Jesucristo mbo’epykuéra
Oñeme’ẽ ñandéve umi escritura jadirihi hag̃ua ñande rekove. Che mensáhe ko árape ogueru umi ñande Salvador ñe’ẽ jeporavopyre— upe Ha’e he’iva’ekue.
Ñande jajerovia Cristo-re. Jesucristo Tupao Santokuéra Ára Pahapegua miembro ramo, ñamomba’eguasu Chupe ha jasegi Imbo’epykuéra umi escritura-pe.
Je’a oiko mboyve, ñande Ru Yvagagua oñe’ẽ directamente Adán ha Eva ndive. Upe guive, Túva oikuaauka Ita’ýra Unihénito, Jesucristo-pe, ñande Salvador ha Redentor ramo, ha ome’ẽ ñandéve pe tembiapoukapy “ñahendu hag̃ua Chupe.”1 Ko dirección guive ñamohu’ã umi escritura ñe’ẽ jehaipyre he’iva’ekue “Tupã” térã “Ñandejára” haimete katuete ha’eha Jehová ñe’ẽ, pe Ñandejára oikovejeýva, Jesucristo.2
Oñeme’ẽ ñandéve umi escritura jadirihi hag̃ua ñande rekove. Proféta Nefi ñanembo’e haguéicha, “penderory Cristo ñeʼẽme; ha péina ápe, Cristo ñeʼẽ heʼíta peẽme opa mbaʼe pejapovaʼerã.”3 Umi hetaiteve escritura omombe’úva Jesús ministerio mortal rehegua, ha’e umi descripción umi mba’e Ha’e ojapova’ekue. Che mensáhe ko árape ogueru umi ñande Salvador ñe’ẽ jeporavopyre— upe Ha’e he’iva’ekue. Ko’ãva ha’e ñe’ẽ ojeregistráva Nuevo Testamento-pe (oikehápe avei José Smith ñembojoapy inspirada) ha Mormón Kuatiañe’ẽme. Heta ko’ã jeporavopyre oĩ pe secuencia ñande Salvador oñe’ẽ haguépe.
“Añetehápe, añetehápe, ha’e ndéve, pe nonaséiva y ha Espíritugui, ndaikatúi oike Tupã réinope.”4
“Ojehovasapyre … [umi] iñembyahýi ha ijiy’uhéiva tekojojágui, henyhẽtagui Espíritu Santo-gui.”5
“Ojehovasapyre umi py’aguapy apoha, oñembohératagui chupekuéra Tupã ra’y.”6
“Pehendu yma oje´e hague: “Ani reporomoakãratĩ:
“Ha katu Che ha’e peẽme, Oimeraẽva omañáva kuñáre oipotaitereiha, oporomoakãratĩma hendive ikorasõme.”7
“Pehendu oje’e hague: Pehayhúta pende rapichápe ha pemboykéta penderahu’ỹvape.
“Ha katu Che ha’e peẽme: Pehayhu umi penderayhu’ỹvape, pehovasa umi penemaldesívape, pejapo iporãva umi penemboykévape, ha peñembo’e umi pendetratavai ha pendepersegívape;
“Peẽ ha’e hag̃ua pende Ru oĩva yvágape ta’yrakuéra: ha’e omopu’ãva ikuarahy umi ivaíva ha iporãva ári, ha ombou ama umi hekojojáva ha hekojoja’ỹva ári.”8
“Peperdona ramo yvyporakuérape hembiapo vaikue, pende Ru yvága pegua peneperdonáta avei:
“Ha katu napeperdonái ramo yvypórape hembiapo vaikue, pende Ru noperdonamo’ãi avei pene rembiapo vaikue.”9
“Peẽ ha’érire ko múndo pegua, ko múndo ohayhuva’erãmo’ã imba’éva, ha katu peẽ ndaha’éigui ko múndo pegua, ha katu che poiporavo ko múndogui, upévare ko mundo ndaija’éi penderehe.”10
“Upévare, ani peheka umi mba’e ko múndo pegua ha katu peheka raẽve pemopu’ã Tupã réino, ha pemopyenda hekojoja, ha opa ko’ã mba’e oñembojoapýta peẽme.”11
“Upévare opa mba’e peipotáva yvypóra ojapo penderehe, pejapo avei hesekuéra, péva ha’égui pe léi ha profetakuéra.”12
“Peñeñangarekóke umi proféta añetegua’ỹgui, oúva penerendápe ovecha ao reheve, ha katu hyepýpe ha’ekuéra jaguaru oporojukáva.
