Gikinahanglan ang mga Tigpasiugda og Kalinaw
Kamo adunay inyong kabubut-on sa pagpili og panagbingkil o panag-uli. Ako moawhag ninyo sa pagpili nga mahimong tigpasiugda og kalinaw, karon ug sa kanunay.
Minahal kong kaigsoonan, makalipay ang pagpakig-uban kaninyo. Atol niining milabay nga unom ka bulan, kanunay kamong ania sa akong hunahuna ug sa akong mga pag-ampo. Ako nag-ampo nga ang Espiritu Santo mosulti unsa ang gusto sa Ginoo nga inyong madunggan samtang ako mamulong kaninyo karon.
Atol sa akong pagka-intern sa operasyon daghang tuig na ang milabay, ako mitabang sa usa ka doktor nga nagputol sa usa ka bitiis nga adunay grabe nga makatakod nga gangrina. Ang operasyon lisod. Dayon, ang nakadugang sa tensiyon, mao ang usa sa kauban sa team nga wala taronga sa paghimo ang buluhaton, ug ang doktor nasuko pag-ayo. Sa tungatunga sa iyang sapot, gilabay niya ang iyang scalpel nga puno sa mga kagaw. Mitugpa kini sa akong bukton!
Ang tanan nga diha sa kwarto sa operasyon—gawas sa doktor nga wala makakontrol sa iyang emosyon—nakugang niining makuyaw nga wala pagsunod sa tukma nga pamaagi sa paghimo og operasyon. Salamat na lang, nga ako wala matakdi. Apan kini nga kasinatian nagbilin nako og walay kataposan nga impresyon. Nianang mao nga oras, ako misaad sa akong kaugalingon nga bisan unsa ang mahitabo sa akong kwarto sa operasyon, ako dili gayod mawad-an sa pagkontrol sa akong mga emosyon. Ako usab nanumpa nianang adlawa nga dili gayod molabay og bisan unsa samtang anaa sa kasuko—ma-scalpel man o mga pulong.
Bisan karon, mga dekada na ang milabay, naghunahuna gihapon ko kon ang kontaminado nga scalpel nga mitugpa sa akong bukton mas makahilo pa ba kay sa ka-lala sa panagbingkil nga mitakboy sa atong sibiko nga panagsultihanay ug daghan usab kaayo nga personal nga mga relasyon karon. Ang pagkasibilisado ug ang pagkadesente ingon og nawala atol niining panahon sa panagkabahin ug mainiton nga panagsumpaki.
Ang pagkabulgar, pagpangitag sayop, ug pagsulti og daotan sa uban komon na kaayo. Daghan kaayong mga eksperto, mga politiko, mga tiglingaw, ug ubang mga tig-impluwensya nga manginsulto kanunay. Ako nabalaka pag-ayo nga daghan kaayong tawo ingon og nagtuo nga madawat ra sa hingpit ang pagkondinar, paglibak, ug pagkaminos ni bisan kinsa nga dili mouyon nila. Daghan ang ingon og ganahan nga modaot sa reputasyon sa uban gamit ang pagtamay ug masakit nga mga pamahayag!
Ang kasuko dili gayod makaawhag. Ang pagpakig-away dili makapalig-on sa usa ka tawo. Ang panagbingkil dili gayod mosangpot ngadto sa dinasig nga mga kasulbaran. Subo lang, usahay makita nato ang mabingkilon nga kinaiya bisan sa atong mga miyembro sa Simbahan. Kita makadungog niadtong nakaminos sa ilang mga kapikas ug mga anak, nga mogamit sa kasuko sa pagkontrol sa uban, ug niadtong kinsa mosilot sa mga sakop sa pamilya pinaagi sa “dili pagtingganay.” Kita makadungog sa kabatan-onan ug kabataan nga modaogdaog ug mga empleyado nga mopakaulaw sa ilang mga kauban.
Akong minahal nga kaigsoonan, dili kini angay. Isip mga disipulo ni Jesukristo, kita ang mga ehemplo kon unsaon sa pagtagad ang uban—ilabi na kon kita adunay managlahi nga opinyon. Usa sa labing sayon nga paagi sa pag-ila sa usa ka tinuod nga sumusunod ni Jesukristo mao ang maluluy-on nga pagtagad niana nga tawo ngadto sa ubang tawo.
