Ofu Lou Malosi, E, Siona e
E tatau ona taitasi i tatou ma iloilo faamaoni ma le lototatalo a tatou faamuamua faaletino ma faaleagaga.
O faataoto o se itu tatau o metotia mamana faafaiaoga a le Alii o Iesu Keriso. E faauigaina faafaigofie, o faataoto a le Faaola o tala sa faaaoga e faatusatusa ai upumoni faaleagaga ma mea o le lalolagi ma aafiaga faaleolaga nei. Mo se faataitaiga, ua tumu Evagelia o le Feagaiga Fou i aoaoga e faatatau ai le malo o le Lagi i se fua o le sinapi,1 i se penina tau tele,2 i se matai ma le aufaigaluega i lona tovine,3 i taupou e toasefulu,4 ma le tele o isi. I se vaega o le galuega a le Alii i Kalilaia, o loo ta’u mai e tusitusiga paia e faapea “ua na o faataoto na ia fetalai atu ai ia te i latou.”5
O le uiga faamoemoeina po o se savali o se faataoto e masani lava e le faamaninoa lona faamatalatalaina. Ae, o le tala e na ona avatu ai o se upumoni paia i se tagata e tuu atu i ai e tusa ma lona faatuatua i le Atua, tapenaga patino faaleagaga, ma le loto ia aoao. O lea la, e tatau i se tagata ona faaaoga le filifiliga tatau ma “ole atu, saili, ma tu’itu’i atu” ma le loto i ai6 ia iloa ai upumoni o loo tanu i se faataoto.
Ou te tatalo faatauanau ia faamalamalamaina i tatou taitoatasi e le Agaga Paia a o tatou mafaufau nei i le taua o le faataoto i le tausamaaga o le faaipoipoga faatupu.
O Le Tausamaaga o le Faaipoipoga Faatupu
“Ona toe … fetalai atu lea o Iesu ia te i latou i faataoto, ma faapea atu,
“E tusa le malo o le lagi ma le tasi tupu ua na faia le tausamaaga o lona atalii,
“Ua aauina atu e ia ana auauna e fai atu i e na talaiina ia o mai i le tausamaaga a ua latou le mafafai ona o mai.
“Ua toe aauina atu e ia nisi auauna, ua faapea atu, Ia outou fai atu i e na tala’iina, Faauta ua ou saunia mea e taumafa: ua fafasi a’u povi ma a’u mea pepeti, ua saunia foi mea uma, ina o mai ia i le tausamaaga.
“A ua latou faatalaese mai, ua taitasi ma alu, o le tasi i lona fanua, ma le tasi i lana faatau.”7
I ona po anamua, o se tasi o taimi olioli i le olaga faaIutaia o se faafiafiaga o se faaipoipoga—o se gaoioiga e alu ai se vaiaso pe lua foi. O lena gaoioiga e manaomia ai fuafuaga mamao, ma e vave faailo mamao foi i malo, faatasi ai ma se faamanatu e auina atu i le aso e tatala ai faafiafiaga. O se valaaulia mai se tupu i tagata o lona malo i se faaipoipoga e pei o lenei, e tatau ona faitaulia o se poloaiga. Peitai, o le toatele o malo valaaulia i lenei faataoto e le’i o mai.8
“O le musu e auai i le tausamaaga a le tupu o se fouvale lea ma le loto i ai faasaga i le pule tautupu ma o se faatausuai foi lea faasaga i le tupu ma lona alo. O le teena e se tasi alii ae alu i lona fanua a o le isi i ana [mea na manao ai]”9 e ta’u mai ai le valea o mea na la faamuamua ma le matuai le amanaiaina lava o le finagalo o le tupu.10
Faaauau pea le faataoto:
“Ona fai atu ai lea o ia i ana auauna, Ua saunia lava le tausamaaga, a ua le aoga e na tala’iina.
“O lenei, ia outou o atu i ala tele, o i latou uma tou te iloa ai, tou te tala’i i ai le tausamaaga.
