Lub Hwj Chim ntawm txoj Lus
Muaj hwj chim ntawm tej lus uas los ntawm cov yaj saub thaum ub thiab cov yaj saub hauv lub caij nyoog no vim lawv tej lus yog tus Tswv tej lus.
Nyob hauv Phau Ntawv Maumoos, peb nyeem hauv ib nqe lus txog tus yaj saub Amas txoj kev txiav txim siab zoo. Ua ntej peb xav txog tej lo lus ntawd, thov xav nrog kuv lub caij nyoog nyuaj thaum ntawd ua ntej muaj txoj kev txiav txim siab zoo ntawd.
Muaj ib pawg haiv neeg uas lawv muab lawv tus kheej hu ua cov Neeg Xaulas, tau ncaim ntawm cov Neeg Nifais1 thiab tau sau ua ke ntawm ciam teb ntawm thaj av ze cov Neeg Lamas.2 Cov Neeg Nifais nyuam qhuav kov yeej cov Neeg Lamas ntawm ib npluav rog uas tsis tau pom dua uas kaum tawm txhiab tau raug tua,3 thiab lawv tau “ntshai heev tias tsam cov Neeg Xaulas ho pib sib tham nrog cov Neeg Lamas, thiab ntshai tias tsam qhov ntawd ho ua ib qho kev swb loj heev4 Tsis yog txhawj rau kev tsov rog xwb, tiam sis Amas tau kawm tias cov Neeg Xaulas, uas “tau muaj Vajtswv txoj lus qhuab qhia rau lawv,”5 tau pib tig mus teev tiam cov mlom thiab “tau hloov tus Tswv tej kev.”6 Tag nrho tej no ua rau Amas txhawj thiab ua rau nws “nyuaj siab heev.”7
Nyob hauv lub sij hawm no uas nyuaj heev, Amas tau xav txog seb nws yuav tsum ua li cas. Hauv nws txoj kev txiav txim siab peb nyeem tej los lus uas tau tseg cia los pab peb thiab qhia peb thaum peb muaj tej yam nyuaj heev hauv peb lub neej.8
“Thiab nim no, vim txoj kev qhia txog txoj lus muaj hwj chim coj tau cov neeg mus ua tej yam uas ncaj ncees—muaj tseeb tiag, txoj kev qhia txog txoj lus muaj hwj chim hloov cov neeg lub siab xav tshaj rab ntaj, los sis tshaj lwm yam huv tib si, uas tau tshwm sim rau lawv—yog li ntawd Amas thiaj xav tias tsim nyog rau lawv sim lub hwj chim ntawm Vajtswv txoj lus{.”9
Ntawm txhua yam uas pab tau lawv, Amas txoj kev ntseeg tau coj lawv mus tso siab rau tej hwj chim ntawm txoj lus. Qhov uas tau qhuab qhia txog tej zaj lus qhia uas zoo tshaj plaws hauv cov vaj lug kub tom qab txoj kev txiav txim siab ntawd yeej tsis yog ib qho uas lam tshwm sim xwb. Nyob hauv tshooj 32 thiab 33 ntawm Amas, peb nyeem txog nws tej lus qhia zoo txog kev ntseeg tus Tswv Yexus Khetos, thiab hauv tshooj 34 peb nrhiav tau Amulej tej kev qhia tseem ceeb txog Yexus Khetos txoj Kev Theej Txhoj.
Tej Lus Piv Txwv txog Lub Hwj Chim ntawm txoj Lus
Muaj tseeb tiag, thoob plaws cov vaj lug kub peb nyeem txog tib neeg uas muaj tej koob hmoov zoo tshaj los rau lawv thaum lawv xaiv kom siv lub hwj chim ntawm Vajtswv txoj lus hauv lawv lub neej.10 Kuv caw nej xav txog peb zaj lus piv txwv thaum peb tsom ntsoov rau Phau Ntawv Maumoos—ib phau uas Thawj Pawg Thawj Tswj Hwm Russell M. Nelson tau hais tias yog “peb [phau ntawv qhia] txog kev cawm seej hauv hnub nyoog kawg.”11
Zaj ib, Amas hais kom rov qab nco txog thaum tus Tswv cawm lawv tej yawg koob, ces nws qhia tias: “Saib seb, nws tau hloov lawv lub siab, muaj tseeb tiag, nws tsa lawv tsim ntawm ib tug dab ntub ntsiag zog, thiab lawv sawv los mus cuag Vajtswv. Saib seb, lawv tau nyob hauv plawv ntawm txoj kev tsaus ntuj; txawm li ntawd los, qhov kaj ntawm txoj lus uas kav ib txhis tau ua rau lawv tej ntsuj plig pom kev tuaj.”12 Tej zaum nej kuj xav tias zoo nkaus li nej nyob hauv plawv ntawm txoj kev tsaus ntuj. Nej tus ntsuj plig puas ntshaw tau qhov kaj? Yog xav tau, thov sim lub hwj chim ntawm Vajtswv txoj lus.
