Lus Teb Yog Yexus
Txawm nyuaj npaum li cas los sis muaj kev kub ntxhov los, nej yeej nco qab tau hais tias lus teb yeej yooj yim; lus teb yeej yog Yexus txhua txhua lub sij hawm.
Kuv zoo siab los hais lus rau nej hauv lub rooj sab laj no. Hnub no kuv ua phooj ywg hais lus rau nej. Nyob hauv Phau Yauhas, tus Cawm Seej qhia tias peb yog Nws cov phooj ywg yog tias peb ua raws li Nws thov peb ua.1
Qhov uas txhua tus thiab sawv daws sib koom siab hlub tus Cawm Seej, yeej muab peb sib khi ua ke. Ib yam li Thawj Tswj Hwm Eyring qhia: “Kuv xav qhia nej tias tus Tswv yeej hlub thiab tso siab rau nej. Thiab, qhov tseem ceeb tshaj, kuv xav qhia nej hais tias Nws vam nej npaum li cas.”2
Thaum Thawj Tswj Hwm Russell M. Nelson hu kuv los ua ib tug Tuam Thawj Coj, kuv muaj ntau yam kev xav. Ua rau kuv xav tsis thoob. Kuv tus poj niam, Julie, thiab kuv wb tos hnub Saturday tuas tav su hauv lub tuam rooj sab laj. Kuv txo hwj chim thaum sawv daws txhawb nqa pom zoo rau kuv. Kuv tau ua tib zoo suav tej ruam taw uas kuv mus zaum xwv kom kuv yuav tsis ntog pem teb hauv kuv thawj txoj hauj lwm ntawd.
Thaum xaus lub rooj sab laj ntawd, txawm muaj ib yam dab tsi tseem ceeb uas tau hloov kuv lub siab. Cov mej zeej hauv pawg txwj laug tau sawv ua ib kab thiab tos txais cov Tuam Thawj Coj tshiab ib leeg dhau ib leeg. Txhua tus qhia lawv txoj kev hlub thiab kev txhawb pab rau peb. Lawv hais tias nyob zoo ces ntxiv tias, “Tsis txhob txhawj—koj koom peb lawm.”
Hais txog peb txoj kev sib raug zoo nrog tus Cawm Seej, Nws saib tib neeg lub siab thiab “tsis xaiv leej twg ntsej muag.”3 Sim xav seb Nws ua li cas thiaj xaiv Nws cov Thwj Tim. Nws tsis quav ntsej seb ua hauj lwm dab tsi los sis muaj nyiaj npaum li cas. Nws caw peb los raws Nws qab, thiab kuv ntseeg hais tias Nws qhia peb hais tias peb yeej nrog Nws sib koom siab.
Zaj xov no haj yam tseem ceeb rau cov neeg hluas hauv lub Koom Txoos. Kuv pom nej zoo li Thawj Tswj Hwm Nelson pom nej thiab. Nws hais tias “muaj ib yam dab tsi tshwj xeeb heev rau tiam neeg hluas no. Nej Leej Txiv Saum Ntuj Ceeb Tsheej yeej tso siab heev rau nej Nws thiaj xa nej los nyob hauv ntiaj teb thaum lub caij nyoog no. Nej yug los ua neeg zoo kawg nkaus!”4
Kuv muaj kev ris txiaj rau tej yam uas cov neeg hluas qhia kuv. Kuv muaj kev ris txiaj rau tej yam uas kuv cov me nyuam qhia kuv, rau tej uas peb cov tub txib qhia kuv, thiab rau tej yam uas kuv cov lawm tub thiab lawm ntxhais qhia rau kuv.
Tsis ntev tas los lawm, kuv tab tom ua teb nrog kuv tus lawm tub hu ua Nash. Nws muaj rau xyoo thiab muaj ib lub siab dawb siab zoo. Nws yog tus lawm tub hu ua Nash uas kuv nyiam tshaj plaws, thiab kuv ntseeg hais tias kuv yog nws tus dab laug uas hais lus hauv lub rooj sab laj uas nws nyiam tshaj plaws.