“Peikuaáta chupekuéra hiʼakuérare. Oñemono’õ piko parral ñuatĩgui, térã ígo ñuatĩ’igui?
“Upéicha avei opa yvyramáta porã hi’a porã; yvyra oñembyaíva katu hi’a vai.”13
“Ndaha’éi opavave he’íva chéve, Ñandejára, Ñandejára, oikéta yvága réinope; ha katu pe ojapóva che Ru yvaga pegua rembipota”14
“Peju cherendápe, opavave peẽ pemba’apo ha pegueraháva mba’e pohýi, ha che porombopytu’úta.
“Pegueraha pende ári che júgo, ha peikũmby chehegui; Che niko che korasõ mánso ha imirĩva: ha pejuhúta pytu’u pene ánga peg̃uarã.
“Che júgo ndahasýi, ha che kárga ivevýi.”15
“Oĩrõ ouséva che rapykuéri, toñenega ijupe, ha tojagarra ikurusu ha tachesegui.
“Ha ko’ág̃a peteĩ kuimba´e ojagarra ikurusu, ha’e hína oñenega ijejupe opa py’aporã’ỹ, ha opa mba’e vai ko múndo peguágui, ha oñongatu che rembiapoukapykuéra.”16
“Upévare, peheja ko múndo, ha pesalva pene ánga; mba’ere piko? mba’épe piko ideprovéchota peteĩ kuimba’e, ohupytýramo ko múndo tuichakue, ha operdéramo hi’ánga? Térã mba’épa ome’ẽta peteĩ kuimba’e hi’ánga rehe?”17
“Oĩrõ ojaposéva hembipota, oikuaáta pe doctrina, ha’épa Tupã mba´e, térã che añe’ẽpa chejehegui.”18
“Ha ha’e peẽme: Pejerure, ha oñeme’ẽta peẽme; peheka, ha pejuhúta; pehenói, ha ojepe’áta peẽme.
“Opavave ojerurévape oñeme´ẽ; ha pe ohekáva ojuhu; ha pe ohenóivape ojepe’áta.”19
“Aguereko ambue ovecha ndahaʼéiva ko rredilpegua; umívape che agueruvaʼerã avei, ha ohendúta hikuái che ñeʼẽ; ha oĩta peteĩ ovechaʼaty ha peteĩ ovecharerekua.”20
“Jesús he’i chupe: “Che haʼe pe jeikovejey ha pe tekove: pe ojeroviáva cherehe, omano ramo jepe, oikovéta:
“Ha oimeraẽ oikovéva ha ojeroviáva cherehe, nomanomo’ãi araka’eve.”21
“[Pe tembiapoukapy tuichavéva léipe ha’e kóva:] Pehayhuva’erã Tupã pe Ñandejárape opa pene korasõ, ha opa pene ánga, ha opa pene apytu’ũ reheve.
“Kóva ha´e tembiapoukapy peteĩha ha tuichavéva.
“Ha pe mokõiha katu ojogua chupe: Ehayhu nde rapichápe ndejupéicha.