Ang Manluluwas miklaro sa Iyang mga wali ngadto sa mga sumusunod sa duha ka bahin sa kalibotan. “Bulahan ang mga tigpasiugda sa kalinaw,” Siya miingon.1 “Apan kon si kinsa ang mosagpa sa inyong tuo nga aping, ibali ngadto kaniya ang pikas usab.”2 Ug dayon, dayag lang, siya mihatag sa pasidaan nga naghagit sa matag usa nato: “Apan karon sultihan ko kamo: higugmaa ang inyong mga kaaway ug pag-ampo kamo alang sa mga tawo nga nagpasipala kaninyo.”3
Sa wala pa ang Iyang kamatayon, ang Manluluwas misugo sa Iyang Napulog Duha ka Apostoles sa paghigugmaay sa usag usa sama nga Siya nahigugma kanila.4 Ug dayon Siya midugang, “Kon maghigugmaay kamo, mahibalo ang tanan nga kamo akong mga tinun-an.”5
Ang mensahe sa Manluluwas klaro: Ang Iyang tinuod nga mga disipulo molig-on, mobayaw, moawhag, moagni, ug modasig—bisan unsa pa ka lisod ang sitwasyon. Ang tinuod nga mga disipulo ni Jesukristo mga tigpasiugda og kalinaw.6
Karon mao ang Dominggo sa Lukay. Kita nag-andam sa pagsaulog sa labing importante nga hitabo nga sukad natala sa yuta, nga mao ang Pag-ula ug Pagkabanhaw ni Ginoong Jesukristo. Usa sa labing maayong mga paagi nga kita makatahod sa Manluluwas mao ang pagkahimong tigpasiugda og kalinaw.7
Ang Pag-ula sa Manluluwas mihimo niini nga posible alang nato sa pagbuntog sa tanang daotan—lakip sa panagbingkil. Ayaw og kasayop niini: ang panagbingkil daotan! Si Jesukristo mipahayag nga kadtong kinsa adunay “espiritu sa panagbingkil” dili gikan Kaniya, apan “gikan sa yawa, kinsa mao ang amahan sa panagbingkil, ug [ang yawa] nagkutaw sa mga kasingkasing sa mga tawo sa panagbangi uban ang kasuko, sa usag usa.”8 Kadtong kinsa nag-awhag og panagbingkil naghimo sa samang butang nga gihimo ni Satanas, nakaamgo man sila o wala. “Walay tawo nga makaalagad sa duha ka mga agalon.”9 Kita dili makasuporta ni Satanas sa atong pagpangataki pinaagi sa pulong ug dayon maghunahuna nga kita nagserbisyo gihapon sa Dios.
Akong minahal nga kaigsoonan, kon giunsa nato pagtagad ang usag usa importante kaayo! Kon giunsa nato sa paghisgot ug mahitungod sa uban sa panimalay, sa simbahan, sa trabaho, ug sa online importante kaayo. Karon, ako mohangyo kanato sa pagtagad sa uban sa mas labaw, mas balaan nga paagi. Palihog, paminaw og maayo. “Kon adunay mga butang nga mahiyason, matahom, o maayo og dungog o dalaygon,”10 nga atong masulti mahitungod sa laing tawo—sa dayag o sa tago—kana mao unta ang atong sumbanan sa komunikasyon.
Kon ang usa ka magtiayon sa inyong ward nagdiborsyo o ang usa ka batan-ong misyonaryo miuli og sayo, o usa ka tin-edyer nagduhaduha sa iyang pagpamatuod, sila wala magkinahanglan sa inyong paghukom. Sila kinahanglan nga makasinati sa tiunay nga gugma ni Jesukristo nga makita sa inyong mga pulong ug mga aksyon.
Kon ang usa ka higala sa social media adunay kusganong politikal o sosyal nga panglantaw nga nakasupak sa tanan nga inyong gituohan, ang pagkasuko, ang inyong masakit nga tubag dili makatabang. Ang pagtukod og mga taytayan sa pagsabot magkinahanglan og daghan gikan ninyo, apan kana mao gayod ang gikinahanglan sa inyong higala.
