Ñandejára Jesucristo Ñanembo’e Ñaministra Hag̃ua
Ñande Salvador pytyvõ reheve, ikatu jahayhu Ijovechakuéra hepyetévape ha ñaministra chupekuéra Ha’e ojapoháichane.
Ñandejára Jesucristo he’iva’ekue:
“Che ha’e pe ovecharerekua imba’eporãva; pe ovecharerekua Imba’eporãva ome’ẽva’ekue hekove ovechakuérare. …
“Túva chekuaaháicha, che avei aikuaa Túvape: ha ame’ẽ che rekove ovechakuérare.”1
Umi escritura versiõ griega-pe, upe ñeʼẽ mba’eporã heʼise avei “marangatu, tuichaitereivéva”. Upévare ko árape, añe’ẽse pe Ovecharerekua Imba’eporãvare, pe Ovecharerekua Marangatu, pe Ovecharerekua Tuichaitereivéva rehe, ha’éva, Jesucristo.
Nuevo Testamento-pe, oñehenói Chupe “ovecharerekua guasu”,2 pe “Ovecharerekua ruvicha”,3 ha “[Ñane] ánga Ovecharerekua ha Obispo.”4
Antiguo Testamento-pe, Isaías ohai “ha’e omongarúta ijovechakuéra ovecharerekuáicha.”5
Mormón Kuatiañe’ẽme, oñehenói Chupe “ovecharerekua marangatu”6 ha “ovecharerekua tuicha ha añeteguáva.”7
Doctrina ha Konvéniokuérape, Ha’e odeklara: “Upévare, Che aime penembytépe, ha Che haʼe ovecharerekua imbaʼeporãva.”8
Ñande árape, Presidente Russell M.Nelson odeklara: “Pe Ovecharerekua Mba’eporã oñangareko mborayhúpe opa ovechakuéra Irredil peguáre, ha ñande ha’e Ijovecharerekua’ikuéra añetegua. Jaguereko privilegio jaguerahávo Imborayhu ha ñamoirũvévo ñande mborayhu umi angirũ ha vesínope g̃uarã—ñamongaru, ñañangareko ha ñamongakuaávo chupekuéra—pe Salvador oipotaháicha jajapo.”9
Ramoite, Presidente Nelson he’íkuri: “Peteĩ séllo odistingíva Ñandejára Tupao añetegua ha oikovévape ha’éta tapiaite peteĩ ñeha’ã oñemohendaporãva, ohóva oñeministra hag̃uáicha peteĩteĩ Tupã ra’ykuéra ha ifamiliakuérape. Ha’égui Itupao, ñande Isiervokuéraramo ñaministra peteĩteĩme, Ha’e ojapo haguéicha. Ñaministráta Hérape, Ipu’aka ha autorida reheve, ha Imba’eporã reheve.”10
Umi fariséo ha escriba oñe’ẽñemi jave Ñandejárare, “he’ívo, ko kuimba’e orresivi pekadorkuérape ha okaru hendivekuéra”,11 Ha’e ombohovái opresentávo mbohapy tembiasakue porãite jaikuaáva pe ovecha okañýva parávolaicha, pe monéda okañýva parávola ha pe ta’ýra pródigo parávolaicha.
Iporã jaikuaa Lucas, upe Evanhélio ohaiva’ekue, oguerúramoguare umi mbohapy mombe’upy, oipuruha upe ñe’ẽ parávola singular-pe, ndaha’éi plural-pe.12 Ha’ete Ñandejára ombo’eha peteĩ mbo’epy ijojaha’ỹva mbohapy tembiasakue reheve—tembiasakue ohechaukáva número iñambuéva: cien ovecha, diez monéda ha mokõi ta’ýra.
Ha katu, pe número kláve peteĩteĩ ko’ã tembiasakuépe, ha’e pe número peteĩ. Ha peteĩ mbo’epy ikatúva jaipe’a upe número-gui ha’e ikatuha peẽ ha’e peteĩ ovecharerekua’i 100 élder ha tenondevépe g̃uarã élder pende elder-kuéra cuórum-pe térã peteĩ asesora 10 mitãkuñáme g̃uarã térã peteĩ mbo’ehára mokõi mitã Primaria-pe g̃uarã, ha katu akóinte, akóinte peministra chupekuéra, peñangareko hesekuéra, ha pehayhúvo chupekuéra, peteĩteĩme. Arakaʼeve ndapejéi, “Ajépa itavyrai pe ovecha” térã “Añetehápe, che naikotevẽi upe monéda” térã “Ajépa irrevélde pe taʼýra.” Peẽ ha che jaguerekóramo ñanendive “Cristo mborayhu potĩ”,13 ñande, pe kuimba’e ovecha okañýva rembiasakuepeguáicha, “jahejáta umi noventa y nueve … ha jaha pe okañýva rapykuéri, jajuhu peve [… jajuhu peve … jajuhu peve… ].”14 Térã, pe kuña oĩva monéda okañýva rembiasakuepeguáicha, “ñamyandýta peteĩ tataindy, ha ñambojeréta pe óga, ha jahekáta tesarekópe [… tesarekópe] jajuhu peve [… jajuhu peve … jajuhu peve].”15 Jaguerekóramo ñanendive “Cristo mborayhu potĩ”, jasegíta pe túva techapyrã pe ta’ýra pródigo rembiasakuepeguáre, pe ta’ýra “upe, oĩrõguare mombyry, … ohecha chupe, ha oiporiahuvereko, ha oñani, ha ojeity ijajúrare, ha ohetũ chupe.”16
Ikatu piko ñañandu pe urgencia oĩva pe kuimba’e korasõme peteĩ ovecha añónte operdeva’ekue? Térã pe urgencia oĩva pe kuña korasõme operdevaʼekue peteĩ monédante? Térã pe mborayhu ha poriahuvereko oje’e’ỹva oĩva pe ta’ýra pródigo túva korasõme?
