Kukuta Pusin om Kinamwe
Ua iotek pwe oupwe kuna kinamwe, anisi chommong neich ar repwe kuna, me pwan sosopeno.
Pwi me fefineni achengicheng, sia fen feioch seni ekkewe amwasangasangen afanafan me ekkewe amwararen kon a fen ku netipach non poputan mwich ren mwichenap. Aua kinisou ngonuk ren ami fitikich me ami nuku.
Ikenai upwe kapas won met ua fen kaeo usun ewe manamanen kukuta pusin om kinamwe, non sokkun nonomun manauach. Ewe Chon Amanau mi sinei pwe meinisin noun Samach won Nang semirit ra mochen kuna kinamwe, me A apasa pwe I a tongeni ngeni kich kinamwe. Ka chechemeni ewe kapasen Jises Kraist mi maketiw non puken John: “Kinamwe uwa fang ngonuk, Ai kinamwe upwe fang ngonuk; esap usun an fonufan fangafang, fang ngang ngonuk. Ousap noninen are osukosuk, ousap pwan nuokus.”1
Met I a kapas usun ren kinamwe me ifa usun I epwe awora ra pwa seni ekkewe nonomun ekana ra rong An apasa ekkei kapas. Ausening ngeni makan non John ren anononun an Kraist we afanafan fetan. Eniuokusun pochokunen chon ungeni ra eriaffou I me epwe mwitir tori Noun kewe Chon kuno.
Ikkei an ewe Chon Amanau kapas:
“Ika pwe ami mi tongei ei, iwe oupwe anneasochisi ai kewe annuk.
“Me upwe tingor ngeni ewe Sam, iwe epwe ngeni kemi pwan emon Chon Oururu, pwe epwe chok nonnom remi feifeino;
“I ewe Ngunun ennet; fonufan ese tongeni etiwa, pun ese tongeni kuna are sinei i: Nge ami oua sinei, pun a nonnom remi o a nonnom non ami.
“Usap nikitikemino: upwe niwinsefaniti kemi.
“Ekis fansoun mwirin, me ewe fonufan rese chiwen kuna ei; nge oupwe kuna ei: pokiten Ngang mi manau, oupwe pwan manau.
“Non ena fansoun oupwe sinei pwe Ngang mi nonom non Semei, me ami non ngang, me ngang non ami.
“Ion mi isoni ai kewe annuk, me anneasochisi, i mi tongei ei: me ion mi tongei ei mi pwan tongei Semei Kot, me I upwe tongei, me pwarano inisi ngeni i.
“Judas a apasa ngeni i, esap Iscariot, Samon, ifa usun epwe pwari pusin i ngeni kem, nge esap ngeni ewe fonufan?
“Jises a ponuweni me a apasa ngeni atewe. ika emon a tonge ei, epwe ausening ai kapas: me Semei epwe tongei i, me aupwe feito ngeni i, me aupwe pwon ngeni i.
“Ion ese tongei ei ese aponueta ai kapas: me ekkewe kapas a ausening esap ai, nge Semei we mine a tinieito.
“Ikkei ekkei mettoch ua apasa ngonuk, nge nonom reom.
“Ewe Chon Oururu, ewe Ngun mi Fel, I ewe Sam epwe tinato fan itei, epwe aiti ngeni kemi mettoch meinisin o epwe achema ngeni kemi mettoch meinisin minne ua fen ereni kemi.
“Upwe ngenikemi kinamwe, upwe fang ngeni kemi pwisin ai kinamwe: esap usun an fonufan fang ngenikemi. Ousap noninen are osukosuk, ousap pwan nuokus.”2
Ua kaeo ukukun nimu ennet seni ena afanafan an ewe Chon Amanau.
Ewin, ewe nifangen kinamwe a ngonuk mwirin sia ani nuku ne aponueta An kewe annuk. Fiti ekkewe memper mi pwon seni an ewe Samon we Mwichefen, anneasosich iei met sia fen pwon sipwe fori.
Oruwan, ewe Ngun mi Fel epwe feito me nonom rech. Ewe Samon a apasa pwe ika sia sopweno ne nikitu, ewe Ngun mi Fel epwe nonom non kich. Ina ewe pwon non ewe iotekin sakrament pwe ewe Ngun epwe chiechiach me sipwe mefi, non netipach me ekiekich, An ourur.
Ounungatin, ewe Chon Amanau a pwon pwe ika sia aponueta ach kewe pwon mi pin, sia tongeni mefi ewe tong an ewe Sam me Noun we ren emon me emon me ren kich. Sia tongeni mefi ar arap ngeni non manauach, usun chok nupwen sipwe feioch ne nonom Rer feinfeino.
Oruanun, aponuetan an ewe Samon kewe annuk a auchea nap seni anneasosich. Sipwe fokkun tongei Kot ren unusen netipach, ach pochokun, ekiekich, me ngunuch.3
Ekkewe rese tongei I rese aponueta An kewe annuk. Me ewer resap angei ewe nifangen kinamwe non ei manau me non ewe fonufan epwe feito.
Enimuan, mi fat pwe ewe Samon amen fokkun tongei kich a moni niwinin ach tipis pwe sipwe tongeni—seni ach nuku non I me ach aiersefan, me ren pochokunen An Achasefan—ani ewe nifangen kinamwe ewe “sise tongeni weweiti”4 non ei manau fiti I feinfeino chok.
Ekkoch me neimi, ika chommong, resap mefi ewe kinamwe ewe Samon a pwonei. Meni oupwe iotek ren pusin ami kinamwe me ourur non pekin ngun. Iwe nge meni oupwe mefi pwe ekkewe nang repwe mosonoson ngeni om tingor fan iten kinamwe.
