tus Cawm Seej tus yam ntxwv thaum Nws siv Nws lub sij hawm txhawb pab lwm tus los ntawm kev hlub.
Kuv tus ntxhais yaus txoj kev ua neej nyob twb muaj teeb meem ntawm nws txoj kev noj qab nyob zoo ntawm nws lub siab ntsws txij thaum nws tseem yog me nyuam yaus. Muaj ntau zaus hauv nws lub neej thaum nws xav tias nws ua tsis tau ntxiv li lawm. Peb yeej yuav ua tsaug mus ib txhis rau cov tim tswv hauv ntiaj teb uas tau nyob ntawd thaum lub sij hawm ntawd, nrog nws zaum, mloog nws, quaj nrog nws, thiab sib faib tej txiaj ntsim tshwj xeeb ua ke, kev nkag siab ntawm sab ntsuj plig, thiab kev sib raug zoo ntawm kev hlub. Thaum muaj kev hlub zoo li no, twb tshwm ob sab neeg tej lub nra huv tib si.
Txwj Laug Joseph B. Wirthlin, hais txog 1 Kauleethaus hais tias, “Txawm yog kuv hais tau txhua haiv neeg tej lus thiab hais tau cov tim tswv ceeb tsheej tej lus los yog kuv tsis muaj kev hlub, ces tej lus uas kuv hais tau ntawd zoo li tej suab tswb tooj tswb hlau uas nrov nrov xwb.”2
Nws hais ntxv tias:
“Povlauj cov lus rau Haiv Neeg Ntseeg tshiab no yog qhov yooj yim thiab ncaj qha: Nej pab tsis taus dab tsi yog tias nej tsis muaj kev siab hlub. Nej hais yam lus txawv, muaj lub txiaj ntsim qhia tej uas yuav muaj los yav tom ntej, to taub txhua yam uas tsis muaj neeg paub, thiab paub ib puas tsav yam los tau; txawm tias nej muaj kev ntseeg muab cov roob txav los, yog tsis muaj kev siab hlub ces yeej yuav tsis muaj nqis dab tsi li.
“‘Kev siab hlub yog Khetos txoj kev hlub uas dawb paug’ [Malaunais 7:47]. Tus Cawm Seej coj yam ntxwv txog txoj kev hlub ntawd.”3
Hauv phau Yauhas peb nyeem, “Yog nej ib leeg hlub ib leeg, sawv daws thiaj yuav paub hais tias nej yog kuv cov thwj tim.”4
Peb cov thawj coj hauv lub Koom Txoos tau hais ntau yam hais txog kev siab hlub, kev sib koom siab, kev hlub, kev ua siab zoo, kev zam txim, thiab kev hlub tshua. Kuv ntseeg tias tus Cawm Seej caw peb los ua txoj kev siab dua thiab dawb huv ntxiv5—Nws txoj kev hlub uas txhua tus yuav sib haum xeeb tiag tiag thiab muaj neeg xav tau lawv.
Tus Tswv txib peb kom hlub lwm tus,6 tsis txhob txiav txim rau lawv.7 Cia peb muab lub nra hnyav ntawd tso tseg; tsis yog ib lub nra rau peb ris.8 Tiam sis, peb yuav tsum kwv tus Cawm Seej tus quab ntawm kev hlub thiab kev khuv leej.
“Nej cov uas sab sab vim ris nra hnyav, nej cia li los cuag kuv, kuv yuav cia nej so.
“Nej cia li los kwv kuv tus quab thiab kawm txog kuv; …
“Tus quab uas kuv muab rau nej kwv yooj yim kwv, thiab lub nra uas kuv muab rau nej ris, lub ntawd tsis hnyav.”9
Tus Cawm Seej tsis pom zoo rau kev txhaum tiam sis Nws muab Nws txoj kev hlub thiab zam txim pub rau peb thaum peb hloov siab lees txim. Nws hais rau tus poj niam deev luag txiv, “Kuv yuav tsis rau txim rau koj thiab: koj cia li mus tsev thiab tsis txhob ua txhaum ntxiv lawm.”10 Cov uas Nws kov tau hnov Nws txoj kev hlub, thiab txoj kev hlub ntawd kho thiab hloov lawv. Nws txoj kev hlub tshoov lawv lub siab kom lawv xav hloov lawv lub neej. Ua lub neej raws li Nws txoj kev ua rau peb muaj kev xyiv fab thiab kev kaj siab lug, thiab Nws caw lwm tus ua neej ua siab mos siab muag, ua siab zoo, thiab muaj kev hlub.
Txwj Laug Gary E. Stevenson hais tias: “Thaum peb raug cua hlob, los nag hlob, raug mob, thiab dej qhuav ntawm lub neej no, tus Tswv—peb tus Tswv Yug Yaj, tus uas Saib Xyuas peb—yuav tu peb nrog kev hlub thiab kev siab zoo. Nws yuav kho peb lub siab kom zoo thiab yuav txhawb nqa peb sab ntsuj plig.”11 Peb cov uas coj raws li Yexus Khetos, puas tsim nyog peb yuav ua li yam li ntawd?