Ang panagbingkil mopapahawa sa Espiritu—matag higayon. Ang panagbingkil nagsuporta sa sayop nga ideya nga ang pagpakigkomprontase mao ang paagi sa pasulbad sa mga kasungian; apan dili gayod. Ang panagbingkil usa ka pagpili. Ang pagpasiugda og kalinaw usa ka pagpili. Kamo adunay inyong kabubut-on sa pagpili og panagbingkil o panag-uli. Ako moawhag ninyo sa pagpili nga mahimong tigpasiugda og kalinaw, karon ug sa kanunay.11
Mga kaigsoonan, kita sa tinuod makausab sa kalibotan—usa ka tawo ug usa ka inter-aksiyon matag higayon. Sa unsang paagi? Pinaagi sa pagpakita unsaon sa pagdumala sa mga kalainan sa opinyon inubanan sa pagtahod sa usag usa ug ligdong nga panag-istorya.
Ang mga kalainan sa opinyon kabahin sa kinabuhi. Ako nagtrabaho matag adlaw uban sa mahalaron nga mga sulugoon sa Ginoo kinsa dili kanunay makakita sa isyu sa samang paagi. Sila nasayod nga ako gusto nga makadungog sa ilang mga ideya ug tinuod nga mga pagbati mahitungod sa tanan nga among hisgotan—ilabi na sa sensitibo nga mga isyu.
Ang akong duha ka halandong magtatambag, sila si Presidente Dallin H. Oaks ug Presidente Henry B. Eyring, mga ehemplo sa paagi nga sila mopadayag sa ilang mga pagbati—ilabi na kon kini managlahi. Sila mohimo sa ingon inubanan sa putli nga gugma alang sa usag usa. Walay usa nga nagsugyot nga siya mas labing nasayod ug mao nga kinahanglang depensahan gyod niya ang iyang posisyon. Ni ang mga ebidensya gikinahanglan aron sa pagkompetensya sa lain. Tungod kay ang matag usa napuno sa gugma nga putli, “ang tinunay nga gugma ni Kristo,”12 ang among mga panaghisgotan magiyahan sa Espiritu sa Ginoo. Ako adunay dakong gugma ug pagtahod niining duha ka bantogan nga mga lalaki!
Ang gugma nga putli mao ang tambal sa panagbingkil. Ang gugma nga putli mao ang espirituhanon nga gasa nga makatabang nato sa pagsalikway sa kinaiyanhon nga tawo, kinsa hakog, mapanalipdon sa kaugalingon, mapagarbuhon, ug masinahon. Ang gugma nga putli mao ang nag-unang kinaiya sa tinuod nga sumusunod ni Jesukristo.13 Ang gugma nga putli naghulagway sa usa ka tigpasiugda og kalinaw.
Kon kita magpaubos sa atong mga kaugalingon sa atubangan sa Dios ug mag-ampo inubanan sa tibuok kusog sa kasingkasing, ang Dios mohatag kanato sa gugma nga putli.14
Kadtong gipanalanginan niining langitnong gasa mainantoson ug mabination. Sila dili masinahon sa uban ug dili tigpanghambog. Sila dili daling masuko ug dili maghunahuna og daotan sa uban.15
Mga kaigsoonan, ang putli nga gugma ni Kristo mao ang tubag sa panagbingkil nga nakahasol kanato karon. Ang gugma nga putli mo-impluwensya nato “sa pagtambayayong sa usag usa nga mga alantuson,”16 kay sa maghatag og kalisod sa usag usa. Ang putli nga gugma ni Kristo motugot nato nga “mobarog ingon nga mga saksi sa Dios sa tanan nga mga panahon ug diha sa tanan nga mga butang,”17—ilabi na sa lisod nga mga sitwasyon. Ang gugma nga putli motugot nato sa pagpakita sa unsa nga paagi nga ang mga lalaki ug mga babaye mosulti ug molihok alang ni Kristo—ilabi na kon giataki og grabe nga pagpanaway.
Karon, ako wala maghisgot mahitungod sa “kalinaw nga kab-oton bahalag unsay mahitabo.”18 Ako naghisgot mahitungod sa pagtagad sa uban sa mga paagi nga nagsubay sa pagtuman sa pakigsaad nga inyong gihimo kon kamo moambit sa sakramento. Kamo nakigsaad nga sa kanunay mahinumdom sa Manluluwas. Sa mga sitwasyon nga emosyonal kaayo ug napuno sa panagbingkil, ako modapit kaninyo sa paghinumdom ni Jesukristo. Pag-ampo aron makabaton og kaisog ug kaalam sa pagsulti o pagbuhat unsa ang Iyang gusto. Kon kita mosunod sa Prinsipe sa Kalinaw, kita mahimong Iyang mga tigpasiugda og kalinaw.