Thaum wb ua hauj lwm nws pab kuv ntaus tswv yim ces kuv hais tias, “Nash, qhov ntawd yog ib lub tswv yim zoo kawg. Koj ua li cas thiaj ua neeg txawj ntse tas npaud?” Nws ntsia kuv txawv txawv, qhov muag hlawv hlo thiab hais tias, “Dab Laug Ryan, ua cas koj thiaj tsis paub teb lus nug ko?”
Nws tshoom xub pwg yam tsis paub li, luag nyav, thiab hais tias, “Yexus.”
Hnub ntawd Nash ua rau kuv nco qab lo lus qhia yooj yim tshaj plaws. Lus teb rau tej lus nug yooj yim thiab cov teeb meem loj tshaj plaws yeej zoo tib yam. Lus teb yog Yexus Khetos. Kev kho tau txhua yam teeb meem yog los ntawm Nws.
Nyob hauv Phau Yauhas, tus Cawm Seej qhia Nws cov thwj tim tias Nws yuav npaj ib qho chaw rau lawv. Thaumas xav tsis thoob thiab hais rau tus Cawm Seej tias:
“Tus Tswv, peb tsis paub xyov koj yuav mus qhov twg; yog li ntawd, peb yuav ua li cas paub kev mus?
“Yexus teb Thaumas hais tias, Kuv yog txoj kev, yog qhov tseeb thiab yog txoj sia; tsis muaj leej twg mus cuag tau Leej Txiv tsuas yog mus ntawm kuv mus xwb thiaj tau.”5
Tus Cawm Seej qhia Nws cov thwj tiam tias Nws yog “txoj kev, qhov tseeb, thiab yog txoj sia.” Nws yog lus teb rau lo lus nug hais tias peb ua li cas thiaj los cuag tau Leej Txiv Saum Ntuj Ceeb Tsheej. Txoj kev muaj ib zag lus tim khawv txog Nws txoj hauj lwm hauv peb lub neej yog ib yam uas kuv tau kawm thaum kuv tseem ua tub hluas.
Thaum kuv yog ib tug tub txib nyob hauv Argentina, Thawj Tswj Hwm Howard W. Hunter tau caw peb los ua ib yam tseem ceeb uas tau hloov kuv lub neej. Nws hais tias, “Peb yuav tsum paub Yexus zoo tshaj peb paub nws; peb yuav tsum nco txog Yexus ntau tshaj peb nco txog nws; peb yuav tsum haj yam rau siab ntso ua hauj lwm pab Yexus ntaus tshaj qhov uas peb yuav pab nws.”6
Lub sij hawm ntawd, kuv tau xav paub seb kuv yuav li cas thiaj ua tau ib tug tub txib zoo dua. Nov yog lo lus teb: kom paub Yexus, kom nco txog Nws, thiab ua hauj lwm pab Nws. Cov tub txib thoob plaws ntiaj teb no sib koom siab muaj tib lub ntsiab lus no: caw lwm tus neeg los cuag Khetos thaum pab lawv lees txais txoj moo zoo uas txum tim rov qab los los ntawm txoj kev ntseeg Yexus Khetos thiab Nws txoj Kev Theej Txhoj, kev hloov siab lees txim, kev cai raus dej, txais lub txiaj ntsim Vaj Ntsuj Plig Dawb Huv, thiab nyiaj kom mus txog thaum kawg.7 Rau peb cov phooj ywg uas tab tom mloog cov tub txib cov lus, kuv kuj caw nej los cuag Khetos. Ua ke no peb yuav sim los kawm paub txog Nws, nco txog Nws, thiab ua hauj lwm pab Nws.
Txoj kev ua tub txib yog ib lub sij hawm dawb ceev hauv kuv lub neej. Thaum nws xam phaj kuv zaum kawg uas kuv ua tub txib, Thawj Tswj Hwm Blair Pincock qhia me ntsis txog tej kev hloov uas yuav muaj rau cov thawj coj rau cov tub txib, thaum nws thiab nws tus poj niam tab tom yuav nkawd txoj hauj lwm tas. Wb ob leeg tu siab vim wb yuav ncaim cov neeg uas wb hlub heev. Nws pom hais tias kuv txhawj vim kuv yuav tsis ua tub txib lawm. Nws yog ib tug neeg uas rau siab ntseeg thiab ua tib zoo qhia kuv rau ob xyoos lawm. Nws taw tes rau daim duab txog Yexus Khetos ntawm nws lub rooj thiab hais tias, “Txwj Laug Olsen, txhua yam yeej yuav zoo vim hais tias yeej yog Nws txoj hauj lwm ntag.” Kuv tau kev nplij siab vim kuv paub tias tus Cawm Seej yuav pab peb, tsis yog thaum peb ua txoj hauj lwm no xwb tiam sis txhua lub ciaj—yog tias peb cia Nws ua li ntawd.