“Ona o atu ai lea o ia auauna i ala, ua latou faapotopoto uma e na latou iloa, o e leaga atoa ma e lelei, ona tumu ai lea o le mea na fai ai le tausamaaga i e na taooto e aai ai.”11
O tu ma aga i na ona po e mo le e talimalo i se tausamaaga o se faaipoipoga—i le faataoto lenei, o le tupu—e saunia ofu mo le au valaaulia i le faaipoipoga. O na ofu o le faaipoipoga o ni ofutalaloa masani, faigofie e ofuina e i latou uma e auai ai. O lea faiga, e le faaaogaina ai ni tulaga mamalu taualoa, ia mafai ai ona miō tutusa tagata uma i le tausamaaga.12
O tagata na valaaulia mai ala tele e auai i le tausamaaga o le a leai se taimi po o ni auala e maua ai ni ofu talafeagai e tapena ai mo le faamoemoe. O lea la, atonu na avatu e le tupu i le au valaaulia ni ofu mai ona lava laei. Sa tuu atu i tagata uma le avanoa e faaoofuina ai i latou lava i ofu o le aigatupu.13
Ina ua ulufale atu le tupu i le faletele, sa ia vaavaai atu i le aofia ma iloa vave atu ai se tasi na iloagofie e le o ofuina se ofu o le tausamaaga. Sa aumai le tagata i luma, ma sa fesili atu le tupu: “Sole, pe faapefea ona e ulufale mai iinei ua le ia te oe le ofu o le tausamaaga? Ona le gagana ai lea o ia.”14 O le mea taua, na fesili le tupu, “Aisea ua e le ofuina ai se ofu o le tausamaaga, a o lea na avatu mo oe se ofu?”15
Na iloagofie e lei faia faalelei ofu o lea alii mo lenei faamoemoe faapitoa, ma o le fasifuaitau, “Ona le gagana ai lea o ia,” e ta’u mai ai sa leai se ‘alofaga a le tagata.16
Ua tuuina mai e Elder James E. Talmage lenei faamatalaga taua e uiga i le taua o faatinoga a le tagata: “O le valaaulia e le’i ofu sa ta’usalaina i le faatamala, lē migao, po o nisi solitulafono matuia, ua manino mai le matalalaga. Muamua sa mamao le tofā faatamalii a le tupu, na sa fesili ai pe na faapefea ona ulufale atu le tagata e aunoa ma se ofu o le tausamaaga. Pe ana mafai e le tagata ona faamatala atu le tulagaese o lona ulufale atu, pe ana i ai foi sana ‘alofaga talafeagai e tuu atu, semanu lava e tautala atu; peitai ua ta’u mai ia i tatou sa le magagana o ia. O le poloaiga a le tupu na saoloto le tuuina atu ia i latou uma na maua e ana auauna; peitai e tatau ia i latou uma taitoatasi ona ulufale atu i le maota o le tupu e ala atu i le faitotoa; ma a o lei taunuu i le potu o le tausamaaga, lea o le a afio ane i ai le tupu lava ia, ua tatau ona oofu faalelei tagata taitasi; peitai o le toatasi e le’i ofu, pe na ulufale atu i se isi auala; ma e le’i savali atu i luma o leoleo faitotoa, o ia o sē na ulufale faagaoi.”17
Na ta’ua e se tusitala Kerisiano o John O. Reid e faapea, o le lē ofuina e le tagata o le ofu o le tausamaaga na faaalia ai le lē faaaloalo aliali i le tupu ma lona atalii. Sa na ona ia lē ofu i le ofu o le tausamaaga, ae, sa ia filifili foi e lē ofuina. Sa ia teena lava ma le fouvale e fai faalelei ona ofu mo le faamoemoe. Sa vave ma mautu le tali a le tupu: “Ia outou fusifusia ona vae ma ona lima, ma ave o ia, ma lafo i le pouliuli i fafo; e i ai le taufaitagiaue ma le lilivau o nifo.”18
O le faamasinoga a le tupu i le tagata sa lei faavaeina atoa i lona le ofuina o le ofu o le tausamaaga—ae o le mea moni, sa ia filima’oti e lē ofuina se ofu. Sa manao le tagata i le mamalu o le auai i le tausamaaga o le faaipoipoga, ae sa le’i manao e mulimuli i agaifanua a le tupu. Sa manao o ia e fai lava le mea i lana ala. O lona le ofu talafeagai na faaalia ai lona fouvale i le loto faasaga i le tupu ma ana faatonuga.”19
E Toatele E e Valaauina, ae Toaitiiti E Ua Filifilia
Ona faaiu ai lea o le faataoto i le mau faaootia loto lenei: “Aua e toatele ē e valaauina, ae toaitiiti ē e filifilia.”20
E malie, na faia e Iosefa Samita le fetuunaiga lenei i le fuaiupu lea mai le Mataio i lana faaliliuga musuia o le Tusi Paia: “Aua e toatele ua valaauina, ae toaitiiti ua filifilia; o le mea lea, e le oofu tagata uma i le ofu o le tausamaaga.”21
O le valaaulia i le tausamaaga o le faaipoipoga ma le filifiliga e ‘ai i le tausamaaga e faiā ae eseese. O le valaaulia e mo alii ma tamaitai uma. E mafai e se tagata e toatasi ona talia le valaaulia ma nofo ai i lalo i le tausamaaga—ae e le filifilia e ‘ai ona e le o ofuina le ofu talafeagai o le faaipoipoga o le faatuatua liua i le Alii o Iesu Keriso ma Lona alofatunoa paia. O lea la, ua ia i tatou le valaau a le Atua ma la tatou tali taitasi atu i lena valaau, ma e toatele e ono valaaulia ae toaitiiti e e filifilia.22
“O le avea ai pe avea foi ma tagata filifilia, e le o se mea faapea e na o i tatou ua faaee mai i ai. Ae, o le taualuga lava o oe ma a’u e mafai ona filifili ina ia filifilia e ala i le faaaogaina ma le amiotonu o lo tatou faitalia tatau.