“Ko’ã mokõi tembiapoukapy ári oñemoĩ opa pe léi ha profetakuéra.”22
“Pe oguerekóva che rembiapoukapy ha oñongatu, ha’e pe cherayhúva, ha pe cherayhúva che Ru ohayhúta, ha che ahayhúta chupe ha ajehechaukáta chupe.”23
“Aheja peẽme py’aguapy, che py’aguapy ame’ẽ peẽme: name’ẽi ko múndo ome’ẽháicha peẽme. Upévare ani ojepy’apy pene korasõ ni okyhyje.”24
“Kóva ha’e che rembiapoukapy, Pejohayhu peteĩva ambue ndive, che pohayhu haguéicha.”25
“Peina ápe, che po ha che py, ha’eha che voi: epoko hese ha ehecha; peteĩ espíritu ndorekóigui so’o ha kangue, pehechaháicha che arekoha.”26
“Upévare, tapeho ha pejapo discípulo opa tetãre, pemongaraívo chupekuéra Túva, ha Ta’ýra, ha Espíritu Santo rérape:
“Pembo’évo chupekuéra taiñe´ẽrendu opa mba’e che ha’eva’ekuére peẽme, ha péina ape, che aime penendive tapiaite, ko múndo paha peve.”27
Iministerio rire pe Yvy Marangatúpe, Jesucristo ojehechauka umi hekojojáva oĩva continente Americano-pe. Ko’ãva ha’e umi ñe’ẽ Ha’e he’iva’ekue upépe:
“Péina ápe, che haʼe Jesucristo pe Tupã Raʼy. Che ajapovaʼekue yvága ha yvy, ha opa mbaʼe ipype oĩva. Che aimevaʼekue Túva ndive iñepyrũmby guive. Che haʼe pe Túvape, ha pe Túva chepype, ha che rupi pe Túva omboverapýkuri héra.”28
“Che haʼe yvóra resape ha rekove. Che haʼe pe Alfa ha Oméga, iñepyrũmby ha ipaha.
“Ha peẽ napeikuaveʼẽmoʼãvéima chéve tuguy ñeñohẽ; héẽ, pende mymbajuka ha pende mymbajehapy opátama, namoporãmoʼãigui ni peteĩ pende mymbajuka ni pene mymbajehapykuéra.
“Ha peikuaveʼẽta chéve ñeikuaveʼẽramo peteĩ korasõ mirĩ ha peteĩ espíritu ñembyasy. Ha oúva cherendápe peteĩ korasõ mirĩ ha espíritu ñembyasy reheve, che amongaraíta chupe tata ha Espíritu Santo-pe. …
“Péina ápe, che ajúkuri yvórape agueru hag̃ua rredensiõ yvórape, asalva hag̃ua yvórape angaipágui.”29
“Ha che haʼe jey peẽme, peñearrepentivaʼerãha, ha peñemongarai che rérape, ha peiko mitã michĩvaicha, térã mbaʼevéicharõ ndapehupytymoʼãi Tupã réino.”30
“Upévare, che aipota penderekoporãmbaite, jepe Chéicha, térã pende Ru yvágape oĩva hekoporãmbaiteháicha.”31
“Añetehápe, añetehápe, che haʼe peẽme, peñangarekovaʼerã ha peñemboʼe tapiaite, ani aña penepyʼaraʼã, ha pejeguaraha hese ñeñapytĩmbýpe.”32
“Upévare akóinte peñemboʼevaʼerã Túvape che rérape.”33
“Upévare, opa mbaʼe pejapóva, pejapóta che rérape; upévare pemeʼẽta che réra tupaópe.”34
“Péina ápe che ameʼẽkuri peẽme che evanhélio, ha kóva haʼe evanhélio ameʼẽvaʼekue peẽme—ajuhague yvórape akumpli hag̃ua che Ru rembipota, che Ru chemboúgui.
“Ha che Ru chemboúkuri añemopuʼã hag̃ua kurusúre; ha añemopuʼã rire kurusúre, ikatu hag̃ua agueru cherendápe opa yvypórape … ojehusga hag̃ua hembiapokuére, tahaʼe iporã térã ivaíva.”35
“ kóva haʼe tembiapoukapy: Peñearrepentíke, opa peẽ yvy paha, ha peju cherendápe ha peñemongarai che rérape, peñemomarangatu hag̃ua Espíritu Santo ñemog̃uahẽ rupive, peñemboʼy hag̃ua maraʼỹme cherenondépe ára pahápe.”36
Jajerovia Cristo-re. Amohu’ã pe Ha’e he’iva’ekuére mba’éichapa jaikuaa ha jasegiva’erã Imbo’epykuéra:
“Pe Pytyvõhára, pe Espíritu Santo, ñande Ru omboútava pene rendápe che rérape, Ha’e penembo’éta opaite mba’e, ha penemomandu’áta opa umi mba’e Che ha’emava’ekue peẽme.”37
Amoañete ko’ã mbo’epy añetegua Jesucristo rérape, amén.