Muam Pinock qhia peb los ntawm nws lub siab hais tej kab lus me me ua lus Mev. Thaum nws hais tias, “Jesucristo vive,” kuv paub tias qhov ntawd muaj tseeb thiab tias Nws yeej muaj sia nyob. Thaum nws hais tias, “Elderes y hermanas, les amo,” kuv thiaj paub tias nws hlub peb thiab xav kom peb yuav coj raws li tus Cawm Seej txhua lub sij hawm.
Kuv tus poj niam wb muaj hmoov ua qhov chaw qhia txoj moo zoo cov thawj coj tsis ntev tas los no nrog cov tub txib zoo hauv Uruguay. Kuv yuav hais tias lawv yog cov tub txib zoo tshaj plaws hauv ntiaj teb no, thiab kuv ntseeg hais tias txhua tus thawj coj rau tej qhov chaw qhia txoj moo zoo yuav xav tib yam li ntawd. Cov tub txib no qhia wb txhua hnub txog txoj kev raws tus Cawm Seej qab.
Thaum ib sij xam phaj lawv ib tug ntxhais txib los hauv hoob kas. Nws yog ib tug ntxhais txib zoo kawg nkaus, ib tug uas coj qhia cov tshiab, thiab ib tug thawj coj zoo. Nws cov khub saib nws rau nqi thiab tib neeg sawv daws hlub nws heev. Nws yeej mloog lus, txo hwj chim, thiab ua siab loj. Tej lub sij hawm tas los lawm wb tau sib tham txog nws qhov chaw thiab cov neeg uas nws tab tom qhia. Lub sij hawm no txawv. Kuv nug seb nws nyob li cas, vim kuv pom tias nws muaj ntsis ntxhov siab. Nws hais tias, “Thawj Tswj Hwm Olsen, kuv tsis paub seb kuv puas muaj peev xwm ua li no. Kuv tsis paub kuv puas yuav zoo txaus. Kuv tsis paub yog tias kuv muaj peev xwm ua ib tug ntxhais txib uas tus Tswv xav kom kuv ua.”
Nws yeej yog ib tug ntxhais txib zoo kawg nkaus. Yeej ua txhua yam zoo. Ib tug uas qhov chaw qhia txoj moo tus thawj tswj hwm xav kom sawv daws ua. Kuv yeej tsis tau txhawj txog nws txoj kev txawj ua ib tug ntxhais txib.
Thaum kuv mloog nws hais lus, kuv tsis paub seb kuv yuav hais li cas. Kuv ua tib zoo ntsiag tos thov Vajtswv hais tias: “Leej Txiv Saum Ntuj Ceeb Tsheej, nov yog ib tug ntxhais txib zoo kawg nkaus. Nws yog Koj li. Nws tab tom ua txhua yam zoo. Kuv tsis xav ua yuam kev li. Thov koj pab qhia seb kuv yuav tsum hais li cas.”
Kuv txawm hnov ib co lus. Kuv thiaj hais tias, “Hermana, thov txim uas koj xav li no. Cia kuv nug koj ib lo lus. Yog koj muaj ib tug phooj ywg uas koj tab tom qhia es tus ntawd xav li koj xav tam sim no, koj yuav hais li cas rau nws?”
Nws ntsia kuv thiab luag nyav. Nws ua siab loj li cov tub txib ua thiab hais lus tawv qhawv hais tias, “Thawj Tswj Hwm es, qhov ntawd yooj yim teb. Kuv yuav qhia tus ntawd hais tias tus Cawm Seej paub nws lub siab tag nrho. Kuv yuav qhia nws tias Yexus muaj sia nyob. Nws hlub nej. Koj yeej zoo txaus thiab koj yeej ua tau!”