Tus Cawm Seej thov kom peb kawm txog Nws12 thiab ua tej yam uas peb tau pom Nws ua.13 Nws yog kev siab hlub, kev hlub dawb paug. Thaum peb maj mam kawm ua raws li Nws hais kom peb ua—tsis yog vim peb muaj lub luag hauj lwm ua los sis vim peb yuav tau koob hmoov tiam sis yog vim peb hlub Nws thiab peb Leej Txiv Saum Ntuj Ceeb Tsheej tiag14—Nws txoj kev hlub yuav los rau hauv peb lub siab thiab yuav ua rau peb xav tias peb yeej ua tau qhov Nws hais kom peb ua thiab yuav yooj yim dua thiab sib dua15 thiab peb yuav muaj kev xyiv fab ntau dua li qhov peb xav. Yeej yuav tsum xyaum ua li no; tej zaum yuav siv ntau xyoo, zoo li kuv ua, tiam sis tsuas yog peb xav muaj txoj kev hlub kom peb thiaj mob siab los, Nws muaj peev xwm siv txoj kev xav ua li ntawd,16 lub noob ntawd, thiab thaum kawg muab hloov los ua ib tsob ntoo zoo nkauj uas muaj cov txiv hmab txiv ntoo qab zib.17
Peb hu nkauj hauv peb zaj nkauj qhuas Vajtswv: “Kuv ua cas txiav txim rau lwm tus thaum kuv ua tsis zoo thiab? Qhov muag ntsia tsis tau kev txom nyem uas muaj nyob hauv neeg lub siab.”18 Leej twg hauv peb muaj tej kev nyuaj siab uas peb tsis pom? Tus tub hluas los sis me nyuam ntxhais uas ntxeev siab, cov me nyuam uas niam txiv sib nrauj, leej niam los yog leej txiv tsis muaj poj niam los txiv, cov uas muaj teeb meem ntawm lub cev los sis lub hlwb, cov muaj los lus nug txog lawv txoj kev ntseeg, cov uas lwm tus tsis nyiam vim lawv yog lwm haiv neeg, cov xav tias lawv nyob ib leeg, cov xav sib yuav, cov uas quav yeeb quav tshuaj, thiab coob tus uas muaj tej yam nyuaj hauv lub neej no—thiab feem ntau cov uas peb pom tias zoo li lawv lub neej yeej ib txwm zoo tag nrho.
Tsis muaj leej twg ntawm peb uas muaj lub neej zoo tag nrho los sis tsev neeg zoo tag nrho; kuv yeej tsis muaj. Thaum peb sim mloog thiab hlub lwm tus uas kuj muaj teeb meem thiab tej yam uas tsis zoo tag nrho, ces yuav pab kom lawv paub tias lawv tsis nyob ib leeg thaum lawv sim kov yeej lawv tej teeb meem. Txhua tus yuav tsum xav tias lawv sib haum xeeb tiag thiab yeej xav tau lawv koom Khetos lub cev.19 Dab Ntxwg Nyoog xav muab Vajtswv cov me nyuam sib nrug, thiab nws twb tau ua li no ntau thiab, tiam sis kev sib koom siab yeej muaj hwj chim heev.20 Peb yuav tsum sib tuav tes nyob ua ke ib leeg pab ib leeg thaum peb ua lub neej nyuaj no!
Peb tus yaj saub, Txwj Laug Russell M. Nelson hais tias, “Kev tsim txom los sis kev ntxub ntxaug rau lwm tus vim yog lawv yog lwm haiv neeg, nyiam poj niam los nyiam txiv neej, yog poj niam los txiv neej, tau kawm npaum li cas, muaj kab lig kev cai li cas, los sis lwm yam tseem ceeb ua rau tus uas Tsim peb tu siab! Qhov kev ua phem ntawd ua rau peb nyob qis dua peb lub hom phiaj uas Nws cov tub thiab ntxhais khi lus!”21
Thaum Txwj Laug Nelson caw peb mus taug kev ua raws nraim li peb tej kev khi lus uas mus rau peb Leej Txiv Saum Ntuj Ceeb Tsheej, nws kuj hais tej lus ntuas no thiab: “Yog phooj ywg thiab tsev neeg … lawv khiav tawm ntawm lub Koom Txoos mus, hlub lawv tsis tu tsis tseg. Nej yuav tsum tsis txhob txiav txim rau lwm tus txoj kev xaiv ib yam li nej tsis xav luag thaum nej vim nej tseem rau siab ntseeg.”22
Kuv cov phooj ywg, cia peb nco ntsoov tias txhua tus neeg hauv lub ntiaj teb no yog Vajtswv ib tug me nyuam23 thiab Nws hlub lawv txhua leej txhua tus.24 Puas muaj cov neeg hauv nej txoj kev uas nej muaj siab xav txiav txim rau lawv? Yog tias muaj, cia li nco ntsoov tias kev xav li no yog lub cib fim zoo rau peb xyaum hlub lwm tus ib yam li tus Cawm Seej hlub lawv.25 Thaum peb coj raws li Nws tus yam ntxwv, peb yuav koom nrog Nws thiab pab txhawb kom tag nrho Vajtswv cov me nyuam yuav muaj kev hlub thiab kev haum xeeb hauv lawv lub siab.
“Peb muaj kev hlub rau qhov Vajtswv twb xub hlub peb lawm.”26 Thaum peb muaj tus Cawm Seej txoj kev hlub puv npo, Nws tus quab yuav yooj yim kwv thiab Nws lub nra yuav sib.27 Kuv ua tim khawv li no los ntawm Yexus Khetos lub npe, amees.