Mi wor emon chon oputa ngunumi ewe ese mochen ami me ekkewe oua tonger ami oupwe kuna kinamwe. Ese tongeni epwe sani. A anganga an epwe epetuk seni om kopwe mochen kuta ena kinamwe ewe Chon Amanau me Samach won Nang ra mochen kopwe angei.
An Setan angang weires an epwe pwarano koput me tipengaw unukuch usun a watteno. Sia kuna an a fis ngeni unusen fonu me neni, me teninimw, non neniach kewe, won mecha ren fon me kampiuter, me non unusen fonufan.
Pwan mo iei mi wor popun epwe wor epinukunuk: iei ewe Saramen Kraist a nonom non emon me emon monukon a keran uputiw. Ren ena niffang epwe wor eu memef ren met mi pung, eu mochenin tongei emon me mefi tong. Mei pusin wor ew memefin pungoch me ennet non meinisin noun Kot semirit nupwen atewe ika neminewe a feitto non ei manau.
Ach epinukunuk ren pusin kinamwein ekkena semirit ra nom ren ekkewe aramas ra tumunur. Ika ekkewe chon amarir me angang ngenir ra fen anganga ar repwe angei ewe nifangen kinamwe seni ewe Chon Amanau, seni pusin an emon nenien apiru me angang weires, repwe pesei an ewe semirit nuku an epwe tufich ngeni ewe umoumochun nifangen kinamwe.
Ina met ekkewe pukefel ra aitikich, “Aiti emon smirit non an epwe feino: me nupwen a mwukono, esapw feino seni.”5 Epwe tufich ngeni ekkewe ra tumunu ewe semirit me amari ar repwe nimenimoch ngeni ewe nifangen kinamwe.
Netipengawan, kich meinisin sia mefi ewe metek nupwen semirit ra marita seni ekkewe umoumochun sam me in—fan ekkoch emon chok sam ika in—ra fini, mwirin eu nakatamen nuku me kinamwe, ar repwe angei ewe anen netipechou.
Ina mwo ika a wor netipengaw, ai nuku a nom non pwan eu nifang seni ewe Samon. Iei: A amarieta chommong chon fori kinamwe nein Noun kewe chon kuno mi nukuchar. Rafen mefi ewe kinamwe me ewe tong an Kot. Ewe Ngun mi Fel a nonom non manauer, me ewe Samon a tongeni emwenir ar repwe anisi ekkewe siip mi mwonucheno.
Ua fen kuna non nakatamen manauei me non unusen fonufan. Kafen pwan pusin kuna. Fan ekkoch, nupwen ka fen emwenino ngeni ewe angangen amanaua, epwe nikinikin nge seran chok.
Ew fansoun, ua tingorei emon ua churi non ai sai, “kose mochen kopwe aporousa ei ekis usun porousen om famini?” Am porous nefinem a emwen ngeniei ei aupwe tingor upwe katon echo sassingin noun fopun, ewe a apasa pwe a tinisuk. Ua mairu ren ewe umoumoch won sangunun me non mesan ena nengin me non ewe sasing. Ua mefi ai mwar ne tingor ika mi tufich upwe angei an email. Noun we nengnin a morukono non na fansoun me a aureki ika a wor an Kot kapas fan itan. Mi wor. Iei: “Ewe Samon a tongeok. Iteitan Ewe Samon a mochen kopwe niwinsefan. Om kewe pwonen efeioch mi chiwen nom.”
Memper non unusen ewe Mwichefen sia mefi an ewe Samon nifang fan iten an emon me emon kinamwe. A pesei meinisin sipwe anisi ekkoch repwe wor ar tufichin feito ngeni I me tufich ngeni pwan ena chok kinamwe won winikaper. Ir, ren ena, ra pusin fini ne kuta ewe amemefin ewe Ngun ar repwe sinei ifa usun ar repwe pwan ngeni emon ena nifang.
Ewe minefon tapin aramas epwe winiti ewe chon tumunu ewe tapin aramas repwe tapwoto. Ewe ekkesiwin mi napeno epwe awora ew manaman. Epwe chou fetan me marino non fansoun me fansoun, me muun ewe Samon won fonufan epwe taweno me monneta an epwe etiwa I fiti puchor mwareiti. Epwe wor kinamwe non fonufan.
Ua apasa ai ennetin pwarata pwe ewe Chon Amanau mi manau me A emweni ei Mwichefen. Ua mefi An tong non manauei me An tong me ourek fan iten meinisin noun Samach won Nang semirit. An ewe Chon Amanau tingor kopwe feito ngeni I ewe epwe ngonuk kinamwe.
Preseten Russell M. Nelson I ewe soufosun Kot mi manau non unusen fonufan. Afen apasa, “Ua ngonuk ai kapas pwe inamo ren nonomun fonufan me pusin nonomum, ka tongeni mesengeni fansoun mwach fiti epinukunuk me pwapwa .”6
Upwe pwarano ai tongekemi. Ami wachimuken nuku me tong ra tori aramas me mut ngeni ewe Samon epwe siwini ekkewe netip me anapano ew mochen ne ngeni ekkoch kewe niffangen kinamwe mine sise weweiti.
Ua iotek pwe oupwe kuna kinamwe, anisi chommong ekkoch aramas ar repwe kuna, me ngeni pwan ekkoch. Epwe wor amwararen ngoroun ierin kinamwe nupwen ewe Samon epwe niwinsefanito. Ua wesen pwarata non pwapwa me non itan Jises Kraist, amen.