Nws luag me ntsis thiab hais tias, “Kuv xav tias yog qhov no muaj tseeb hais txog peb cov phooj ywg, ces kuj muaj tseeb rau kuv thiab.”
Thaum twg peb muaj lus nug los sis kev tsis ntseeg, tej zaum peb yuav xav tias txoj kev kho yuav nyuaj heev los sis nrhiav lus teb tsuas muaj kev ntxhov siab xwb. Thov kom peb yuav nco qab hais tias dab ntxwg nyoog, tus uas yog leej txiv rau txhua yam kev dag, yog tus uas ua kom peb muaj kev ntxhov siab li no.8
Tus Cawm Seej yog tus Xib Hwb zoo rau qhov uas yooj yim.
Thawj Tswj Hwm Nelson tau hais tias:
“Tus yeeb ncuab txawj ntse heev. Tau ntev lawm nws ua kom neeg xav tias kev zoo yog kev phem thiab kev phem yog kev zoo. Nws tej zaj lus nrov thiab khav theeb.
“Tiam sis, tej zaj lus los ntawm peb Leej Txiv Saum Ntuj Ceeb Tsheej txawv heev. Nws hais lus ntsiag to, hais lus yooj yim, thiab hais lus meej heev peb thiaj to taub zoo.”9
Peb muaj kev ris txiaj heev vim Vajtswv hlub peb heev Nws thiaj xa Nws Tib Leeg Tub los. Nws yeej yog lus teb.
Thawj Tswj Hwm Nelson tau hais tias:
“Yuav tsum muaj Yexus Khetos txoj moo zoo niaj hnub no ntau tshaj yav tas los. …
“… Qhov no qhia tias tus Tswv tej lus rau Nws cov thwj tim tseem ceeb npaum li cas kom “mus thoob plaws lub ntiaj teb thiab qhia txoj moo zoo kom sawv daws hnov.”10
Cov uas txiav txim mus ua txoj hauj lwm no, kuv qhia tau tseeb hais tias nej yuav tau koob hmoov thaum nej ua raws li tus yaj saub hu nej mus ua. Txoj hauj lwm no tsis yog hais txog koj; nws yeej yog hais txog tus Cawm Seej. Nws yuav hu nej mus rau ib qho chaw, tiam sis tseem ceeb dua uas Nws hu nej mus qhia ib co neeg. Nej yuav muaj kev lav ris ntau thiab yuav foom koob hmoov rau ib co phooj ywg tshiab thaum pab lawv to taub tias Yexus yeej yog lo lus teb.
Nov yog Yexus Khetos Lub Koom Txoos ntawm Tsoom Haiv Neeg Ntseeg hauv Hnub Nyoog Kawg, thiab nov yog qhov chaw uas peb haum xeeb. Txhua yam uas Thawj Tswj Hwm Nelson thov peb ua yuav coj peb mus nyob ze dua tus Cawm Seej.
Hais rau peb cov neeg hluas zoo—kuj suav kuv tus kwv tub Nash—hauv tag nrho nej lub neej, txawm nyuaj npaum li cas los sis muaj kev kub ntxhov los, nej yeej nco qab tau hais tias lus teb yeej yooj yim: lus teb yeej yog Yexus txhua txhua lub sij hawm.
Xws li kuv hnov cov uas peb pom zoo ua cov yaj saub, cov pom tau, thiab cov qhia kev tshwm sim hais ntau ntau zaus lawm, kuv kuj hais rau nej hais tias peb hlub nej, peb ua nej tsaug, thiab peb xav tau nej. Nov yog qhov chaw rau nej haum xeeb.
Kuv hlub tus Cawm Seej. Kuv ua tim khawv txog Nws lub npe, uas yog Yexus Khetos. Kuv hais lus tim khawv tias Nws yog “peb lub hauv paus kev ntseeg thiab ua kom peb kev ntseeg tiav”,11 thiab Nws yog tus Xib Hwb ntawm qhov yooj yim. Lus teb yog Yexus. Los ntawm Yexus Khetos lub npe, amees.