Niining puntoha tingali kamo naghunahuna nga kini nga mensahe makatabang gayod sa usa ka tawo nga inyong nailhan. Tingali kamo naglaom nga kini makatabang kaniya nga mas magbinuotan kanimo. Manghinaot ko nga mahitabo kana! Apan ako usab manghinaot nga inyong tan-awon og maayo ang inyong mga pagbati kon kini aduna bay ginagmay nga garbo o kasina nga makapugong ninyo sa pagkahimong tigpasiugda og kalinaw.19
Kon kamo seryoso mahitungod sa pagtabang sa pagpundok sa Israel ug mahitungod sa paglig-on sa mga relasyon nga molungtad hangtod sa kahangtoran, karon mao ang panahon sa paghunong sa kaligutgot. Karon mao ang panahon sa paghunong sa pag-insister nga ang imong paagi maoy matuman o walay mahitabo. Karon mao ang panahon sa paghunong sa paghimo og mga butang nga makapahimo sa uban nga magkinto tungod sa kahadlok nga ikaw masuko. Karon mao ang panahon sa paglubong sa inyong mga hinagiban sa gubat.20 Kon ang inyong mga pulong napuno sa mga panginsulto ug mga akusasyon, karon mao ang panahon sa paghunong niini.21 Kamo mobarog isip lig-on nga lalaki ug babaye sa espirituhanong paagi diha ni Kristo.
Ang templo makatabang nato sa atong paningkamot. Didto kita tugahan sa gahom sa Dios, maghatag nato sa abilidad sa pagbuntog ni Satanas, ang lider sa tanang panagbingkil.22 Isalikway siya gikan sa inyong mga relasyon! Hinumdomi nga gibadlong usab nato ang kaaway matag higayon nga atong sulbaron ang walay pagsinabtanay o magdumili nga masilo. Hinuon, makapakita kita og malumo nga kaluoy nga mao ang kinaiya sa tinuod nga mga disipulo ni Jesukristo. Ang mga tigpasiugda og kalinaw mopakgang sa kaaway.
Atong himoon isip usa ka katawhan nga mahimong tinuod nga kahayag sa bungtod—usa ka kahayag nga “dili matago.”23 Atong ipakita nga adunay malinawon nga paagi sa pagsulbad sa komplikado nga mga isyu ug usa ka mahayag nga paagi nga matarong ang panagbangi. Samtang inyong ipakita kanang gugma nga putli nga ipakita sa tinuod nga mga sumusunod ni Jesukristo, ang Ginoo mopalambo sa inyong mga paningkamot lapas sa inyong labing taas nga mahunahuna.
Ang pukot sa ebanghelyo mao ang labing dako nga pukot sa kalibotan. Ang Dios midapit sa tanan nga moduol ngadto Kaniya, “itom ug puti, ulipon ug gawasnon, lalaki ug babaye.”24 Adunay luna alang sa tanan. Hinoon, walay luna alang sa pangdaot, panghimaraot, o panagbingkil sa bisan unsa nga matang.
Akong mga kaigsoonan, ang labing maayo moabot pa alang niadtong kinsa mogahin sa ilang mga kinabuhi sa paglig-on sa uban. Karon ako modapit kaninyo sa pagsusi sa inyong pagkadisipulo sa konteksto sa paagi sa inyong pagtagad sa uban. Ako mopanalangin kaninyo sa paghimo og bisan unsa nga mga kausaban nga tingali gikinahanglan aron nga inyong kinaiya maligdong, matinahoron, ug representante sa tinuod nga sumusunod ni Jesukristo.
Ako mopanalangin nga inyong pulihan ang kapintas sa kaluoy, kapungot sa pagsabot, ug panagbingkil sa kalinaw.
Ang Dios buhi! Si Jesus mao ang Kristo. Siya nagbarog nga ulohan niini nga Simbahan. Kita Iyang mga sulugoon. Siya motabang kanato nga mahimong Iyang tigpasiugda og kalinaw. Ako sa ingon mopamatuod pinaagi sa sagradong ngalan ni Jesukristo, amen.