Anonga Ekiek won ewe Tempel
Uwa pwon ngenikemi pwe anapeno fansoun non ewe tempel epwe efeiochu manauemi non ekkewe napanap ese pwan wor ew epwe tongeni.
Achengicheng pwi me fefinei, non ekkei nimu amwararen mwichen mwichenap, sia pwan sinei sefani pwe ekkewe nang ir mi suk! Uwa iotek pwe ami oua fen makketiw met ami mefi seni ewe ngun me oupwe tapweno mwirin met oua mefi. Semach won Nang me Noun we Achengicheng, Jises Kraist, ra moneta ar repwe anisikemi. Uwa mochen oupwe anapano ami achocho ne kutta Ar aninnis.
Ese mo towaweno fansoun, am me Sister Nelson aua tongeni katon ewe minafon 4 kinikin ekkewe Kachiton ewe Puken Mormon.1 Am oua mwasangasang rer! Ouse mochen mut ngeni ei upwe pwar ngeni kemi ew mochomochen kinikin seni ewe kinikin a pwano an ewe Chon Amanau ewe pwa ngeni ekkewe chon Nifai.
A auchea pwe ewe Chon Amanau a fini an epwe pwa ngeni ekkewe aramas non ewe tempel. Ina Imwan. A ureno ren An manaman. Sisap tongeni nemenano met ewe Samon a fori fan itach iei. A fori An kewe tempel repwe kon mecheres ngenikich. A emwitiri fansoun ach sia aueta ekkewe tempel. A anapano ach tufich ne anisi ewe ionfengenin Israel. A pwan fori an epwe mecheres ngeni emon me emon kich ach sipwe nimenimochuno non pekin ngun. Uwa pwon ngeni kemi pwe anapano fansoun non ewe tempel epwe efeiochu manauemi non ekkewe napanap ese pwan wor ew epwe tongeni.
Iei mi wor 168 tempel mi suk me 53 minafon tempel ra kauta iei me pwan 54 a wor kokot won napanapen koutan!2 Uwa ani pwapwan ai upwe esinesin ach kokkot ne aueta minafo tempel non ew me ew ekkei neni: Busan, Korea; Naga, Philippines; Santiago, Philippines; Eket, Nigeria; Chiclayo, Peru; Buenos Aires City Center, Argentina; Londrina, Brazil; Ribeirão Prêto, Brazil; Huehuetenango, Guatemala; Jacksonville, Florida; Grand Rapids, Michigan; Prosper, Texas; Lone Mountain, Nevada; me Tacoma, Washington.
Sia pwan kokkot an epwe kouta fitu tempel non ekkewe neni mi kefinita non ewe kinikin nenien teninimw watte ikewe fansoun sai ngeni ew tempel mi wor a ew watten sossot. Ina minne, ua pwapwa ai upwe awora esinesin ren ruanu neni mi kapacheta arapakan ngeni Mexico City ikewe ekkewe minafon tempel repwe kouta.
Achengicheng pwi me fefinei, amo oupwe anonga ami ekiek won ewe tempel non sokkun napanap ouse fofori me akkom. Uwa efeiochukemi pwe oupwe arap ngeni Kot me Jises Kraist iteitan ran. Ngang ua tongekemi. Amo Kot epwe nonom remi tori ach chu sefan, ua iotek non ewe it mi pin Jises Kraist, amen.