Zaj ob, xav txog cov Neeg Lamas txoj kev hloov siab los ntseeg, uas nws tau pom thaum nws yog ib tug tub txib, Amoos hais, “Saib seb, nws twb tso peb cov kwv tij pes tsawg txhiab leej dim ntawm ntuj txiag teb tsaus tej kev mob nkeeg; thiab coj tau lawv los hu nkauj txog txoj kev hlub uas txhiv dim, thiab muaj li no los twb vim yog lub hwj chim ntawm nws txoj lus uas yog nyob hauv peb.”13 Cov kwv tij thiab cov muam, muaj ntau tus nyob ib puag ncig peb uas xav kom ib tug uas peb hlub rov qab los hu nkauj txog kev hlub uas txhiv dim. Thaum peb ua txhua yam, thov kom peb nco qab siv lub hwj chim ntawm tus Tswv txoj lus uas nyob hauv peb.
Zaj peb, hauv phau Hilamas peb nyeem hais tias, “Muaj tseeb tiag, peb pom tias txhua tus uas xav tau yuav tuav tau Vajtswv txoj lus, uas muaj sia zees nyob thiab muaj hwj chim, uas yuav muab tag nrho tus dab phem tej kev dag ntxias thiab tej ntxiab thiab tej kev npaj ua phem faib hlo ua ob sab, thiab coj tus uas ntseeg Khetos nyob hauv txoj kev ti thiab nqaim kom hla dhau tus kwj tob tob ntawm kev nyuaj siab uas kav ib txhis … thiab lawv tej ntsuj plig mus txog … rau ntawm Vajtswv sab tes xis nyob hauv lub nceeg vaj ceeb tsheej.”14 Nej puas nrhiav ib txoj hauv kev mus dhau tag nrho cov dab phem tej kev dag ntxias thiab tej ntxiab thiab tej kev npaj ua phem uas muaj ntau nyob hauv tib neeg tej laj lim tswv yim hauv lub caij nyoog no? Nej puas muaj siab xav muab cov huab ntxhov siab uas los ntawm tej xov xwm ntau heev ntiab tawm kom thiaj ua tib zoo tsom ntsoov rau txoj kev ua raws li tej kev khi lus? Thov sim lub hwj chim ntawm Vajtswv txoj lus.
Los ntawm ib tug uas tau hloov los ua zoo los ntawm lub hwj chim ntawm txoj lus, kuv ua tim kawv txog qhov tseeb no uas peb tus yaj saub uas peb hlub, Thawj Tswj Hwm Russell M. Nelson tau qhia: “Kuv xav tias yus pom tau lub hwj chim ntawm Phau Ntawv Maumoos nyob hauv kev hloov siab tiag tiag ntawm cov ua nyeem ‘nrog lub siab dawb paug, nrog txoj kev thov tiag tiag, muaj txoj kev ntseeg Khetos.’ Cov neeg coob uas hloov siab los ntseeg tso ntau yam uas tseem ceeb rau lawv tseg kom thiaj li los ua raws li tej ntsiab cai hauv phau ntawv ntawd. … Phau ntawv ntawd yuav yog kev pab loj tshaj uas yuav pab coj neeg los cuag Khetos.”15
Lub Hauv Paus ntawm Hwj Chim
Hauv tej zaj no thiab lwm zaj, peb pom tau lub hwj chim ntawm Vajtswv txoj lus hauv Nws cov me nyuam lub neej. Tej zaum peb yuav xav nug, lub hauv paus ntawm lub hwj chim ntawd yog dab tsi?