Faamolemole matau nei le faaaogaina o le upu filifilia i fuaiupu nei mai le Mataupu Faavae ma Feagaiga:
“Faauta, e toatele e e valaaulia, ae toaitiiti e e filifilia. Ma aisea e lē filifiliaai i latou?
“Aua ua pupu tele o latou loto i mea o lenei lalolagi, ma saili i viiga a tagata.”23
“Ou te talitonu o loo tuusa’o mai lava le faatatauga o nei fuaiupu. E leai se lisi a le Atua o ni tagata e fiafia i ai, lea faapea tatou te faamoemoe e i ai se aso e faaopoopo atu i ai o tatou igoa. E le o fuapauina ‘le au filifilia’ na o nai tagata. Nai lo lena, o o tatou loto, o o tatou naunauga, o lo tatou faamamaluina o feagaiga ma sauniga paia o le talalelei, o lo tatou usiusitai i poloaiga, ma, o le mea e sili ona taua, o le alofatunoa togiola o le Faaola e filima’oti ai pe faitaulia i tatou o se tasi e filifilia e le Atua.24
“Ona ua matou galulue maelega e tusia nei mea, e faatauanau atu ai ia matou fanau, ma o matou uso foi, ia talitonu ia Keriso, ma ia faalelei ma le Atua; ona ua matou iloa e faaolaina i tatou i le alofa tunoa, pe a uma mea uma e mafai ona tatou faia.”25
I le pisi tele o o tatou olaga i aso taitasi, ma i le gaogaosa o le lalolagi o tatou ola ai nei, atonu e faasalaveia i tatou mai mea o le faavavau ia e sili ona taua e ala i le avea o fiafiaga, tamaoaiga, moomia, lauiloa ma a tatou faamuamua maualuga. O lo tatou mua’i nopia’i mo sina taimi i “mea o le lalolagi” ma “mamalu o tagata” e ono ta’ita’i atu ai i tatou e faaleaogaina lo tatou tofi ulumatua faaleagaga mo sina meaai itiiti.26
Folafolaga ma le Molimau
Ou te toe fai atu le apoapoaiga a le Alii i Lona nuu na auala atu i le perofeta o le Feagaiga Tuai o Hakai: “O lenei o loo faapea ona fetalai mai o Ieova o ‘au; Ia outou mafaufau i o outou ala.”27
E tatau ona taitasi i tatou ma iloilo faamaoni a tatou faamuamua faaletino ma faaleagaga ma le lototatalo ia faailoa mea i o tatou olaga e ono faalavelaveina ai le anoanoai o faamanuiaga ua naunau le Tama Faalelagi ma le Faaola e faaee mai i o tatou luga. O le a fesoasoani le Agaga Paia ia tatou vaai ia i tatou lava e pei ona tatou i ai moni.28
A tatou saili faalelei mo le meaalofa faaleagaga o mata ia vaai ma taliga ia faalogo,29 ou te folafola atu o le a faamanuiaina i tatou i le mana ma le faautautaga e faamalolosia ai a tatou sootaga faalefeagaiga ma le Alii soifua. O le a tatou mauaina foi le mana o le faaleatua i o tatou olaga30—ma i’u ai ina valaauina ma filifilia ai mo le tausamaaga a le Alii.
“Ala mai ia, inā ala mai ia, ofu lou malosi, E, Siona e.”31
“Aua e ao ina faateleina Siona i le matagofie, ma i le paia; o ona tuaoi e ao ina faalauteleina; o ona siteki e ao ina faamalolosia; ioe, e moni Ou te fai atu ia te outou, e ao ina tulai Siona ma ofu i ona ofu matagofie.”32
Ou te tautino atu ma le olioli la’u molimau e uiga i le paia ma le moni a’ia’i o le Atua soifua, o lo tatou Tama e Faavavau, ma Lona Alo Pele, o Iesu Keriso. Ou te molimau atu o Iesu Keriso o lo tatou Faaola ma le Togiola, ma o loo soifua o Ia. Ma ou te molimau atu foi na faaali atu le Tama ma le Alo i le taulealea o Iosefa Samita, ma o lea na amata ai le Toefuataiga mai o le talalelei a le Faaola i aso e gata ai. Ia tatou tofu sailia ma ia faamanuiaina i mata e vaai ma taliga e faalogo, ou te tatalo atu ai i le suafa paia o le Alii o Iesu Keriso, amene.