Che rembireko, María Isabel, ha che roservi Centroamérica-pe, roikóvo Ciudad de Guatemala-pe. Upépe areko oportunida aikuaávo Julia-pe, peteĩ Tupao miembro hekojojáva. Aguereko pe impresiõ aporandumi hag̃ua chupe ifamilia rehe. Isy omano cáncer-gui ary 2011-pe. Itúva ha’ékuri peteĩ líder hekojojáva ijestákape, oservívo obispo ha ipresidente de estaca-konsehéro ramo heta áño aja. Ha’eva’ekue peteĩ ovecharerekua’i añetéva Ñandejárape g̃uarã. Julia omombe’u chéve upe iñeha’ã ikane’õ’ỹre ovisita, oministra ha oservi hag̃ua. Añetehápe ha’e ovy’a omongaru ha oñangarekóvo Ñandejára ovechakuéra hepyetereívare. Omenda jey ha opyta activo Tupaópe.
Heta áño rire, ojopoi hembirekóndi, ha koʼág̃a oho jeyvaʼerã tupaópe haʼeño. Haʼe oñeñandu ndoikoiha hendaitépe ha oñandu avei oĩha tapicha oñe’ẽva hese ojopoi haguére. Ndohovéikuri tupaópe peteĩ espíritu negativo omyenyhẽgui ikorasõ.
Julia oñe’ẽ porãiterei ko ovecharerekua hechapyrãvare, ha’éva peteĩ kuimba’e omba’apo mbaretéva, oporohayhúva ha oiporiahuverekóva. Chemandu’a porã ou hague chéve peteĩ temiandu iñurgénteva ha’e odescribi aja chupe. Ajaposénte peteĩ mba’e upe kuimba’épe g̃uarã, peteĩ kuimba’e ojapova’ekue hetaiterei mba’e heta tapichápe g̃uarã umi áño pukukue aja.
Ha’e ome’ẽ chéve iteléfono número, ha añepyrũ ahenói chupe, aha’arõvo areko oportunida aikuaa hag̃ua chupe personalmente. Heta semana ha heta, heta llamada telefónica rire osẽ porã’ỹre, peteĩ ára ipahápe ombohovái upe teléfono.
Amombe’u chupe aikuaahague Julia, itajýrape, ha che kautivaha pe mbaʼéichapa haʼe oservi, oministra ha ohayhuhague umi Ñandejára ovecha hepyetévape hetaiterei áño aja. Haʼe nohaʼarõikuri peteĩ komentário peichagua. Ha’e chupe añetehápe añemongetaseha hendie ojohovake. Oporandu chéve che propósito aproponévo péichagua ñembyaty. Ambohovái chupe, “Añetehápe aikuaaseterei peteĩ kuñataĩ hechapyrãva túvape.” Upereire, unos segundos aja oĩ kirirĩ teléfono-pe—segundos ha’etéva chéve peteĩ opave´ỹtava. Haʼe heʼimínte: “Arakaʼépa ha moõpa?”
Pe ára ajotopahague hendive, a’invita chupe okomparti hag̃ua chendive umi experiencia ovisita, oministra ha oservi aja umi Ñandejára ovecha hepyetévape. Omombe’u aja mayma historia conmovedora, ahechakuaa iñe’ẽpu iñambueha ha ou jeyhague pe espíritu-ete ha’e oñanduva’ekue heta jeyve peteĩ ovecharerekua’i ramo. Ko’ágã henyhẽ hesa tesaýgui. Aikuaákuri upéva ha’eha pe moménto oportuno chéve g̃uarã, ha katu ahechakuaa ndaikuaaiha mba’épa ha’éta. Añembo’e che akãme: “Túva, chepytyvõmi”.
Sapy’aitépe, ahendu chejupe ha’évo: “Hermano Florián, Ñandejára siervo ramo, ajerure ndéve disculpa ndoroiméi haguére upépe nde ykére. Oreperdonami. Eme’ẽ oréve ambue oportunida rohechauka hag̃ua ndéve ore mborayhu. Roikotevẽha nderehe. Nde tuichamba’e oréve g̃uarã.”
Pe domingo oúvape haʼe ou jey. Are oñe’ẽ ijobispo ndive ha opyta activo. Meses upe riremi omano—ha katu ou jeýkuri. Ou jeýkuri. Atestifika ñande Salvador pytyvõ rupive, ikatuha jahayhu Ijovechakuéra hepyetévape ha ñaministra chupekuéra Ha’e ojapoháichane. Upéicha, upépe Ciudad de Guatemala-pe Ñandejára Jesucristo ogueru jey peteĩve ovecha hepyetéva Irreváñope. Ha chemboʼevaʼekue peteĩ lección ministrasiõ rehegua ndaikatúiva cheresarái. Pe Ovecharerekua Mbaʼeporã, pe Ovecharerekua Marangatu, pe Ovecharerekua Tuichaitereivéva rérape, jepeve Ñandejára Jesucristo. Amén.