Thaum peb xav txog txoj lus nug no, yuav tsum nco qab tias “txoj lus,” uas siv hauv vaj lug kub, muaj ob lub ntsiab cai. Tsis ntev tas los Txwj Laug David A. Bednar tau qhia tias “ib lub npe rau Yexus Khetos yog ‘Txoj Lus,’” thiab “tus Cawm Seej tej lus qhia, raws li muaj nyob hauv cov vaj lug kub dawb huv, kuj yog ‘txoj lus.’”16
Tus yaj saub Nifais tau qhia ntxiv txog qhov sib txuas ntawm ob lub ntsiab cai no thaum nws sau: “Cia li mloog tej lus no thiab ntseeg Khetos; thiab yog nej tsis ntseeg tej lus no los cia li ntseeg Khetos. Thiab yog nej ntseeg Khetos ces nej yuav ntseeg tej lus no, vim tej lus no yog Khetos tej lus, thiab nws tau muab tej lus no rau kuv.”17 Ces peb kawm tias muaj hwj chim ntawm tej lus uas los ntawm cov yaj saub thaum ub thiab cov yaj saub hauv lub caij nyoog no yeej yog vim lawv tej lus yog tus Tswv tej lus.18 Kuv cov phooj ywg zoo, qhov tseeb nyob mus ib txhis no yuav tseem ceeb heev txhawb nqa peb sab ntsuj plig hauv hnub nyoog kawg no19 thaum, ib yam li tau qhia tias, yuav muaj “kev tshaib kev nqhis, tiam sis tsis yog yuav nqhis dej nqhis mov. Lawv yuav tshaib thiab nqhis tus Tswv tej lus.”20
Thaum kawg, lub hwj chim ntawm Vajtswv txoj lus yog tus Tswv Yexus Khetos.21 Thaum peb to taub tej no ntxiv, peb yuav nkag siab yam muaj nuj nqis mus ib txhis txog qhov uas lub luag hauj lwm ntawm Nws cov yaj saub thiab tus Txhiv Dim yeej sib txuas ua ke. Peb txoj kev hlub rau Nws, peb txoj kev xav los nyob ze Nws thiab muaj Nws txoj kev hlub tsis tu tsis tseg,22 yuav ua rau peb xav xaiv lub hwj chim ntawm txoj lus hauv peb lub neej—ob lub hwj chim uas los ntawm Nws tus uas yog peb tus Cawm Seej thiab tus Txhiv Dim23 thiab lub hwj chim ua los ntawm cov lus “cov neeg uas tus Tswv tau xaiv tseg.”24 Peb yuav los saib pom tias, txawm lwm cov ntawv pab tau peb kawm ntxiv txog tus Cawm Seej thiab Nws cov yaj saub tej lus los, tsis txhob siv kom pauv tau. Peb yuav tsum rau siab kawm thiab nyeem25 ntawm lub hauv paus.26
Kuv hais txog kuv txoj kev hlub rau nej, kuv cov kwv tij thiab kuv cov muam. Vim kuv hlub nej, kuv thov kom nej sim lub hwj chim ntawm Vajtswv txoj lus, qhov tseem ceeb los ntawm Phau Ntawv Maumoos, txhua hnub hauv nej lub neej. Thaum nej ua li ntawd, ces nej yuav txais tej yam uas Thawj Tswj Hwm Russell M. Nelson tau cog lus tias: “Thaum nej ke thov Vajtswv ke kawm Phau Ntawv Maumoos txhua txhua hnub, nej yuav txiav txim siab zoo dua—txhua hnub. Kuv cog lus hais tias thaum nej xav txog tej yam uas nej kawm, lub rooj ntug yuav qhib plho, thiab nej yuav txais lus teb rau nej cov lus nug thiab kev coj rau nej lub neej. Kuv cog lus hais tias thaum nej rau rau siab nyeem Phau Ntawv Maumoos, nej yuav tiv thaiv nej tus kheej tawm ntawm tej kev phem uas muaj niaj hnub nim no.”27
Kuv ua tim khawv tias peb Leej Txiv Saum Ntuj Ceeb Tsheej tau muab txoj lus rau peb vim Nws hlub peb zoo tag nrho thiab Nws xav kom peb txhua tus rov qab mus cuag Nws thiab nrog Nws nyob mus ib txhis Kuv ua tim khawv tias “Txoj Lus … tau los yug ua neeg,”28 thiab ua tim khawv txog Yexus tus Khetos, thiab Nws lub hwj chim uas cawm peb tau thiab txhiv peb dim. Kuv paub tias Nws lub hwj chim los muaj nyob hauv Nws cov yaj saub tej lus, cov yaj saub puag thaum ub thiab niaj hnub nim no.
Kuv thov Vajtswv kom peb muaj tswv yim thiab muaj siab mos siab muag los tuav ruaj29 rau Vajtswv txoj lus thiab taug kev raws nraim txoj kev khi lus uas yuav coj peb mus txais kev tsa nto thiab txoj sia nyob mus ib txhis.30 Thov kom peb muaj kev hloov siab tiag tiag tas mus li uas peb txhua tus txais tau los ntawm lub hwj chim ntawm Txoj Lus.31 Los ntawm Yexus Khetos lub npe, amees.